Gênesis 41

ಯೋಸೆಫ್‌ನೆ ಫರೋಹನ ಖ್ಹೋಣ್ಯವ್‌ನಿ ಮತ್ಲಬ್‌ ಬೋಲ್ಯೋತೆ

1 ಬೇ ವರಖ್ಹ್‌ ಹುವಾದಿನ್ ಫರೋಹನ ಎಕ್ ಖ್ಹೋಣ್ಯು ಪಡ್ಯು. ಯೊ ಖ್ಹೋಣ್ಯಾಮ ನೈಲ್ ನದ್ದಿನ ಕನಾರಿಪರ್ ಭಿಯ್ಯೋಥೊ. 2 ತದೆ ಖ್ಹಾಜ಼್‌ಥಿ ರ‍್ಹವಾನಿ ಖ್ಹಾತ್ ಪಲಿಹುಯಿ ಗೈಯೆ ಯೊ ನೈಲ್‌ ನದ್ದಿನ ಮಹಿಥು ಆಯಿನ್ ಘಾಖ್ಹ್‌ ಚ಼ರಾಲಗಿಥಿಯೇ಼. 3 ಇನ ಪೀಠೇಸ್ ಖ್ಹುಕ್‌ಲಿ ಖ್ಹಾತ್ ಬಂಕೋಡಿ ಗೈಯೆ ನೈಲ್‌ ನದ್ದಿನ ಮಹಿಥು ಆಯಿನ್ ಪಹಿಲೆ ದೆಖೈಯೇತೆ ಗೈಯೇಕನ ಭೀರಿಗೈಯೆ. 4 ಬಂಕೋಡಿ ಗೈಯೆನೆ ಖ್ಹಾಜ಼್‌ನಿ ಯೊ ಪಲಿಹುಯಿ ಗೈಯೆನ ಖೈಲಿದಿಯೆ. ಎತ್ರಾಮ ಫರೋಹನ ಹೊಷಾರಿ ಹುಯಿಗಯು 5 ಯೊ ಪಾಛೊ಼ ನಿಂದರ್‌ ಕರಾದಿನ್‌ ಬಿಜೇಕ್ ಖ್ಹೋಣ್ಯುಪಡ್ಯು. ಯೊ ಶಾತ್‌ಕತೊ ದಾಣಭರಾಯುಹುಯು ಖ್ಹಾತ್ ಮುಡ್‌ಕ್ಯಾನು ಪಕೇಟ್ ಬುಟ್ಟುಖ್ಹಾರು ಎಕ್ಕಸ್ ಡಂಟ್‌ಮ ಫುಟ್ಯು. 6 ಇನ ಪೀಠೆಸ್ ಚ಼ಢ್‌ತಿ ಬಾಜೂ಼ನ ವಹಿರೇಥಿ ಖ್ಹುಕೈನ್, ತಶೀಗಯುತೆ ಬಿಜು಼ ಖ್ಹಾತ್ ಮುಡ್‌ಕ್ಯನು ಬುಟ್ಟು ಫುಟ್‌ತು ಆಯು. 7 ಅಜು಼ ತಶೀಗಯುಹುಯು ಯೊ ಬಂಕೋಡ್ಯು ಖ್ಹಾತ್ ಮುಡ್‌ಕ್ಯಾನು ಬುಟ್ಟುಖ್ಹಾರು ದಾಣಭರಾಯುಹುಯು ಯೊ ಖ್ಹಾತ್ ಮುಡ್‌ಕ್ಯಾನ ಪಕೇಟ್ ಬುಟ್ಟಾನ ಗಳಿಲಿದು. ಎತ್ರಾಮ ಫರೋಹನೆ ಹೊಷಾರಿ ಹುಯಿನ್, ಇನೆ ದೇಖ್ಯೋತೆ ಖ್ಹೋಣ್ಯು ಕರಿ ಮಾಲುಮ್‌ಕರ್‌ಲಿದೊ. 8 ವ್ಹಾಣೆಮ ಇನೊ ದಿಲ್‌ಮ ಕಲಾವ್ಣಿ ಹುಯಿನ್‌, ಈಜಿಪ್ಟ್ ದೇಖ್ಹ್‌ಮಥೂತೆ ಖ್ಹಾರೂಸ್ ಪೊಂಡಿತ್‌ನಾಬಿ ಗ್ಯಾನಿನಾಬಿ ಬುಲೈಮಂಗಾಯೊ. ಇವ್ಣುನ ಇನು ಖ್ಹೋಣ್ಯು ಬೋಲಿವತಾಳ್ಯೊ. ಯೊ ಮತ್ಲಬ್‌ನ ಇನ ಬೋಲಿವತಾಳವಾಳು ಕೋಣ್ಬಿ ಮಳ್ಯುಕೊಯ್ನಿ.

9 ತದೆ ಪಾನದ್ಯಾವಾಳ ಆಳ್‌ನ ಅದಿಕಾರಿನೆ ಫರೋಹನ, "ರಾಜ಼ ಆ ವಖ್ಹತ್ ಮಾರಿ ಗಲತ್‌ನ ಮೇ ಮಾನಿಲೇವ್ಣು. 10 ತೂ ತಾರ ಆಳ್‌ಪರ್ ಇರಾದೊಕರೀನ್ ಮನಾಬಿ ಯೊ ಭೋಜ಼ನ್ ಪಿಕಾವವಾಳನ ಮೋಟಾನಾಬಿ ಶಿಪಾಯಿನ ಘರ್‌ಮ ಕಾವಲ್‌ಮ ರಾಖಾನಿವಖ್ಹ್‌ತೆ ಹಮುನ ಭೇಜ಼ಣಾನಾಬಿ 11 ಎಕ್ಕಸ್‌ ರಾತ್ಮ ಖ್ಹೋಣ್ಯು ಪಡ್ಯು, ಏಕೇಕ್‌ ಜ಼ಣಾನ ಖ್ಹೋಣ್ಯಾನ ಅಲಕ್‌ ಅಲಕ್ ಮತ್‌ಲಬ್‌ಥು. 12 ಹಿಜ್ಜಾ಼ ಹಮಾರಿ ಜೋ಼ಡ್ಮ ಇಬ್ರಿಯವಾಳೊ ಎಕ್ ಜ಼ವಾನಿಥೊ; ಯೊ ಶಿಪಾಯಿನೊ ಆಳ್‌. ಹಮೆ ಇನ ಹಮಾರ ಖ್ಹೋಣ್ಯಾನ ಬೋಲಖ್ಹತರ್‌ ಇನೆ ಯೊ ಅಖ್ಖಾನು ಮತ್ಲಬ್‌ನ ಹಮುನ ಬೊಲ್ಯೊ; ಹಮಾರ ಖ್ಹೋಣ್ಯಾನಿ ಪರಕ್ ಬರೋಬರಸ್ ಬೊಲ್ಯೊ. 13 ಎತ್ರೇಸ್ ಕಾಹೆತೆ ಇನೆ ಹಮುನ ಬೋಲ್ಯೋತೆ ಪರಕ್ಕಸ್‌ಹುಯು. ಮನ ಪಾಛು಼ ಕಾಮ್‌ಬಿ ಮಳ್ಯು. ಯೊ ಭೋಜ಼ನ್‌ ಪಿಕಾವವಾಳನ ಫಾಖ್ಹೊದೆವಾಯು" ಕರಿ ಬೊಲ್ಯೊ.

14 ಅನ ಖ್ಹಮ್‍ಜ್ಯೋತೆ ಫರೋಹನೆ ಯೋಸೇಫ್‌ನ ಬುಲೈಮಂಗಾಯೊ. ಯೋಸೇಫ್‌ನೆ ಒಗ್ಗೀಸ್ ಜೇಲ್‌ಮಾಥೊ ಛು಼ಟೀನ್ ಢಾಡಿ ಮೂಂಡೈಲೀನ್‌ ಅಲಕ್ ಲುಂಗ್‌ಡು ಫೇರಿಲೀನ್ ಫರೋಹಕನ ಆಯೋ. 15 ತದೆ ಫರೋಹನೆ ಯೋಸೇಫ್‌ನ, "ಮೇ ಎಕ್ ಖ್ಹೋಣ್ಯು ದೇಖ್ಯೊ, ಇನಿ ಮತ್ಲಬ್‌ ಬೋಲಾವಾಳು ಕೋಣ್‌ಬಿಕೊಯ್ನಿ. ಕತೋಬಿ ತೂ ಖ್ಹೋಣ್ಯು ಖ್ಹಮಜ಼್‌ತಾಸ್‌ನ ಇನು ಮತ್‌ಲಬ್ ಬೋಲಸ್‌ಕರಿ ಖಬರ್‌ ಖ್ಹಮ್‌ಜ್ಯೊ" ಕರಿ ಬೊಲ್ಯೊ. 16 ಯೋಸೇಫ್‌ನೆ, "ಮನಶಾತ್‌ಬಿ ಮಾಲುಮ್‌ಕೊಯ್ನಿ. ಕತೋಬಿ ದೇವಸ್‌, ಫರೋಹ ಹುಯಿರೋತೆ ತುನ ಸಮಾಧಾನ್ನು ಫೇಡ್ ದ್ಯವಾಳೊ ಹುಯಿರೋಸ್" ಕರಿ ಬೊಲ್ಯೊ. 17 ತದೆ ಫರೋಹನೆ ಯೋಸೇಫ್‌ನ, "ಖ್ಹೋಣ್ಯಾಮ ಮೇ ನೈಲ್ ನದ್ದಿನು ಕನಾರಿಪರ್ ಭಿಯ್ಯೋಥೊ. 18 ನೈಲ್‌ ನದ್ದಿನ ಮಹಿಥು ಖ್ಹಾಜ಼್‌ನಿ ಖ್ಹಾತ್ ಪಲಿಹುಯಿ ಗೈಯೆ ಆಯಿನ್ ಘಾಖ್ಹ್‌ಮ ಚ಼ರುಕರ್‌ತಿಥೀಯೆ. 19 ಯೊ ಅಖ್ಖಾನ ಪೀಠೇಸ್ ಘಣು ಬಂಕೋಡಿ ಹುಯಿರೀತೆ ಬಿಜಿ ಖ್ಹಾತ್ ಗೈಯೆ ಅಯ್ಯೆ. ಎಥ್ರಾನಿ ಬಂಕೋಡಿ ಗೈಯೇನ ಮೇ ಈಜಿಪ್ಟ್‌ಮ ಕಿಜ್ಜಾ಼ಬಿ ದೇಖ್ಯೋಕೊಯ್ನಿ. 20 ಆನಾಹುಯಿನ್, ಬಂಕೋಡಿ ಹುಯಿರಿಯೇತೆ ಯೊ ಬಂಕೋಡಿ ಗೈಯೆನೆ ಫೈಲೇಸ್ ದೆಖೈಯೇತೆ ಯೊ ಖ್ಹಾತ್ ಗೈಯೇನ ಖೈಲಿದಿಯೆ. 21 ಖಾದಿಯೇತೋಬಿ ಖಾದಿಯೇಂತ್ರ ದೆಖಾಯುಕೊಯ್ನಿ. ಯೊ ಅಗಾಡಿಥೂತೆ ತಿಮ್ಮಸ್ ಬಂಕೋಡಿಸ್‌ಥಿಯೇ. ಎತ್ರಾಮ ಮನ ಹೋಷಾರಿ ಹುಯಿಗು. 22 ಮನ ಪಡ್ಯುತೆ ಬಿಜೇಕ್ ಖ್ಹೋಣ್ಯಾಮ ದಾಣೊ ಭರಾಯುಹುಯು ಖ್ಹಾತ್ ಮುಡ್‌ಕ್ಯಾನ ಪಕೇಟ್ ಬುಟ್ಟು ಎಕ್ಕಸ್ ಡಂಟ್‌ಮ ಫುಟಿರ‍್ಹಯುಥು. 23 ಇನ ಪೀಠೇಸ್ , ಚ಼ಢ್‌ತಿಬಾಜು಼ನೊ ಗರಮ್‌ ವಹಿರಾಮ ತಶೀನ್, ಖ್ಹುಕೈನ್ ಖರಾಬ್‌ಹುಯ್ಗುತೆ ಬಿಜು಼ ಖ್ಹಾತ್ ಮುಡ್‌ಕ್ಯಾನು ಬುಟ್ಟು ಫುಟಿನ್‌ಆಯು. 24 ತಶೀಗಯುತೆ ಬುಟ್ಟುಖ್ಹಾರು ದಾಣ ಭರೈರ‍್ಹುಥೂತೆ ಯೊ ಖ್ಹಾತ್ ಬುಟ್ಟಾನ ಗಳಿಲಿದು. ಆ ಖ್ಹೋಣ್ಯಾನ ಪೊಂಡಿತ್‌ಖ್ಹಾರಾನ ಖ್ಹಮ್‌ಜಾ಼ಡ್ಯೊ; ಯೊ ಅಖ್ಖಾನು ಮತ್ಲಬ್‌ನ ಛೋ಼ಡಿಬೋಲಾನ ಇವ್ಣಾಮ ಕಿನೇಥಿಬಿ ಹುಯುಕೊಯ್ನಿ.

25 ಯೋಸೇಫ್‌ನೆ ಫರೋಹನ, "ಇವ್ಣೆ ದೇಖ್ಯಾತೆ ಬೇ ಖ್ಹೋಣ್ಯಾನಿ ವಾತ್ ಎಕ್ಕಸ್‌. ದೇವ್‌ಕರ್‌ನುಕರಿ ಛಾ಼ತೆ ಇನ ಆ ಅಖ್ಖಾಥಿ ತುನ ಖ್ಹಮ್‌ಜಾ಼ಡಿರಾಖ್ಯೋಸ್. 26 ಯೊ ಖ್ಹಾತ್ ಪಲಿಹುಯಿ ಗೈಯೆಸ್ ಖ್ಹಾತ್ ವರಖ್ಹ್‌; ಯೊ ಖ್ಹಾತ್ ಅಛ್ಛಾ಼ ಬುಟ್ಟಾಬಿ ಖ್ಹಾತ್ ವರಖ್ಹ್‌; ಬೇ ಖ್ಹೋಣ್ಯಾನಿ ಮತ್‌ಲಬ್ ಎಕ್ಕಸ್. 27 ಅಛ್ಛಿ ಗೈಯೆನ ಪೀಠೆ ಅಯ್ಯೇತೆ ಬಂಕೋಡಿ ಹುಯಿರ‍್ಹಿಯೇತೆ ಯೊ ಖ್ಹಾತ್ ಗೈಯೆ ಅಜು಼ ಛ಼ಡ್ತಿಬಾಜೂ಼ನ ವಹಿರೇಥಿ ಖರಾಬ್‌ಹುಯ್ಗುತೆ ಯೊ ಖ್ಹಾತ್ ದಾಣಕೊಂತೆ ಬುಟ್ಟುಖ್ಹಾರು ಕಾಳ್‌ದುಕಾಳ್‌ಹುವಾನು ಖ್ಹಾತ್‌ವರಖ್ಹ್‌ನ ವತಾಳಸ್. 28 ದೇವ್ ಕರ‍್ನುಕರಿ ಛಾ಼ತೆ ಯೊ ಫರೋಹ ಖ್ಹಮ್‌ಜಾ಼ಡಿರಾಖ್ಯೋಸ್‌ಕರಿ ಮೇ ಬೋಲಿವತಾಳ್ಯೋತೆ ಎತ್ರೇಸ್. 29 ಈಜಿಪ್ಟ್ ದೇಖ್ಹ್‌ಮಾಸ್ ಘಣು ಅಛ್ಛಾ಼ ಖ್ಹಾತ್ ಖ್ಹುಗಾಳ್‌ನ ದನ್ ರಿಶೆ, 30 ಇನಪಾರ್‌ ಖ್ಹಾತ್ ಕಾಳ್‌ದುಕಾಳ್‌ನ ದನ್ ಆವ್‌ಶೆ. ತದೆ ಈಜಿಪ್ಟ್ ದೇಖ್ಹ್‌ವಾಳು ಪಹಿಲೆ ಥೂತೆ ಖ್ಹುಗಾಳ್‌ನ ಭೈಕಿಜಾಶೆ; ಯೊ ಕಾಳ್‌ದುಕಾಳ್‌ಥಿ ದೇಖ್ಹ್‌ನಿ ಹಾಲತ್‌ ಖರಾಬ್‌ಹುಯಿಜಾ಼ಶೆ. 31 ಫೈಲೆಥೂತೆ ಖ್ಹುಗಾಳ್‌ನ ದನ್ನಿ ಖ್ಹಣೇದಸ್ ಕೋರ‍್ಹಿಶೇನಿ. ಕತೋಬಿ ಅಗಾಡಿ ವಳ್ಯಾವತೆ ಕಾಳ್‌ದುಕಾಳ್ನ ದನ್ ಘಣು ವದೇಖ್ಹ್‌ನು ಹುಯಿರಿಶೆ, 32 ಆ ಖ್ಹೋಣ್ಯಾನ ಫರೋಹನ ಬೇ ಥರ ದ್ಯವಾನ ಕಾರಣ್ ಶನಕತೊ ದೇವ್ ಆ ಕಾಮ್‌ಕರಾನ ಜ಼ಲ್ದಿಮ ಖ್ಹೂಜ಼್‌ ಕರಿರಾಖ್ಯೊಸ್ ಮಾಲುಮ್ ಕರಿಲೇವ್ಣು. 33 "ಇನಖ್ಹಾಜೆ ತೂ ಅಕ್ಕಲ್‌ವಾಳೊಬಿ ಬುದ್ದಿವಾಳೊಬಿ ಹುಯಿರೋತೆ ಏಕ್‌ಜ಼ಣಾನ ಚೂ಼ಣಿಲೀನ್ ಇನ ಈಜಿಪ್ಟ್ ದೇಖ್ಹ್‌ಪರ್ ಅಧಿಕಾರಿಬಣೈನ್ ಮ್ಹೇಲ್ನು. 34 ಅಜು಼ ತೂ ಎಕ್ ಕಾಮ್ ಕರ‍್ನು;ಈಜಿಪ್ಟ್ ದೇಖ್ಹ್‌ನಿ ಖ್ಹಾರೀಸ್‌ ಬಾಜು಼ಮಾಬಿ ಖ್ಹರ್ಕಾರ್‌ನೊ ಅಧಿಕಾರಿನ ಮ್ಹೇಲಿನ್ ಇವ್ಣೇಥಿ ಖ್ಹುಗಾಳ್‌ನ ಖ್ಹಾತ್‌ವರಖ್ಹ್‌ನು ಪಿಕಾವ್ಣಿಮ ಪಾಚ಼್‌ಮಾನು ಏಕ್‌ ಭಾಗ್ನ ಲೇವ್ಣು. 35 ಇವ್ಣೆ ಅಗ್‌ಲ್ಯಾ ಅಛ್ಛಾ಼ ವರಖ್ಹ್‌ಮ ಖಾಣಾನು ಚೀಜ಼್‌ನಾಬಿ ಅನಾಜ಼್‌ನಾಬಿ ಜ಼ಮಾಕರೀನ್ ಖ್ಹಯೇರ್‌ಮ ಜ಼ತನ್‌ಕರಾನ ತೂ ಹುಕುಮ್‌ ದೆವ್ಣು. 36 ಅಮ್‌ ಖಾಣಾನು ಚೀಜ಼್‌ನ ಜ಼ಮಕರಾಥಿ ಈಜಿಪ್ಟ್ ದೇಖ್ಹ್‌ಮ ಕಾಳ್‌ದುಕಾಳ್ ಉಶೇತೆ ಖ್ಹಾತ್ ವರಖ್ಹ್‌ನ ಹಗಾಮ್ಮ ಖ್ಹಾರುಸ್‌ ಕಾಳ್‌ಥಿ ನಾಶಹುಯ್‌ಜಾಶೆ ಕೊಯ್ನಿ" ಕರಿ ಬೊಲ್ಯೊ.

ಯೋಸೇಫ್ ಈಜಿಪ್ಟ್‌ನೊ ರಾಜ್ಯಪಾಲ್ ಹುಯೋತೆ

37 ಯೋಸೇಫ್‌ನೆ ವತಾಳ್ಯೋತೆ ಖ್ಹೂಜ಼್ ಫರೋಹನಾಬಿ ಇನ ಕುಟುಂಬ್‌ವಾಳನಾಬಿ ಅಛ್ಛು಼ಕರಿ ದೆಖಾಯು. 38 ಅಜು಼ ಫರೋಹನ ಯೋಸೆಫನಿತ್ರಾನು ದೇವ್‌ನು ಆತ್ಮ ಛಾ಼ತೆ ಊಚು಼ ಅದ್ಮಿ ದೆಖ್ಯಾಕೊಯ್ನಿ. 39 ಅನೇಥಿ ಅಛ್ಛೋ಼ ಪರ್ಖ್ಹೊ ಅಪ್ಣುನ ಮಳ್‌ಶೇಕಿಶೂ?" ಕರಿ ಬೋಲಿನ್ ಯೋಸೇಫ್‌ನ, "ದೇವ್‌ ತುನಾಸ್‌ ಆ ಅಖ್ಖು ಖ್ಹಮ್‌ಜಾ಼ಡ್ಯೋತೆ ಇನಾಖ್ಹಾಜೆ ತಾರಿನಿತರ ಅಕ್ಕಲ್‌ ಬುದ್ದಿರ‍್ಹಾವಾಳೊ ಪರ್ಖ್ಹೊ ಬಿಜು಼ ಕೋಣ್‌ಬಿ ಕೊಯ್ನಿ; 40 ಮೇ ತೂಸ್ ಮಹೇಲ್‌ಮ ಖ್ಹಾರೀಸ್‍ ಅಧಿಕಾರ್‌ ಲೀರಾಖವಾಳೊ ಹುಯಿರ‍್ಹೇವ್ಣು; ಅಜು಼ ಅದ್ಮಿಖ್ಹಾರು ತಾರಿ ಹುಕುಮ್‌ನಿ ಘೋಣಿಸ್ ಚಾ಼ಲಿಲೇವ್ಣು; ಸಿಂಹಾಸನ್ನಿ ಬಾರೇಮ ಖಲಿ ಮೇ ತಾರೇಥಿ ಮೋಟೊ ಹುಯಿರ‍್ಹೆವ್ಸ್ ಕರಿ ಬೊಲ್ಯೊ. 41 ಇನಪಾರ್ ಫರೋಹನೆ ಯೋಸೇಫ್‌ನ, "ಹಮ್ಕೇಸ್‌ ತುನ ಈಜಿಪ್ಟ್ ದೇಖ್ಹ್‌ಪರ್‌ ರಾಜ್ಯಪಾಲ್ ಬಣೈರಾಖ್ಯೋಸ್" ಕರಿ ಬೋಲಿನ್‌, 42 ಫರೋಹನೆ ಇನ ಹಾತ್‌ಮಾಥು ಮುದ್ರಾನಿ ಅಂಗೂಠಿನ ಕಾಡಿನ್ ಯೋಸೇಫ್‌ನಿ ಅಂಗ್‌ಳಿಮ ಘಾಲ್ಯೊ. ಕಿಮ್ಮತ್‌ನ ಝ಼ಗ್ಗಾನಬಿ ಇನ ಘಲೇಂಡಾಮ ಖ್ಹೋನ್ನಾನಿ ಹಾರ‍್ನ ಘಲಾಯೊ. 43 ಇನಥೂತೆ ಬೇನು ರಾಜ್ಯನು ರಥ್‌ಪರ್ ಬೆಖ್ಹಾಡಿನ್‌, "ಇನ ಖ್ಹಾಮ್ಣೆ ಆಡ್‌ಪಡೊ" ಕರಿ ಬೋಲೈನ್‌ ಇನ ಈಜಿಪ್ಟ್ ದೇಖ್ಹ್‌ನ ರಾಜ್ಯಪಾಲ್ ಬಣಾಯೊ. 44 ಇನೆ ಯೋಸೇಫನ, "ಮೇ ಫರೋಹ ಬೋಲುಕರೂಸ್; ಹಿಡಿ ಈಜಿಪ್ಟ್ ದೇಖ್ಹ್‌ಮ ತಾರಿ ಹುಕುಮ್‌ಕೊಂತೆ ಕೋಣ್‌ಬಿ ಹಾತ್‌ ಗೋಡ ನಾ ಹಲಾವ್ಣು" ಕರಿಬೋಲ್ಯೊ. 45 ಆಸ್ ಕಾಹೆತೆ ಫರೋಹನೆ ಯೋಸೇಫ್‌ನ ‘ಸಾಪ್ನತ್ಪನ್ನೇಹ’ ಕರಿ ನವು ನಾಮ್ ಮ್ಹೇಲ್ಯೊ; ಓನ್‌ ಕರಿ ಗುರು ಪೀಠನೊ ಯಾಜಕ ಹುಯಿರೊಥೋತೆ ಪೋಟೀಫೆರನಿ ಛೋ಼ರಿ ಆಸನತ್‌ ಕರಿ ನಾಮ್‌ವಾಳಿನ ಇನ ವ್ಯಹಾಕರೈದಿದೊ. ಇನವಾರ್ ಯೋಸೇಫ್ ಈಜಿಪ್ಟ್ ದೇಖ್ಹ್‌ಪರ್ ಗಖ್ಹತ್‌ಮಾರನ ನಿಕ್‌ಳ್ಯೊ. 46 ಈಜಿಪ್ಟ್ ದೇಖ್ಹ್‌ನೊ ರಾಜ಼ ಫರೋಹನಿ ಮಹೇಲ್‌ಮ ಆವಾನಿವಖ್ಹ್‌ತೆ ಯೋಸೇಫ್‌ನ ಡೋಡಿಖ್ಹ್‌ ವರಖ್ಹ್‌ನಿ ಉಂಬರ್‌ಹುಯಿರೀಥಿ. ಯೋಸೇಫ್ ಫರೋಹಕಂಥೊ ನಿಕ್ಳಿನ್ ಈಜಿಪ್ಟ್ ದೇಖ್ಹ್‌ನು ಖ್ಹಾರೀಸ್‍ ಬಾಜು಼ಮ ಗಖ್ಹತ್‌ ಮಾರ‍್ಯೊ. 47 ಯೊ ದೇಖ್ಹ್‌ಮ ಖ್ಹುಗಾಳ್‌ನ ಖ್ಹಾತ್ ವರಖ್ಹ್‌ಮ ಜ಼ಮೀನ್ ಹೋಣುತೆತ್ರು ಅನಾಜ಼್‌ದಿದು. 48 ಈಜಿಪ್ಟ್ ದೇಖ್ಹ್‌ಮ ಖ್ಹಾತ್ ವರಖ್ಹ್‌ನು ಅನಾಜ಼್‌ನ ಯೋಸೇಫ್‌ನೆ ಜ಼ಮಾಕರೀನ್ ಖ್ಹಯೇರ್‌ಮ ಮ್ಹೇಲ್ಯೊ. ಖೆವಾ ಖ್ಹಯೇರ್‌ನ ಅಶ್‌ಪಿಶ್‌ಥೂತೆ ಖೆತರ್‌ನು ಅನಾಜ಼್‌ಕೀ ಯೊ ಖ್ಹಯೇರ್‌ಮಾಸ್‌ ಜ಼ಮಾಕರ‍್ಯೊ. 49 ಅಮ್ ಜ಼ಮಾಕರ‍್ಯುಹುಯು ಅನಾಜ಼್ ದರ‍್ಯಾವ್‍ನಿ ರೇತ್‌ನಿತರ ರಾಶ್‌ರಾಶ್ ಹುಯ್‌ರೂಥು. ಯೋಸೇಫನ ಗಣ್ತಿಕರಾನ ಹೋಣುನಾತೆ ಇಮ್‌ ಮ್ಹೇಲಖ್ಹರ್‌ಕುಹುಯು. 50 ಕಾಳ್‌ದುಕಾಳ್ ಆವಾನ ಅಗಾಡಿ ಯೋಸೇಫ್‌ನ, ಓನ್‌ ಖ್ಹಯೇರ್‌ನೊ ಯಾಜಕ ಹುಯಿರೋತೆ ಪೋಟೀಫೆರನಿ ಛೋ಼ರಿ ಆಸನತ್‌ಥಿ ಬೇಜ಼ಣ ಪರ್ಖ್ಹಾ ಲಡ್ಕ ಪೈದಹುಯ. 51 ಪೈಲ್ಹೋಟೊ ಛಿಯ್ಯೊ ಪೈದಹುವಾದಿನ್ ಯೋಸೇಫ್‌ನೆ, "ಮೇ ಮಾರಿ ಅಖ್ಖೀಸ್‌ ವದೇಖ್ಹ್‌ನಾಬಿ ಬಾನ ಘರ್‌ವಾಳನಾಬಿ ಭೈಕಿಜಾ಼ವನಿತರ ದೇವ್ನೆ ಕರ‍್ಯೋನಿ" ಕರಿ ಯೊ ಲಡ್ಕಾನ, ‘ಮನಸ್ಸೆ’ ಕರಿ ನಾಮ್‌ಮ್ಹೇಲ್ಯೊ. 52 ಬೇನೊ ಛಿಯ್ಯೊ ಪೈದಹುವಾದಿನ್, ಖೆವಾ ದೇಖ್ಹ್‌ಮ ಮನ ವದೇಖ್ಹ್‌ಥೂಕಿ ಯೋಸ್ ದೇಖ್ಹ್‌ಮ ದೇವ್‌ ಮನ ಭಡೈರಾಖ್ಯೋಸ್" ಕರಿ ಯೊ ಛಿಯ್ಯಾನ ‘ಎಫ್ರಾಯಿಮ್’ ಕರಿ ನಾಮ್ ಮ್ಹೇಲ್ಯೊ. 53 ಈಜಿಪ್ಟ್ ದೇಖ್ಹ್‌ಮ ಖ್ಹುಗಾಳ್‌ನ ಖ್ಹಾತ್ ವರಖ್ಹ್ ಖತಮ್‌ಹುಯ್‌ಗ. 54 ಯೋಸೇಫ್‌ನೆ ಬೋಲ್ಯೋತೆ ಪರಕ್ಮಾಸ್ ಕಾಳ್‌ದುಕಾಳ್‌ನ ಖ್ಹಾತ್ ವರಖ್ಹ್ ಶುರುಹುಯಿಗ. ಕಾಳ್‌ದುಕಾಳ್ ಖ್ಹಾರಾಸ್ ದೇಖ್ಹ್‌ಮಾಬಿ ಫೈಲೈಗು. ಈಜಿಪ್ಟ್‌ಮ ಖಲಿ ಅನಾಜ಼್ ಥು. 55 ಇನಾಕೇಡೆಥು ಈಜಿಪ್ಟ್‌ಮಾಬಿ ಭಾಡ್ ಆವಾಖ್ಹತರ್ ಅದ್ಮಿಖ್ಹಾರು ಖಾಣುಹೋಣುಕರಿ ಫರೋಹನ ಬಿಂತಿ ಕರ‍್ಯು. ತದೆ ಇನೆ ಇವ್ಣುನ, "ಯೋಸೇಫ್‌ಕನ ಜಾ಼ವೊ, ಯೊ ಬೋಲನಿತರ ಕರೊ" ಕರಿ ಬೊಲ್ಯೊ. 56 ಕಾಳ್‌ದುಕಾಳ್ ಖ್ಹಾರಾಸ್ ದೇಖ್ಹ್‌ಮ ಫೈಲೈಜಾ಼ತಾನ ಯೋಸೇಫ್‌ನೆ ಕಣ್‌ಗಿಯೇನ ಕಡೈನ್, ಈಜಿಪ್ಟ್‌ವಾಳನ ಅನಾಜ಼್ ವೇಚಾ಼ಯೊ. ಈಜಿಪ್ಟ್ ದೇಖ್ಹ್‌ಮ ಕಾಳ್‌ದುಕಾಳ್ ಘಣು ಕಠಣ್‌ ಹುಯಿರೂಥು. 57 ಆನಾಹುಯಿನ್ ಖ್ಹಾರೀಸ್‍ ಧರ್‌ತಿಪರ್ ಕಾಳ್‌ದುಕಾಳ್ ಕಠಣ್‌ ಹುಯಿರೂಥೂತೆ ಇನಖ್ಹಾಜೆ ಖ್ಹಾರಾಸ್ ದೇಖ್ಹ್‌ವಾಳು ಅನಾಜ಼್ ಲ್ಯಾವಾನಖ್ಹಾಜೆ ಈಜಿಪ್ಟ್‌ದೇಖ್ಹ್‌ನ ಯೋಸೇಫ್‌ಕನ ಆಯು.