ನಿರ್ಗಮನ್ 7

1 ತನ್ನಾ ಸರ್ವೆಸ್ಪರಾನ್ ಮೊಯ್ಜೆಕ್, "ಅಬಕ್ ಮಿಯಾ ತುಕಾ ಫಾರೊವ್ ರಾಜಾಚ್ಯಾ ಇದ್ರಾಕ್ ದೆವಾಚೊ ರಾಯಭಾರಿ ಕರುನ್ ಥವ್ಲಾ. ತುಚೊ ಅನ್ನಾ ಆರೊನ್ ತುಜ್ಯಾ ಸಾಟ್ನಿ ಪರ್ವಾದಿ ಹೊವ್ನ್ ಬೊಲ್ತಾ". 2 "ಮಿಯಾ ತುಕಾ ಹುಕುಮ್ ದಿಲ್ಲೆ ಸಗ್ಳೆ ತಿಯಾ ಸಾಂಗುಚೆ. ಇಜ್ರಾಯೆಲ್‌ಕಾರಾಕ್ನಿ ಹ್ಯಾ ದೆಸಾತ್ನಾ ಜಾವ್ಕ್ ಒಪ್ಕಿ ದಿವ್ಚೆ ಮನುನ್ ತುಜೊ ಅನ್ನಾ ಆರೊನಾಚ್ ಫಾರೊವ್ ರಾಜಾಚ್ಯಾ ಇದ್ರಾಕ್ ಬೊಲುಚೊ. 3 ಹೊಲ್ಯಾರ್ಬಿ ಮಿಯಾ ಫಾರೊವ್ ರಾಜಾಚೊ ಮನ್ ಕಟಿನ್ ಕರುನ್, ಇಜಿಪ್ತ್ ದೆಸಾತ್ ಲೈ ಅಜಾಪಾಚಿ ಕಾಮಾ ಅನಿ ಚಮತ್ಕಾರ್ ಕರುನ್ ಮಾಜಿ ಬಳ್ ದಾಕ್ವುತಾ. 4 ಫಾರೊವ್ ರಾಜಾ ತುಜಿ ಗೊಸ್ಟ್ ಆಯ್ಕಿನಾ, ತನ್ನಾ ಮಿಯಾ ಇಜಿಪ್ತಾಚಾಕ್ನಿ ಲೈ ತರಾಸ್ ಅನಿ ಶಿಕ್ಷ್ಯಾ ದಿವ್ನ್, ಮಾಜ್ಯಾ ಇಜ್ರಾಯೆಲಾಚ್ಯಾ ಸೈನಿಕಾಕ್ನಿ ಭಾಯ್ರ್ ಹಾನ್ತಾ. 5 ಮಿಯಾ ಇಜಿಪ್ತಾಚ್ಯಾ ಲೊಕಾಕ್ನಿ ವಿರೊಧ್ ಹೊವ್ನ್ ತೆಂಚ್ಯಾ ಮದ್ನಾ ಇಜ್ರಾಯೆಲ್ ಲೊಕಾಕ್ನಿ ಭಾಯ್ರ್ ಹಾನಲ್ಲ್ಯಾ ತನ್ನಾ ಮಿಯಾಚ್ ಸರ್ವೆಸ್ಪರ್ ಮನ್ತಲೆ ಇಜಿಪ್ತಾಚಿ ಲೊಕಾ ಕಳ್ವುನ್ ಘೆತಾತ್", ಮಟ್ಲ್ಯಾನ್. 6 ಸರ್ವೆಸ್ಪರಾಚ್ಯಾ ಹುಕುಮಾ ಸಾರ್ಕೆಚ್ ಮೊಯ್ಜೆನ್ ಅನಿ ಆರೊನಾನ್ ಕರ್ಲ್ಯಾನಿ. 7 ಫಾರೊವ್ ರಾಜ್ಯಾಚ್ಯಾ ವಾಂಗ್ಡಾ ಬೊಲ್ತಾನಾ ಮೊಯ್ಜೆಕ್ ಆಯ್ಸಿ ಅನಿ ಆರೊನಾಕ್ ಆಯ್ಸಿರ್ ತಿನ್ ವರ್ಸಾ ಹೊಲ್ಲಿ.

ಆರೊನಾಚೊ ದಾಂಡೊ

8 ಮೊಯ್ಜೆ ಅನಿ ಆರೊನ್ ವಾಂಗ್ಡಾ ಸರ್ವೆಸ್ಪರಾನ್ ಬೊಲುನ್, 9 "ಫಾರೊವ್ ರಾಜಾನ್ ತುಮ್ಕಾ, ‘ಮಿಯಾ ಸಾಂಗ್ತಲೆ ವಿಶ್ವಾಸ್ ಕರುಚೆ ಹೊಲ್ಯಾರ್ ಅಜಾಪಾಚಿ ಕಾಮಾ ಮಾಜ್ಯಾ ಇದ್ರಾಕ್ ಕರುನ್ ದಾಕ್ವು’ ಮನುನ್ ಸಾಂಗ್ಲ್ಯಾರ್, ಮೊಯ್ಜೆನ್ ಆರೊನಾಕ್, ‘ತುಜ್ಯಾ ಹಾತಿತ್ಲೊ ದಾಂಡೊ ರಾಜಾಚ್ಯಾ ಇದ್ರಾಕ್ ಜಿಮ್ನ್ ವರ್‍ತಿ ಟಾಕ್’ ಮನುನ್ ಸಾಂಗುಚೆ, ತೊ ದಾಂಡೊ ಸಾಂಪ್ ಹೊತಾ" 10 ಮೊಯ್ಜೆ ಅನಿ ಆರೊನ್ ಫಾರೊವ್ ರಾಜಾಕ್ಡೆ ಗೆಲೆ, ಅನಿ ಸರ್ವೆಸ್ಪರಾನ್ ಅಪ್ನಾಕ್ ಹುಕುಮ್ ದಿಲ್ಲ್ಯಾ ಸಾರ್ಕೆ ಕರ್ಲ್ಯಾನ್, ಆರೊನಾನ್ ಅಪ್ನಾಚ್ಯಾ ಹಾತಿತ್ಲೊ ದಾಂಡೊ ಫಾರೊವ್ ರಾಜಾಚ್ಯಾ ಅನಿ ಸೈನಿಕಾಂಚ್ಯಾ ಅನಿ ಅಧಿಕಾರಿಯಾಂಚ್ಯಾ ಇದ್ರಾಕ್ ಜಿಮ್ನಿ ವರ್‍ತಿ ಟಾಕಲ್ಲ್ಯಾ ತನ್ನಾ ತೊ ದಾಂಡೊ ಸಾಂಪ್ ಹೊಲೊ. 11 ಫಾರೊವ್ ರಾಜಾನ್ ಇಜಿಪ್ತ್ ದೆಸಾತ್ಲ್ಯಾ ಬುದ್ವಂತಾ ಅನಿ ಮೊಡ್ಗಾರಾಕ್ನಿ ಬಲ್ವುನ್, ತೆನಿಬಿ ಅಪ್ಲ್ಯಾ ಮೊಡಿನ್ ಆರೊನಾಚ್ಯಾ ಸಾರ್ಕೆ ಸಾಂಪ್ ಕರ್ಲ್ಯಾನಿ. 12 ತೆನಿಬಿ ಅಪ್ಲ್ಯಾ ಹಾತಿತ್ಲೆ ದಾಂಡೆ ಜಿಮ್ನಿ ವರ್‍ತಿ ಟಾಕಲ್ಲ್ಯಾ ತನ್ನಾ ತೆ ದಾಂಡೆಬಿ ಸಾಂಪಾ ಹೊಲಿ, ಖರೆ ಆರೊನಾಚ್ಯಾ ದಾಂಡ್ಯಾನ್ ತೆಂಚ್ಯಾ ದಾಂಡ್ಯಾಕ್ನಿ ಗಿಳ್ಳ್ಯಾನ್. 13 ಸರ್ವೆಸ್ಪರಾನ್ ಅದ್ದಿಚ್ ಸಾಂಗಲ್ಯಾ ಸಾರ್ಕೆ ಫಾರೊವ್ ರಾಜಾಚೊ ಮನ್ ಲೈ ಕಠಿನ್ ಹೊಲೊ. ತೆನಿ ತೆಂಚ್ಯಾ ಗೊಸ್ಟಿಯಾಕ್ನಿ ಕಾನ್ ದಿವ್ಕ್ ನಾ.

ಇಜಿಪ್ತಾಚ್ಯಾ ವರ್‍ತಿ ಯೆಲ್ಲಿ ತರಾಸಾ

ರಗಾತ್

14 ಸರ್ವೆಸ್ಪರಾನ್ ಮೊಯ್ಜೆಕ್, ಫಾರೊವ್ ರಾಜಾ ಲೈ ಮಂಡ್ ಪನ್ ಕರುಲ್ಲಾ, ತೊ ಲೊಕಾಕ್ನಿ ಜಾವ್ಕ್ ಒಪ್ಕಿ ದಿಯ್ನಾ ಮನುಲ್ಲಾ. 15 ತಸೆಹೊವ್ನ್, ಸಕ್ಕಾಳಿ ತಿಯಾ ಫಾರೊವ್ ರಾಜಾಕ್ಡೆ ಜಾ, ನ್ಹಯಿಕ್ಡೆ ಜಾಯ್ತ್ ರ್‍ಹಾತಾನಾ, ತಿಯಾ ತೆಕಾ ಭೆಟುಕ್ ಸಾಟ್ನಿ ನೈಲ್ ಮನ್ತಲ್ಯಾ ನ್ಹಯ್ಚ್ಯಾ ದಂಡೆಕುಚ್ ಜಾವ್ನ್ ಇಬೆ ರಾ, ಸಾಪ್ ಹೊಲ್ಲೊ ದಾಂಡೊ ತುಜ್ಯಾ ಹಾತಿತ್ ರಾಂವ್ದಿತ್. 16 ತನ್ನಾ ರಾಜಾಕ್, "ಇಬ್ರಿಯಾಂಚೊ ದೆವ್ ಹೊವ್ನ್ ಹೊತ್ತ್ಯಾ ಸರ್ವೆಸ್ಪರಾನ್ ಸಾಂಗಲಿ ಗೊಸ್ಟ್ ಹಿ; ಡಂಗ್ಳಿತ್ ಜಾವ್ನ್ ಮಾಜ್ಯಾ ಲೊಕಾಕ್ನಿ ಆರಾದನ್ ಕರುಕ್ ಒಪ್ಕಿ ದಿ ಮನುನ್ ತುಕಾ ಹುಕುಮ್ ದಿಲೊ, ಖರೆ ತಿಯಾ ಅಜುನ್ ಪತರ್ ತೆಕಾ ದ್ಯಾನ್ ದಿವ್ಕ್ ನ್ಹಯ್, 17 ತಸೆ ಹೊವ್ನ್, ಸರ್ವೆಸ್ಪರ್ ಹೊವ್ನ್ ಹೊತ್ತೊ ಮಿಯಾ ಅನಿಬಿ ಸಾಂಗ್ತಾ; ತಿಯಾ ಸರ್ವೆಸ್ಪರ್ ಮನುನ್ ಕಳ್ವುನ್ ಘೆಯ್ ಸಾರ್ಕೆ ಮಾಜ್ಯಾ ಸೆವಕಾಚ್ಯಾ ಹಾತಿತ್ ಹೊತ್ತ್ಯಾ ದಾಂಡ್ಯಾನ್ ನೈಲ್ ಮನ್ತಲ್ಯಾ ನ್ಹಯಿಚ್ಯಾ ಪಾನಿಯಾಕ್ ಮಾರ್‍ತಾ, ತನ್ನಾ ತೆ ರಗಾತ್ ಹೊತಾ. 18 ನೈಲ್ ನ್ಹಯ್ತ್ ಹೊತ್ತಿ ಮಾಸ್ಳಿಯಾ ಮರುನ್ ಜಾತಾತ್, ನ್ಹಯ್ ಬುರ್ಶಿ ಹೊವ್ನ್ ವಾಸ್ ಯೆತಾ, ತೆ ಪಾನಿ ಫಿವ್ಕ್ ಇಜಿಪ್ತಾಚ್ಯಾ ಲೊಕಾಕ್ನಿ ಬುರ್ಸೆ ದಿಸ್ತಾ" ಮನುನ್ ಸಾಂಗ್, ಮಟ್ಲ್ಯಾನ್. 19 ಸರ್ವೆಸ್ಪರಾನ್ ಮೊಯ್ಜೆಕ್, "ತಿಯಾ ಆರೊನಾಕ್ ತುಜೊ ದಾಂಡೊ ಘೆವ್ನ್ ಇಜಿಪ್ತ್ ದೆಸಾತ್ ಹೊತ್ತ್ಯಾ, ನ್ಹಯ್, ಝರೊವಾ, ಕಾಲ್ಗಿಯಾ, ತಳೆ ಹ್ಯಾ ಸಗ್ಳ್ಯಾಕ್ಡೆ ಹಾತ್ ವೈರ್ ಕರ್ ತಸೆ ಕರ್ತಾನಾ, ಸಗ್ಳೆ ಪಾನಿ ರಗಾತ್ ಹೊತಾ. ಇಜಿಪ್ತ್ ದೆಶ್ಯಾಚ್ಯಾ ಫುರಾ ಝಾಡಾಚ್ಯಾ ಬೊಡ್ಡ್ಯಾಂಚ್ಯಾ ಢೊನ್ಯಾತ್ನಿ, ಅನಿ ಗುಂಡ್ಯಾನಿ ಭಾಂದಲ್ಲ್ಯಾ ಟಾಕಿಯಾತ್ನಿ ಸಗ್ಳ್ಯಾಕ್ಡೆ ಹೊತ್ತೆ ಪಾನಿ ಫುರಾ ರಗ್ತಾನ್ ಭರುನ್ ರ್‍ಹಾತಾ", ಮಟ್ಲ್ಯಾನ್. 20 ಮೊಯ್ಜೆನ್ ಅನಿ ಆರೊನಾನ್ ಸರ್ವೆಸ್ಪರಾನ್ ತೆಂಕಾ ಸಾಂಗಲ್ಲ್ಯಾ ಸಾರ್ಕೆಚ್ ಕರ್ಲ್ಯಾನಿ, ಫಾರೊವ್ ರಾಜಾ ಅನಿ ತೆಚ್ಯಾ ಅಧಿಕಾರಿಯಾಂಚ್ಯಾ ಇದ್ರಾಕ್ ಆರೊನಾನ್ ದಾಂಡೊ ಉಕ್ಲುನ್ ನೈಲ್ ನ್ಹಯ್ತ್ ಹೊತ್ತ್ಯಾ ಪಾನಿಯಾ ವರ್‍ತಿ ಮಾರ್‍ಲ್ಯಾನ್, ತೆ ಸಗ್ಳೆ ರಗಾತ್ ಹೊಲೆ. 21 ತ್ಯಾತುರ್ ಹೊತ್ತಿ ಮಾಸೊಳಿಯಾ ಮರುನ್ ಗೆಲಿ, ನೈಲ್ ನ್ಹಯ್ ಬುರ್ಶಿ ಹೊವ್ನ್ ವಾಸ್ ಯೆವ್ಕಲಾಗಲಿ, ಇಜಿಪ್ತಾಚ್ಯಾ ಲೊಕಾಕ್ನಿ ತೆ ಪಾನಿ ಫಿವ್ಕ್ ಹೊವ್ಕ್ ನಾ, ಇಜಿಪ್ತ್ ದೆಸಾತ್ ಫುರಾ ಪಾನಿ ರಗಾತ್ ಹೊಲೆ.

22 ಖರೆ ಇಜಿಪ್ತಾಚ್ಯಾ ಮೊಡ್ಗಾರಾನಿಬಿ ಅಪ್ಲ್ಯಾ ಮೊಡಿಯಾನಿ ತಸೆಚ್ ಕರ್ಲ್ಯಾನಿ, ತಸೆ ಹೊವ್ನ್ ಫಾರೊವ್ ರಾಜಾಚೊ ಮನ್ ಕಟಿನ್ ಹೊಲೊ. ಸರ್ವೆಸ್ಪರಾನ್ ಅದ್ದಿಚ್ ಸಾಂಗಲ್ಲ್ಯಾ ಸಾರ್ಕೆಚ್ ತೊ ಮೊಯ್ಜೆ ಅನಿ ಆರೊನಾಚಿ ಗೊಸ್ಟಿಯಾ ಆಯ್ಕಿನಾ ಹೊಲೊ. 23 ಹ್ಯಾ ಅಜಾಪಾಚ್ಯಾ ಕಾನಿಯಾಕ್ನಿ ದ್ಯಾನ್ ದಿಯ್ನಸ್ತಾನಾ ತೊ ಅಪ್ಲ್ಯಾ ರಾಜಾಚ್ಯಾ ಘರಾಕ್ ಗೆಲೊ. 24 ಸಗ್ಳ್ಯಾ ಇಜಿಪ್ತ್ ದೆಶಾಚ್ಯಾ ಲೊಕಾನಿ ನೈಲ್ ನ್ಹಯ್ಚೆ ಪಾನಿ ಪಿವ್ಕ್ ಹೊಯ್ ನಸ್ತಾನಾ, ಫಿತಲ್ಯಾ ಪಾನಿಯಾಚ್ಯಾ ಸಾಟ್ನಿ ಥೈ ನ್ಹಯಿಚ್ಯಾ ದಂಡೆಚ್ಯಾ ಭೊತ್ಯಾನಿ ಖಂಡುನ್ ಬಗ್ಲ್ಯಾನಿ. 25 ಸರ್ವೆಸ್ಪರಾನ್ ನೈಲ್ ನ್ಹಯಿಕ್ ಮಾರುನ್ ಸಾತ್ ದಿಸಾ ಕಳದ್ಲಿ.