Deuteronômio 33

मूसे रा इस्राएलिया खे आशीर्वाद देणा

1 जो आशीर्वाद परमेशरो रे दास मूसे आपणे मरने ते पईले इस्राएली लोका खे दित्तेया से ये ए। 2 तिने बोलेया,

"यहोवा सीनै पाह्ड़ो ते आया

ओर सेईर प्रदेशो ते तिना रिया

तँईं निकल़ेया; तिने

पारान पाह्ड़ो

पाँदा ते आपणा तेज

दखाया ओर दस ह्जार

स्वर्गदूता बीचा ते आया,

तेसरे दाँणे आथो ते

तिना रिया तँईं बिदिया निकल़ी

जो ज्वालामय आगी जेड़ी थी।*33:2 यूह. 1:4

3 यहोवा पक्का सबी

लोका साथे प्यार करोआ;

तेसरे सारे पवित्र लोक

तेरे आथो रे ए,

सेयो तेसरे कदमा पाँदे चले,

तेरे हर एक वचनो ते तिना खे

सई बाट मिली ओर फायदा ऊआ।*33:3 इफिसि 1:8

4 मूसे आसा खे

व्यवस्था री आज्ञा दित्ती ओर से

याकूबो री मण्डल़िया रा

निज पाअग ठईरी।

5 जेबे प्रजा रे

खास-खास मर्द ओर

इस्राएलो रे सारे गोत्र

मिली की कट्ठे ऊए,

तेबे यहोवा यशूरूनो रे राजा ठईरेया।"

रूबेनो खे आशीर्वाद

6 रूबेनो रा कुल नि मरो,

बल्कि से जिऊँदा रओ,

तेबे बी तेसरे कुलो रे

गिणतिया रे माणूं थोड़े जे ओ।

यहूदा खे आशीर्वाद

7 मूसे यहूदा रे कुलो खे

ये आशीर्वाद दित्तेया,

"ओ यहोवा, तूँ यहूदा

री वाणी सुण ओर तेसखे

तेसरे लोका गे पऊँचा।

से आपणियां तँईं आपू

आपणे आथो साथे

लड़ेया ओर तूँई तेसरे

बिरोदिया रे खलाफ

मतदगार ओ।"

लेविया खे आशीर्वाद

8 फेर लेविया रे कुलो रे बारे दे

मूसे बोलेया कि

ओ यहोवा, लेवी कुलो खे आपणा तुम्मीम,

ओर पग्तो खे आपणा ऊरीम दे;

जो तैं मस्सा नाओं री जगा रे परखेया था

ओर जेस साथे तैं मरीबा नाओं री

सूबल़ा पाँदे बईस कित्ती थी;

9 तिने तो आपणे

माया-बाओ रे बारे दे बोलेया,

"माखे तिना री परवा निए;

ओर ना ई तिने

आपणे पाई आपणे माने ओर

ना आपणे पाऊ पछयाणे।

पर तिने तेरी गल्ला

मानियां ओर सेयो तेरे

वाचा रा पालण करोए।*33:9 मत्ती 10:37

10 तिना याकूबो खे

तेरे बिधान ओर

इस्राएलो खे तेरी

बिदिया सिखाणी ओर

तेरे आगे तूप ओर तेरी बेदिया पाँदे

पूरा डांगर होमबलि करना।

11 ओ यहोवा, तेसरी

सम्पत्तिया पाँदे

आशीष दे ओर तेसरे

आथो री सेवा खे ग्रईण कर;

तेसरे बरोदी ओर

बैरिया रे लको पाँदे एड़ी

बाई दे कि सेयो फेर उठी नि सको।"

बिन्यामीनो खे आशीर्वाद

12 फेर मूसे बिन्यामीनो रे कुलो

रे बारे दे बोलेया,

"ये यहोवे रा परोसे वाल़ा दास ए,

ये तेसगे सई सलामत रणा ओर

तेस पूरा दिन तेस पाँदे

छाया करदे रणा ओर

तेस परमेशरो ते एड़ा साथ पाणा

जेड़ा एक पाऊ बाओ रे

कान्दा पाँदे चकेया जाओआ।"*33:12 2 थिस्सलुनी 2:13

यूसुफो खे आशीर्वाद

13 फेर यूसुफो रे कुलो रे बारे दे मूसे बोलेया,

"एसरा देश यहोवे ते

आशीष पाओ, मतलब

सर्गो रिया सबी ते कीमती चीजा

ओर पाल़ा ओर से डूगा

पाणी जो थाले ए,

14 सूरजो रे जरीये पकाये रे

सबी ते कीमती फल़ ओर से

कीमती फसल जो मौसमो रे

मुताबिक पैदा ओई,

15 ओर पुराणे पाह्ड़ो रिया

सबी ते खरिया चीजा ओर

सनातन पाह्ड़िया रिया

कीमती चीजा,

16 ओर तरती ओर जो सबी ते

कीमती चीजा तिदे परी रिया ए,

ओर बल़दे ऊए जाड़ो दे

दिशणे वाल़े यहोवे री खुशी।

इना सबी रे बारे दे

यूसुफो रे सिरो पाँदे,

मतलब जो आपणे पाईया रे सिरो रा ताज ए,

जो आपणे पाईया ते लग ऊआ था,

तेसरे सिरो पाँदे इना

आशीषा ई आशीषा री बर्खा ओ।

17 से गायी रे जेठे बच्चे जेड़ा

तागतबर ए,

जेड़े जंगल़ी बल़दो रे सींगा रे

तागत ओई तेड़ी तेसदे ए;

तेस आपणे तागती जेड़े सींगा

रे जरीये देश-प्रदेशो रे लोक,

बल्कि तरतिया रे

कूणे तको रे सारे लोक नठाई देणे;

सेयो एप्रैम वंशो रे लाखो लोक

ओर मनश्शे रे वंशो रे ह्जारो

लोक एड़े तागतबर ए।"

जबूलून ओर इस्साकारो खे आशीर्वाद

18 तेबे जबूलूनो रे कुलो रे बारे दे मूसे बोलेया,

"ओ जबूलून,

तूँ बारे निकल़दे बखते

ओर ओ इस्साकार,

तूँ आपणे डेरेया रे खुशी मना।

19 तिना जातिया-जातिया रे

लोक पाह्ड़ो पाँदे बुलाणे,

तेती तिना तार्मिकता री बलि चढ़ाणी,

कऊँकि तिना समुद्रो रा

धन ओर बालूए रे

छिपे रे कीमती चीजा

ते फायदा लणा।"

गादो खे आशीर्वाद

20 फेर गादो रे कुलो रे बारे दे मूसे बोलेया,

"तन्य ए यहोवा जो गादो री सीमा खे बढ़ाओआ!

गाद तो शेरो जेड़ा रओआ,

से शिकारो री बांयी खे चीरी देओआ

बल्कि तेसरे सिरो खे फाड़ी देओआ।

21 तिने आपू खे जमीना रा

खरा इस्सा छाँटी ला,

कऊँकि तेती तेसखे सेनापतिये

जोगा पाअग राखी राखेया था;

तेबे तिने प्रजा रे

खास-खास मर्दा साथे

आई की यहोवे रा

ठराया रा तर्म ओर

इस्राएलो साथे ऊई की

तेसरे नियमो रा पालण कित्तेया।"

दानो खे आशीर्वाद

22 फेर दानो रे कुलो रे बारे दे मूसे बोलेया,

"दान तो शेरो रा बच्चा ए!

से बाशान प्रदेशो ते उटकोआ।"

नप्तालिया खे आशीर्वाद

23 नप्तालीए रे कुलो रे बारे दे मूसे बोलेया,

"ओ नप्ताली, तूँ जो

यहोवे री दया ते

सन्तुष्ट ओर तेसरी

आशीषा साथे परिपूर्ण ए।

तूँ पच्छम ओर दक्खण

प्रदेशो रा मालक ओ।"

आशेरो खे आशीर्वाद

24 आशेरो रे कुलो रे बारे दे मूसे बोलेया,

"आशेर पाऊआ रे

बारे दे आशीष पाओ;

से आपणे पाईया बीचे

प्यारा रओ ओर

तेसरी जगा रे जैतूनो रे

तेलो री नदिया बह्ओ।

25 तेरे जोड़े लोए ओर

पीतल़ी रे ऊणे ओर

तेरी उम्रा रे आखरी तक

तेरी तागत बणी री रओ।"

मूसा रे जरीये परमेशरो री स्तुति

26 ओ यशूरून,

परमेशरो जेड़ा ओर कोई निए,

से तेरी मताद करने खे

सर्गो पाँदे ओर आपणा

प्रताप दखांदा ऊआ बादल़ा पाँदे

संवार ऊई की चलोआ।

27 सदा रणे वाल़ा परमेशर

तेरी रणे री जगा ए ओर

तेसरी सदा रणे वाल़िया बांयी

तेरा आसरा ए।

से दुश्मणा खे तेरे सामणे ते

निकयाल़ी देओआ ओर

बोलोआ, तिना खे नाश करी दे।

28 ओर इस्राएल बिना डरे

बसेया रा रओआ, नज्ज

ओर नये अंगूरा रे प्रदेशो

रे याकूबो री सूबल़

कल्ली ई रओई ओर तेती

सर्गो ते पाल़ा

पड़दा रओआ।

29 ओ इस्राएल, तूँ तन्य ए!

ओ यहोवे ते उद्धार पाए रे लोको,

तुसा जेड़ा कुण ए?

से तो तुसा री मतादा रिया तँईं

ढाल ओर तेरे प्रतापो खे

तलवार ए;

तेरे दुश्मणा तूँ सराणा

ओर तां तिना रिया

ऊच्ची जगा पाँदे जीत आसिल करनी।