10 तेबे पलिश्ती लोके तेड़ा ई कित्तेया, मतलब दो दूद देणे वाल़िया गायी लई की तेते गडिया दे जोड़िया ओर तिना रे बच्चे गवाईणी दे बन्द करीते। 11 तेबे यहोवे रा सन्दूक ओर दूजा सन्दूक बी जिदे सूईने रे चूए ओर गिलटिया रिया मूर्तिया थिया गडिया पाँदे राखी तिया। 12 तेबे गायी ओरे-पोरे मुड़े बिना सीदे बेतशेमेश शईरो रिया बाटा दे गईया, सेयो सड़के ई सड़के रांबदिया ऊईया चली गिया ओर पलिश्तिया रे सरदार तिना पीछे-पीछे बेतशेमेश शईरो रे बन्ने तक गये। 13 तेस बखते बेतशेमेश शईरो रे लोक काट्टिया दे कणक बाडणे लगी रे थे ओर जेबे तिने सन्दूक देखेया, तेबे तिजी खे देखी की सेयो बऊत खुश ऊए। 14 से गड्डी यहोशू नाओं रे बेतशेमेशो दे रणे वाल़े माणूंए रे डोरूए दे जाई की रूकी गी, जेती एक बड़ा पात्थर था। तिने लोके गडिया री लकड़ी चीरी ओर गायी होमबलि करी की यहोवे खे चढ़ाईया। 15 ये सब करने ते पईले लेवी गोत्रो रे लोके यहोवे रे वादे रा सन्दूक तेस सन्दूको समेत जिदे सूईने रिया चीजा थिया, गडिया ते उतारी की तेती बड़े पात्थरो पाँदे राखी तिया। बेतशेमेशो रे लोके तेस ई दिने यहोवे खे होमबलि ओर मेलबलि चढ़ाए।