Gênesis 27

ಯಾಕೋಬ್‍ನ ಇಸಾಕ್‍ನಿ ಆಶೀರ್ವಾದ್‌

1 ಇಸಾಕ್‍ ಬುಢೊಹುಯಿನ್ ಡೋಳ ದೆಖಾವಕೊಂತೆ ಭುಂಬ್‌ಳ ಹುಯಿರ‍್ಹವಾನಿವಖ್ಹ್‌ತೆ ಯೊ ಇನೊ ಮೋಟೊ ಛಿಯ್ಯೊ ಏಸಾವನ ಬುಲೈನ್, "ಛಿಯ್ಯಾ" ಕರಿ ಬೋಲಖ್ಹತರ್ ಏಸಾವನೆ, "ಒಹೊ ಹಜ಼್ಜಸ್ ಛೂ಼" ಕರಿ ಬೊಲ್ಯೊ. 2 ಇಸಾಕ್‍ನೆ ಇನ, "ಮೇ ಬುಢೋಹುಯಿಗೊ; ಕದೆ ಮರೀಶ್‍ಕಿ ಮಾಲುಮ್‍ಕೊಯ್ನಿ. 3 ಇನಖ್ಹಾಜೆ ತಾರ ಕಫ್ಪನ್‌ನಾಬಿ ಧೂಣ್ ತೀರ್‌ಖ್ಹಾರು ಪಾಡಿಲೀನ್ ಝಾ಼ಡಿನ ಜೈ಼ನ್; 4 ಅಜು಼ ಮಾರಖ್ಹಾಜೆ ಶಿಕಾರ್‌ಕರೀನ್ ಬೋಟಿಲೀನ್‌ ಆವ್. ಮನ್ ಪಸಂದ್‍ನು ಲಜ಼ತ್‍ನು ಚೀಜ಼್‌ನ ಮಾರ ಖಾಣನಖ್ಹಾಜೆ ತಯ್ಯಾರ್‌ಕರ್, ಮರ್ವಾನ ಅಗಾಡಿ ಮೇ ಯೊ ಖೈನ್ ತುನ ಆಶೀರ್ವಾದ್‌ ಕರುಸ್" ಕರಿಬೋಲ್ಯೊ. 5 ಇಸಾಕ್‍ನೆ ಇನೊ ಛಿಯ್ಯೊ ಏಸಾವನ ಬೋಲ್ಯೊತೆ ವಾತ್ ರೆಬೆಕ್ಕನ ಕಾನ್ಮ ಪಡ್ಯು. 6 ಏಸಾವ ಶಿಕಾರ್‌ ಕರಾನ ಝಾ಼ಡಿನ ಜೈ಼ರ‍್ಹವಾನಿ ವಖ್ಹ್‌ತೆ, 7 ರೆಬೆಕ್ಕನೆ ಇನೊ ಛಿಯ್ಯೊ ಯಾಕೋಬ್‍ನ, "ತಾರೊ ಬಾ ತಾರೊ ಭೈ ಏಸಾವನ ‘ತೂ ಜೈ಼ನ್‌ ಶಿಕಾರ್‌ ಕರೀನ್ ಯೊ ಬೋಟಿಥಿ ಮಾರಖ್ಹಾಜೆ ಲಜ಼ತ್‍ನ ಖಾಣನ ತಯ್ಯಾರ್‌ಕರ್; ಮರಣ್ ಆವಾನ ಅಗಾಡಿ ಮೇ ತುನ ಯೆಹೋವನ ಖ್ಹಾಮ್ಣೆ ಆಶೀರ್ವಾದ್‌ ಕರುಸ್’ ಕರಿ ಬೋಲಾನು ಮೇ ಖ್ಹಮ್‍ಜಿ. 8 ಇನಖ್ಹಾಜೆ ಛಿಯ್ಯಾ, ತೂ ಮಾರಿ ವಾತ್ನ ಕಾನ್‍ದೀನ್ ಮೇ ಬೋಲಾನಿಘೋಣಿ ಕರ್‌. 9 ಬೋಕ್ಡಾನ ಮಂಧಾಮ ಜೈ಼ನ್ ಬೇ ಅಛ್ಛಾ಼ ಬೋಕ್ಡಾನ ಚೆಲ್ಕಾವ್ನ ಜ಼ಲ್ದಿ ಲೀನ್‍ ಆವ್; ಇನೇಥಿ ತಾರ ಬಾನ ಪಸಂದ್‍ನು ಲಜ಼ತ್‍ನು ಖಾಣು ಮೇಸ್ ತಯ್ಯಾರ್‌ಕರೂಸ್. 10 ತೂ ಯೊ ಇನ ಲಿಜೈ಼ನ್ ಖಡಾವ್ಣು; ಅಮ್ ಕರ‍್ಯೋತೊ ಯೊ ಮರಾನ ಅಗಾಡಿ ತುನಾಸ್‍ ಆಶೀರ್ವಾದ್‌ ಕರ್‌ಶೆ" ಕರಿ ಬೋಲಿ. 11 ಇನಖ್ಹಾಜೆ ಯಾಕೋಬ್‍ನೆ ಇನಿ ಆಯಾ ರೆಬೆಕ್ಕನ, "ಮಾರೊ ಮೋಟೊ ಭೈ ಏಸಾವ ಆಂಗ್‍ಭರಿ ಕೇಖ್ಹ್‌ವಾಳೊ ಹುಯಿರೋಸ್. ಮೇ ಬಿಣ್‌ಕೇಖ್ಹ್‌ವಾಳೊ. 12 ಏಕ್‍ ವೇಳ್ ಬಾ ಮನ ಛೀಮಿ ದೇಖ್ಯೋತೊ ಮೇ ಇನ ಠಗಾವವಾಳೊ ಹುಯಿನ್ ದೆಖಾಯೋತೊ, ಆಶೀರ್ವಾದ್‌ಥೀಬಿ ಶಾಪಾಸ್ ಲೀಲಿಶ್" ಕರಿ ಬೊಲ್ಯೊ. 13 ಇನಿ ಆಯಾ ಇನ, "ಛಿಯ್ಯಾ, ಯೊ ತುನ ಶಾಪ ದಿದೋತೊ ಯೊ ಶಾಪ ಮನರ‍್ಹವಾದೆ; ತೂ ಮಾರಿ ವಾತ್ನ ಖ್ಹಮ್‌ಜಿನ್ ಬೋಕ್ಡಾನ ಚೆಲ್ಕಾವ್ನ ಲೀನ್ಆವ್‌" ಕರಿ ಬೋಲಿ. 14 ಇನೆ ಜೈ಼ನ್ ಯೊ ಅಖ್ಖಾನ ಲಯಿನ್ ಆಯಾನ ದಿದೊ. ರೆಬೆಕ್ಕನೆ ಇನ ಬಾನ ಪಸಂದ್‍ಹುವಾನು ಲಜ಼ತ್‍ನ ಖಾಣನ ತಯ್ಯಾರ್‌ಕರಿ. 15 ಇನಪಾರ್ ರೆಬೆಕ್ಕನೆ ಇನಕನ ಥೂತೆ ಇನ ಮೋಟೊ ಛಿಯ್ಯೊ ಏಸಾವನು ಘಣಾ ಅಛ಼್ಛ ಲುಂಗ್ಡಾನ ಪಾಡಿಲಯಿನ್, ಇನೊ ನ್ಹಾನೊ ಛಿಯ್ಯೊ ಯಾಕೋಬನ ಫೇರೈ. 16 ಯೊ ಬೋಕ್ಡಾನ ಚೆಲ್ಕವ್‍ನು ಚಾ಼ಂಬ್ಡಾವ್‍ನ ಇನ ಹಾತ್‍ನಾಬಿ, ಘಲೆಂಡನಾಬಿ ಲಪೇಟಿ. 17 ಪಾಛ಼ಳ್‍ಥು ಇನೆ ತಯಾರ್ ಕರೀತೆ ಲಜ಼ತ್‍ನ ಖಾಣನಬಿ ರೋಟನಾಬಿ ಇನೊ ಛಿಯ್ಯೊ ಯಾಕೋಬನ ಹಾತ್ಮದಿದಿ. 18 ಇನೆ ಬಾಕನ ಜೈ಼ನ್, "ಬಾ" ಕರಿ ಪುಕಾರಖ್ಹತರ್, ಬಾನೆ, "ಶಾತ್‍ಲಾ ಛಿಯ್ಯಾ, ತೂ ಕೋಣ್?" ಕರಿ ಪುಛಾ಼ಯೊ. 19 ಯಾಕೋಬನೆ ಇನ, "ಮೇ ತಾರೊ ಮೋಟೊ ಛಿಯ್ಯೊ ಏಸಾವ; ತಾರಿ ಹುಕುಮ್‍ನಿತ್ರಾಸ್ ಖಾಣು ತಯಾರ್ ಕರೀನ್ ಲೈರಾಖ್ಯೋಸ್. ಉಠಿ ಬೇಶಿನ್ ಮೇ ಲೈರಾಖ್ಯೋತೆ ಶಿಕಾರ್‌ ಬೋಟಿ ಖೈನ್ ಮನ ಆಶೀರ್ವಾದ್‍ಕರ್" ಕರಿ ಬೊಲ್ಯೊ. 20 ಇಸಾಕ್‍ನೆ, "ಶಾತ್‍ಲಾ ಛಿಯ್ಯಾ, ಅತ್ರೆ ಜ಼ಲ್ದಿ ಶಿಕಾರ್‌ ಕಿಮ್‌ಕರ್ಯೊ" ಕರಿ ಬೋಲಖ್ಹತರ್ ಇನೆ, "ತಾರೊ ದೇವ್‍ ಯೆಹೋವನೆ ಇನ ಮಾರ ಖ್ಹಾಮ್ಣೆ ಆವಖ್ಹರ್ಕು ಕರ‍್ಯೊ" ಕರಿ ಬೊಲ್ಯೊ. 21 ಇಸಾಕ್‍ನೆ ಯಾಕೋಬ್‍ನ, "ಚೆಲ್ಕಾ, ಮಾರಕನ ಆವ್; ತೂ ಮಾರೊ ಛಿಯ್ಯೊ ಏಸಾವಕಿ ಕೊಯ್ನಿಕಿ ಛೀಮಿ ದೇಖಿ ಮಾಲುಮ್ ಕರ್ನು" ಕರಿ ಬೊಲ್ಯೊ. 22 ಯಾಕೋಬ ಖನ್ನೆ ಆವಖ್ಹತರ್ ಬಾ ಇಸಾಕನೆ ಇನ ಛೀಮಿ ದೇಖಿನ್, "ಅವಾಜ಼್‌ತೊ ಯಾಕೋಬನು ಅವಾಜ಼್ ಹುಯಿರುಸ್, ಹಾತ್ ಏಸಾವನ ಹಾತ್ನಿತರ ಛಾ಼" ಕರಿ ಬೊಲ್ಯೊ. 23 ಯಾಕೋಬನ ಹಾತ್ ಏಸಾವನ ಹಾತ್‍ನಿತ್ರಸ್ ಕೇಖ್ಹಾಳು ಹುಯಿರ‍್ಹುಥೂತೆ ಖ್ಹಾಜೆ ಇಸಾಕ್‍ನೆ ಇನು ಖ್ಹಣೇದ್‍ ಧರ‍್ಯೊಕೊಂತೆ ಇನ ಆಶೀರ್ವಾದ್‍ಕರ‍್ಯೊ. 24 ಇನೆ, "ತೂ ಖ್ಹಾಚಮ ಮಾರೊ ಛಿಯ್ಯೊ ಏಸಾವಕಿಶು" ಕರಿ ಬೋಲಖ್ಹತರ್ ಯಾಕೋಬನೆ, "ಒಹೊ" ಕರಿ ಬೊಲ್ಯೊ. 25 ಇಸಾಕ್‍ನೆ, "ಯೊ ಬೋಟಿನ ಖನ್ನೆಲೀನ್‍ ಆವ್; ತೂ ಲಾಯೋತೆ ಶಿಕಾರ್‌ನಿ ಬೋಟಿನ ಮೇ ಖೈನ್ ಇನಪಾರ್‌ ತುನ ಆಶೀರ್ವಾದ್‌ ಕರುಸ್" ಕರಿ ಬೊಲ್ಯೊ. ಯಾಕೋಬ್‍ನೆ ಯೊ ಖ್ಹಾರು ಇನ ಖನ್ನೆ ಲೈನ್‌ ದ್ಯಾವಖ್ಹತರ್‌ ಇನೆ ಖಾದೊ; ದ್ರಾಕ್ಷಿನರಖ್ಹ್‌ನ ಪೀದೊ. 26 ಇನಪಾರ್‌ ಇನೊ ಬಾ ಇಸಾಕ್‍ನೆ ಇನ, "ಛಿಯ್ಯಾ, ತೂ ಮಾರ ಖನ್ನೆ ಅಯಿನ್ ಮನ ಬುಚ್ಚಾ಼ದೆ" ಕರಿ ಬೋಲಖ್ಹತರ್ ಇನೆ ಖನ್ನೆ ಅಯಿನ್ ಬಾನ ಬುಚ್ಚಾ಼ದಿದೊ. 27 ಇಸಾಕ್‍ನೆ, ಇನ ಲುಂಗ್ಡಾನು ವಾಖ್ಹ್‌ನ ಖ್ಹುಂಗಿದೇಖಿನ್ ಇನ ಆಶೀರ್ವಾದ್‌ಕರೀನ್, "ವ್ಹಾ, ಮಾರ ಛಿಯ್ಯಾನಿ ಮಹಿಕಾವಾನಿ ವಾಖ್ಹ್‌, ಯೆಹೋವನೆ ಆಶೀರ್ವಾದ್ ಕರ‍್ಯೋತೆ ಖೇತರ‍್ನಿ ಮ್ಹೈಕಾವಾನಿ ವಾಖ್ಹ್‌ನಿಘೋಣಿ ಛಾ಼. 28 ದೇವ್‌, ತುನ ಆಬ್‌ನು ಬರಪ್‌ನಾಬಿ ಹದಾನಿ ಜ಼ಮೀನ್ನಾಬಿ ದೀನ್‌, ಅನಾಜ಼್‌ಬಿ, ದ್ರಾಕ್ಷಿನ ರಖ್ಹ್‌ನಾಬಿ ಚೆಹೆಳ್‌ಥಿ ದ್ಯವಾದೆ. 29 ಅದ್ಮಿಖ್ಹಾರು ತುನ ಆರಾದನೆ ಕರಾದೆ, ಜ಼ಗ್‌ಜಾ಼ತ್‌ಖ್ಹಾರು ತಾರ ಹಾತ್‍ಹೇಟ್ ರ‍್ಯವಾದೆ. ತಾರ ಮೋಟ ನ್ಹಾನಭೈಯೆನ ತೂ ಯಜಮಾನ್ ಹುಯಿರ‍್ಹೆ, ತಾರಿ ಆಯನ ಲಡ್ಕ ತುನ ಆಡ್‌ಪಡಾದೆ. ತುನ ಶಾಪ್ನ ದ್ಯವಾಳನ ಶಾಪ್ನಾಬಿ ತುನ ಆಶೀರ್ವಾದ್‌ ಕರವಾಳಾನ ಆಶೀರ್ವಾದ್‌ಬಿ ಹುವಾದೆ" ಕರಿ ಬೊಲ್ಯೊ.

ಇಸಾಕ್‌ಕಿ ಆಶೀರ್ವಾದ್‍ನಖ್ಹಾಜೆ ಏಸಾವನಿ ಬಿಂತಿ

30 ಇಸಾಕ ಇನ ಆಶೀರ್ವಾದ್‌ ಕರಿ ಹುಯಿಜಾ಼ವಾದಿನ್ ಯಾಕೋಬ ಇನ ಬಾಕಂಥೋ ಚ಼ಲೆಜಾ಼ವಾನಿ ವಖ್ಹ್‌ತೇಸ್ ಇನೊ ಮೋಟೊ ಭೈ ಏಸಾವ ಹಲ್ಡೇಥೊ ಆಯೊ. 31 ಯೋಬಿ ಅಛ್ಛು಼ ಖಾಣು ಪೀಕೈನ್ ಇನ ಬಾಕನ ಲಯಿನ್ ಇನ, "ಬಾ, ತೂ ಉಠೀನ್ ತಾರೊ ಛಿಯ್ಯೊ ಹುಯಿರ‍್ಹೋತೆ ಮೇ ಲಾಯೋತೆ ಶಿಕಾರ್‌ನಿ ಬೋಟಿನ ಖೈನ್ ಮನ ಆಶೀರ್ವಾದ್‌ ಕರ್‌" ಕರಿಬೋಲ್ಯೊ. 32 ಇನೊ ಬಾ ಇಸಾಕನೆ, "ತು ಕೋಣ್‌?" ಕರಿ ಇನ ಬೋಲಖ್ಹತರ್‌ ಇನೆ, "ಮೇ ತಾರೊ ಫೈಲೊಟೊ ಛಿಯ್ಯೊ ಏಸಾವ" ಕರಿಬೋಲ್ಯೊ. 33 ಇನಖ್ಹಾಜೆ ಇಸಾಕನೆ ಘಣೊ ಗಡ್‌ಗಡ್‌ ಕಾಪ್ತೋಹುಯಿನ್, "ಕೋಣ್‌ ಬಿಜೇಕ್‌ ಜ಼ಣು ಶಿಕಾರ್‌ ಕರಿನ್ ಮನ ಖಾಣು ಲಯಿನ್ ದಿದೋತೆ? ತೂ ಆವಾನ ಅಗಾಡಿಸ್ ಇನೆ ಲಾಯೋತೆ ಖಾಣನ ಖೈನ್ ಕಡ್‌ಷಿನಿ ಅಶೀರ್ವಾದ್‌ ಕರಿನಾಖ್ಯೊ; ಇನ ಕರ‍್ಯೊತೆ ಆಶೀರ್ವಾದ್‌ ಛು಼ಕ್‌ಶೆ ಕೊಯ್ನಿ" ಕರಿಬೋಲ್ಯೊ. 34 ಏಸಾವ ಇನ ಬಾನಿ ವಾತೆನ ಖ್ಹಮ್‌ಜಿನ್ ದುಖ್‌ನ ಕುಢಾಪೇಥಿ ಘಣು ರೋವ್ತೊಹುಯಿನ್‌, "ಬಾ, ಮಾರೊ ಬಾ, ಮನಾಬಿ ಆಶೀರ್ವಾದ್ ಕರ್‌" ಕರಿ ಗಿಂಗೈಲೇತಾನ ಇಸಾಕನೆ, 35 "ತಾರೊ ನ್ಹಾನೊ ಭೈನೆ ತುನ ಹೋಣು ಥೂತೆ ಆಶೀರ್ವಾದ್‌ನ ತಾರೇಥಿ ಠಗೈಲಿ ಚ಼ಲೆಗಯೊ" ಕರಿಬೋಲ್ಯೊ. 36 ತದೆ ಏಸಾವನೆ, ಇನಖ್ಹಾಜೇಸ್ ಇನ "ಯಾಕೋಬ ಕರಿ ನಾಮ್‌ ಪಡ್ಯುತೆ ನ್ಯಾವಸ್ನಿ, ಇನೆ ಪಹಿಲೆಸ್ ಬೇ ವಖ್ಹತ್ ಮನ ಠಗೈರಾಖ್ಯೋಸ್, ಅಗ್ಗಳ್ ಇನೆ ಮಾರಾ ಫೈಲೋಟ ಹಕ್‌ನ ಚೋ಼ರ್‌ಕರ‍್ಯೊ; ಹಮ್ಕೆ ಅಯಿನ್ ಮನ ಹೋಣುಥುತೆ ಆಶೀರ್ವಾದ್‌ನಾಬಿ ಛಿನೈಲಿದೊ" ಕರಿ ಬೋಲಿನ್ ಇನ ಬಾನ, "ಮಾರಖ್ಹಾಜೆಕರಿ ತಾರಕನ ಅಶೀರ್ವಾದಸ್ ಕೊಯ್ನಿಕಿಶು?" ಕರಿ ಬೋಲಖ್ಹತರ್‌, 37 ಇಸಾಕನೆ ಏಸಾವನ, "ಮಾರ ಛಿಯ್ಯಾ, ಇನ ತಾರೊ ರಾಜ಼ಕರಿ ಬಣೈರಾಖ್ಯೊಸ್; ಇನ ಮೋಟ ನ್ಹಾನಭಯ್ಯೆನ ಆಳ್‌ಬಣೈ ದೀರಾಖ್ಯೊಸ್; ಅನಾಜ಼್‌ಬಿ, ದ್ರಾಕ್ಷಿನೊ ರಖ್ಹ್‌ಬಿ ಇನ ದೀರಾಖ್ಯೊಸ್ ದೇಕ್, ಅಮ್‌ ರ‍್ಹವಾಪರ್‌ ಮೇ ತಾರಖ್ಹಾಜೆ ಶಾತ್‌ಕರು?" ಕರಿಬೋಲ್ಯೊ. 38 ಏಸಾವನೆ ಇನ, "ಬಾ ಮಾರೊ ಬಾ, ತಾರಾಮ ಎಕ್ಕಸ್ ಆಶೀರ್ವಾದ್ ಖಲಿ ಥು? ಬಾ, ಮನಾಬಿ ಆಶೀರ್ವಾದ್ ಕರ್‌" ಕರಿ ಬೋಲಿನ್ ರದ್‌ನ್ಯ ಕರ‍್ಯೊ. 39 ತದೆ ಇನೊ ಬಾ ಇಸಾಕ್‍ನೆ ಇನ, "ಹದಾನಿ ಜ಼ಮೀನ್‍ಥೀಬಿ ಆಬ್‍ಥು ಪಡಾತೆ ಓಖ್ಹ್‌ಥಿ ದೂರ್ ತಾರು ಘರ‍್ಹೀಶೆ. 40 ತೂ ತಲ್ವಾರ್‌ಥೀಸ್ ಜಿವ್ಣುಕರೀಶ್. ತಾರ ನ್ಹಾನ ಭೈನಿ ಚಾ಼ಕ್ರಿ ಕರಿಶ್. ಕತೋಬಿ ತುನ ಖ್ಹಮಾಳನ ಕೋಹುವಾಂತೆ ವಖ್ಹತ್, ಯೊ ತಾರ ಖಾಂದಪರ್ ಢೊವಾಡ್‍ಶೇತೆ ನೊಗಾನ ತೋಡಿನಾಖಿಷ್" ಕರಿ ಬೊಲ್ಯೊ. 41 ಬಾನೆ ಯಾಕೋಬನ ಕರ‍್ಯೊತೆ ಆಶೀರ್ವಾದ್‍ನಖ್ಹಾಜೆ ಏಸಾವನೆ ಯಾಕೋಬ್‍ನ ವಹೇರ್‌ ಕರೀನ್ ಇನ ದಿಲ್‌ಮ, "ಬಾನಖ್ಹಾಜೆ ದುಖ್‍ ಕರಾನಿವಖ್ಹತ್‍ ಖನ್ನೆಅಯ್ಗಿ. ಇಮ್ಮಸ್‌ ಮಾರೊ ನ್ಹಾನೊ ಭೈ ಯಾಕೋಬನ ಮರ್‌ನಾಖಿಶ್" ಕರಿ ಬೋಲಿಲಿದೊ. 42 ಮೋಟೊ ಛಿಯ್ಯೊ ಏಸಾವನೆ ಬೋಲ್ಯೊತೆ ವಾತ್ ರೆಬೆಕ್ಕನ ಮಾಲುಮ್‍ ಪಡಾನಿವಖ್ಹ್‌ತೆ ಇನೆ ಇನೊ ನ್ಹಾನೊ ಛಿಯ್ಯೋ ಯಾಕೋಬನ ಬುಲೈನ್ ಇನ, "ದೇಕ್, ತಾರೊ ಮೋಟೊ ಭೈ ಏಸಾವನೆ ತುನಾ ಮಾರಿನ್ ದಾವೊಕಾಡ್ಣು ಕರಿ ಛಾ಼. 43 ಇನಖ್ಹಾಜೆ ಛಿಯ್ಯಾ, ಮಾರಿವಾತ್ನ ಖ್ಹಮಜ಼್; ತೂ ಹಾರಾನ್ಮ ಛಾ಼ತೆ ಮಾರೊ ಭೈ ಲಾಬಾನಕನ ಚ಼ಲ್ಯೋಜಾ಼. 44 ಥೋಡದನ್, ತಾರ ಭೈನೊ ಇರಾದೊ ಟುಟಾಲಗು ಇನಾಕನಸ್ ರ‍್ಹೆ. 45 ತಾರೊ ಭೈ ತೂ ಕರ‍್ಯೊತೆ ಇನ ಭೈಕಿನ್, ಇನೊ ಇರಾದೊ ತೋಡಿಲ್ಯವಾನಿ ವಖ್ಹ್‌ತೆ ಮೇ ತುನ ಹಿಜ್ಜಾ಼ಥಿ ಬುಲೈ ಮಂಗೈಶ್. ಮೇ ಎಕ್ಕಸ್‍ ದನ್ಮ ತುಮುನ ಭೇಜ಼ಣಾನ ಗುಮೈಲೆವ್ ಕಿಮ್?" ಕರಿಬೋಲಿ.

ಇಸಾಕ್‍ನೆ ಯಾಕೊಬ್‌ನ ಲಾಬಾನಕನ ಮೋಕ್‌ಲ್ಯೊತೆ

46 ರೆಬೆಕ್ಕನೆ ಇಸಾಕ್‍ನ, "ಹಿತ್ತಿಯವಾಳನಿ ಛೋ಼ಕ್ರಿಯೇಥಿ ಮನ ಖಟು ಹುಯಿರುಸ್. ಯಾಕೋಬಬಿ ಆ ದೇಖ್ಹ್‌ಮ ಛಾ಼ತೆ ಹಿತ್ತಿಯನಿ ತಯೇಡವ್‍ನ ಚೂ಼ಣಿ ವ್ಯಹ ಕರಿಲಿದೋತೊ, ಮೇ ಬಿಜೂ಼ಬಿ ಬಚಿನ್ ಶನೊ ಫಾಯಿದೊ?" ಕರಿ ಬೋಲಿ.