Êxodo 37

ಕರಾರಾಚಿ ಪೆಟಿ ತಯಾರ್ ಕರ್‍ತಲೆ

1 ಬೆಚೆಲಾನ್ ಜಾಲಿಚ್ಯಾ ನಾಕ್ಡಾನ್ ಕರಾರಾಚಿ ಪೆಟ್ ಕರ್ಲ್ಯಾನ್, ತೆ ಸಾಡೆ ದೊನ್ ಹಾತ್ ಲಾಂಬಿ ಸಾಡೆ ಎಕ್ ಹಾತ್ ರುಂದ್ ಅನಿ ಸಾಡೆ ಎಕ್ ಹಾತ್ ಉಪ್ಪರ್ ಹೊತ್ತೆ. 2 ತೆಕಾ ಶುದ್ದ್ ಸೊನ್ಯಾಚಿ ತಗ್ಡಾ ಭಾಯ್ರ್ ಅನಿ ಭಿತ್ತುರ್ ಮಾರ್ಲ್ಯಾನಿ, ತೆಚ್ಯಾ ಭೊತ್ಯಾನಿ ಸೊನ್ಯಾಚೆ ಮುಕುಟ್ ಭಾಂದಸ್ಲ್ಯಾನಿ. 3 ಚಾರ್ ಸೊನ್ಯಾಚಿ ಕಾಕ್ನಾ ಕರುನ್, ತೆಚ್ಯಾ ಚಾರಿ ಮುಲ್ಯಾಕ್ನಿ ಎಕೆಕ್ ಭಾಜುನ್ ದೊ ದೊನ್ ಕಾಕ್ನಾ ಥವ್ಲ್ಯಾನಿ. 4 ಅನಿ ಜಾಲಿಚ್ಯಾ ಝಾಡಾಚೆ ದಾಂಡೆ ಕರುನ್, ತೆಕಾ ಸೊನ್ಯಾಚಿ ತಗ್ಡಾ ಮಾರುನ್, 5 ಕರಾರಾಚಿ ಪೆಟಿ ಉಕ್ಲುಕ್ ಸಾಟ್ನಿ ತೆಚ್ಯಾ ದೊನಿ ಕಡೆ ಹೊತ್ತ್ಯಾ ಕಾಕಾತ್ನಿ ಘಾಟ್ಲ್ಯಾನಿ. 6 ತವ್ಡೆಚ್ ನಸ್ತಾನಾ, ಶುದ್ದ್ ಸೊನ್ಯಾನ್ ಕ್ರಪಾಸನ್ ಕರ್ಲ್ಯಾನ್, ತೆ ಸಾಡೆ ದೊನ್ ಹಾತ್ ಲಾಂಬಿ, ಸಾಡೆ ಎಕ್ ಹಾತ್ ರುಂದಿ ಹೊತ್ತೆ. 7 ಕ್ರಪಾಸನಾಚಿ ದೊನಿ ತುದಿಯಾಕ್ನಿ ಸೊನ್ಯಾಚಿ ದೊನ್ ಕೆರುಬಿಯಾಂಚಿ ಆಕಾರಾ ನಕಾಸಿಚ್ಯಾ ಕಾಮಾನ್ ಕರ್ಲ್ಯಾನಿ. 8 ಕ್ರಪಾಸನಾಚ್ಯಾ ಎಕೆಕ್ ತುದಿಕ್ ಎಕೆಕ್ ಕೆರುಬಿ ಕರುನ್ ಜೊಡಸ್ಲ್ಯಾನಿ. 9 ತಿ ಕೆರುಬಿಯಾ ಫಾಕುಟೆ ವರ್‍ತಿ ಪಗಳಲ್ಲೆ ಅನಿ ಕ್ರಪಾಸನ್ ಅಪ್ನಾಚ್ಯಾ ಫಾಕುಟ್ಯಾನಿ ಧಾಪಿ ಸಾರ್ಕೆ ಹೊತ್ತೆ, ತೆಂಚಿ ತೊಂಡಾ ಇದ್ರಾಬದ್ರಾಕ್ ರಾವ್ನ್ ಕರ್ಪಾಸನಾಕ್ ಬಗುಲಾಗಲ್ಲಿ.

ಸರ್ವೆಸ್ಪರಾಕ್ ಬಾರಿಕ್ಲಿ ಭೆಟ್ವುಕ್ ಮಾಚೊ ತಯಾರ್ ಕರ್‍ತಲೆ

10 ಅನಿ ತೆನಿ ಜಾಲಿಚ್ಯಾ ಝಾಡಾನ್ ಮಾಚೊ ಕರ್ಲ್ಯಾನ್, ತೊ ದೊನ್ ಹಾತ್ ಲಾಂಬಿ, ಎಕ್ ಹಾತ್ ರುಂದಿ ಅನಿ ಸಾಡೆ ಎಕ್ ಹಾತ್ ಉಪ್ಪರ್ ಹೊತ್ತೊ. 11 ತೆಕಾ ಶುದ್ದ್ ಸೊನ್ಯಾಚಿ ತಗ್ಡಾ ಮಾರುನ್, ಭೊತ್ಯಾನಿ ಸೊನ್ಯಾಚಿ ಮುಕುಟಾ ಭಾಂದ್ಲ್ಯಾನ್. 12 ಮಾಚ್ಯಾಚ್ಯಾ ಭೊತ್ಯಾನ್ ಅರ್ದೊ ಹಾತ್ ರುಂದ್ ಅಡ್ವಿ ಪಟ್ಟಿ ಕರುನ್ ತೆಕಾಬಿ ಸೊನಾಚೊ ಮುಕುಟ್ ಭಾಂದ್ಲ್ಯಾನ್, 13 ಮಾಚ್ಯಾಕ್ ಉಕಲ್ತಲೆ ದಾಂಡೆ ಮಿಳ್ವುಕ್ ಸಾಟ್ನಿ, ತೆಕಾ ಚಾರ್ ಸೊನ್ಯಾಚಿ ಕಾಕ್ನಾ ಕರ್ಸುನ್, ತೆಚ್ಯಾ ಚಾರಿ ಪಾಯಾಕ್ನಿಬಿ ಲಾವ್ಲ್ಯಾನ್. 14 ತಿ ಕಾಕ್ನಾ ಅಡ್ವ್ಯಾ ಪಟ್ಟಿಕ್ ಲಾಗಲ್ಲಿ ಹೊತ್ತಿ. 15 ಮಾಚೊ ಉಕ್ಲುಕ್ ಜಾಲಿಚ್ಯಾ ಝಾಡಾಚೆ ದಾಂಡೆ ಕರುನ್, ತೆಂಕಾ ಸೊನ್ಯಾಚಿ ತಗ್ಡಾ ಮಾರ್‍ಲ್ಯಾನ್. 16 ಮಾಚ್ಯಾ ವರ್‍ತಿ ಥವ್ತಲಿ ಸಾಮಾನಾ ಮಟ್ಲ್ಯಾರ್, ಮೊಟಿ ಆಯ್ದಾನಾ, ಧುಪಾಚಿ ಆರತ್, ಹುಜಿಯಾ, ವಾಯ್ನಾ ಭೆಟುಕ್ ಪಾಜೆ ಹೊಲ್ಲಿ ಆಯ್ದಾನಾ, ಹೆ ಸಗ್ಳೆ ಶುದ್ದ್ ಸೊನ್ಯಾನಿ ಕರ್ಲ್ಯಾನ್.

ದಿವ್ಯಾಚೊ ಖಾಂಬೊ ತಯಾರ್ ಕರ್‍ತಲೆ

17 ಶುದ್ದ್ ಸೊನ್ಯಾಚೊ ದಿವ್ಯಾಚೊ ಖಾಂಬೊ ಕರ್ಲ್ಯಾನಿ, ಅನಿ ತೆಚೊ ಮುಳ್ ಅನಿ ಖಾಂಬೊ ನಕಾಸಾಚ್ಯಾ ಕಾಮಾನ್ ಕರ್ಲ್ಯಾನ್, ತ್ಯಾ ದಿವ್ಯಾಚ್ಯಾ ಖಾಂಬ್ಯಾರ್ ಫುಲ್ಲ್ಯಾಚ್ಯಾ ಆಯ್ದಾನಾಚ್ಯಾ ಸಾರ್ಕೆ ಅನಿ ಫುಲ್ಲಾಂಚ್ಯಾ ಸಾರ್ಕೆ ಶಿಂಗಾರ್ ಹೊತ್ತೆ. 18 ಖಾಂಬ್ಯಾಚ್ಯಾ ಎಕೆಕ್ ಬಾಜುಕ್ ತಿತಿನ್ ಟಾಂಕಿಯಾ ಸಗ್ಳಿ ಮಿಳುನ್ ಸಾ ಟಾಂಕಿಯಾ ಹೊತ್ತಿ. 19 ಹರ್ ಎಕ್ ಟಾಂಕಿಕ್ ಬಾದಾಮಿಚ್ಯಾ ಫುಲ್ಲಾ ಸಾರ್ಕೆ ತಿತಿನ್ ಫುಲ್ಲಾಂಚೊ ಶಿಂಗಾರ್ ಹೊತ್ತೆ, ಎಕೆಕ್ ಶಿಂಗಾರಾಕ್ ಎಕ್ ಫುಲ್ಲಾಚೆ ಆಯ್ದಾನ್ ಅನಿ ಫುಲ್ಲಾ ಹೊತ್ತಿ, ಸಾ ಟಾಂಕಿಯಾಬಿ ತಸೆಚ್ ಕರ್ಲ್ಯಾನ್. 20 ದಿವ್ಯಾಚ್ಯಾ ಖಾಂಬ್ಯಾಚ್ಯಾ ಟಾಂಕಿಕ್ ಫುಲ್ಲಾಚಿ ಆಯ್ದಾನಾ ಅನಿ ಫುಲ್ಲಾಚೆ ಮೊಗ್ಗೆ ಹೊತ್ತೆ, ಬಾದಾಮಿ ಫುಲ್ಲಾ ಸಾರ್ಕೆ ಚಾರ್ ಫುಲ್ಲಾಚಿ ಶಿಂಗಾರ್ ಹೊತ್ತಿ. 21 ದೊದೊನ್ ಟಾಂಕಿಯಾ ಫಾಟೆ ಫುಟಲ್ಲ್ಯಾ ಜಾಗ್ಯಾನಿ, ಎಕೆಕ್ ಫುಲ್ಲಾಚೆ ಆಯ್ದಾನ್ ಹೊತ್ತೆ. 22 ಫುಲ್ಲಾಚ್ಯಾ ಆಯ್ದಾನಾನಿ ಅನಿ ಟಾಂಕಿಯಾ ಹೊತ್ತೊ ದಿವ್ಯಾಚೊ ಖಾಂಬೊ ಶುದ್ದ್ ಸೊನ್ಯಾನ್ ಅನಿ ನಕಾಸಿಚ್ಯಾ ಕಾಮಾನ್ ಕರ್ಲ್ಯಾನಿ. 23 ತೆಚೆ ಸಾತ್ ದಿವೆ ಅನಿ ತೆಕಾ ಕಾರ್ತಲೆ ಅನಿ ದಿವ್ಯಾಚೆ ಕುಡಿ ಕಾಡ್ತಲೆ ಆಯ್ದಾನ್ ಶುದ್ದ್ ಸೊನ್ಯಾನ್ ಕರ್ಲ್ಯಾನ್. 24 ದಿವ್ಯಾಚೊ ಖಾಂಬೊ ಅನಿ ತೆಚಿ ಸಾಮಾನಾ ತಿಸಾರ್ ಚಾರ್ ಕಿಲೊ ಶುದ್ದ್ ಸೊನ್ಯಾಚಿ ಹೊತ್ತಿ.

ಧುಪ್ ಜಾಳ್ವುಕ್ ಧುಪಾಚೊ ಕಟ್ಟೊ ತಯಾರ್ ಕರ್‍ತಲೆ

25 ತೆನಿ ಹಾತ್ ಎಕ್ ಲಾಂಬಿ ಅನಿ ಎಕ್ ಹಾತ್ ರುಂದಿ ಚಾರಿ ಮುಲ್ಲ್ಯಾನಿ ಚವ್ಕ್ ಅನಿ ದೊನ್ ಹಾತ್ ಉಪ್ಪರ್ ಜಾಲಿಚ್ಯಾ ಝಾಡಾನ್ ಧುಪ್ ಭೆಟ್ವುತಲೊ ಕಟ್ಟೊ ಕರ್ಲ್ಯಾನ್. 26 ತೆಚಿ ಶಿಂಗಾ ತೆಚ್ಯಾ ವಾಂಗ್ಡಾ ಮಿಳುನ್ ಹೊತ್ತಿ, ತೆಚ್ಯಾ ಚಾರಿ ಮುಲ್ಲ್ಯಾಕ್ನಿಬಿ ಅನಿ ಶಿಂಗಾಕ್ನಿಬಿ ಶುದ್ದ್ ಸೊನ್ಯಾಚಿ ತಗ್ಡಾ ಮಾರ್‍ಲ್ಯಾನ್, ಅನಿ ಭೊತ್ಯಾನ್ ಸೊನ್ಯಾಚಿ ತೊರ್ನಾ ಸಾರ್ಕೆ ಶಿಂಗಾರ್ ಭಾಂದಸ್ಲ್ಯಾನ್. 27 ತೆ ಉಕಲ್ತಲೆ ದಾಂಡೆ ಮಿಳ್ವುಕ್ ಸಾಟ್ನಿ, ತೆಜ್ಯಾ ಖಾಲ್ತಿ ಕಟ್ಟ್ಯಾಚ್ಯಾ ದೊನಿ ಭಾಜುಚ್ಯಾ ಮುಲ್ಲ್ಯಾಕ್ನಿ ದೊದೊನ್ ಸೊನ್ಯಾಚಿ ಕಾಕ್ನಾ ಭಾಂದ್ಲ್ಯಾನ್. 28 ಕಟ್ಟೊ ಉಕ್ಲುಕ್ ಜಾಲಿಚ್ಯಾ ಝಾಡಾಚೆ ದಾಂಡೆ ಕರುನ್, ತೆಂಕಾ ಸೊನ್ಯಾಚಿ ತಗ್ಡಾ ಮಾರ್‍ಲ್ಯಾನ್.

ಅಭಿಶೆಕಾಚೆ ತೆಲ್ ಅನಿ ಧುಪ್ ತಯಾರ್ ಕರ್‍ತಲೆ

29 ತವ್ಡೆಚ್ ನಸ್ತಾನಾ, ತೆನಿ ಸರ್ವೆಸ್ಪರಾಚ್ಯಾ ಸೆವಾಕ್ ನೆಮಲ್ಲ್ಯಾ ಅಭಿಶೆಕಾಚೆ ತೆಲ್ ಅನಿ ಬರ್ಯಾ ವಾಸೆಚ್ಯಾ ಪಾನಿಯಾನಿ ಕರಲ್ಲೆ ಶುದ್ದ್ ಧುಪಾಚೆ ಪಾನಿ, ಬರ್ಯಾ ವಾಸೆಚೆ ಪಾನಿ ತಯಾರ್ ಕರ್‍ತಲ್ಯಾಂಚ್ಯಾ ಶಿಕಾಪಾ ಸಾರ್ಕೆ ಕರ್ಲ್ಯಾನ್.