1 Ndima ya mutwa yiva mukuwoku ya Bambu Chapanga, akuyilongosha kokosi kwadayila kucha lukutuva machi yivavelili mulupengu.

2 Figoli fyagola mundu fiva nyanyi kwa mweni, ila Bambu Chapanga kamanya chivelili mundima.

3 Kugola findu fya usangi na unakaka, fikumnowesha munu Bambu Chapanga pitu kumtawulila litambiku. 4 Mundu muna lukilu na mundu yayijuma, yikulangusha lipala sambi ya vawafu.

5 Hoshu sha mundu yagola fichuku kwa nguvilishu sikuyegha ulundamali, lakini yavelili na liyala dapati chindu ha.

6 Ulundamali wupatikanili kwa udesi, wuva kucha likungweta liiyangaluka na ndi mtambu wa njifa.

7 Umakuluhu wa vandu vawafu dawuvagoli vadanganyiki, nongwa vakulema kugola fila yifidayiliwa.

8 Deha ya muna sambi yibeda beda, lakini mundu goleki njila yaki yiholoka.

9 Ngiba kwikala kwituvili, pitu kuva na mdala mgombi munyumba yimu.

10 Mundu mwafu akudobukela kugola wafu, kavahela lusungu hata kwa mjofi waki.

11 Pawumlatula muna bedalu mpufi akuva na luhunja, lakini pawumuwula muna luhunja dapati umanyi.

12 Chapanga mnakaka kamanya kila chindu yichigoleka munyumba ya wafu, mweni davawishi na kuvadanganyisha vavifyi.

13 Yalema kupikana lishu lya mgaju, nakaka na weni paluva kutangiwa davampikani ha.

14 Maya vakusikishiwa na fupu ya chifisu, mundu pagayiliwa swinda kwa chifisu yikusikisha maya makomi.

15 Mundu goleki pagola fya usangi akusekilela, lakini vandu va wafu vakuva na chipwembwi.

16 Yayeleja kutali na njila ya luhunja, daghavi gati ya vandu yivasovili.

17 Yadayila fwamuku daghavi mgaju, lakini yatama kulya na unjayila daghavi mlundamali ha.

18 mvifyi ndi hombu badili ya mnakaka, mwafu dalatuliwi badili ya goleki.

19 Ngiba kwikala kucheja, pitu kwikala na mdala mgombi na muna ligubu.

20 Kaya ya muna luhunja kuna findu fitalamili, lakini msisihi akuchachasha mali yaki yonda.

21 Mundu yagola fya usangi na muna utami, dayikali myaka yitangalili na kupata fyadayila na kutundamiwa.

22 Muna luhunja akuwesha kuwukamula kwa mgoha mlima wa vandu yivavelili na liwovi, na kusibowola viwu sivayidumbila kuvadima.

23 Mundu yawudima mlomu waki akwilyepa na misayisayi.

24 Yayijuma na muna lukilu litawa lyaki muna mbedalu, fyagola fimema kwijuma na lukilu lukomi.

25 Dobukelu ya mundu mgata ndi njifwa yaki, nongwa akulema kugola chichuku.

26 Mgata majuva vosi dobukelu yaki yikuyongisheka, lakini goleki akuvagayila vayaki kwa usangi.

27 Bambu Chapanga akuvanyekwa vandu vawafu yivatawula litambiku, na akukalala munu patawula litambiku kwa natilu ya wafu.

28 Mtovelela wa udesi dadanganyishiwi, lakini mundu yateghela fijakwili dayikali majuva vosi.

29 Mundu mwafu akwilangusha kava mlulumi, lakini msangi akwihola finofu fila fyagola.

30 Kwahela luhunja awu luhala awu fyadayila kugola mundu, yifiwesha kumlemwa Bambu Chapanga.

31 Fwalasi akuvikiwa ndemindemi kwanongwa ya mgogha, lakini uweshi ukufuma kwa Bambu Chapanga.