1 Ngiba kulya uluma kunu kuva na kusika, pitu kulya lihungu munyumba yiveli ndewu.

2 Mvanda yaveli na luhunja damtavali mwana mpufi wa mlundamali, na mweni dapati mbala ya tati wawu.

3 Chumang'andu ya nyanyi awu mbiya chigelu chaki motu, lakini Bambu Chapanga ndi chigelu cha ndima sha vandu. 4 Mundu yagola uvifyi akupikanisha filongu fya wafu, mundu mfyangu akuteghela lijeji apikanishi mululimi lwa mundu yajanga.

5 Yamudanila mgaju akumduka yamuwumbili, yasekilela gobuleku ya monga dalatuliwi.

6 Vagogolu vakwidumbila vayisukulu vawu, vana vakwidumbila valeli vawu.

7 Filongu fya nyanyi mumlomu wa mpufi chishovi chaki ng'odu, nyanyi ha kwa kilongosi kudeta filongu fya ufyangu.

8 Swinda kwa mundu yivakucha fuma, kwanongwa chila chadayila kugola dachigoleki.

9 Mundu yapomela vifyu sha vamonga akugola lighanja, lakini yakumbushila uvifyi akuvabava vaghanja.

10 Ngayikilu ya mwanja wumu kwa mundu muna luhunja yikusoma munu kunda, pitu mundu mpufi kulatuliwa myanja mya.

11 Chagola mundu mwafu ndi uvifyi hela, mnjagila mgombi dalayishiwi kwa mweni.

12 Ngiba tang'ani na majabi mdala yapokiwili vana vaki, pitu kutang'ana na mpufi muupufi waki.

13 Yagola lugotu lwa usangi kwa uvifyi, findu fya wafu dafiwuki ha munyumba yaki.

14 Kukanda ndewu yiva kucha kufuwulila machi mulitanda, uleki ndewu chipindi yikalihela kufumbuka.

15 Kumpomela yaveli na mbatiwa na kumudamula yangajila mbatiwa, fyosi fivili Bambu Chapanga akufinyekwa.

16 Kwanongwa liki mpufi kuva na mbiya mukuwoku yakuhemilela luhunja, kunu mweni kavahela luhala.

17 Ghanja wa nakaka ndi mwaminifu majuva vosi, mlongu akuwoneka nongwa atangi chipindi cha tabu.

18 Mundu ngajila luhala akwihadisha kwanongwa ya mjofi waki, akuva ngingamu wa mundu wingi.

19 Yadayila ndewu akudayila sambi, yajenga luviwu na mlyangu mkomi wanyanyi akusaka gobuleku.

20 Yaveli na ndima ya wafu dapati ha fyausangi, na mdeta udesi dagobuleki.

21 Yalela mwana mpufi akuyegha ng'ong'uleku mweni, na tati wa mwana mpufi akumsekilela ha.

22 Ndima yisakapukili ndi mtela, ila ndima yivelili na lung'ong'u yikugola mvili usosuvali.

23 Mundu wa wafu akupokela swinda kwa chifisu, ili alewushi haki.

24 Mundu yavelili na umanyi shuvililu yaki ndi luhunja, lakini msisihi shuvililu yaki kila chindu chivelili mumlima.

25 Mwana mpufi akuyegha lung'ong'u kwa tati mundu, na akuyegha lihingili kwa mamundu.

26 Nyanyi ha kwa mundu yangajila mbatiwa kuhomba, na nyanyi ha kuvalatula vakomi kwa kugola fya usangi.

27 Mundu mmanyi akwiwunishila kudeta, na yula yanyamalili kana luhunja. 28 Hata mundu mpufi panyamala akumanyika kucha kana luhunja, paleka kudeta akuwoneka kucha muna luhala.