1 Mwana wangu leki kumuhadikila mjofi waku, payiva kuvika jangi kwa nongwa ya mundoyu. 2 Leki wikamula kwa filongu fyaku umweni, leki kwiwomesha kwa jangi yiwuvikili. 3 Topi goli naha mwanawangu ili wuvi pekesu, nongwa kukamuliwa kwa nongwa ya mweni, topi ugoli naha, umuyendeli mundu ayu kalopu mdediveki akuleki wuvi pekesu. 4 Kotoo kuwonja, na wala kotoo kusisila. 5 Uyilowoli mumtambu nga mbavala yawomilili mumtambu, awu kucha mbongu yamunyelipukili yavinga.

6 Yuwi mugata umulembeshi njapi, uyiholi ndambu wayikala wupati luhunja. 7 Njapi kavahela chilongisi mkomi wa lingandawu, mutwa awu mtavala, 8 lakini vakwikungashila filivi chipindi cha mkakamu, vakukungasha filivi chipindi cha mbena. 9 Yuwi mugata, dawuwonji mbaka ndili? Dawuyimuki ndili mung'onju shaku? 10 Akudeta, "Leki ng'onji padokwa hela! Leki sisili padokwa na mawoku vangu vapumuli padokwa." 11 Lakini chipindi achi chiwuwonja, ugaju dawukukamuli kucha kukamuliwa na mpoki awu mwifi.

12 Mundu yangajila kujakwa na mundu mwafu, akuyelejayeleja kunu padeta filongu fya ufyangu. 13 Akuvavifya vamonga kwa kuvakupisha lisu lyaki, na kuvakupisha kwa mawulu, na kuvasonya kwa fyala, 14 chipindi chosi mundima akwihola kugola milandu ya wafu, kila kwayenda akuva chambuja vandu valevi. 15 Kwanongwa ayi, gobuleku dayimwisili kalopu, na dadanganyiki nakamu, aweshi kandi ha kunana.

16 Kuna findu sita awu saba Chapanga akufinyekwa na aweshi kufivika munda, 17 Mesu yivalola kwa lukilu, findu fya ufyangu, findu yifiwulagha findu fingajila mbatiwa, 18 findu yifiilata kugola wafu, findu yifituvilila kugola milandu ya wafu, 19 findu yifitovilela fya ufyangu, na findu yifijongishela valongu mundu.

20 Mwana wangu, kamuli malawu va tati waku, na kotoo kwivasua fyakuwulili mawaku, 21 majuva vosi uviki filongu fyawu mundima yaku, na uwopi kucha ukufu mungulu yaku kotoo kwivasuwa. 22 Ng'ulilu asi dafikulongoshi mudeha yaku, dasikudimi chipindi pawuwonja, dasikuwombeli cha kugola pawuyimuka. 23 Nongwa Malawu vava kucha luliku pawuyendayenda. Ngayiku asi sivi kucha ngesha mungalilu yaku. 24 Dafikuviki kutali na mdala mwafu, dafikulowoli uyilyepi na filongu finowili fya mdala muwoni. 25 Kotoo kumudobukela mdadala ayu kwa uvayisi waki, na ngopi sha mesu vaki sikotoo kukugola uwomeli kwa mweni. 26 Kwanongwa ya mdala muwoni Mundu akuwesha kuva mgaju mbaka akuluva libumunda, lakini kuwonja na mdala wa mundu damgoli mundu ghavi mgaju.

27 Wuli, mundu akuwesha kuvika motu pachifuva, na yingwa shaki sikotoo kulungula? 28 Wuli, ukuwesha kuvata makala va motu, na lwayu lwaki lukotoo kulungula? 29 Ndi yivelili kwa mlumi yawonja na mdala wa mundu, yoyosi yamgufya mdala ayu dagobuliwi nakamu. 30 Vandu vakumbedala ha mwifi, yahija kwanongwa ya njala, 31 lakini pavamukamula dahombi myanja saba, kandi datawuli fyosi fyavelili nafyu. 32 Lakini mlumi yawonja na mdala wa mundu kavahela luhala, ayu akwigobola mweni. 33 Dapati mivanga na kubedaliwa, soni shaki dasimpeli ha. 34 Nongwa mlumi waki yavelili na weyi akuva mkali munu, na padayila kuwuyisha lugota kavahela lusungu. 35 Na dajumili ha kuhombiwa chindu chochonda, awu dajakwi ha na fupu shaku sitangalili.