1 Afi ndi filongu fya Aguli mwana wa Yaki.

Mundu ayu amuwombililili Itieli na naamu, Itieli na Ukali. 2 Nenga mpufi pitu vandu vosi,

mundu ha, nenga ndivahela luhala nga vandu vamonga vangavelili nawu.

3 Ndiyiwula ng'odu luhunja,

wala ndivahela umanyi wa kumumanya Chapanga Mng'alili.

4 Ghani yakwelili kumbindi kwa Chapanga na kusunuka?

Ghani yafubatili uyegha mumawoku vaki?

Ghani yawopili machi muyingwa yaki?

Ghani yavikili mbaka sha mlima?

Litawa lyaki ghani na mwana mundu litawa lyaki ghani? Leki kumumanya ung'ombeli?

5 Kila chilongu cha Chapanga ndi chanakaka. Mweni kava ngawu ya kwikikila kwa vala yivamtuvilila. 6 Kotoo kuyongesha chilongu mufilongu fyaki, akotoo kwisa kukulakalila na kukuwona yuwi mdesi.

7 Ngukuluva filongu afi fivili yuwi Bambu Chapanga, unyimbi chipindi ngali hela kusova. 8 Ubavi kutali na nenga udesi na jangilu, kotoo kunyimba ugaju awu ulundamali. Ila unyimbi filivi yifingwila kila lijuva, 9 ngotoo kwisa kwikuta na kukulema padeta, Bambu Chapanga ndi ghani? Awu ngotoo kuva mgaju na kuhija, na kulivika chindipa litawa lyaku yuwi Bambu Chapanga.

10 Kotoo kumdetela mvanda kwa chilongosi waki. Akuwesha kukulapila na kuwoneka kuna mbatiwa.

11 Kuna vandu yivavalapila vatati vawu, wala vakuvanemela ha vamavawu.

12 Kuna vandu yivayiwona veni ndi vasangi, lakini vapughiwa ha wafu wawu.

13 Kuna vamonga vana mesu va lukilu, na nolelu yawu ya mbedalu kwa kila chindu chivachiwona.

14 Vamonga minu vawu kucha lipanga na magego vawu vava kucha mimayi yivelili vekuveku kunu na kunu kuvadanganyisha vagaju va mlima, na vasosuvafu yivavelili gati ya vandu.

15 Shushu kanawu vakavali vavili yivawomba, "Unyimbi, unyimbi!"

Kuna findu fitatu yifingajila kwikuta, yina, kuna findu mchechi yifideta fikwila

16 Sembi ndi kucha munda wa mdadala yangajila kulela,

na motu wulemwili kuwujima,

uganga wungajila kukwila machi.

17 Leki mundu pamudanila tati mundu na kulema kupikana kwa mawaki, vangungulu va kundenyeku davamdimuli mesu na vangwasi davamulyi.

18 Kuna findu fitatu fya filoja, yina, findu mchechi ndifimanya ha,

19 Ngwasi ndambu wawuluka kumbindi,

njoka wayendayenda mumigonguveli,

meli wuyityanga mubahali,

ndambu mlulumi na mdadala wuvayitama.

20 Njila ya mdala muwoni yiva naha, mweni akulya na kwifyangula mlomu pambeli akudeta, "Gola uvifyi wowosi wula ha!"

21 Kuna findu fitatu yifitikanyisha mlima, yina, findu mchechi fingajila kwiwunishila.

22 Mvanda paghava mutwa, mpufi yayikuta filivi,

23 mdada yangajila kutamiwa akuhetiwa, na ndumindumi yatola fwasi ya mbuyi mundu.

24 Kuna vang'ongolu mchechi mumlima yivavelili vadokwa munu, lakini vana luhala munu.

25 Vanjapi vang'ongolu yivavelili vadokwa yivangajila liwovi, lakini vakuvika filivi fyawu chipindi cha mkakamu;

26 Vang'ongolu vasosuvafu hela yivakemiwa pelele, lakini vakujenga nyumba shawu mumigonguveli:

27 Vangumbingumbi vavahela mutwa, lakini vonda vakuyenda pamu kwa fipuga.

28 Ngolungosi ukuwesha kumkamula mukuwoku, lakini akuwesha kuyingila munyumba ya wutwa.

29 Kuna vang'ongolu vatatu yivayendayenda nyanyi, yina, kuna vang'ongolu mchechi yivayendayenda kwa kufuta.

30 Majabi ng'ongolu yavelili na liwovi pitu vonda, na akumtila ng'ongolu wingi yoyosi yula ha. 31 Njowolu yayendayenda kwa kufuta kucha likambaku lya meni, na mutwa pawulongolu ya vandu vaki pavalongosha.

32 Leki kugola usisighi mbaka ukuyijuma, au ukushuvilila kugola wafu, kotoo kuwombangaya. 33 Nongwa pawuvachukunja majiva ukupata samuli, pawumdula mundu mumbula mwasi dawufumi, wuwula wula pawujongishela ndewu yikufumbuka njifwa.