Êxodo 23

ನ್ಯಾಯ್ ಅನಿ ಬರೆಪಾನ್

1 ಝುಟಿ ಖಬರ್ ಪಗ್ಳುಚೆ ನ್ಹಯ್, ತುಮಿ ಸಾಂಗ್ತಲಿ ಸಾಕ್ಷಿ ಖರ್ಯಾಕ್ ವಿರೊಧ್ ಹೊವ್ನ್ ಹೊತ್ತ್ಯಾಕ್ ಅನಿ ಬುರ್ಸ್ಯಾಕ್ ಮಜ್ಜತ್ ಕರುಕ್ ಸಾಟ್ನಿ ಹೊವ್ನ್ ರಾವ್ಚಿ ನ್ಹಯ್. 2 ಬುರ್ಶಿ ಕಾಮಾ ಕರ್ತಲಿ ಲೊಕಾ ಲೈ ಹಾತ್, ಹೊಲ್ಯಾರ್ಬಿ ತುಮಿ ತೆಂಚೆ ವಾಂಗ್ಡಿ ಹೊವ್ ನಕಾಸಿ, ಲೈ ಲೊಕಾಂಚ್ಯಾ ಬೊಲ್ನ್ಯಾಕ್ನಿ ಒಪ್ಪುನ್ ಖರೆಪಾನ್ ನಾಶ್ ಕರ್ತಲಿ ಸಾಕ್ಷಿ ಹೊವ್ ನಕಾಸಿ. 3 ಅನಿ ಗರಿಬಾಚ್ಯಾ ವೈಲ್ಯಾ ದಯಾವೈನಾ ತೆಜ್ಯಾ ಪಕ್ಷಾನ್ ರಾವ್ಚೆ ನ್ಹಯ್.

4 ತುಜ್ಯಾ ವಿರೊಧಿಚೊ ಬೈಲ್ ನಾತರ್ ಗಾಡಾವ್ ಚುಕುನ್ ಜಾವ್ನ್ ಫಿರುನ್ಗೆತ್ ರ್‍ಹಾತಾನಾ ತುಕಾ ದಿಸ್ಲ್ಯಾರ್ ತೆ ಹಾಂಬ್ಡುನ್ ನ್ಹೆವ್ನ್ ತೆಜ್ಯಾಕ್ಡೆ ಪರ್‍ತುನ್ ದಿ. 5 ತುಕಾ ಬೆಜಾರ್ ಹೊತ್ತ್ಯಾ ಮಾನ್ಸಾಚೆ ಗಾಡಾವ್ ವಾವಲ್ಲೆ ವಜ್ಜೆ ಲೈ ಝಡ್ ಹೊವ್ನ್, ಖಾಲ್ತಿ ಪಡಲ್ಲ್ಯಾ ತನ್ನಾ ತುಕಾ ತೆ ಉಟ್ವುಕ್ ಮನ್ ನಸ್ಲ್ಯಾರ್ಬಿ ತ್ಯಾ ಮಾನ್ಸಾಕ್ ತೆ ಉಟ್ವುಕ್ ಮಜ್ಜತ್ ಕರುಕುಚ್ ಪಾಜೆ. 6 ತುಮ್ಚ್ಯಾಕ್ಡೆ ಹೊತ್ತಿ ಗರಿಬ್ ಲೊಕಾ ನ್ಯಾಯ್ ಮಾಗುನ್ಗೆತ್ ಯೆಲ್ಲ್ಯಾ ತನ್ನಾ, ತೆಂಕಾ ನ್ಯಾಯ್ ದಿಯ್ನ ಸ್ತಾನಾ ರಾವ್ಚೆ ನ್ಹಯ್. 7 ಪಸ್ವುತಲ್ಯಾ ಕಾಮಾಂತ್ನಾ ಧುರ್ ರಾವ್ಚೆ, ಚುಕ್ ನಸಲ್ಲ್ಯಾ ಅನಿ ನಿತಿವಂತ್ ಮಾನ್ಸಾಕ್ ಮರ್ನಾಚಿ ಶಿಕ್ಷ್ಯಾ ದಿವ್ಚೆ ನ್ಹಯ್, ತಸ್ಲೆ ಬುರ್ಸೆ ಕಾಮ್ ಕರಲ್ಯಾ ಮಾನ್ಸಾಕ್ ಮಿಯಾ ಶಿಕ್ಷ್ಯಾ ದಿಯ್ನಸ್ತಾನಾ ಸೊಡಿನಾ. 8 ಲಂಚ್ ಘೆವ್ಚೆ ನ್ಹಯ್, ಲಂಚ್ ಡೊಳೆ ಹೊತ್ತ್ಯಾಕ್ನಿಬಿ ಕುಡ್ಡೆ ಕರ್ತಾ, ಅನಿ ಚುಕ್ ನಸಲ್ಲ್ಯಾಕ್ ಗಾವ್ಚೆ ಹೊಲ್ಲೆ ನ್ಯಾಯ್ ನಾಶ್ ಕರ್ತಾ. 9 ದುಸ್ರ್ಯಾ ದೆಶಾಚ್ಯಾಕ್ನಿ ತರಾಸ್ ದಿವ್ಚೆ ನ್ಹಯ್, ತುಮಿಬಿ ಇಜಿಪ್ತಾತ್ ದುಸ್ರ್ಯಾ ದೆಶಾಚೆ ಹೊಲ್ಲ್ಯಾಸಿ ನ್ಹಯ್? ತೆಂಚ್ಯಾ ಮನಾತ್ಲೊ ತರಾಸ್ ತುಮ್ಕಾ ಗೊತ್ತುಚ್ ಹಾಯ್.

ಸಾತ್ವ್ಯಾ ವರ್ಸಾಚ್ಯಾ ಅನಿ ಸಾತ್ವ್ಯಾ ದಿಸಾಚ್ಯಾ ವಿಶಯಾತ್

10 ತುಮ್ಚ್ಯಾ ಸೆತಾತ್ನಿ ಸಾ ವರಿಸ್ ಪೆರುನ್ ಪಿಕ್ ಕಾಡುನ್ಗೆವಾ. 11 ಖರೆ ಸಾತ್ವ್ಯಾ ವರ್ಸಾತ್ ತ್ಯಾ ಸೆತಾತ್ ಕಾಯ್ಬಿ ಪೆರಿನಸ್ತಾನಾ ಬಿಳ್ ಸೊಡಾ, ತ್ಯಾತುರ್ ಅಪ್ನಿಚ್ ಉಗ್ವುನ್ ಯೆಲ್ಲೆ ತುಮ್ಚ್ಯಾ ಗಾಂವಾತ್ನಿ ಗರಿಬ್ ಹೊತ್ತಿ ಲೊಕಾ ಖಾಂವ್ದಿತ್, ಅನಿ ಹುರಲ್ಲೆ ಡಂಗ್ಳಿತ್ಲಿ ಜನಾವರಾ ಚರುಂದಿತ್, ಅನಿ ತುಮ್ಚ್ಯಾ ದರಾಕ್ಷಾಚ್ಯಾ ಮ್ಹಳ್ಯಾತ್ನಿ ಅನಿ ತೆಲಾಚ್ಯಾ ಝಾಡಾಂಚ್ಯಾ ಮ್ಹಳ್ಯಾತ್ನಿಬಿ ತಸೆಚ್ ಕರಾ.

12 ಎಕ್ ವ್ಹಾರ್‍ಯಾತ್ ತುಮಿ ಸಾ ದಿಸ್ ಕಾಮ್ ಕರುನ್ ಸಾತ್ವ್ಯಾದಿಸಿ ಕಸ್ಲೆಬಿ ಕಾಮ್ ಕರುನಕಾಸಿ, ತ್ಯಾ ದಿಸಿ ತುಮ್ಚಿ ಬೈಲಾ, ಗಾಡ್ವಾ ಅನಿ ಆಳಾಬಿ ಆರಾಮ್ ಕರುಂದಿತ್, ಅನಿ ತುಮ್ಚ್ಯಾ ದೆಸಾತ್ ಹೊತ್ತಿ ದುಶ್ರ್ಯಾ ದೆಶಾಚಿ ಲೊಕಾಬಿ ಆರಾಮ್ ಕರುಂದಿತ್. 13 ಮಿಯಾ ತುಮ್ಕಾ ಸಾಂಗಲ್ಲೆ ಹೆ ಸಗ್ಳೆ ಲೈ ಹುಶಾರ್ಕಿನ್ ಚಾಲ್ವುನ್ಗೆವ್ನ್ ಜಾವಾ, ಅನಿ ದುಶ್ರ್ಯಾ ಖಲ್ಯಾಬಿ ದೆವಾಚೆ ನಾವ್ ಯಾದ್ ಕರುನಕಾಸಿ, ಅನಿ ಸಾಂಗುಬಿ ನಕಾಸಿ.

ತಿನ್ ಮೊಟಿ ಸನಾ

14 ತುಮಿ ವರ್ಸಾತ್ ಮಾಜೆಸಾಟ್ನಿ ತಿನ್ ಸನಾ ಕರುಚೆ. 15 ಎಕ್ ಫುಗ್ ನಸಲ್ಲಿ ಭಾಕ್ರಿಯಾ ಖಾತಲೊ ಸನ್, ಮಿಯಾ ತುಮ್ಕಾ ಹುಕುಮ್ ದಿಲ್ಲ್ಯಾ ಸಾರ್ಕೆ, ನೆಮಲ್ಲ್ಯಾ ಎಳಾರ್ ಸಾತ್ ದಿಸಾ ಪತರ್ ಫುಗ್ ನಸಲ್ಲಿ ಭಾಕ್ರಿಯಾ ಖಾವ್ಚೆ, ಕಶ್ಯಾಕ್ ಮಟ್ಲ್ಯಾರ್, ತುಮಿ ಇಜಿಪ್ತ್ ದೆಸಾಕ್ನಾ ಯೆಲ್ಲೆ ತ್ಯಾಚ್ ದಿಸಾತ್ನಿ, ಅನಿ ಮಾಜೆಕ್ಡೆ ಯೆತಲೊ ಹರ್ ಎಕ್ಲೊಬಿ ಕಾನಿಕ್ ನಸ್ತಾನಾ ಖಾಲಿ ಹಾತಿನ್ ಯೆವ್ಚೆ ನ್ಹಯ್. 16 ಅನಿ ತುಮಿ ಪೆರಲ್ಲ್ಯಾ ಸೆತಾತ್ನಾ ಪೈಲೆಚೆ ಫಳ್ ಗಾವಲ್ಲ್ಯಾ ತನ್ನಾ ಕಾತ್ರನಿಚೊ ಸನ್ ಕರುಚೆ, ಅನಿ ವರಿಸ್ ಸರ್ತಾನಾ ಮಟ್ಲ್ಯಾರ್ ತುಮ್ಚ್ಯಾ ಸೆತಾಂತ್ನಾ ಅನಿ ಮ್ಹಳ್ಯಾಂತ್ನಾ ಪಿಕ್ ಗೊಳಾ ಕರ್ತಾನಾ ಮ್ಹಳ್ತಲೊ ಸನ್ ಕರುಚೆ. 17 ಅಸೆ ಸಗ್ಳಿ ಘವ್ಮಾನ್ಸಾ ಎಕ್ ವರ್ಸಾತ್ ತಿನ್ ದಾ ಮಾಜ್ಯಾ ಇದ್ರಾಕ್ ಯೆವ್ಚೆ. 18 ಮಾಕಾ ಬಲಿ ಭೆಟ್ವುತಾನಾ ಭೆಟ್ವಲ್ಲ್ಯಾ ಜನಾವರಾಚ್ಯಾ ರಕ್ತಾಚ್ಯಾ ವಾಂಗ್ಡಾ ಫುಗ್ ನಸಲ್ಲೆ ಪಿಟ್ ದಿವ್ಚೆ ನ್ಹಯ್, ಮಾಜ್ಯಾ ಸನಾತ್ ಮಾಕಾ ಭೆಟ್ವಲ್ಲ್ಯಾ ಜನಾವರಾಚೆ ಮಾಂದೆ ದುಸ್ರ್ಯಾ ದಿಸಾ ಪತರ್ಬಿ ಥವ್ತಲೆ ನಕ್ಕೊ. 19 ತುಮ್ಚ್ಯಾ ಪಿಕೆಚ್ಯಾ ಪೈಲ್ಯಾ ವಾಟ್ಯಾತ್ ಲೈ ಬರೆ ಹೊತ್ತೆ, ತುಮ್ಚೊ ದೆವ್ ಅನಿ ಸರ್ವೆಸ್ಪರ್ ಹೊವ್ನ್ ಹೊತ್ತ್ಯಾ ಮಾಕಾ ಭೆಟ್ವುಕ್ ಹಾನುಚೆ, "ಬಕ್ರ್ಯಾಚ್ಯಾ ಪೆಟ್ಯಾಕ್ ತೆಜ್ಯಾ ಅವ್ಸಿಚ್ಯಾ ದುದ್ದಾತ್ ಸಿಜ್ವುಚೆ ನ್ಹಯ್".

ಗೊಸ್ಟಿಯಾಂಚ್ಯಾ ವಿಶಯಾತ್

20 ಅಬಕ್! ತುಮ್ಕಾ ವಾಟೆವರ್‍ತಿ ರಾಕುಕ್, ಅನಿ ಮಿಯಾ ವಳಕ್ ಕರಲ್ಲ್ಯಾ ಜಾಗ್ಯಾಕ್ ತುಮ್ಕಾ ಬಲ್ವುನ್ ಹಾನುಕ್ ಮನುನ್ ತುಮ್ಚ್ಯಾ ಫಿಡೆ ಎಕ್ ಧುತ್ ಧಾಡ್ತಾ. 21 ತುಮಿ ತೆಜ್ಯಾಕ್ಡೆ ಧ್ಯಾನ್ ದಿವ್ನ್ ತೆಜ್ಯಾ ಗೊಸ್ಟಿಯಾಕ್ನಿ ಕಾನ್ ದಿವ್ಚೆ, ಕಶ್ಯಾಕ್ ಮಟ್ಲ್ಯಾರ್ ತೊ ಮಾಜ್ಯಾ ನಾವಾರ್ ಯೆತಲೊ ತಸೆ ಮನುನ್ ತುಮಿ ತೆಕಾ ಖಾಲ್ತಿ ಹೊಯ್ನಸ್ತಾನಾ ರಾವ್ನಕಾಸಿ, ತುಮಿ ಖಾಲ್ತಿ ಹೊಯ್ ನಸ್ತಾನಾ ರಾಲ್ಯಾರ್ ತೊ ತುಮ್ಕಾ ಶಿಕ್ಷ್ಯಾ ದಿತಾ. 22 ತುಮಿ ತೆಚೆ ಬೊಲ್ನೆ ಲೈ ಭಕ್ತಿನ್ ಆಯ್ಕುನ್, ಮಾಜಿ ಆಶ್ಯಾ ಫುರಾ ಕರ್ಲ್ಯಾರ್ ಮಿಯಾ ತುಮ್ಚ್ಯಾ ವಿರೊಧಿಯಾಕ್ನಿ ವಿರೊಧಿ ಅನಿ ತುಮ್ಕಾ ತರಾಸ್ ದಿತಲ್ಯಾಕ್ನಿ ತರಾಸ್ ದಿತಲೊ ಹೊವ್ನ್ ರ್‍ಹಾತಾ.

ಗೊಸ್ಟಿಯಾ ಅನಿ ವಾಟ್ ದಾಕ್ವುತಲೆ

23 ಮಾಜೊ ಧುತ್ ತುಮ್ಚ್ಯಾನ್ ಫಿಡೆ ಚಲುಂಗೆತ್, ಅಮೊರಿತಾ, ಹಿತ್ತಿಯಾ, ಪೆರಿಜಿಯಾ ಅನಿ ಕಾನಾನ್, ಹಿವ್ವಿಯಾ, ಜೆಬುಸಿಯಾ ಹೆಂಚಿ ಲೊಕಾ ರ್‍ಹಾತಲ್ಯಾ ಗಾಂವಾಕ್ ತುಮ್ಕಾ ಪಾವಸ್ತಾ, ಮಿಯಾ ತೆಂಕಾ ಸಗ್ಳ್ಯಾಕ್ನಿ ನಾಶ್ ಕರ್ತಾ. 24 ತುಮಿ ತೆಂಚ್ಯಾ ದೆವಾಕ್ನಿ ನಮಸ್ಕಾರ್ ಕರುಚೆ ನ್ಹಯ್, ಫುಜ್ಯಾ ಕರುಚೆ ನ್ಹಯ್, ಅನಿ ತೆನಿ ಕರಲ್ಲಿ ನೆಮಾ ಪಾಳುಚೆ ನ್ಹಯ್, ತ್ಯಾ ಲೊಕಾಕ್ನಿ ನಾಶ್ ಕರುನ್ ತೆಂಚಿ ಮುರ್ತಿಯಾ ನಾಶ್ ಕರುಚೆ. 25 ತುಮ್ಚೊ ದೆವ್ ಅನಿ ಸರ್ವೆಸ್ಪರ್ ಹೊವ್ನ್ ಹೊತ್ತ್ಯಾ ಮಾಕಾ ಎಕ್ಲ್ಯಾಕುಚ್ ಆರಾದನ್ ಕರುಚೆ, ತನ್ನಾ ತುಮ್ಚ್ಯಾ ಜೆವ್ನಾ, ಖಾನಾಕ್ ಮಿಯಾ ಆಶಿರ್ವಾದ್ ಕರ್ತಾ, ಅನಿ ತುಮ್ಚ್ಯಾಕ್ಡೆ ಕಸ್ಲೆ ದುಕ್ನೆಬಿ ನಾ ಸಾರ್ಕೆ ಕರ್ತಾ. 26 ತುಮ್ಚ್ಯಾ ಗಾಂವಾತ್ ಗರಬ್ ಪಡುನ್ ಜಾತಲೆ ಹೊಂವ್ದಿತ್, ಪೊರಾ ಹೊಯ್ನಸಲ್ಲೆ ಹೊಂವ್ದಿತ್ ರ್‍ಹಾಯ್ನಾ, ತುಮ್ಕಾ ಫುರಾ ಆಯಿಸ್ ದಿತಾ.

27 ತುಮಿ ಜಾತಲ್ಯಾ ಸಗ್ಳ್ಯಾ ಕಡೆ ಮಿಯಾ ಲೊಕಾಂಚ್ಯಾ ಮನಾತ್ನಿ ಭಿಂಯೆ ಹಾನುನ್ ತಳ್ಮಳೊ ಹೊಯ್ ಸಾರ್ಕೆ ಕರುನ್, ತುಮ್ಕಾ ವಿರೊದ್ ಕರ್‍ತಲ್ಯಾಕ್ನಿ ಪಳುನ್ ಜಾಯ್ ಸಾರ್ಕೆ ಕರ್ತಾ. 28 ಮಿಯಾ ತುಮ್ಚ್ಯಾನ್ ಫಿಡೆ ಗಾಂಜ್ಡಾಚಿ ಮಾಸ್ಕಾ ಧಾಡುನ್ ತ್ಯಾ ಹಿವ್ವಿಯಾಕ್ನಿ, ಕಾನಾನ್ಯಾಕ್ನಿ ಅನಿ ಹಿತ್ತಿಯಾಕ್ನಿ ತುಮ್ಚ್ಯಾ ಇದ್ರಾಕ್ ಇಬೆರಾಯ್ನಸ್ತಾನಾ ಪಳುನ್ ಜಾಯ್ ಸಾರ್ಕೆ ಕರ್ತಾ. 29 ಖರೆ ಮಿಯಾ ತೆಂಕಾ ಥೈತ್ನಾ ಎಕುಚ್ ವರ್ಸಾತ್ ಪಳ್ಸಿನಾ, ಕಶ್ಯಾಕ್ ಮಟ್ಲ್ಯಾರ್ ಥೈ ಲೊಕಾ ಕಮ್ಮಿ ಹೊಲ್ಲ್ಯಾ ವೈನಾ ಡಂಗ್ಳಿಚಿ ಜನಾವರಾ ತುಮ್ಕಾ ತರಾಸ್ ದಿತಿಲ್ . 30 ತುಮಿ ವಾಡುನ್ ಸಗ್ಳ್ಯಾಗಾಂವಾತ್ ಪಗ್ಳಿಪತರ್ ತೆಂಕಾ ಉಲ್ಲ್ಯಾ ಉಲ್ಲ್ಯಾಚ್ ಲೊಕಾಕ್ನಿ ಧಾಡುನ್ಗೆತ್ ರ್‍ಹಾತಾ. 31 ತಾಂಬ್ಡ್ಯಾ ಸಮುಂದರಾಕ್ನಾ ಪಿಲಿಸ್ಟಿಯಾಂಚ್ಯಾ ದೆಸಾಕ್ನಾ ಜಗ್ಗೊಳ್ಲ್ಯಾ ಸಮುಂದರಾ ಪತರ್ ಅನಿ ಹ್ಯಾ ಡಂಗ್ಳಿಕ್ನಾ ಯುಪ್ರೆಟಿಸ್ ಮನ್ತಲ್ಯಾ ಮೊಟ್ಟ್ಯಾ ನ್ಹಯ್ ಪತರ್ಬಿ ಹೊತ್ತೆ ಸಗ್ಳೆ ಗಾಂವಾ ತುಮ್ಕಾ ಮನುನ್ ನೆಮ್ಸುನ್ ಥೈ ವಸ್ತಿ ರ್‍ಹಾತಲ್ಯಾ ಲೊಕಾಕ್ನಿ ತುಮ್ಚ್ಯಾ ಖಾಲ್ತಿ ಕರುನ್ ದಿತಾ. 32 ತುಮಿ ತೆಂಚ್ಯಾ ವಾಂಗ್ಡಾ ಹೊಂವ್ದಿತ್ ನಾತರ್ ತೆಂಚ್ಯಾ ದೆವಾಂಚ್ಯಾ ವಾಂಗ್ಡಾ ಹೊಂವ್ದಿತ್ ಕಸ್ಲೆಬಿ ಕರಾರ್ ಕರುನ್ ಘೆವ್ಕ್ ನ್ಹಯ್. 33 ತೆನಿ ತುಮ್ಚ್ಯಾ ಗಾಂವಾತ್ ವಸ್ತಿ ರ್‍ಹಾತಲೆ ನಕ್ಕೊ, ತೆನಿ ತುಮ್ಚ್ಯಾ ವಾಂಗ್ಡಾ ರಾಲ್ಯಾರ್ ಮಾಜ್ಯಾ ವಿಶಯಾತ್ ತುಮಿ ವಿರೊದ್ ಹೊವ್ನ್ ಬುರ್ಶಿ ಬುದ್ದ್ ಕರಿಸಾರ್ಕೆ ಹೊಯ್ಲ್, ತುಮಿ ತೆಂಚ್ಯಾ ದೆವಾಕ್ನಿ ಫುಜ್ಯಾ ಕರ್ಲ್ಯಾರ್ ತಿ ಫುಜ್ಯಾ ತುಮ್ಕಾ ಪಾಸೊ ಹೊವ್ನ್ ರ್‍ಹಾತಾ.