1 Yayibava na vayaki ayu akusaka fyaki hela, akulema kila chindu hata chila chinofu.

2 Mpufi akunowiliwa ha na umanyi, lakini akusekilela kudeta hoshu shaki mweni.

3 Mundu mwafu akwisa na bedalu, akwisa pamu na soni na lawama.

4 Filongu fya muna luhunja fiva kucha litepu litali lya machi, luhunja lwa mundu luva kucha lupengu lusesa machi.

5 Yiva nyanyi ha kumyongishela mundu wa wafu, na kuleka kumyongishela mundu mnakaka.

6 Filongu fya mpufi fikuyegha ndewu, na kila chadeta chikuyegha kulatuliwa.

7 Mlomu wa mpufi ukumdanganyisha mweni, mlomu waki ndi mtambu wa kumuwomesha mweni.

8 Filongu fya mundu yajongishela fiva nga filivi finovili, fikuseleka holuholu mbaka munda.

9 Mundu mgata muchichuku chaki ndi mlongu wa mundu mvifyi.

10 Litawa lya Bambu Chapanga ndi luviwu ludindalili, mundu goleki akutuvilila aku na kuva mnofu. 11 Mlundamali akwihola ulundamali ndi luviwu lwaki, akwihola kucha alu luviwu lutali ndi lukumdima.

12 Kwijuma mundima kukuyegha danganyishilu, lakini yatundama akutundamiwa.

13 Kuyangula ngajila kupikana ndi upufi na akwiyeghela soni mweni.

14 Mfuki wa mundu ukuwesha kwiwunishila matami, lakini ndima payilepisiwa dawuwiwunishili wuliwuli?

15 Mundu muna luhala akwipatila umanyi, wuwula wula lijeji lya muna luhunja likusaka umanyi.

16 Fupu yikumfuwulila mundu milyangu, na yikuwesha kumyegha pawulongolu ya mkomi.

17 Mundu wa kwaa kuywanga muhighilu akuwoneka munakaka, dayimanyiki kana mbatiwa mbaka mundu monga amdashi.

18 Kugola doo yikuwolosha ndewu, yikulamula gati ya vakomi vavili yivalimbana.

19 Mlongu yakalalili kadindala pitu mbwani yivelili na viwu, lakini yalimbana na mweni kava kucha milyangu wa viwu wuvelili na mikolukolu.

20 Kunda kwa mundu kukumemi filongu fyaki fya nyanyi, dayikuti fila fyadeta kufuma mumlomu waki. 21 Lulimi lukuwesha kuyegha njifwa na unofu, vala yivadayila davahombiwi chivadetili.

22 Yapata mdala kapata chindu chinofu, na kapata fya usangi kufuma kwa Bambu Chapanga.

23 Mundu mgaju akuluva kwa kutundama, lakini mlundamali akumuyangula kwa kulakala.

24 Vaghanja yivatangalili vakuwesha kumuwisha mundu, lakini kuna vaghanja vanakaka pitu mlongu.