Êxodo 11

ಥೊರ್ಲಾ ಪೊರಾಚ್ಯಾ ಮರ್ನಾಚ್ಯಾ ವಿಶಯಾತ್ ಮೊಯ್ಜೆಕ್ನಾ ಹುರ್ಶಾಕಿ

1 ಸರ್ವೆಸ್ಪರಾನ್ ಮೊಯ್ಜೆಕ್, "ಫಾರೊವ್ ರಾಜಾಕ್ ಅನಿ ಇಜಿಪ್ತ್ ಲೊಕಾಕ್ನಿ ಅನಿ ಎಕ್ ಶಿಕ್ಷ್ಯಾ ಧಾಡ್ತಾ, ತವ್ಡೆ ಹೊಲ್ಲ್ಯಾ ಮಾನಾ ತೊ ತುಮ್ಕಾ ಹಿತ್ತೆತ್ನಾ ಜಾವ್ಕ್ ಒಪ್ಕಿ ದಿತಾ, ತವ್ಡೆಚ್ ನಸ್ತಾನಾ ತುಮ್ಕಾ ಸಗ್ಳ್ಯಾಕ್ನಿ ಥೈತ್ನಾ ಪಳ್ಸುನ್ ಘಾಲ್ತಾ. 2 ತಸೆ ಹೊವ್ನ್, ಬಾಯ್ಕಾ ಮಾನ್ಸಾ ಅನಿ ಘವ್ಮಾನ್ಸಾ ಸಗ್ಳ್ಯಾನಿಬಿ ಅಪ್ಲ್ಯಾ ಅಪ್ಲ್ಯಾ ಆಜು ಭಾಜುಕ್ನಾ ಸೊನೆ, ಚಾಂದಿಚಿ ವಸ್ತಾ ಸಗ್ಳಿ ಮಾಗುನ್ ಘೆವಾ, ಮನುನ್ ತುಮ್ಚ್ಯಾ ಲೊಕಾಕ್ನಿ ಸಮಾ ಕರುನ್ ಸಾಂಗಾ", ಮಟ್ಲ್ಯಾನ್. 3 ಅನಿ ಸರ್ವೆಸ್ಪರಾನ್ ಇಜಿಪ್ತಾಚ್ಯಾ ಲೊಕಾಕ್ನಿ ಅನಿ ಇಜ್ರಾಯೆಲ್ ಲೊಕಾಚ್ಯಾ ವರ್‍ತಿ ದಯಾ ಯೆಯ್ ಸಾರ್ಕೆ ಕರ್ಲ್ಯಾನ್, ಅನಿ ಇಜಿಪ್ತ್ ದೆಸಾತ್ಲ್ಯಾ ಫಾರೊವ್ ರಾಜಾಚ್ಯಾ ಘರಾತ್ಲ್ಯಾ ಲೊಕಾನಿ ಮೊಯ್ಜೆ ಎಕ್ ಮೊಟೊ ಮಾನುಸ್ ಮನುನ್ ನೆಮ್ಲ್ಯಾನಿ. 4 ಮೊಯ್ಜೆನ್ ಫಾರೊವ್ ರಾಜಾಕ್, ಸರ್ವೆಸ್ಪರಾನ್ ಅಸೆ ಹುಕುಮ್ ದಿಲಾ, ಮಿಯಾ ಮದ್ದಿ ರಾತ್ತಿನ್ ಇಜಿಪ್ತಾಕ್ನಾ ದಾಟುನ್ ಜಾತಾ, 5 ತನ್ನಾ ಸಿಂವಾಸನಾರ್ ಬಸಲ್ಲ್ಯಾ ಫಾರೊವ್ ರಾಜಾಚ್ಯಾ ಥೊರ್ಲ್ಯಾ ಲೆಕಾಕ್ನಾ, ಜಾತೆ ಧರುನ್ ಬಸಲ್ಲ್ಯಾ ದಾಸಿಚ್ಯಾ ಥೊರ್ಲ್ಯಾ ಪೊರಾ ಪತರ್ಬಿ ಇಜಿಪ್ತ್ ದೆಸಾತ್ಲಿ ಸಗ್ಳಿ ಥೊರ್ಲಿ ಪೊರಾಬಿ ಮರ್ತಾತ್, ಜನಾವಾರಾತ್ನಿಬಿ ಥೊರ್ಲಿ ಹೊತ್ತಿ ಸಗ್ಳಿ ಮರ್ತಾತ್. 6 ತನ್ನಾ ಸಗ್ಳ್ಯಾ ಇಜಿಪ್ತ್ ದೆಸಾತ್ ಮೊಟೊ ಆಳಾಪ್ ಹೊತಾ, ತಸ್ಲೊ ಅಳಾಪ್ ಅದ್ದಿಬಿ ರಾವ್ಕ್ ನತ್ತೊ ಅನಿ ಫಿಡೆಬಿ ರ್‍ಹಾಯ್ನಾ. 7 ಖರೆ ಇಜ್ರಾಯೆಲ್ ಲೊಕಾಂಚ್ಯಾ ವಿರೊಧ್ ಹೊಂವ್ದಿತ್ ನಾತರ್ ಜನಾವರಾಂಚ್ಯಾ ವಿರೊದ್ ಹೊಂವ್ದಿತ್ ಎಕ್ ಕುತ್ರೆಬಿ ಭೊಕಿನಾ, ಹೆಚ್ಯಾ ವೈನಾ ಸರ್ವೆಸ್ಪರಾನ್ ತುಮ್ಕಾ ಅನಿ ಇಜ್ರಾಯೆಲ್ ಲೊಕಾಕ್ನಿ ಎಗ್ಳೆ ಕರ್ಲ್ಯಾನ್, ಮನ್ತಲೆ ತುಮ್ಕಾ ಕಳ್ತಾ. 8 ತನ್ನಾ ತುಜ್ಯಾ ಅಧಿಕಾರಿಯಾ, ಹಿ ಲೊಕಾಬಿ ಮಾಜ್ಯಾ ಜಗ್ಗೊಳ್ ಯೆವ್ನ್ ಅಡ್ವೆ ಪಡುನ್, ತುಮಿ ಅನಿ ತುಮ್ಚ್ಯಾ ವಾಂಗ್ಡಾ ಹೊತ್ತಿ ಸಗ್ಳಿ ಲೊಕಾ ಅಮ್ಕಾ ಸೊಡುನ್ ಜಾವಾ, ಮನುನ್ ಮಾಗುನ್ ಘೆತಾತ್, ಹೆ ಸಗ್ಳೆ ಹೊಲ್ಲ್ಯಾ ಮಾನಾ ಮಿಯಾ ಜಾತಾ ಮಟ್ಲ್ಯಾನ್, ಹಿ ಬೊಲ್ನಿಯ ಸಗ್ಳಿ ಸಾಂಗುನ್ ಮೊಯ್ಜೆ ಲೈ ರಾಗಾನ್ ಫಾರೊವ್ ರಾಜಾಕ್ನಾ ಗೆಲೊ. 9 ಸರ್ವೆಸ್ಪರಾನ್ ಮೊಯ್ಜೆಕ್, "ಫಾರೊವ್ ತುಮ್ಚ್ಯಾ ಗೊಸ್ಟಿಯಾ ಆಯ್ಕಿನಾ, ತಸೆ ಹೊವ್ನ್ ಇಜಿಪ್ತ್ ದೆಸಾತ್ ಅಜಾಪಾಚಿ ಕಾಮಾ ಲೈ ಕರುನ್ ದಾಕ್ವುಕ್ ಆದಾರ್ ಹೊತಾ" ಮನುನ್ ಸಾಂಗ್ಲ್ಯಾನ್. 10 ಮೊಯ್ಜೆನ್ ಅನಿ ಆರೊನಾನ್ ಫಾರೊವ್ ರಾಜಾಚ್ಯಾ ಇದ್ರಾಕ್ ಹಿ ಅಜಾಪಾಚಿ ಕಾಮಾ ಸಗ್ಳಿ ಕರ್ಲ್ಯಾನಿ, ಖರೆ ಸರ್ವೆಸ್ಪರಾನ್ ಫಾರೊವ್ ರಾಜಾಚೊ ಮನ್ ಮಂಡ್ ಕರ್ಲ್ಯಾನ್, ತೆನಿ ಅಪ್ಲೊ ದೆಶ್ ಸೊಡುನ್ ಜಾವ್ಕ್ ಇಜ್ರಾಯೆಲ್ ಲೊಕಾಕ್ನಿ ಒಪ್ಕಿ ದಿವ್ಕ್ ನಾ.