Timotey Paulıka saraççe
1 Paul Derbeeqayiy Listreeqa hayk’an. Maa’ar Timotey donana I’sayna teleba axva ıxha. Mang’una yed I’sa Masihılqa iman ha’ana Yahudiy, dekme Yunan ıxha. 2 Listreeneyiy Konyeene imannanbışe mang’une hək’ee yugun karbı eyhe. 3 Paulıs Timotey cukasana ıkkees ıkkiykan. Mang’una dek Yunanva gırgıng’uk’le ats’a ıxha. Mane cigabışee vooxhene Yahudeeşinemee mang’vee Timotey sunnat ha’a. 4 Manbı şaharbışee ı’ğviykır, İyerusalimeene I’sayne ç’ak’ıne telebabışe, ağsaqqalaaşe huvuyn q’ararbı maane imannanbışilqa hixhar ha’a. 5 Məxüd imannanbışinıd iman it’umexhen, imannanbıb yiğ-yiğıle geeb qeebaxhe.
Paulıs Makedoniyeençena insan gyagva
6 Muq’addasne Rı’hı’n Asiyelqa cuvab hixhar ha’as manbışisqa haysar deş. Mançil-allab manbı Frigiyeençeyiy Galatiyeençe ılğeepç’ı avayk’ananbı. 7 Misiyeeqa qabı hipxhırmee, manbışis Bitiniyeeqa vüqqəs vukkiykan. I’sayne Rı’hı’nme manbışisqa man ha’as haysar deş. 8 Mançil-allab Misiyeençe ılğeepç’ı, Troas eyhene şahareeqa avayk’an. 9 Mane xəmde Paulıs Makedoniyeençena sa insan gyagva. Mane insanee mang’une ögee ulyorzul mang’us miz k’yaa’a vuxha:
– Makedoniyeeqa ayre, şas kumag he’e!
10 Paulıs man kar gyaguyle qiyğa, şi gaf hav’u, ine fıkrelqa qabı: Allahee Yugna Xabar hivxhar hee’ecenva şi maqa qoot’al. Şi mankecab Makedoniyeeqa vüqqəsda yəq t’abal haa’a gibğıl.
Lidiya imanılqa qiyeele
11 Troaseençe şi gamee qabıynbı, Samotrakeyne adeeqa, mançeb qinne yiğıl Neapoliseeqa apk’ın. 12 Mançeb Filippı eyhene şahareeqa ılğeepç’ı. Mana Makedoniyeyna inekke xəbna şahar vobna, maadın gellesın millet Roomabı vobunbı. Şi maa’ab sa-q’ölle yiğna avxu. 13 Şabbatne yiğıl şi şaharne akkeençe qığeepç’ı, damayne mıgleqqa hapk’ın. Şak’le cühüt’yar maqa düə haa’as sabaylençinaniy ats’a. Şi gyuv’ur, maqa sabıyne yadaaşika gafbı ha’a gibğıl. 14 Şal k’ırı iliyxhenbışde yı’q’nee, gıranna ç’ərana parçe massa hoolena Lidiya donana sa zəiyfaniy vor. Mana menne milletna, Tiatira eyhene şahareençena mu’mun zəiyfa yixha. Rəbbee məng’ı’n yik’niy aaqı, Paulee eyhenbı məng’ı’lqa yugda hixhrecenva. 15 Lidiyee xaabınbışika sacigee gicərxı’yle qiyğa, şi cene xaaqa qopt’ul, eyhen:
– Şosqa zı Rəbbine ögil imannana insan xhinne qööxhee, qudoora yizde xaa aaxve.
Məng’ee şi yicee eyhençilqa qavaalyav’uynbı.
Paulıy Silan avqaaqqanbı
16 Sa yiğıl şi düə haa’ane cigeeqa vüqqəmee, cinın ayqına sa həmbal zəiyfa şasqa qızeexı. Məng’ee vuk’lelqa qalesın eyhe ıxha. Məxüd məng’ee cene iyeseeşis geed pıl hı’ı. 17 Mana Paulıqayiy şaqa qihna girxhu, ts’ir haa’a-haa’a eyheyiy:
– İn insanar Allah-Ta’aalayn g’ularıb. Şos nəxübiy g’attivxhanas vukkanva yəq haagva.
18 Məng’ee xılece yiğbına məxüd ha’a. Mançin Paul ozar ha’ana. Mana sark’ıl, cinık’le eyhen:
– I’sa Masihne doyuka valqa əmr haa’a, ine içiyne arğançe qığeç’e!
Cin mankecad içiyne adğançe qığeç’en. 19 İçiyne iyeseeşilqa hiyxharan, məng’ı’sse cos pıl ha’as əxə deşud. Manbışe Paulıy Silan avqu, şaharne maydameeqa quvku, haakimaaşine ögilqa qığav’u. 20 Manbışe haakimaaşik’le eyhen:
– İn insanar Yahuder vob. Yişde şaharee manbışe alikkı-gikkiy atçu. 21 Şi Roomabışe ilydyaat’asın, hidya’asın ədatbı xət qa’a.
22 Milletıd Paulılqayiy Silanılqa g’elil qexhe. Haakimaaşe əmr haa’a, manbışde tanalin karbı qakki’ı, t’at’aaka yugba gyootecen. 23 Manbı yugba gyootu, aqa akkyaa’a. Zindanne xərıng’ulqab əmr haa’a, manbışil oğa it’umba vuxhecen. 24 Mana əmr g’avxhumee, zindanne xərıng’vee manbı menne anne gozeeqa akkyav’u, g’elybışis osan g’andalbı ı’xı’yxə.
25 Xəm sura vooxhemee, Pauleeyiy Silanee Allahıs mə’niybıyiy düəbı qədəqqə. Menne avquynbışed manbışil k’ırı iliyxhe ıxha. 26 Sayid sayangada it’umda ç’iyebı ı’ğiykar, manbı avquyne cigayn xhebbıd çikana cigeençe ı’ğiykar. Maadın gırgın akkabı aaqanbı, gırgıng’ulin zincirbıd k’yoyharanbı. 27 Zindanna xərna muğur qıxha, zindanın akkabı aaqı g’acumee, gılınc hı’tditxı', cuscar-vuc gik’as ıkkiykan. Cuk’le məxüd ats’axhxhe, avquynbı heepxıynbıniyxan. 28 Pauleeme ts’irıka eyhen:
– Ğucar-ğu gimek’a, yişin gırgınbı inyaa vob!
29 Zindanne xərıng’vee, işix alli’ı, aqa g’adayxhvan. Zeze aytxhu, mana Paulneyiy Silanne ögil ç’iyelqa qukkyoyk’al. 30 Zindanne xərıng’vee manbı g’aqa qığav’u, manbışike qiyghanan:
– Ç’ak’ınbı, zı g’attixhanasdemee hucoona ha’as ıkkan?
31 Manbışe eyhen:
– Xərne I’salqa iman he’ee, ğu g’attixhanasda. Yiğne xaabınbışed hasre məxüd he’ecen.
32 Qiyğa manbışe Rəbbin cuvab mang’ulqad mang’une xaabınbışilqad hixhara’an. 33 Xəmdiyne mane gahıl zindanne xərıng’vee manbı cune xaaqa quvku, manbışin ı’xnabı hoyğalanbı. Qiyğa vucur cune xaabınbıb mankecab I’sa Masihne doyule gicəbəxənbı. 34 Qiyğa mang’vee Paulısiy Silanıs sufra qa’a. Allahılqa iman hı’ıva vucur, cune xaabınbıb şadeebaxhenbı.
35 Miç’eed qıxhamee, haakimaaşe con eskerar g’axuvu, eyhen:
– İn insanar g’avkke.
36 Zindanne xərıng’vee man uvhiynbı Paulılqa hixhar ha’a:
– Haakimaaşe xabar g’axuvu, şu g’avkkeva. Həşde qığeepç’ı, nişilecab qı’dəpq’ı’n, hudoora.
37 Pauleeme eyhen:
– Şi Roomayn vatandaşar vuxhayqa ilydyaakı, manbışe şi məhkama dena gyootu, zindaneeqa av’u. Həşdeb şavuk’lecad dyats’a-dyats’a, şi g’avkasne vukkan? Məxdın kar ixhes deş! Co abı, şi qığee’ecen!
38 Eskeraaşe man uvhiynbı haakimaaşilqa hixhar ha’a. Haakimaaşik’le Paulıy Silan Roomayn vatandaşar vuxhay ats’axhxhamee, qəvəyq’ənanbı. 39 Manbı abı, co qotkuda hidi’ıva eyhe. Qiyğab manbı zindaneençe qığav’u, ittunçil avqaaqqa, şahareençe qığeepç’ecenva. 40 Paulıy Silan zindaneençe qığeepç’iyle qiyğa Lidiyeyne xaaqa havayk’an. Maa’ab manbışisqa iman ha’anbı qızaaxa. Manbışis yik’bı huvu, manbı mançe avayk’ananbı.