1 Pisda insan hexvana, mang’uqa qihna gexhana dexheeyir,

qorkuname, aslan xhinne yik’eka eyxhe.

2 Ölka g’elil quvxhamee, vuk’lek vukkekkanbı geeb qeebaxhe.

K’orana ək’elikana, iş vaats’ana insan ixhee, ölka geeb gahna it’umba avqas.

3 Kar deşing’vee, mebın kasibar hooç’an-g’ooç’anxhee,

man ezuyn ıkkekkane gyoğiyk akar.

4 Xət qı’iyn yik’el hixan ha’anbışe, pisda axtı qa’a.

Xət qı’iyn ha’anbıme, mang’une ögiyl ulyoozar.

5 Pisınbışilqa qopkuvalla nəxdın kar ıxhay hiyxhar deş,

Rəbb t’abal ha’anbışilqa gırgın hiyxharan.

6 Məttına ı’mı’r haa’ana kar deşda,

quç’opkurne yəqbışika ı’ğiykarne karnang’ule yugra vor.

7 Ək’elikane dixee xət qı’iyn ha’an,

vuxhnat’ayka hambaziyvalla haa’ang’vee, dekkıs naş qa’an.

8 Xənne faizıka cus kar sa’ang’un kar,

inekke qiyğa kar deşinbışika yugra eyxheng’us hixharas.

9 Xət qa’an g’idiyxhesdemee k’ırıbı aqqaqqang’un düəbıd

Allahnemee həlyvəq’ənasınbı vod.

10 Qopkuynbı quç’opkurne yəqqı’lqa ts’ıts’aa’ana vucee alipk’ırne g’uyeeqa g’a’ayxhas.

Məttıne yik’nanbışis yugun karbı axvas.

11 Karnang’uk’le vuc k’orana ək’elynana xhinne ats’a,

kar deşde k’orane ək’elynang’uk’leme mana ul üvxümeecar ats’a eyxhena.

12 Qopkuynbı ğameepxhamee, gırgınbı şadeebaxhenbı.

Pisınbı ç’ak’ınbı vuxhamee, insanar dyuguleebaxhenbı.

13 Bınahbı dyugulya’ang’uqa barakat vuxhes deş.

Bınahbı gardanaqa alyaat’u, manbı g’aletçiyng’us rəhı’m haa’as.

14 Gırgıne gahbışilycar qopkune yəqqı’le qıtteç’es qəyq’ənna baxtivar vorna,

hı’t’ilqame ver abayle.

15 Kar deşde milletna pisda xərna,

hooghane aslanık, mıssıne syoyuk akar.

16 Ək’el deşde xərıng’vee geeb hooç’an-g’ooç’an,

haramın kar dekkanang’una ı’mı’r xıliy qooxhe.

17 Eb k’yoohar haa’ana, nyuq’vneeqa hixharasmee, g’adaxhvanasda.

Hasre şavaacad mang’us kumag hıma’acen.

18 Qorkune yəqqı’n hoyharna g’attixhanasda,

quç’opkurna yəq əlyhəəname sayangara qukk’yok’alasda.

19 Cun ciga ezu-qiyşalng’vee ats’esınmeen gıney oxhanas,

q’ərane karbışde qihna girxhuname, vuççud dena axvas.

20 Yı’q' qizaras eyxhene insanıqa barakat geeb vuxhes,

zaara karana ixhes ıkkanname, cazaa dena axvas deş.

21 Sang’un sura aqqiy yugda deşin,

sabaranbışeme sa xüvə gıneynemeeyib bınah haa’ana.

22 Q’ı’rq’ı’t’iy karana ixhesva g’adayxhvan,

mang’uk’le culqa kar deşiyvalla qöö vuxhay ats’a deş.

23 Şavaayiy merıng’une aq’veeqa cuvab eyhe,

mana, ittune mizeka hor ha’ang’ule yugra g’aces.

24 Dekkiy-yed q’əra qav’u, «man bınah deşva» eyhena

g’ulduraaşina hambaz vor.

25 Mıssıne ulen uğoodıybı ha’a,

Rəbbilqa umud haa’ana gyatsts’ı-gixhxhıne cigeeqa gexha.

26 Culqacab umud haa’ana beynyava vor,

k’orane ək’elika ı’ğı’ykarname g’ittiyxhanna.

27 Kar deşing’us xıl avquna, mısacar kar dena axvas deş,

məxbınbışilqa ul gyapxıyng’veeme geeb bed-düə alyapt’as.

28 Pisınbı ç’ak’ınbı vuxhamee, insanar dyuguleebaxhenbı.

Manbı habat’ang’a, qopkuynbı geeb qeebaxhe.