1 Ngiba ngalilu nofu na vandu pitu ulunda mali, ngiba usangi kuliku mbiya awu chumang'andu.

2 Valundamali na Vagaju vava chindu chimu hela, Bambu Chapanga ndi yavalumbili vonda.

3 Muna luhunja akufiwona fyonda fya hatali na akwififa, lakini mpufi akwifumbusha kuulongolu na kugobuleka.

4 Pawumtundamila Bambu Chapanga dawupati fupu, ulundamali, ndundamilu na unofu.

5 Vawafu deha yawu yimema misomi na mitambu, yula yananisha unofu waki dayilyepi.

6 Muwuli mwana ndambu ya kwikala, na mweni dayivasughi ha deha ayi mbaka pagogola.

7 Mlundamali akumtavala mgaju, yakopa akuva mvanda wa yula yamkopesha.

8 Yakweta wafu dabeni gobuleku, na uweshi waki wa kugola wafu dawupeli.

9 Mundu msangi danemiliwi, nongwa filivi fyaki akuvagayila vagaju.

10 Mumdagidagi muna bedalu ili pasiki, magombi na jowolu dafipeli.

11 Muna ndima nofu na yaywanga filongu fya nyanyi, daghavi ghanja wa mutwa.

12 Bambu Chapanga akuvadima yivaveli na luhunja, lakini akufitilinganya filongu fya vandu vafyangu.

13 Mgata akuwombagha akuwesha ha kufuma panji, pambeli akuwomba kuna majabi akuwesha kung'ulagha kudeha.

14 Filongu fya mdala muwoni fiva kucha lyowu litali, yakalaliwili na Bambu Chapanga dadubukili amu.

15 Mwana mundima yaki akufitama findu fya upufi, lakini ndomondu yikuwusha upufi awu. 16 Yamuwonela mgaju ili kwiyongishela ulundamali, na yula yamupa fupu mlundamali vonda vakuva vagaju.

17 Tegheli matu pikani filongu fya vana luhunja, gubutuli ndima yaku kombikeshi umanyi wangu. 18 Dawuvi na seku leki kufivika mundima yaku, na yuwi kwiwula myanja yitangalili 19 yidayila kumuwula nalelu hata yuwi, ili shuvililu yaku yivi kwa Bambu Chapanga. 20 Ndikuyandikila ng'odu detelu milongu mitatu, detelu sha kukayika na umanyi, 21 ili kukuwula fivelili fya nakaka, na mundu pakudasha yuwi wumuyanguli kwa nakaka?

22 Kotoo kumsulumu mgaju kwa nongwa ya ugaju waki, na kotoo kumukaja haki yaki muchitemela, 23 nongwa Bambu Chapanga davatangi, vala yivavasulumili davapokiwi unofu wawu.

24 Kotoo kugola lighanja na mundu muna maya, na kotoo kwilongosha na mundu yavelili na chifuki, 25 kotoo kwisa kwiwula ngalilu yaki, dawiwomeshi umweni mumtambu.

26 Kotoo kuva gati ya vandu yivahadika, awu kumuhadikila mundu findu fyaku, 27 leki kuvahela chindu chochonda cha kuhomba, hata ulili wuwonjela dawutoliwi.

28 Kotoo kusewusha chilangushilu cha mbaka ya dahili, chila chivavikili vagogolu vaku.

29 Wuli, kumuwona mundu mumanyi muchichuku chaki? Ayu davakimbanikili vatwa, davakimbanikili ha vandu yivangajila kujakwa.