1 Luhunja kajenga nyumba yaki, nyumba yivelili na siki saba. 2 Katanda nyama na kahasha difwayi, pambeli katanda mesa ya kulila filivi. 3 Kavalayisha kumbwani vandumindumi vaki vadadala, vavakemi vandu yivavelili kufikwelu vya mbwani. 4 "Yoyosi yaveli mpufi ayisi apa!" Na yoyosi yaveli mpufi akumuwombela, 5 "Mwisi mulyi filivi, na mlandi difwayi yindiyihashili finofu. 6 Muleki deha shenu sha upufi damwikali na kukovikela deha ya umanyi."

7 Mundu yoyonda yamukayika yavelili na mbedalu akusaka kujowuliwa, na mundu yoyonda yamulakalila mwafu akusafiwa. 8 Kotoo kumkayika yaveli na mbedalu nongwa dakunywekwi, mkayiki yavelili na luhunja mweni dakutami. 9 Muwuli yaveli na luhunja na mweni dayongeshi luhunja, na muwuli goleki na mweni dakwili umanyi.

10 Kumtundamila Bambu Chapanga ndi chikandilu cha luhunja, na kumumanya Chapanga Mng'alili ndi kupata umanyi. 11 Luhunja lukuyongesha myaka yitangalili mungalilu yaku. 12 Leki kuna luhunja, dawugayiliwi fya usangi kufuma kwa umweni, lakini pawubedala dawugobuleki umweni.

13 Mdala mpufi kana chowu, kamanya chindu ha na kavahela soni. 14 Akwikala pamulyangu wa nyumba yaki, akuvika chigoda chaki pala pakwelili mumbwani, 15 na akuvakema vandu yivapita kudeha, vala yivayenda kufichuku fyawu, 16 "Yoyosi yavelili mpufi ayisi apa!" Yavelili mpufi akumuwombela, 17 "Machi va kuhija vanova munu, libumunda livalya kwa chifisu linova munu." 18 Lakini mpufi kamanya ng'odu mula muvavelili vandu vasovili, vahenja va mdala ayu vayingilili amu vavapasi kumambi.