Lucas 22

Opita A Zɔma Te E Yi Ɔzhizɔsi Mo

54 Akwɛyi o yi Ɔzhizɔsi mo akwɛyi o kawa mogba uwu Oboshi Uwakɔ; Opita ba a mbwalu shaaru mu izhikembo. 55 O kpala ɔyi mu odida akwɛyi Opita e kyo a ŋɔma mbala enzu umba o yi mu ɔyi ivyemo mɔmɔ awu tete. 56 Tabɔkɔ umɛgba umesheko a ma Opita a ŋɔma umba ɔyi mɔmɔ akwɛyi a bɔ wu eyeshii akwɛyi a zɔ tee, <<Onzu ele tete e yi mbala Ɔzhizɔsi.>>

57 Opita ba a zɔma, a zɔ tee, <<Oko ele, Imi lala mi yi wu mo!>>

58 Kwuye bwɛɛ onzu awa a ma Opita akwɛyi a za wu tee, <<Uŋɔ ŋɔ kwu onzu ukpɛnyi meka mba tete!>> Opita ba a gba wu opwu tee, <<Uma, mi yi mbala mba mo!>>

59 Mizhikembo iyi awa ikpɛnyi tee, akwɛyi onzu uwufo e bo a zɔ tee, <<Imulo iyi munɛ mo ndii, onzu ele e yi mbala Ɔzhizɔsi, moo akwu onzu uwu Ogalili tete!>>

60 Opita ba a gba opwu tee, <<Uma, mi yi kiya ingyi ŋɔ yi mu isomo mo!>> Tabɔkɔ e yi mu iso isomo tayi akwɛyi okwuru e tɛyi. 61 Ɔkwu e fulo biri e yese Opita, akwɛyi Opita e lolo iso iyi ba Ɔkwu e so wu awu tee, <<Ŋɔ zɔ kwu zɔ mi izhɛla dɛ gba okwuru e tɛyi mutu ɔlɛ le.>> 62 Akwɛyi Opita a wɔ kwudu akwɛyi e loga iyɛkɔkɔ.