Êxodo 24

ನೆಮಾಂಚೆ ಧೃಡಿಕರನ್

1 ಮೊಯ್ಜೆಕ್ ಸರ್ವೆಸ್ಪರ್ ಸಾಯ್ಬಾನ್, ತಿಯಾ ಆರೊನ್, ನಾದಾಬ್ ಅನಿ ಅಬಿಹು ಅನಿ ಇಜ್ರಾಯೆಲಾಂಚ್ಯಾ ಜಾಂನ್ತ್ಯಾತ್ನಿ ಸತ್ತರ್ ಲೊಕಾ ಹಿ ಮಡ್ಡಿ ಚಡುನ್ ಸರ್ವೆಸ್ಪರ್ ಹೊವ್ನ್ ಹೊತ್ತ್ಯಾ ಮಾಜೆಕ್ಡೆ ಯೆವ್ನ್ ಧುರುಚ್ ಇಬೆರಾವ್ನ್ ಮಾಕಾ ಪಾಂಯ್ ಪಡುಚೆ. 2 ಮೊಯ್ಜೆ ಎಕ್ಲೊ ಸೊಡುನ್ ಅನಿ ತೆಚೆ ವಾಂಗ್ಡಿ ಕೊನ್ಬಿ ಮಾಜ್ಯಾ ಜಗ್ಗೊಳ್ ಎವ್ಚೆ ನ್ಹಯ್, ಹಿ ಹುರಲ್ಲಿ ಲೊಕಾ ಮಡ್ಡಿ ವರ್‍ತಿ ಚಡ್ತಲೆಚ್ ನಕ್ಕೊ, ಮನುನ್ ಸಾಂಗ್ಲ್ಯಾನ್. 3 ಮೊಯ್ಜೆನ್ ಸರ್ವೆಸ್ಪರಾಚಿ ನೆಮಾ ಅನಿ ಹುಕುಮಾ ಲೊಕಾಂಚ್ಯಾಕ್ಡೆ ಯೆವ್ನ್ ಸಾಂಗ್ಲ್ಯಾನ್, ಸಗ್ಳ್ಯಾ ಲೊಕಾನಿ ಅಮಿ ಸರ್ವೆಸ್ಪರಾಚ್ಯಾ ಹುಕುಮಾಂಚ್ಯಾ ಸಾರ್ಕೆ ಕರುನ್ ಘೆವ್ನ್ ಚಲ್ತಾಂವ್ ಮನುನ್ ಎಕುಚ್ ಧನಾನ್ ಸಾಂಗ್ಲ್ಯಾನಿ. 4 ಮೊಯ್ಜೆನ್ ಸರ್ವೆಸ್ಪರಾಚಿ ಹುಕುಮಾ ಸಗ್ಳಿ ಲಿವ್ನ್ ಥವ್ಲ್ಯಾನ್; ಅನಿ ಸಕ್ಕಾಳಿ ಉಟುನ್ ಮಡ್ಡಿಚ್ಯಾ ಬುಡಿ ಎಕ್ ಬಲಿಭೆಟ್ವುತಲೊ ಜಾಗೊ ಭಾಂದ್ಲ್ಯಾನ್, ಇಜ್ರಾಯೆಲಾಂಚ್ಯಾ ಬಾರಾ ಘರಾನಾಕ್ನಿ ಬಾರಾ ಗುಂಡ್ಯಾಂಚೆ ಖಾಂಬೆ ತಯಾರ್ ಕರ್ಲ್ಯಾನಿ. 5 ಅನಿ ಇಜ್ರಾಯೆಲ್ ಲೊಕಾಂಚ್ಯಾ ದಾಂಡ್ಗ್ಯಾ ಮಾನ್ಸಾಕ್ನಿ ಸರ್ವೆಸ್ಪರಾ ಸಾಟ್ನಿ ಜಾಳ್ವುತಲಿ ಬಲಿಯಾ ಭೆಟ್ವು ಸಾರ್ಕೆ ಅನಿ ಸಮಾಧಾನಾಚ್ಯಾ ಬಲಿಸಾಟ್ನಿ ಪಾಡೆ ಬಲಿ ಭೆಟ್ವುಕ್ ಒಪ್ಕಿ ದಿಲ್ಯಾನ್. 6 ಅನಿ ತ್ಯಾ ಬಲಿ ಭೆಟ್ವಲ್ಲ್ಯಾ ರಕ್ತಾತ್ಲೊ ಅರ್ದೊಭಾಗ್ ಕಾಡುನ್ ಆಯ್ದಾನಾತ್ನಿ ಭರಲ್ಲ್ಯಾನ್, ಅನಿ ಹುರಲ್ಲೆ ಅರ್ದೆ ಬಲಿಭೆಟ್ವುತಲ್ಯಾ ಜಾಗ್ಯಾ ವರ್‍ತಿ ಸಿಪಡ್ಲ್ಯಾನ್. 7 ಮಾನಾ ನೆಮಾಂಚೆ ಪುಸ್ತಕ್ ಘೆವ್ನ್ ಲೊಕಾಕ್ನಿ ಆಯ್ಕಿಸಾರ್ಕೆ ವಾಚ್ಲ್ಯಾನ್, ತೆನಿ ತೆ ಆಯ್ಕ್ ಲ್ಲ್ಯಾ ಮಾನಾ ಅಮಿ ಸರ್ವೆಸ್ಪರಾಚಿ ಹುಕುಮಾ ಸಗ್ಳಿ ಪಾಳ್ತಾಂವ್, ಅನಿ ತೆಂಕಾ ಖಾಲ್ತಿ ಹೊತಾವ್, ಮಟ್ಲ್ಯಾನಿ. 8 ತನ್ನಾ ಮೊಯ್ಜೆನ್ ಆಯ್ದಾನಾಂತ್ಲೆ ರಗಾತ್ ಘೆವ್ನ್ ಲೊಕಾಂಚ್ಯಾ ವರ್‍ತಿ ಸಿಪ್ಡುನ್, ಅಬಕಾ, ಹೆಚ್ ರಗಾತ್ ತೆ ಹ್ಯಾ ಪುಸ್ತಕಾತ್ ಸಾಂಗಲ್ಲ್ಯಾ ಸಗ್ಳ್ಯಾ ಹುಕುಮಾಂಚ್ಯಾ ಸಾರ್ಕೆ ಸರ್ವೆಸ್ಪರಾನ್ ತುಮ್ಚ್ಯಾ ವಾಂಗ್ಡಾ ಕರುನ್ಗೆಟಲ್ಲ್ಯಾ ಕರಾರಾಕ್ನಿ ಘಟ್ ಕರಲ್ಲೆ ಮಟ್ಲ್ಯಾನ್. 9 ಮೊಯ್ಜೆ, ಆರೊನ್, ನಾದಾಬ್ ಅನಿ ಅಬಿಹು ವಾಂಗ್ಡಾ ಇಜ್ರಾಯೆಲಾಂಚಿ ಸತ್ತರ್ ಲೊಕಾ ಮಡ್ಡಿ ವರ್‍ತಿ ಚಡ್ಲಿ. 10 ತೆಂಕಾ ಇಜ್ರಾಯೆಲಾಂಚೊ ಸರ್ವೆಸ್ಪರ್ ದಿಸ್ಲೊ, ಮಳ್ಬಾಂಚ್ಯಾ ತಾಂಡ್ಯಾ ಸಾರ್ಕೆ ಲೈ ನಿತಳ್ ಹೊತ್ತೆ, ಇಂದ್ರನಿಳ್ ಮನಿಚೊ ಜಾಗೊ ತೆಂಚೊ ಪಾಯ್ ಥವ್ತಲಿ ಮ್ಹನಿ ಹೊಲ್ಲಿ. 11 ತೆನಿ ಇಜ್ರಾಯೆಲಾಂಚ್ಯಾ ಜಾಂನ್ತ್ಯಾಕ್ನಿ ಕಾಯ್ಬಿ ನಾಶ್ ಕರುಕ್ನಾ, ತ್ಯಾ ಜಾಂನ್ತ್ಯಾನಿ ದೆವಾಕ್ ಬಗ್ಲ್ಯಾನಿ, ಅನಿ ಮಾನಾ ಜೆವಾನ್ ಕರ್ಲ್ಯಾನಿ.

ಸಿನಾಯ್ ಮಡ್ಡಿರ್ ಮೊಯ್ಜೆ

12 ಸರ್ವೆಸ್ಪರಾನ್ ಮೊಯ್ಜೆಕ್, ತಿಯಾ ಮಡ್ಡಿ ಚಡುನ್ ಯೆವ್ನ್ ಮಾಜ್ಯಾ ಜಗ್ಗೊಳುಚ್ ರಾ, ತಿ ಶಾಸ್ತರಾ ಅನಿ ಮಾಜಿ ಹುಕುಮಾ ತಿಯಾ ಲೊಕಾಕ್ನಿ ಶಿಕಾಪ್ ಕರುಕ್ ಸಾಟ್ನಿ ಗುಂಡ್ಯಾ ವೈನಿ ಲಿವಲ್ಲೆ ಹೊತ್ತೆ ಮಿಯಾ ತುಕಾ ದಿತಾ ಮಟ್ಲ್ಯಾನ್. 13 ಮೊಯ್ಜೆನ್ ಅಪ್ನಾಚೊ ಶಿಸ್ ಜೊಶ್ವಾಕ್ ಘೆವ್ನ್ ದೆವಾಚ್ಯಾ ಮಡ್ಡಿಚ್ಯಾ ತುದಿಕ್ ಗೆಲೊ. 14 ಹೆಜ್ಯಾನ್ ಅದ್ದಿ ತೆನಿ ಜಾಂನ್ತ್ಯಾ ಲೊಕಾಕ್ನಿ, ಮಿಯಾ ಪರ್‍ತುನ್ ತುಮ್ಚ್ಯಾಕ್ಡೆ ಯೆಯ್ ಪತರ್ಬಿ ತುಮಿ ಹಿತ್ತೆಚ್ ರಾಕುನ್ಗೆತ್ ರಾವಾ, ಆರೊನ್ ಅನಿ ಹುರಲ್ಲಿ ಲೊಕಾ ತುಮ್ಚ್ಯಾಕ್ಡೆಚ್ ರ್‍ಹಾತಾತ್, ತುಮ್ಚ್ಯಾಕ್ಡೆ ಹೊಯ್ನಸಲ್ಲಿ ಕಾಯ್ತರ್ಬಿ ವಿಶಯ್ ರಾಲ್ಯಾರ್ ತೆಂಚ್ಯಾಕ್ಡೆ ಜಾವ್ನ್ ಸಾಂಗಾ, ಮಟ್ಲ್ಯಾನ್. 15 ಮಾನಾ ಮೊಯ್ಜೆ ಮಡ್ಡಿ ವರ್‍ತಿ ಚಡ್ಲೊ ಅನಿ ಮೊಡಾನ್ ತೆಕಾ ಧಾಪ್ಲ್ಯಾನ್. 16 ಅನಿ ಸರ್ವೆಸ್ಪರಾಚೊ ಉಜ್ವೊಡ್ ಸಿನಾಯ್ ಮಡ್ಡಿ ವರ್‍ತಿ ಇಬೆ ರ್‍ಹಾಲೊ, ತ್ಯಾ ಮೊಡಾನ್ ಸಾ ದಿಸ್ ಪತರ್ಬಿ ಮಡ್ಡಿಕ್ ಧಾಪ್ಲ್ಯಾನ್, ಸಾತ್ವ್ಯಾ ದಿಸಿ ಸರ್ವೆಸ್ಪರಾನ್ ಮೊಯ್ಜೆಕ್ ಮೊಡಾಂತ್ನಾ ಬಲ್ವುಲ್ಯಾನ್. 17 ಇಜ್ರಾಯೆಲ್ ಲೊಕಾಕ್ನಿ ಸರ್ವೆಸ್ಪರಾಚೊ ಉಜ್ವೊಡ್ ಮಡ್ಡಿ ವರ್‍ತಿ ಲೈ ಹೊಳಾವ್ತಲ್ಯಾ ಆಗಿ ಸಾರ್ಕೆ ದಿಸ್ಲೆ. 18 ಮೊಯ್ಜೆನ್ ತ್ಯಾ ಮೊಡಾತ್ ಗುಸುನ್ ಮಡ್ಡಿ ವರ್‍ತಿ ಚಡ್ಲ್ಯಾನ್, ತೊ ತ್ಯಾ ಮಡ್ಡಿ ವರ್‍ತಿ ಚಾಳಿಸ್ ರ್‍ಹಾತ್ ಅನಿ ದಿಸ್ ರಾಲೊ.