1 जे तूँ आपणे इस्राएली पाईए रे गाय-बल़द या पेडा-बाकरिया खे ओरे-पोरे पटकदा ऊआ देखे तो अणदेखा नि करेया, तूँ मताद करने ते मूँ नि फेरेया बल्कि तिना खे आपणे पाईए गे जरूर पऊँचाई देया। 2 पर जे से तेरा पाई तेरे कअरो रे नेड़े नि रंदा ओ या तूँ तेसखे नि जाणदा ओ, तो से डांगर आपणे कअरे लई आऊणा ओर जदुओ तक तेरा पाई तेसखे नि टोल़ो, तदुओ तक से तांगे रओ ओर जेबे से तेसखे टोल़दा ऊआ तेरे कअरे आओ, तेबे तेसखे से देई देणा। 3 ओर तेसरे गह्दे या टाल्लेया रे बारे दे, बल्कि तेसरी कोई चीज कऊँ नि ओ, जो तेसते राची गी ओ ओर ताखे मिलो, तिजी रे बारे दे बी एड़ा ई करना; तैं तेसरी मताद करने ते मूँ नि मोड़ना।

4 तैं आपणे पाईए रा बल़द या गह्दा बाटा रे रूड़ेया रा देखी की अणदेखा नि करना, बल्कि आपणे पाईए री मताद करनी ताकि से आपणे डांगरो खे चकी सको।

5 कोई जवाणस मर्दो रा पईरावा नि पईनो ओर ना ई कोई मर्द जवाणसा रा पईरावा पईनो, कऊँकि एड़े काम करने वाल़े सब परमेशर यहोवे रिया नजरा दे नीच काम करने वाल़े ए।

6 जे बाटा रे जमीन या डाल़ो पाँदे अचाणक ताखे चिड़िया रा कोअला मिलो, तिदे चिड़िया रे बच्चे या अण्डे ओ ओर चिड़िया तिना बच्चेया या अण्डेया पाँदे बैठी री ओ, तो तैं बच्चेया समेत तिना री माये नि पकड़नी। 7 बच्चेया खे आपणियां तँईं लई तो लओ, पर तिना री माये जरूर छाडी देणी, ताकि तेरा पला ओ ओर तेरी उम्र लाम्बी ओ।

8 जेबे तूँ नवां कअर बणाए तेबे तेतेरे छतो पाँदे रोका खे जंगल़ा लगाणा एड़ा नि ओ कि कोई छतो ते रूड़ो ओर तेसरी अत्या रा दोष तेरे कराने पाँदे लगो।

9 तैं आपणे अंगूरा रे बगीचे दे दूई किस्मा रे बीज नि बाणे, एड़ा नि ओ कि तेतेरी सारी फसल मतलब तेरा बाया रा बीज ओर अंगूरा रे बगीचे री फसल दोनो अपवित्र ठईरो।

10 तैं बल़द ओर गह्दा दोनो साथे जोड़ी की अल़ नि बाणा।

11 तैं ऊन ओर लीलणो री मलाऊटा साथे बणेया रा टाल्ला नि पईनणा।

12 जो चादर तूँ टखेया तिजी रे चऊँ कनारे रे कूणेया पाँदे चालर लगाया करनी।

13 जे कोई मर्द केसी जवाणसा साथे ब्या करो ओर तेसा साथे सम्बन्द बनाणे ते बाद तेसा ते नफरत करो, 14 ओर जे से तेसा जवाणसा पाँदे कुकर्मो रा दोष लगाओ ओर ये बोलदे ऊए तेसा खे बदनाम करो कि मैं एसा जवाणसा साथे ब्या कित्तेया था ओर जेबे मैं एसा साथे सम्बन्द बणाए तेबे तेसा रे कुआँरी उम्रा रे लच्छण नि पाए।

15 तेबे तेसा बेटिया रे माये-बाओ तेसा रे कुआँरिया रे चिह्न लई की शईरो रे स्याणे लोका गे प्रवेश द्धारो रे बारे जाओ 16 ओर तेसा बेटिया रा बाओ स्याणे लोका खे बोलो, "मैं आपणी बेटी एस मर्दो खे ब्यायी थी ओर एबे ये एसा ते नफरत करोआ; 17 ओर से तो ये बोली की तेसा पाँदे कुकर्मो रा दोष लगाओआ कि मैं तेरी बेटिया रे कुआँरिया रे लच्छण नि देखे। पर मेरी बेटिया रे कुआँरिया रे लच्छण यो ए।" तेबे तेसा रे माये-बाओ शईरो रे स्याणे लोका सामणे तेसा चाद्दरी खे फैलाओ।

18 तेबे शईरो रे बुजुर्ग तेस मर्दो खे पकड़ी की सजा देओ 19 ओर तेसखे चाँदिये रे सौ सिक्केया रा दण्ड बी लगाई की तेसा बेटिया रे बाओ खे देओ, कऊँकि तिने एक इस्राएली बेटिया री बेज्जती कित्ती ओर से तेसरी ई लाड़ी बणी री रओ ओर से पूरी जिन्दगी तेसा खे छाडी नि सको।

20 पर जे तेसा बेटिया रे कुआँरिया रे लच्छण नि ओगे ओर तेस मर्दो री गल्ल सच्च निकल़ो, 21 तो सेयो तेसा बेटिया खे तेसा रे बाओ रे कअरो रे द्धारो पाँदे लई जाओ ओर तेस शईरो रे मर्द तेसा पाँदे पत्थराव करी की काई देओ, तेसे तो आपणे बाओ रे कअरे व्याभिचारो रा काम करी राखेया ओर इस्राएली समाजो रे मूर्खता रा काम करी राखेया, ईंयाँ तैं आपू बीचा ते एड़ी बुराई दूर करनी।*22:21 1 कुरिन्थ 5:13

22 जे कोई मर्द दूजे मर्दो री ब्यायी रिया जवाणसा साथे सुतेया रा पकड़ेया जाओ, तो जो मर्द तेसा जवाणसा साथे सुती रा ओ से ओर जवाणस दोनो काई देणे, ईंयाँ तैं एड़ी बुराई इस्राएलो ते दूर करनी।*22:22 यूह. 8:5

23 जे केसी कुआँरी बेटिया री सगाई ऊई चूकी री ओ ओर कोई दूजा मर्द तेस शईरो रे आई की तेसा साथे कुकर्म करो, 24 तो तुसे सेयो दोनो तेस शईरो रे प्रवेश द्धारो ते बारे लई जाई की तिना पाँदे पत्थराव करी की काई देणे, कऊँकि तेसे बेटिए तो शईरो रे रंदे ऊए मतादा रिया तँईं कोई बी नि बुलाया ओर मर्दे आपणे पाई-बन्दुआ री ऊणे वाल़ी लाड़िया री बेज्जती कित्ती। ईंयाँ तैं आपू बीचा ते एड़ी बुराई दूर करनी।

25 पर जे कोई मर्द केसी बेटिया खे जेसा री सगाई ऊई चूकी री ओ मैदानो रे देखी की जबरदस्ती तेसा साथे कुकर्म करो, तो बस से मर्द ई काणा, जिने तेसा साथे कुकर्म कित्तेया। 26 तेसा बेटिया साथे कुछ नि करना, तेसा बेटिया रा पाप मौता री सजा जोगा निए, कऊँकि जिंयाँ कोई आपणे पड़ोसिये पाँदे अमला करी की तेसखे काई देओआ, तेड़ी ई ये गल्ल बी ठईरनी; 27 तिने मर्दे से बेटी मैदानो रे देखी जेसा री सगाई ऊई चूकी थी ओर तेसे बेटिए आपणी मतादा खे बुलाया, पर तेसा खे कोई बचाणे वाल़ा नि मिलेया।

28 जे केसी मर्दो खे कोई कुआँरी बेटी मिलो जेसा री सगाई नि ऊई री ओ ओर से तेसा खे पकड़ी की तेसा साथे कुकर्म करो ओर सेयो पकड़ी जाओ, 29 तो जिने मर्दे तेसा साथे कुकर्म करी राखेया से तेसा बेटिया रे बाओ खे चाँदिए रे पंजा सिक्के देओ ओर से तेसरी ई लाड़ी ओ, तिने तेसा री बेज्जती कित्ती, इजी बजअ ते से तेसा खे पूरी जिन्दगी छाडी नि सकदा।

30 कोई आपणी सौतेली माया खे आपणी लाड़ी नि बणाओ, ओर ना ई आपणे बाओ री चादर जो तेसरी सौतेली माये टखी राखी तिजी खे नि टाओ।*22:30 1 कुरिन्थ 5:1