Irumu lánina leferuduruniwa adúeihani
1 Aba lasigirun Moisesi ariñaga houn Ísüraelina:
—Sagü sedü irumu, feruduna bubéi badueirúniwa.
2 Sun gürigia ha furedeihaña somu katei lun gürigia háledi, feruduna habéi luagu le hafuredeirubei lun. Mamuriahanhañame luma le unbei hafuredeiha lun lafayeiruniña, lugundun dan ligía, lidaanibei ferudun lidan liri Bungiu. 3 Gayaraabei baguburahani terencha luagu le bafuredeirubei lun, ánheinti bupaisanun gasu feruduna bani luagu le leresibirubei búmagiñe. 4 Lau igaburi le, úabaña gudemetiña haganagua, labinirubadibu Wabureme le Bubungiute lidan ageiraü le lunbei líchuguni bun keisi balagante 5 anhein badüga le lubeibei, gúnfulibeime sun gumadi le, le níchugubei bun uguñe. 6 Ítara luba, labinirubadibu Wabureme le Bubungiute, ani gámabadibu lun bafuredeirun houn saragu néchanigu, ánheinti buguya mamuriahanbadibu furedeiti; bagumadiruba saragu néchanigu, gama lumoun hagía magumadirún habadibu.
7 —Anhein ñein aban gudemeti hadan bupaisanun lidan aban lídangiñe luburugute ageiraü le líchugubei Wabureme le Bubungiute bun, mamaharabá bíderaguni bupaisanun le gudemebei; 8 lubaragiñe lira, arufudabéi bareini, furedeibéi le lemegeirubei lun. 9 Mariñagabá búnguarügü: "Yarafaali lisedün irumu, lidaani ferudunawa lan adúeihani", barufudameti luriban igibu lun bupaisanun le gudemebei ábame mafuredeirun ban ni kata lun; ladüga lagúaruba lun Bungiu kóntüra buguya, ani labahüdǘba katei ligía keisi figóu. 10 Lunti bíderaguni súnwandan gúndaañu, lugundun ladüga katei lira, labinirubadibu Wabureme le Bubungiute lidan sun katei le badüga. 11 Súnwandan ñeinbei lan megei fulasurugu, ligía nariñagunbei bun lun buidu ban hama bupaisanun ha áfagubaña gudemei bageira.
Lúrudu hawaguti idamuni
(Afu 21.1-11)