1 Vandu vawafu vakutuva hata leki kwahela mundu yamdagadaga, lakini vandu goleki vava valulumi kucha majabi.

2 Mlima pawuva na uvifyi kukuva na filongosi vatangalili, lakini kwa yula yavelili na umanyi na luhala mlima wukusika.

3 Mundu mgaju akumuwonela yavelili mgaju nendu, yiva kucha ndonya maganga wuyidanganyisha fivelekwa fyosi.

4 Vandu yivavaleka malawu vakuvajuma vandu vawafu, lakini yivakamula malawu vakuvalimba.

5 Vandu vawafu vawumanya ha haki, lakini yamtundamila Bambu Chapanga kawumanya munu.

6 Ngiba mgaju yayikala kwa ugoleki, pitu mlundamali yayikala ngalilu ya wafu.

7 Mwana yakamula malawu kana luhunja, lakini yavelili na ghanja mbafu akumgola tatimundu ghavi na chindipa.

8 Yayongesha ulundamali waki kwa kusumula pakomi, akumkungashila mundu wingi yavawonela lusungu na vagaju.

9 Leki mundu yoyonda yalema kupikana malawu, hata dadavu yaki yikumgola Chapanga akalali.

10 Yamkuvilisha mundu goleki agoli wafu, dawomeli mumtambu waki mweni,

ila yivangajila mbatiwa davahali fya usangi.

11 Mlundamali akwiwona mweni kana luhunja, lakini mgaju yavelili na luhala akummanya ndambu waveli.

12 Vandu goleki pavatavala ngalilu yikuva nyanyi, lakini vawafu pavatavala vandu vakwifisa.

13 Yafifa vifyu shaki dapati chindu ha, lakini yapomela na kusileka sambi dapomiliwi.

14 Ngiba yamtundamila Bambu Chapanga jola, lakini yavelili na lukilu dawili mugobuleku.

15 Chilongosi mwafu yatavala vagaju, kava kucha majabi yabuluma au limbuli yapundangila,

16 Mtavala mpufi na yangajila luhala ndi makuluhu akuvawonela vandu, lakini yula yafinyekwa findu fya kusulumu dasekileli majuva vatangalili va kwikala.

17 Mundu yavelili na mbatiwa ya kuwulagha, akuva mundu wa kuyeleja kuuhenja mbaka kusembi, mundu yoyonda akotoo kumtanga.

18 Mundu yangajila mbatiwa dalowuliwi, lakini yavelili na ngalilu ya wafu tepu dadanganyishiwi.

19 Mundu yalima chitava chaki dapati filivi fitangalili, lakini yakovekela findu fingajila kujakwa daghavi mgaju munu.

20 Mundu goleki danemiliwi munu, lakini yula yadobukela kupata ulundamali wa kalopukalopu dalatuliwi.

21 Nyanyi ha kugola lushawu, mundu akuwesha kugola findu fya wafu kwanongwa ya filivi fidokwa hela.

22 Mundu mwimi akubafukila ulundamali, lakini kamanya ha ugaju ukumwisila.

23 Yamkayika monga akupata fya wusangi munu, pitu yula yayiwongola kwa filongu finovili.

24 Yula yamuhijila tati mundu awu mamundu, pambeli akudeta kucha kavifya ng'odu, ayu kayileka ha na vavifyi vamonga.

25 Mundu munadobukelu akukuvilisha mbedula, lakini yamwidumbila Bambu Chapanga dapati.

26 Yayidumbila luhala lwaki mweni mpufi, lakini yayikala kwa luhunja daghavi nyanyi.

27 Yula yamtanga mgaju kwa kumgayila chindu dayangiliwi ha, lakini yula yalema kuvatanga vagaju dalapiliwi munu.

28 Vandu vawafu pavatavala vandu vakwifisa, lakini padanganyika mwafu vandu goleki vakuyongisheka.