44 Sahree yişde baba-dideeşika Şahaadatna Çadırniy vob. Mısee mana cuka yuşan ha’ane Allahee uvhiyn xhinne, haaguyn xhinne giviyxə. 45 Yişde baba-dideeşe Şahaadatna Çadır ögilyne nasılıke alyapt’ı. Manbışe Yeşuayne xəbvalika menne milletbışin cigabı cone xılyaqa alğavhumee, Çadırıb cokasana maqa qavaylenaniy. Allahee Vucee yişde baba-dideeşine ögile medın milletbı g’e’eşşu. Şahaadatna Çadır Davudulqamee avxuna. 46 Allahne ulen aqqıyne Davudee, Mang’us miz k’yaa’a, cune baba-dideyne Yaaq’ubne Allahnemee İzrailyne milletne yı’q’nee sa xav alya’a hasrecen. 47 Allahısme Xav ali’ına Sıleyman ıxha. 48 Haq'-Ta’aala insanaaşe ali’ıyne xaybışee axvana deş. Peyğambaree inəxüd uvhu:

49 «Rəbbee inəxüd eyhe:

„Xəybı Yizda taxt vob,

ç’iyeme Yizde g’elybışik avudun ciga vod.

Yizdemee nəxdın xavne alya’as?

Zı manzil haa’asın ciga nençene aveykes?

50 İn gırgın Yizde xılen dişde itxhın?"»*