ಆದಿಕಾಂಡ 26

ಇಸಾಕ್ ಗೆರಾರ‍್ಮ ಜಿವ್ಣುಕರ‍್ಯೋತೆ

1 ಅಬ್ರಹಾಮ್‍ನ ಹಗಾಮ್ಮ ಪಹಿಲು ಕಾಳ್‌ದುಕಾಳ್ ಕಾಹೆತೆ ಬಿಜೇಕ್ ಕಾಳ್‌ದುಕಾಳ್‌ಬಿ ಕಾನಾನ್ ದೇಖ್ಹ್‌ನ ಆಯು. ತದೆ ಇಸಾಕ್‍ನೆ ಫಿಲಿಷ್ಟಿಯವಾಳನೊ ರಾಜ಼ ಅಬೀಮೆಲೆಕನ ದೇಖಾನ ಗೆರಾರ್‌ನ ಗಯೊ. 2 ಹಿಜ್ಜಾ಼ ಯೆಹೋವನೆ ಇಸಾಕ್‍ನ ದರ್ಶನ್‌ದೀನ್, "ತೂ ಈಜಿಪ್ಟ್ ದೇಖ್ಹ್‌ನ ನಕೊ ಜಾ಼; ಮೇ ಬೋಲುತೆ ದೇಖ್ಹ್‌ಮ ತೂ ಜಿವ್ಣು ಕರ್ನು. 3 ತೂ ಆ ದೇಖ್ಹ್‌ಮ ರ‍್ಹೇ; ಮೇ ತಾರಕನ ರ‍್ಹೀನ್ ತುನ ಆಶೀರ್ವಾದ್ ಕರಿನ್‌ ತುನಾಬಿ, ತಾರಿ ಪಿಳ್ಗಿವಾಳನಬಿ ಆ ಖ್ಹಾರಸ್ ತಬರ್ಖಾನ ದೆವುಸ್‌. ಅಮ್ ತಾರೊ ಬಾ ಅಬ್ರಹಾಮ್‍ನ ಕರ‍್ಯೊತೆ ವಾಗ್ದಾನ್ನ ಚ಼ಲಾವುಸ್. 4 ತಾರಿ ಪಿಳ್ಗಿವಾಳನ ಆಬ್‍ಮ ಛಾ಼ತೆ ಶುಕ್ಕರ್‌ನಿತರ ಭಡೈಶ್. ತಾರಿ ಪಿಳ್ಗಿನ ಆ ತಬರ್ಖೊ ಖ್ಹಾರೋಸ್ ದೆವುಸ್. ತಾರಿ ಪಿಳ್ಗಿಥಿ ಧರ್ತಿನು ಖ್ಹಾರುಸ್‍ ಜ಼ಗ್‌ಜಾ಼ತ್‍ನಾಬಿ ಆಶೀರ್ವಾದ್‌ ಉಷೆ. 5 ಶನಕತೊ ಅಬ್ರಹಾಮ್ ಮಾರಿ ವಾತ್ನ ಮುಡ್‌ಕ್ಯುಝು಼ಕೈನ್ ಮಾರಿ ವಿಧಿನ, ಮಾರಿ ಹುಕುಮ್‍ಖ್ಹಾರನ, ಮಾರಿ ಖಾನೂಲ್‍ನ, ಮಾರಿ ಹುಕುಮ್‌ನ ಪಾಡಿಚಾ಼ಲ್ಯೊ" ಕರಿ ಬೊಲ್ಯೊ.

6 ಇನಖ್ಹಾಜೆ ಇಸಾಕ್‍ ಗೆರಾರ‍್ಮ ಜಿವ್ಣುಕರ್ತೋಥೊ. 7 ಯೊ ಝ಼ಗೋನು ಅದ್ಮಿ ಇನಿ ಬಾವಣ್ಣ ದೇಖಿನ್ ಇನಿ ಬಾರೇಮ ಪುಛಾ಼ಯು. ತದೆ ಇನೆ ರೆಬೆಕ್ಕ ಶನ್‌ಗಾರ್‌ನಿ ಥೀತೆ ಖ್ಹಾಜೆ ಆ ಝ಼ಗೋನು ಅದ್ಮಿ ಅನಾಖ್ಹಾಜೆ ಮನ ಮಾರಿನಾಕ್‍ಶೆನಿ ಕರಿ ಇನೆ ಇನಿ ಬಾವಣ್‌ಕರಿ ಬೋಲಾನ ಡರಿನ್ ಭೇನ್‍ಲಾಗ್ಣು ಕರಿ ಬೊಲ್ಯೊ. 8 ಇನೆ ಯೊ ಝ಼ಗೋಮ ಘಣಾದನ್ ರ‍್ಹವಾನಪಾರ್ ಏಕ್‍ದನ್ ಫಿಲಿಷ್ಟಿಯವಾಳನೊ ರಾಜ಼ ಅಬೀಮೆಲೆಕನೆ ಕಿಟ್ಕೆಥು ದೇಖಾನಿವಖ್ಹ್‌ತೆ ಇಸಾಕ್‍ ಇನಿ ಬಾವಣ್ ರೆಬೆಕ್ಕನಿ ಜೋ಼ಡ್ಮ ಲಾಡ್‌ಕರಾನು ದೇಖ್ಯೊ.