Mateus 18

Wan een Brooda sindicht

15 Wan oba dien Brooda sikj jäajen die vesindicht, dan go han un strof am tweschen die un am auleen. Horcht hee no die, dan hast du dienen Brooda jewonnen. 16 Horcht hee oba nich, dan nemm noch eenen ooda twee met die, soo daut jieda Sach opp daut Mul von twee ooda dree Zeijen bestonen kaun. 17 Horcht hee oba dise nich, dan saj de Jemeent daut. Horcht hee de Jemeent oba uk nich, dan saul hee fa die sennen soo aus een Heid un een Taks-Kollakjta. 18 Ekj saj junt woarhauftich: Wautemma jie oppe Ieed binjen woaren, saul em Himmel jebungen sennen, un wautemma jie oppe Ieed leesen, saul em Himmel jeleest sennen. 19 Un wada saj Ekj junt: Wan twee von junt äwareen-komen oppe Ieed, äwa irjent eene Sach, om dee see bedden wellen, dan saul äant daut woaren von mienem Voda em Himmel. 20 Wiels wua twee ooda dree vesaumelt sent en mienem Nomen, doa sie Ekj en äare Medd.