ನಿರ್ಗಮನ್ 4

ದೆವಾನ್ ಮೊಯ್ಜೆಕ್ ದಿವ್ನ್ ಹೊಲ್ಲಿ ಚಮತ್ಕಾರಾಂಚಿ ಬಳ್

1 ತನ್ನಾ ಮೊಯ್ಜೆನ್ ಸರ್ವೆಸ್ಪರಾಕ್ ಜವಾಬ್ ದಿವ್ನ್, "ಖರೆ, ತಿ ಲೊಕಾ ಮಾಜೆರ್ ವಿಶ್ವಾಸ್ ಕರಿನಸ್ತಾನಾ ಮಾಜ್ಯಾ ಗೊಸ್ಟಿಕ್ ಕಾನ್ ದಿಯ್ನಸ್ತಾನಾ ಜಾತಾತ್ ಕಿ ಕಾಯ್ಕಿ, ಸರ್ವೆಸ್ಪರ್ ದೆವ್ ತುಕಾ ದಿಸುಕುಚ್ ನಾ ಮನುನ್ ಸಾಂಗ್ಲ್ಯಾರ್ ಮಿಯಾ ಕಾಯ್ ಕರುಚೆ?" ಮಟ್ಲ್ಯಾನ್.

2 ತನ್ನಾ ಸರ್ವೆಸ್ಪರಾನ್ ತೆಕಾ, "ತುಜ್ಯಾ ಹಾತಿತ್ ಹೊತ್ತೆ ಕಾಯ್?"

ಮನುನ್ ಇಚಾರ್‍ಲ್ಯಾನಿ, ತೆನಿ, "ಹ್ಯೊ, ದಾಂಡೊ" ಮಟ್ಲ್ಯಾನ್. 3 ಸರ್ವೆಸ್ಪರಾನ್ ತೆಕಾ, "ತೊ ದಾಂಡೊ ಜಿಮ್ನಿ ವರ್‍ತಿ ಟಾಕ್" ಮಟ್ಲ್ಯಾನ್. ಜಿಮ್ನಿ ವರ್‍ತಿ ಟಾಕ್ತಾನಾಚ್ ತೊ ದಾಂಡೊ ಸಾಪ್ ಹೊಲೊ! ತೆ ಬಗುನ್ ಮೊಯ್ಜೆ ಭಿಂವ್ನ್ ಪಳುನ್ ಗೆಲೊ. 4 ತನ್ನಾ ಸರ್ವೆಸ್ಪರಾನ್ ತೆಕಾ, "ಹಾತ್ ಫಿಡೆ ಕರುನ್ ತೆಚಿ ಸೆಪ್ಡಿ ಧರ್" ಮಟ್ಲ್ಯಾನ್, ತಸೆಚ್ ಧರಲ್ಲ್ಯಾ ತನ್ನಾ ತೊ ದಾಂಡೊ ಹೊಲೊ. 5 ತನ್ನಾ ಸರ್ವೆಸ್ಪರಾನ್ ತೆಕಾ, "ಹೆಚ್ಯಾ ವೈನಾ ತಿ ಲೊಕಾ ಅಪ್ಲೆ ಪುರ್ವಜ್ ಅಬ್ರಾಹಾಮ್, ಇಸಾಕ್ ಅನಿ ಜಾಕೊಬಾಚೊ ದೆವ್ ಹೊವ್ನ್ ಹೊತ್ತೊ ಸರ್ವೆಸ್ಪರ್ ತುಕಾ ದಿಸಲೊ ಖರೆಚ್ ಮನ್ತಲೆ ವಿಶ್ವಾಸ್ ಕರ್‍ತಾತ್" ಮಟ್ಲ್ಯಾನ್.

6 ಅನಿ ಸರ್ವೆಸ್ಪರಾನ್ ತೆಕಾ, "ತುಜೊ ಹಾತ್ ಛಾತಿ ವೈರ್ ತುಜ್ಯಾ ಅಂಗಿತ್ ಘಾಲ್" ಮಟ್ಲ್ಯಾನ್, ತಸೆಚ್ ತೆನಿ ಛಾತಿ ವೈರ್ ಅಂಗಿತ್ ಥವ್ನ್ ಭಾಯ್ರ್ ಕಾಡಲ್ಯಾ ತನ್ನಾ ಹಾತ್ ಖೊಡ್ ಉಜಳಲ್ಲ್ಯಾ ಸಾರ್ಕೊ ಹೊವ್ನ್ ಬರ್ಪ್ ಸಾರ್ಕೊ ಫಾಂಡ್ರೊ ದಿಸ್ಲೊ. 7 ಸರ್ವೆಸ್ಪರಾನ್ ತೆಕಾ "ತುಜೊ ಹಾತ್ ಪರ್‍ತುನ್ ಛಾತಿ ವೈರ್ ಅಂಗಿತ್ ಘಾಲ್" ಮಟ್ಲ್ಯಾನ್, ತಸೆಚ್ ತೆನಿ ಛಾತಿ ವೈರ್ ಭುತ್ತುರ್ ಅಂಗಿತ್ ಘಾಲುನ್ ಭಾಯ್ರ್ ಕಾಡುನ್ ಬಗಲ್ಲ್ಯಾ ತನ್ನಾ ತೊ ಹಾತ್ ಹುರಲ್ಲ್ಯಾ ಆಂಗಾ ಸಾರ್ಕೊಚ್ ಹೊಲೊ. 8 ತನ್ನಾ ಸರ್ವೆಸ್ಪರಾನ್ ತೆಕಾ, "ತಿ ಲೊಕಾ ತುಜ್ಯಾರ್ ವಿಶ್ವಾಸ್ ಕರಿನಸ್ತಾನಾ ಪೈಲೆಚೆ ಅಜಾಪಾಚೆ ಕಾಮ್ ಅರ್ಥ್ ಕರುನ್ ಘೆವ್ಕ್ ನಸ್ಲ್ಯಾರ್ಬಿ, ದೊನ್ವೆಚೆ ಅರ್ಥ್ ಕರುನ್ ಘೆವ್ನ್ ವಿಶ್ವಾಸ್ ಕರ್‍ತಾತ್". 9 "ಹಿ ದೊನ್ ಅಜಾಪಾಚಿ ಕಾಮಾಬಿ ತೆನಿ ಮನಾಕ್ ಲಾವ್ನ್ ಘೆಯ್ನಸ್ತಾನಾ ಅನಿ ತುಜ್ಯಾ ಬೊಲ್ನ್ಯಾಕ್ನಿ ವಿಶ್ವಾಸ್ ಕರಿನಸ್ತಾನಾ ರಾಲ್ಯಾರ್, ನೈಲ್ ಮನ್ತಲ್ಯಾ ನ್ಹಯ್ಚೆ ಪಾನಿ ಘೆವ್ನ್ ವಾಳ್ಕ್ಯಾ ಜಿಮ್ನಿ ವರ್‍ತಿ ವೊತ್, ತನ್ನಾ ಜಿಮ್ನಿರ್ ವೊತಲೆ ಪಾನಿ ರಗಾತ್ ಹೊತಾ" ಮಟ್ಲ್ಯಾನ್.

10 ಖರೆ ಮೊಯ್ಜೆನ್ ಸರ್ವೆಸ್ಪರಾಕ್, "ನಕ್ಕೊ ಧನಿಯಾ ಮಾಕಾ ಧಾಡುನಕ್ಕೊ. ಅದ್ದಿಚ್ಯಾನ್ ಮಾಕಾ ಬೊಲುಕ್ ಕಳಿನಾ; ಅನಿ ತುಮಿ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾ ಮಾನಾಬಿ ತಸೊಚ್ ಹಾಯ್, ಮಿಯಾ ಫಾಟಿ ಸರಕ್ನಾರೊ, ಮಾಜಿ ಬೊಲ್ನಿ ಸವ್ಕಾಸ್, ಅನಿ ಮಾಜಿ ಜಿಬ್ಲಿ ದಾಟ್", ಮಟ್ಲ್ಯಾನ್.

11 ತನ್ನಾ ಸರ್ವೆಸ್ಪರಾನ್ , "ಮಾನ್ಸಾಕ್ನಿ ತೊಂಡ್ ದಿಲ್ಲೆ ಕೊನ್? ಎಕ್ಲ್ಯಾಕ್ ಮುಕ್ಕೊ ಕರುನ್, ಅನಿ ಎಕ್ಲ್ಯಾಕ್ ಕಿವ್ಡೊ ಕರುನ್, ಅನಿ ಎಕ್ಲ್ಯಾಕ್ ಡೊಳೆ ದಿಸ್ತಲೊ ಕರುನ್, ಅನಿ ಎಕ್ಲ್ಯಾಕ್ ಕುಡ್ಡೊ ಕರುನ್ ಥವ್ತಲೆ ಕೊನ್? ಸರ್ವೆಸ್ಪರ್ ಹೊವ್ನ್ ಹೊತ್ತೊ ಮಿಯಾಚ್ ನ್ಹಯ್ ಕಾಯ್?"

12 "ತಸೆ ಹೊವ್ನ್ ಅತ್ತ್ಯಾಚ್ ಜಾ; ತುಕಾ ಬೊಲುಕ್ ಮಿಯಾಚ್ ಮಜ್ಜತ್ ಕರ್ತಾ, ಅನಿ ತಿಯಾ ಕಾಯ್ ಬೊಲುಚೆ ಮನ್ತಲೆ ಮಿಯಾಚ್ ತುಕಾ ಸಾಂಗ್ತಾ", ಮಟ್ಲ್ಯಾನ್.

13 ತನ್ನಾ ಮೊಯ್ಜೆನ್, "ಧನಿಯಾ ದಯಾಕರುನ್, ಹ್ಯಾ ಕಾಮಾಕ್ ತಿಯಾ ದುಶ್ರ್ಯಾ ಕೊನಾಕ್ಬಿ ಧಾಡ್",

14 ತನ್ನಾ ಸರ್ವೆಸ್ಪರಾಕ್ ಮೊಯ್ಜೆಚೊ ರಾಗ್ ಯೆಲೊ, ಅನಿ ತೆಕಾ, "ತುಜೊ ಭಾವ್ ಲೆವಿ ಆರೊನ್ ನ್ಹಯ್ ಕಾಯ್? ತೊ ಬರೊ ಕರುನ್ ಬೊಲ್ತಾ ಮನ್ತಲೆ ಮಾಕಾ ಗೊತ್ತ್ ಹಾಯ್, ಅಬಕ್, ತೊಚ್ ತುಕಾ ಭೆಟುಕ್ ಯೆವ್ಲಾ, ಅನಿ ತುಕಾ ಬಗ್ತಾನಾ ತೆಕಾ ಮನಾತ್ ಖುಶಿ ಹೊತಾ".

15 "ತಿಯಾ ತೆಚ್ಯಾ ವಾಂಗ್ಡಾ ಬೊಲುನ್, ಸಾಂಗುಚಿ ಹೊಲ್ಲಿ ಸಂಗ್ತಿಯಾ ಸಾಂಗ್, ಮಿಯಾ ತೆಕಾ ಅನಿ ತುಕಾ ಕಶೆ ಬೊಲುಚೆ ಮನುನ್ ಮಜ್ಜತ್ ಕರ್ತಾ, ಅನಿ ತುಮಿ ಕಾಯ್ ಕರುಚೆ ಮನ್ತಲೆ ಸಾಂಗ್ತಾ". 16 ತುಜ್ಯಾ ನಾವಾರ್ ತೊಚ್ ಲೊಕಾಂಚ್ಯಾಕ್ಡೆ ಬೊಲ್ತಾ ತೊ ತುಕಾ ತೊಂಡ್ ಸಾರ್ಕೊ ಹೊವ್ನ್ ರ್‍ಹಾತಾ ಅನಿ ತಿಯಾ ತೆಕಾ ದೆವ್ ಸಾರ್ಕೊ ಹೊವ್ನ್ ರ್‍ಹಾತೈ‍. 17 "ಹ್ಯೊ ದಾಂಡೊ ಹಾತಿತ್ ಘೆವ್ನ್ ಜಾ, ಹೆಚ್ಯಾನುಚ್ ತಿ ಅಜಾಪಾಚಿ ಕಾಮಾ ಕರ್‍ತೆ" ಮಟ್ಲ್ಯಾನ್.

ಮೊಯ್ಜೆ ಇಜಿಪ್ತಾಕ್ ಪರ್‍ತುನ್ ಯೆತಲೆ

18 ಹೆಜ್ಯಾ ಮಾನಾ ಮೊಯ್ಜೆನ್ ಅಪ್ಲ್ಯಾ ಮಾಮಾ ಜೆತ್ರೊಕ್ಡೆ ಪರ್‍ತುನ್ ಯೆವ್ನ್, "ಮಿಯಾ ಇಜಿಪ್ತ್ ದೆಶ್ಯಾತ್ ಹೊತ್ಯಾ ಮಾಜ್ಯಾ ಸ್ವತ್ಯಾಚ್ಯಾ ಲೊಕಾಂಚ್ಯಾಕ್ಡೆ ಜಾವ್ನ್, ತೆನಿ ಝಿತ್ತೆ ಹಾತ್ಕಿ ಕಾಯ್ ಮನುನ್ ಬಗುನ್ ಯೆತಾ", ಮನುನ್ ಮಾಗುನ್ಗೆಟ್ಲ್ಯಾನ್, ಜೆತ್ರೊನ್ ತೆಕಾ, "ಬರ್ಯಾನ್ ಜಾವ್ನ್ ಯೆ" ಮಟ್ಲ್ಯಾನ್.

19 ಮಿದ್ಯಾನ್ ಮನ್ತಲ್ಯಾ ಗಾಂವಾತ್ ಸರ್ವೆಸ್ಪರಾನ್ ಮೊಯ್ಜೆಕ್, "ತಿಯಾ ಇಜಿಪ್ತ್ ದೆಶ್ಯಾಕ್ ಪರ್‍ತುನ್ ಜಾ, ತುಕಾ ಜಿವ್ ಕಾಡುಚೆ ಮನುನ್ಗೆವ್ನ್ ಹೊತ್ತೆ ಸಗ್ಳೆ ಮರುನ್ ಗೆಲೆ", ಮನುನ್ ಸಾಂಗ್ಲ್ಯಾನ್. 20 ತಸೆ ಹೊವ್ನ್ ಮೊಯ್ಜೆನ್, ಅಪ್ಲ್ಯಾ ಬಾಯ್ಕೊ ಪೊರಾಕ್ನಿ ಎಕ್ ಗಾಡ್ವಾವರ್‍ತಿ ಬಸ್ವುನ್ಗೆವ್ನ್ ಇಜಿಪ್ತ್ ದೆಸಾಕ್ ಜಾವ್ಕ್ ಲಾಗ್ಲೊ, ಅನಿ ತೆನಿ ದೆವಾನ್ ಘೆವ್ನ್ ಜಾ ಮನುನ್ ಸಾಂಗಲ್ಲೊ ದಾಂಡೊ ಹಾತಿತ್ ಧರುನ್ಗೆಟ್ಲ್ಯಾನ್.

21 ಸರ್ವೆಸ್ಪರಾನ್ ಮೊಯ್ಜೆಕ್, ಅನಿ ಪರ್‍ತುನ್ ಅಸೆ ಮಟ್ಲ್ಯಾನ್, "ತಿಯಾ ಇಜಿಪ್ತಾಕ್ ಪರ್‍ತುನ್ ಗೆಲ್ಲ್ಯಾ ತನ್ನಾ ಮಿಯಾ ತುಕಾ ದಾಕ್ವುನ್ ದಿಲ್ಲಿ ಅಜಾಪಾಚಿ ಕಾಮಾ ಸಗ್ಳಿ ಫಾರೊವ್ ಮನ್ತಲ್ಯಾ ರಾಜಾಚ್ಯಾ ಇದ್ರಾಕ್ ಕರುನ್ ದಾಕ್ವು, ಖರೆ ಮಿಯಾ ತೆಜೊ ಮನ್ ಗುಂಡ್ಯಾ ಸಾರ್ಕೊ ಕರ್ತಾ, ತೊ ಲೊಕಾಕ್ನಿ ಜಾವ್ಕ್ ದಿಯ್ನಾ". 22 ತನ್ನಾ ತಿಯಾ ತೆಕಾ ಕಳ್ವುಚೆ ಹೊಲ್ಲೆ, "ಸರ್ವೆಸ್ಪರ್ ಸಾಂಗ್ತಲೆ ಆಯ್ಕ್; ಇಜ್ರಾಯೆಲ್ ಲೊಕಾ ಮಾಕಾ ಲೆಕಾಂಚ್ಯಾ ಸಾರ್ಕಿ ಹಾತ್, ತೊ ಮಾಜೊ ಥೊರ್ಲೊ ಲೆಕುಚ್ ಮನುನ್ ಸಾಂಗುಚೆ". 23 "ಮಾಕಾ ಆರಾದನ್ ಕರುಕ್ ಸಾಟ್ನಿ ಮಾಜ್ಯಾ ಥೊರ್ಲ್ಯಾ ಲೆಕಾಕ್ ತುಜ್ಯಾ ದೆಶ್ಯಾತ್ನಾ ಜಾವ್ಕ್ ಸೊಡ್, ಹೆಕಾ ತಿಯಾ ಮಾನಿ ನಸ್ತಾನಾ ರಾಲ್ಯಾರ್, ಮಿಯಾ ತುಜ್ಯಾ ಥೊರ್ಲ್ಯಾ ಲೆಕಾಕ್ ಜಿವಾನಿ ಮಾರ್‍ತಾ",

24 ತವ್ಡೆಚ್ ನಸ್ತಾನಾ, ಇಜಿಪ್ತಾಕ್ ಜಾತಲ್ಯಾ ವಾಟೆರ್ ಹೊತ್ತ್ಯಾ ಘರ್‍ಹಾತ್ ಸರ್ವೆಸ್ಪರ್ ಮೊಯ್ಜೆಚ್ಯಾ ಇದ್ರಾಕ್ ಯೆವ್ನ್ ತೆಜೊ ಜಿವ್ ಕಾಡುಚೆ ಮನುನ್ ಹೊತ್ತೊ. 25 ತನ್ನಾ ಜಿಪ್ಪೊರಾನ್ ಎಕ್ ಧಾರ್ಲೊ ಗುಂಡೊ ಘೆವ್ನ್ ಅಪ್ಲ್ಯಾ ಲೆಕಾಕ್ ಸುನ್ನತ್ ಕರ್‍ಲಿನ್, ಅನಿ ತೆಜೊ ಕಾತರಲ್ಲೊ ತುಕ್ಡೊ ಘೆವ್ನ್ ಮೊಯ್ಜೆಚ್ಯಾ ಪಾಂಯಾಕ್ನಿ ಲಾವ್ನ್, ತೆಕಾ "ತಿಯಾ ಮಾಜ್ಯಾ ರಗ್ತಾಚೊ ನ್ಹವ್ರೊ" ಮಟ್ಲಿನ್, ತನ್ನಾ ಸರ್ವೆಸ್ಪರಾನ್ ತೆಕಾ ಹುರ್ವುಲ್ಯಾನ್. 26 ತನ್ನಾ ಸರ್ವೆಸ್ಪರಾನ್ ತೆಕಾ ಹುರ್ವುಲ್ಯಾನ್, ತಿನಿ ಸುನ್ನತಿ ಸಾಟ್ನಿಚ್, "ತಿಯಾ ರಗ್ತಾ ವೈನಾ ಹೊಲ್ಲೊ ನ್ಹವ್ರೊ" ಮಟಲ್ಲೆ.

27 ತವ್ಡೆಚ್ ನಸ್ತಾನಾ, ಸರ್ವೆಸ್ಪರಾನ್ ಮೊಯ್ಜೆಕ್ ಭೆಟುಕ್ ಸಾಟ್ನಿ ತಿಯಾ ಡಂಗ್ಳಿಕ್ ಜಾ ಮನುನ್ ಆರೊನಾಕ್ ಸಾಂಗ್ಲ್ಯಾನ್, ತನ್ನಾ ತೊ ಜಾವ್ನ್ ದೆವಾಚ್ಯಾ ಮಡ್ಡಿರ್ ಮೊಯ್ಜೆಕ್ ಭೆಟುನ್ ಉಪ್ಪಾದಿಲ್ಯಾನ್. 28 ತನ್ನಾ ಮೊಯ್ಜೆನ್, ಆರೊನಾಕ್ ಅಪ್ನಾಕ್ ಧಾಡಲ್ಲ್ಯಾ ಸರ್ವೆಸ್ಪರಾಚಿ ಸಗ್ಳಿ ಬೊಲ್ನಿಯಾ ಅನಿ, ಅಪ್ನಾಕ್ ಕರುಚೆ ಮನುನ್ ಹುಕುಮ್ ದಿಲ್ಲ್ಯಾ ಸಗ್ಳ್ಯಾ ಅಜಾಪಾಚ್ಯಾ ಕಾಮಾಂಚ್ಯಾ ವಿಶಯಾತ್ ಸಾಂಗ್ಲ್ಯಾನ್. 29 ಮಾನಾ ಮೊಯ್ಜೆ ಅನಿ ಆರೊನ್ ದೊಗೆಬಿ ಜಾವ್ನ್ ಇಜ್ರಾಯೆಲಾಂಚ್ಯಾ ಜಾಂನ್ತ್ಯಾ ಲೊಕಾಕ್ನಿ ಗೊಳಾ ಕರ್ಲ್ಯಾನಿ. 30 ಸರ್ವೆಸ್ಪರಾನ್ ಮೊಯ್ಜೆಕ್ ಸಾಂಗಲ್ಲಿ ಸಗ್ಳಿ ಗೊಸ್ಟಿಯಾ ಆರೊನಾನ್ ತ್ಯಾ ಲೊಕಾಕ್ನಿ ಸಾಂಗ್ಲ್ಯಾನ್, ಮೊಯ್ಜೆನ್ ತೆಂಚ್ಯಾ ಇದ್ರಾಕ್ ತಿ ಆಜಾಪಾಚಿ ಕಾಮಾ ಕರುನ್ ದಾಕ್ವುಲ್ಯಾನ್. 31 ತ್ಯಾ ಲೊಕಾನಿ ತೆಕಾ ವಿಶ್ವಾಸ್ ಕರ್ಲ್ಯಾನಿ. ಸರ್ವೆಸ್ಪರಾನ್ ಇಜ್ರಾಯೆಲಾಂಚಿ ತರಾಸಾ ಮನಾಕ್ ಲಾವ್ನ್ ಘೆವ್ನ್ ಬಗಟ್ಲಾ ಮನ್ತಲೆ ತೆನಿ ಆಯಿಕ್ತಾನಾ ಮಾನ್ ಬಾಗ್ವುನ್ ಆರಾದನ್ ಕರ್ಲ್ಯಾನಿ.