1 Yivadayila kuwuliwa pavifya ayu akudayila umanyi, lakini yalema kukayikiwa mpufi.

2 Chapanga akuvatama vandu vasangi, lakini vala vavifyi davahighiwi na Chapanga.

3 Wafu wukumdindasha mundu ha, lakini kwahela chindu yichiwesha kumuwisha goleki.

4 Mwehi msangi akumgola bambu mundu ayidumbi na kusekilela, lakini yamusabanga bambu mundu kava kucha chilonda mumingendewu yaki.

5 Hoshu sha mundu goleki siva nakaka, lakini hoshu sha mvifyi ufyangu.

6 Filongu fya mpufi fikwilata kuwulagha vangajila mbatiwa, lakini filongu fya vandu goleki fikuvalowola.

7 Vavifyi vakufyoghiwa na kusova, lakini nyumba ya vasangi dayidindashiwi.

8 Mundu akujumiwa kulinga luhunja lwaki, lakini mundu wa hoshu sha wafu akubedaliwa.

9 Ngiba mundu yayiwona chindu ha kunu kana ndumindumi, pitu yula yadayila milandu mikomi kunu kavahela filivi.

10 Mundu msangi akuvadima vang'ongolu vaki, lakini lusungu lwa mvifyi ndi umakuluhu.

11 Mlimi yakimbanika akuva na filivi fitangalili, lakini yagola milandu ya wafu kavahela luhala.

12 Vandu vavifyi vakusaka mali kwa deha ya wafu, lakini mundu msangi akwidindasha.

13 Mundu mvifyi akuwomela kwa ufyangu waki mweni, lakini goleki akuyisegha na gobuleku.

14 Mundu akupata fupu kwa filongu fyaki, kucha wula wapata kwa fichuku fya mawoku vaki.

15 Mpufi akwiwona deha yaki ndi yanyanyi, lakini yavelili na luhunja akupikanisha filongu fya vandu.

16 Mpufi akuhava ha kukalala, lakini munaluhala akubedala pajowuliwa.

17 Yadeta nakaka akutovilela fya nakaka, lakini mtovilela ufyangu akudeta fya udesi.

18 Mundu yadeta filongu fya wafuwafu fikusoma kucha limayi, lakini fyadeta muna luhunja fikulowola.

19 Unakaka ukwikala jola, lakini udesi ukwikala majuva madokwa hela.

20 Yivayilata kugola uvifyi vamema ufyangu mundima, lakini yivayilata usangi vakuva pekesu.

21 Kwahela gobuleku kwa vandu vasangi, lakini vavifyi vakwikala mugobuleku.

22 Bambu Chapanga akuvakalalila vandu yivahimula fya udesi, lakini vandu vanakaka ndi seku yaki.

23 Mundu yavelili na luhunja akufifa umanyi waki, lakini mpufi akulandula upufi wavelinawu.

24 Kugola chichuku kwa ngimbaniku kukukugayila chewu, lakini ugata dawukugoli mvanda.

25 Lyogha mundima dalimuwushili mundu seku, lakini chilongu chinofu chikumgola mundu asakapuki.

26 Mundu msangi akwilyepa na uvifyi, lakini deha ya vavifyi sikuvayaghamisha veni.

27 Mundu mgata dapati ha chila chayilatili, lakini yula yakimbanika dapati.

28 Ugoleki ndi deha ya unofu, lakini deha ya uvifyi yikulola kunjifwa.