1 Kar deşda, məttına yik’nana insan,

hor ha’ane beynyavayle yugra vor.

2 Hucoomecad ha’as ıkkanxhee, man nəxüd hı’iy dyats’axhee, man yugda ixhes deş.

Ek’ra hoyharna, yəqqı’le qığeç’ena.

3 İnsanee cune beynyavavalika, cune ı’mrekın ha’a,

yik’eeyib Rəbbilqa qəl haa’a.

4 Karan geeb hambazar saa’a,

kar deşdame gırgıne hambazaaşe g’alyaraççena.

5 Horalay şahad cazaa dena axvas deş,

horbışika aq’val ulyorzulynar, cazaale g’attixhanas deş.

6 Geebınbışis ç’ak’ınbışde ulyaqa eepç’es vukkiykan,

paybı heleng’uqab gırgınbı hambazar vooxhe.

7 Kar deşda çocaaşik’ler g’ımece eyxhe,

hambazarıb mang’ule əq’əna qooxhe,

mang’vee manbı qoot’almee, nyaacab iveeke deş.

8 Cus yugun ıkkanang’vee ək’el hexxaa’a,

ək’el havaacınar gırgınçina eyxhena.

9 Horalay şahad cazaa dena axvas deş,

horbışika aq’val ulyorzulynar qik’asda.

10 Beynyavays karnana ı’mı’r idyvaak’an xhinne,

həmbalısıb ç’ak’ınbışis xəbvalla hav’uy avaak’a deş.

11 Ək’elikane insanıs qəl zaraba vooxhe deş,

merıng’une bınahıke ılheç’uyn insan xərra hagva.

12 Paççahna qəl aslanne ts’irık akar,

mang’un ulen aqqıyid çolulqa g’e’exhxhane çiyik akar.

13 Beynyava dixee dekkılqa ver ablyaa’a,

siç’eekvana xhunaşşer ç’əvcab dyooxhene t’yank’ık akar.

14 Xaviy var-devlet dekkına miras vobna,

ək’elikana xhunaşşer Rəbbikena pay vobna.

15 Tanbalıyvalin insanıs k’oran nyak' halya’a,

iş hidyav’iynır insan mıssıra g’alyaraççe.

16 Əmrın uvhiyn ha’ang’vee ı’mı’r havaace,

cune yəqqı’qa yugra ilydyakkanar qik’asda.

17 Kar deşing’uka yugra eyxheng’vee itteyhesğu Rəbbis şib hele,

mançine cigeen Rəbbike qales.

18 Umud vobna, dixes terbiye hele,

mang’une qik’vee yiğnab xıl mooxhecen.

19 Geer qəlıkanang’us cazaa hevles vukkan,

vas mana qiykınee, mang’vee man meed ha’asın.

20 Mısləhətıl k’ırı alixhxhe, terbiye aleet’e.

Məxüd he’ee, sabara gahıle k’orane ək’elyna ixhes.

21 İnsanne yik’ee geed kar vod,

ı’mree eyxhenbıme saccu Rəbbis ıkkananbı vod.

22 İdyayts’ene ulen insan g’eliqqa hele,

kar deşda insanır horalayre yugra vor.

23 Rəbbile qərq’ı’niyn ı’mı’r xıliy qaa’a.

Rəbbile qəyq’ənna ittura g’ılexhana,

pisınıd mang’uk set’a deş.

24 Tanbalee xıl g’abeeqa hiyxə,

mançe xıl ghalyaqa ıkkekka deş.

25 Matsxara haa’ang’us cazaa hevle, manke caahilyarıb ək’eleeqa qavaales.

Ək’elikang’uk’le aq’veeqa cuvab uvhee, mang’un ats’al hexxaxhes.

26 Şavaayiy dek q’əra qı’ı yed g’e’eyşu,

mana naş qa’ana dix vor.

27 Dix, terbiyel k’ırı alixhxhiyle xıl ts’ıts’av’ee,

ats’al helene yəqqı’ler qığeç’esda.

28 Karaı’dəəne şahadee qopkuvalla matsxara haa’a,

pisıng’une ghalen bınah opxhan.

29 Matsxara haa’anbı cazaa dena aaxvas deş,

beynyavabışde yı’q’əsıb çümq üvxəs.