Êxodo 19

ಇಜ್ರಾಯೆಲ್ ಲೊಕಾ ಸಿನಾಯ್ ಮಡ್ಡಿವರ್‍ತಿ

1 ಇಜ್ರಾಯೆಲ್ ಲೊಕಾ ಇಜಿಪ್ತಾಕ್ನಾ ಜಾವ್ಕ್ ಲಾಗಲ್ಲ್ಯಾ ತಿನ್ವ್ಯಾ ಮ್ಹಯಿನ್ಯಾತ್ ಸಿನಾಯ್ ಡಂಗ್ಳಿಕ್ ಪಾವ್ಲ್ಯಾನಿ. 2 ತೆನಿ ರೆಫಿದಿಮ್ ಮನ್ತಲೊ ಜಾಗೊ ಸೊಡುನ್, ತ್ಯಾ ಡಂಗ್ಳಿಕ್ ಯೆವ್ನ್ ಥೈತ್ಲ್ಯಾ ಮಡ್ಡಿಚ್ಯಾ ಇದ್ರಾಕ್ ವಸ್ತಿ ರಾಲ್ಯಾನಿ. 3 ಮೊಯ್ಜೆ ತ್ಯಾ ಮಡ್ಡಿ ವರ್‍ತಿ ಚಡುನ್ ಸರ್ವೆಸ್ಪರಾಚ್ಯಾ ಜಗ್ಗೊಳ್ ಯೆಲೊ. ಸರ್ವೆಸ್ಪರಾನ್ ತೆಕಾ ಮಡ್ಡಿ ವೈನಾ ಬಲ್ವುನ್, "ತಿಯಾ ಜಾಕೊಬಾಚ್ಯಾ ಘರಾನಾಚ್ಯಾ ಇಜ್ರಾಯೆಲ್‌ಕಾರಾಕ್ನಿ ಹಿ ಗೊಸ್ಟ್ ಸಾಂಗ್; 4 ಮಿಯಾ ಇಜಿಪ್ತ್ ಕಾರಾಕ್ನಿ ಕರಲ್ಲೆ ತುಮಿ ಬಗಟ್ಲ್ಯಾಸಿ, ಎಕ್ ಹದ್ದ್ ಕಸೆ ಅಪ್ನಾಚ್ಯಾ ಪೆಟ್ಯಾಕ್ನಿ ಫಾಂಕುಟ್ಯಾ ವೈನಿ ಉಕ್ಲುನ್ ಘೆತಾ, ತಸೆ ಮಿಯಾ ತುಮ್ಕಾ ಉಕ್ಲುನ್ ಘೆವ್ನ್ ಮಾಜ್ಯಾ ಜಾಗ್ಯಾಕ್ ಪಾವಸ್ಲೊ, ಮನ್ತಲೆ ತುಮ್ಕಾ ಗೊತ್ತ್ ಹಾಯ್. 5 ಅಸೆ ರ್‍ಹಾತಾನಾ, ಮಾಜೆ ಬೊಲ್ನೆ ತುಮಿ ಲೈ ದೆವಸ್ಪಾನಾನ್ ಆಯ್ಕುನ್, ಮಾಜಿ ಕರಾರಾ ಪಾಳುನ್ಗೆವ್ನ್ ಚಲಲ್ಲೆ ಹೊಲ್ಯಾರ್, ಸಗ್ಳೆ ಜಗ್ ಮಾಜೆ ಹೊವ್ನ್ ರಾಲ್ಯಾರ್ಬಿ ತುಮಿ ಸಗ್ಳ್ಯಾ ಲೊಕಾತ್ನಿ ಮಾಜಿ ಸ್ವತಾಚಿ ಲೊಕಾ ಹೊವ್ನ್ ರ್‍ಹಾತ್ಯಾಸಿ. 6 ಅನಿ ತುಮಿ ಮಾಜ್ಯಾ ಯಾಜಕಾಂಚ್ಯಾ ಘರಾನಾಚೆ ಅನಿ ನಿತಳ್ ಲೊಕಾ ಹೊತ್ಯಾಸಿ, ಮನುನ್ ಇಜ್ರಾಯೆಲ್ ಲೊಕಾಕ್ನಿ ತಿಯಾ ಕಳ್ವುಚಿ ಹೊಲ್ಲಿ ಗೊಸ್ಟ್ ಹಿ", ಮಟ್ಲ್ಯಾನ್.

7 ಮೊಯ್ಜೆ ತ್ಯಾ ಮಡ್ಡಿ ವೈನಾ ಉತ್ರುನ್ ಯೆವ್ನ್, ಇಜ್ರಾಯೆಲಾತ್ನಿ ಜಾಂನ್ತ್ಯಾಕ್ನಿ ಗೊಳಾ ಕರುನ್, ತೆಂಕಾ ಸರ್ವೆಸ್ಪರಾನ್ ಹುಕುಮ್ ದಿಲ್ಲಿ ಸಗ್ಳಿ ಗೊಸ್ಟಿಯಾ ಕಳ್ವುಲ್ಯಾನ್. 8 ತನ್ನಾ ಸಗ್ಳ್ಯಾ ಲೊಕಾನಿ, "ಅಮಿ ಸರ್ವೆಸ್ಪರಾನ್ ಸಾಂಗಲ್ಲ್ಯಾ ಸಾರ್ಕೆಚ್ ಕರ್ತಾಂವ್" ಮನುನ್ ಎಕುಚ್ ಮನಾನ್ ಜವಾಬ್ ದಿಲ್ಯಾನಿ, ಮೊಯ್ಜೆನ್ ತಿ ಗೊಸ್ಟ್ ಸರ್ವೆಸ್ಪರಾಕ್ಡೆ ಜಾವ್ನ್ ಸಾಂಗ್ಲ್ಯಾನ್.

9 ಅನಿ ಸರ್ವೆಸ್ಪರಾನ್ ಮೊಯ್ಜೆಕ್, ಅಬಕ್ ಮಿಯಾ ತುಜ್ಯಾ ವಾಂಗ್ಡಾ ಬೊಲ್ತಲೆ ಲೊಕಾಕ್ನಿ ಆಯ್ಕುನ್ ತುಕಾ ಕನ್ನಾಬಿ ವಿಶ್ವಾಸ್ ಕರಿಸಾರ್ಕೆ ಮಿಯಾ ಮೊಡಾತ್ನಾ ತುಜ್ಯಾ ಜಗ್ಗೊಳ್ ಯೆತಾ ಮಟ್ಲ್ಯಾನ್, ಅನಿ ಮೊಯ್ಜೆನ್ ಲೊಕಾಂಚೆ ಜವಾಬ್ ಸರ್ವೆಸ್ಪರಾಕ್ ಸಾಂಗ್ಲ್ಯಾನ್. 10 ಮೊಯ್ಜೆನ್ ಲೊಕಾಂಚಿ ಬೊಲ್ನಿಯಾ ಸರ್ವೆಸ್ಪರಾಕ್ಡೆ ಸಾಂಗ್ತಾನಾ, ಸರ್ವೆಸ್ಪರಾನ್ ತೆಕಾ, "ತಿಯಾ ಲೊಕಾಂಚ್ಯಾ ಜಗ್ಗೊಳ್ ಜಾವ್ನ್ ತೆಂಕಾ ಆಜ್ ಅನಿ ಉದ್ದ್ಯಾ ನಿತಳ್ ಕರ್, ತೆನಿ ಅಪ್ನಾಚೆ ಕಪ್ಡೆ ನಿತಳ್ ಕರುನ್ ಘೆಂವ್ದಿತ್, 11 ಅನಿ ತಿನ್ವ್ಯಾ ದಿಸಿ ತೆನಿ ತಯಾರ್ ಹೊವ್ನ್ ರಾಂವ್ದಿತ್, ಕಶ್ಯಾಕ್ ಮಟ್ಲ್ಯಾರ್, ತ್ಯಾ ದಿಸಿ ಮಿಯಾ ಸರ್ವೆಸ್ಪರ್ , ಸಗ್ಳ್ಯಾ ಲೊಕಾಕ್ನಿ ದಾಕ್ವುನ್ ಘೆವ್ಕ್ ಸಿನಾಯ್ ಮಡ್ಡಿ ವರ್‍ತಿ ಉತ್ರುನ್ ಯೆತಾ, ಥೈ ತುಮಿ ಮಾಕಾ ಬಗ್ತ್ಯಾಸಿ. 12 ತಿಯಾ ಲೊಕಾ ಮಡ್ಡಿಚ್ಯಾ ಜಗ್ಗೊಳ್ ಯೆಯ್ನಾ ಸಾರ್ಕೆ ಮಡ್ಡಿಚ್ಯಾ ಭೊತ್ಯಾನ್ ಕುಪ್ಪ್ ಘಾಲುನ್ ವಳಕ್ ಕರ್, ಅನಿ ಲೊಕಾಕ್ನಿ ತುಮಿ ಮಡ್ಡಿ ಚಡುಚೆ ನ್ಹಯ್, ಅನಿ ಕುಪ್ಪಾಕ್ಬಿ ಅಪ್ಡು ನ್ಹಯ್, ಕೊನಿ ತರ್ಬಿ ಅಪಡಲ್ಲ್ಯಾಕ್ ಮರ್ನಾಚಿ ಶಿಕ್ಷ್ಯಾ ಹೊತಾ, 13 ತಸ್ಲ್ಯಾಕ್ನಿ ಕೊನಿಬಿ ಹಾತ್ ಲಾವಿನಸ್ತಾನಾ, ಗುಂಡ್ಯಾನಿ ನಾತರ್ ಭರ್ಚಿಯಾನಿ ಮಾರುನ್, ಜಿವ್ ಕಾಡುಚೆ, ಮಡ್ಡಿಕ್ ಅಪಡಲ್ಲೊ ಮಾನುಸ್ ಹೊಂವ್ದಿತ್ ನಾತರ್ ಜನಾವರ್, ಕೊನಾಕ್ ಹೊಲ್ಯಾರ್ಬಿ ಹುರ್ವುಚೆ ನ್ಹಯ್, ಖರೆ ಪಂವ್ವೊ ವಾಜಲ್ಲ್ಯಾ ತನ್ನಾ ಮಡ್ಡಿಚ್ಯಾ ಜಗ್ಗೊಳ್ ಯೆವ್ಚೆ ಮನುನ್ ಹುಶಾರ್ಕಿ ದಿವ್ನ್ ಸಾಂಗ್" ಮಟ್ಲ್ಯಾನ್. 14 ಮೊಯ್ಜೆನ್ ಮಡ್ಡಿ ವೈನಾ ಉತ್ರುನ್ ಯೆವ್ನ್ ತಸೆಚ್ ಆರಾದನ್ ಕರುಕ್ ಲೊಕಾಕ್ನಿ ತಯಾರ್ ಕರ್ಲ್ಯಾನ್, ಅನಿ ತೆನಿ ಅಪ್ನಾಚೆ ಕಪ್ಡೆಬಿ ಧುವ್ನ್ ಘೆವ್ನ್ ನಿತಳ್ ಹೊಲ್ಯಾನಿ. 15 ತನ್ನಾ ಮೊಯ್ಜೆನ್ ಲೊಕಾಕ್ನಿ, "ತಿನ್ವ್ಯಾ ದಿಸಾ ಸಾಟ್ನಿ ತಯಾರ್ ಹೊವಾ, ಹ್ಯಾ ದಿಸಾತ್ನಿ ಖಲ್ಯಾ ಘವ್ಮಾನ್ಸಾನ್ಬಿ ಬಾಯ್ಕೊ ಮನ್ಸಿ ವಾಂಗ್ಡಾ ಮಿಳುಚೆ ನ್ಹಯ್", ಮಟ್ಲ್ಯಾನ್.

16 ತಿನ್ವೊ ದಿಸಿ ಉಜ್ವಾಡ್ತಾನಾ, ತ್ಯಾ ಮಡ್ಡಿ ವರ್‍ತಿ ಗುಡ್ಗುಡೆ, ಲಕ್ಲಕೊ, ಕಾಳೊ ಮೊಡ್, ಅನಿ ಪಂವ್ವ್ಯಾಂಚೊ ಮೊಟೊ ಧನ್ ಆಯ್ಕೊ ಯೆಲೊ, ತನ್ನಾ ಬಿಡಾರಾತ್ನಿ ಹೊತ್ತಿ ಸಗ್ಳಿ ಲೊಕಾ ಭಿಂವ್ನ್ ಖಾಪುಕ್ ಲಾಗ್ಲಿ. 17 ಮೊಯ್ಜೆನ್ ಲೊಕಾಕ್ನಿ, ಸರ್ವೆಸ್ಪರಾಕ್ ಬಗುಕ್ ಮನುನ್ ಬಿಡಾರಾಂಚ್ಯಾ ಭಾಯ್ರ್ ಹಾನ್ಲ್ಯಾನ್, ಅನಿ ತೆನಿ ಸಗ್ಳೆ ಯೆವ್ನ್ ಮಡ್ಡಿಚ್ಯಾ ಬುಡಿ ಇಬೆರಾಲ್ಯಾನಿ. 18 ತನ್ನಾ ಸಗ್ಳಿ ಸಿನಾಯ್ ಮಡ್ಡಿ ಡುಕ್ಟಾನ್ ಭರಲ್ಲಿ, ಕಶ್ಯಾಕ್ ಮಟ್ಲ್ಯಾರ್, ಸರ್ವೆಸ್ಪರ್ ಸಾಯ್ಬ್ ಆಗಿಚ್ಯಾ ರುಪಾರ್ ತ್ಯಾ ಮಡ್ಡಿ ವರ್‍ತಿ ಉತ್ರುನ್ ಯೆಲ್ಲೊ, ತೊ ಡುಕೊಟ್ ಆವಿಗೆಚೊ ಸಾರ್ಕೊ ವರ್‍ತಿ ಚಡ್ಲೊ, ತವ್ಡೆಚ್ ನಸ್ತಾನಾ, ತಿ ಮಡ್ಡಿ ಹಾಲ್ಲಿ. 19 ಪಂವ್ವ್ಯಾಂಚೊ ಧನ್ ಲೈ ಲೈ ಹೊವ್ಕ್ ಲಾಗ್ಲೊ, ಮೊಯ್ಜೆನ್ ಬೊಲಲ್ಯಾ ತನ್ನಾ, ಸರ್ವೆಸ್ಪರಾನ್ ಮೊಟ್ಟ್ಯಾ ಘಜ್ನಿ ಸಾರ್ಕೆ ಜವಾಬ್ ದಿವ್ನ್ ಬೊಲ್ಲ್ಯಾನ್. 20 ಸರ್ವೆಸ್ಪರ್ ಸಿನಾಯ್ ಮಡ್ಡಿಚ್ಯಾ ಶಿಖರಾಕ್ ಉತ್ರುನ್ ಯೆಲೊ, ತೆನಿ "ಮಡ್ಡಿಚ್ಯಾ ತುದಿಕ್ ಯೆ" ಮನುನ್ ಮೊಯ್ಜೆಕ್ ಬಲ್ವುತಾನಾ ತೊ ಮಡ್ಡಿ ವರ್‍ತಿ ತುದಿಕ್ ಚಡ್ಲೊ. 21 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, "ತಿಯಾ ಜಾವ್ನ್ ಲೊಕಾಕ್ನಿ ಹುಶಾರ್ಕಿ ದಿ, ತೆನಿ ಮಾಕಾ ಮಟ್ಲ್ಯಾರ್, ಸರ್ವೆಸ್ಪರಾಕ್ ಬಗುಚೆ ಮನುನ್, ಮಡ್ಡಿಕ್ ಕರಲ್ಲಿ ವಳಕ್ ದಾಟುನ್ ಯೆತಿಲ್, ತಸೆ ಕಾಯ್ತರ್ಬಿ ಹೊಲ್ಯಾರ್ ಲೈ ಲೊಕಾ ಮರ್ತಾತ್. 22 ಮಾಜೆಕ್ಡೆ ಯೆತಲ್ಯಾ ಯಾಜಕಾನಿಬಿ ಅಪ್ನಾಕ್ ನಿತಳ್ ಕರುನ್ ಘೆವ್ಚೆ, ನಾತರ್ ಮಿಯಾ ತೆಂಕಾ ಲೈ ಲಗ್ಗುನಾ ನಾಶ್ ಕರ್ತಾ", ಮಟ್ಲ್ಯಾನ್.

23 ತನ್ನಾ ಮೊಯ್ಜೆನ್ ಸರ್ವೆಸ್ಪರಾಕ್, "ಲೊಕಾಕ್ನಿ ಸಿನಾಯ್ ಮಡ್ಡಿ ಚಡುಕ್ ಹೊಯ್ನಾ, ತಿಯಾ ಸಾಂಗಟಲ್ಲ್ಯಾ ಸಾರ್ಕೆ ಮಡ್ಡಿಚ್ಯಾ ಭೊತ್ಯಾನ್ ಕುಪ್ಪಾಚಿ ವಳಕ್ ಕರುನ್ ತುಜ್ಯಾ ಸಾಟ್ನಿ ಎಗ್ಳುನ್ ಥವ್ಲಾ", ಮಟ್ಲ್ಯಾನ್. 24 ತೆಕಾ ಸರ್ವೆಸ್ಪರಾನ್ , "ತಿಯಾ ಜಾವ್ನ್ ಆರೊನಾಕ್ ಬಲ್ವುನ್ಗೆವ್ನ್ ವರ್‍ತಿ ಯೆ, ಖರೆ ಯಾಜಕಾ ಅನಿ ಹುರಲ್ಲಿ ಲೊಕಾ ತಿ ವಳಕ್ ದಾಟುನ್ ಮಾಜೆಕ್ಡೆ ಯೆತಲೆ ನಕ್ಕೊ, ದಾಟುನ್ ಯೆಲ್ಯಾರ್ ಮಿಯಾ ತೆಂಕಾ ಲೈ ಲಗ್ಗುನಾ ನಾಶ್ ಕರ್ತಾ ಮನುನ್ ಸಾಂಗ್", ಮಟ್ಲ್ಯಾನ್. 25 ತಸೆಚ್ ಮೊಯ್ಜೆನ್ ಖಾಲ್ತಿ ಉತ್ರುನ್ ಜಾವ್ನ್, ಸರ್ವೆಶ್ಚರಾಚಿ ಬೊಲ್ನಿಯಾ ಲೊಕಾಕ್ನಿ ತಸೆಚ್ ಸಾಂಗ್ಲ್ಯಾನ್.