1 Chapanga akuchinyekwa chigelu cha findu fingajila unakaka, lakini chigelu cha nakaka ndi seku kwa mweni.

2 Yivavelili na lukilu vakuyegha chindipa, lakini yivavelili vashishamoyu vana luhunja.

3 Ugoleki wa vandu vasangi ukuvalongosha, na uvifyi wa vafyangu ukuvadanganyisha.

4 Ulundamali chindu ha lijuva lya kusova, lakini ugoleki ukukulowola munjifwa.

5 Ugoleki wa vandu vasangi ukuholola deha yawu, lakini vavifyi kwanongwa ya wafu wawu vakuwa.

6 Ugoleki wa vasangi ukuvalongosha kudeha nofu, lakini vandu vawafu vakuwomela mudobukelu shawu sha wafu.

7 Mundu mwafu pasova na shuvililu yaki yikuwuka, fyosi fyayidumbileghi mundu kwa liwovi lyaki fikuva chindu ha.

8 Mundu goleki akulowuliwa mugobuleku, na mundu mvifyi akudanganyika.

9 Yangajila kumtundamila Chapanga akuvayaghamisha vandu kwa ufyangu wadeta, lakini goleki akulowuliwa kwa umanyi waki.

10 Vandu goleki pavawesha, mbwani yikulumbilila, na vavifyi pavasova vandu vakukuva njowu kwa seku.

11 Mbwani yikunemiliwa payiva na vandu goleki, lakini kwa filongu fya vavifyi yikuyanangika.

12 Yamubedala mjofi waki kavahela luhala, mundu yavelili na luhunja akunyamala jii.

13 Mundu muhesi akujumiliwa ha, lakini mundu akumwidumbila yaveli na chifisu.

14 Mlima wungajila mutwa wukuwa. Mlima wuvelili na vakayika vatangalili wukusika.

15 Yamuhadikila muhenja dagobuleki, lakini yula yatila milandu ya kumuhadikila muhenja daghavi nyanyi.

16 Mdala msangi akutundamiliwa jola, mlulumi muna ndewu daghavi mlundamali.

Lakini mundu mgata akuva ha mlundamali.

17 Mundu yalibushila akwinoma mweni, lakini mundu makuluhu akwigobola mweni.

18 Ijala ya mundu mwafu yiva ya ufyangu, lakini yagola usangi dapati fupu ya nakaka.

19 Mundu yayilata kuva goleki dayikali, lakini yashawula kugola uvifyi dasovi.

20 Bambu Chapanga akuvanyekwa yivavelili na natilu sha wafu, lakini yivagola milandu ya usangi ndi seku kwa mweni.

21 Nakaka vavifyi davayilyepi ha kuhighiwa, lakini vagoleki davalowuliwi.

22 Mdala yavayilili yangajila luhunja, kava kucha pete ya chumang'andu mumbula ya ngubi.

23 Shuvililu ya vagoleki milandu ya nyanyi, lakini dobukelu sha vavifyi sikupelela mugobuleku.

24 Yatawula kwa usangi dayendileli kuva mlundamali, lakini mundu mwimi akuyendilela kuva mgaju.

25 Mundu yatawula kwa usangi dagayiliwi, yula yamtanga monga na mweni datangiwi.

26 Vandu vakumlapila yafisa filivi, lakini vakumnemela yula yachulusa.

27 Yagola usangi akugayiliwa kwanongwa ya usangi wagolili, lakini yula yagola wafu akugayiliwa ngimu wafu waki wagolili.

28 Mundu yayidumbila mali shaki daghawi, lakini mundu goleki danemulili kucha lihamba lidodi.

29 Yayegha gobuleku kwa vandu vaki dayambulili chindu ha.

Mpufi daghavi mvanda wa muna luhunja.

30 Fyagola mundu goleki fikuyegha unofu, na mundu yavelili na luhunja akuvakwegha ndima sha vandu.

31 Payiva goleki akupata fupu mumlima, nakaka mvifyi na yavelili na sambi dalatuliwi.