Oluku 8

Umɛ Okokpayi Uwu Ozhayirusu Mbala Okokpayi Uwu A Pwafyi Mu Ɔriga Uwu Ɔzhizɔsi

40 Kwuye ungwu bɔkɔ Ɔzhizɔsi a gbama a ka mu ɛsɛnyi iyi risu, enzu o bwa wu ma, kwuwongu lɛɛbi mba uwu gba o rigbo wu le. 41 Akwɛyi onzu uwufo uwu bɔkɔ o ya wu tee Ɔzhariyɔ, utokeyi mu udaba uwu ɛlu ikpalama uwu Azhu e bo e kwumo mu idu iyi Ɔzhizɔsi akwɛyi a kpawu ɛshɛku tee le so mogba wu, 42 kwuwongu umɛ wu okokpayi ukpɛnyi kɛɛkyi uwu e yi wu, uwu lɔri luwo la lopo, a ŋe kpo wu mo.

Tabɔkɔ Ɔzhizɔsi e sheyimo, enzu riba o mbwalu wu ba o kpawa fyifyi munamuna. 43 Oko uwufo ba e yi mɔmɔ uwu bɔkɔ e yi ofya umbu ɛzhi ifumo umbwu lɔri luwo la lopo; a ngbɛ kiya ingyi kwuwo wu mo lɛɛbi mbaa walepu igagyima ba a fya onzu uwu bɔkɔ e do te e bo wu ofya mbwɔmbwu ma mo.

44 A zɛ mekeka iyi riba ingyi enzu akwɛyi a ka mu izhikembo iyi Ɔzhizɔsi, a pwu wu afyi mu ɛtu iyi ɔriga wu, akwɛyi mu kwotota kwɔngu ɛnzhi wu ɔ zɛma.

45 Akwɛyi Ɔzhizɔsi e yo kwuyo tee, <<Uwe bɔkɔ a pwumi afyi?>> Onzu uwunawuna a zɔma, akwɛyi Opita a zɔ tee, <<Adakwogba, enzu o yi riba ba o ye ŋɔ mu ikpama fyifyi le kɔ.>>

46 Ɔzhizɔsi ba a zɔ tee, <<Onzu uwufo a pwumi afyi, moo mi pwa kwuyengwu ekpasu i wɔma mu ɛnwu mi.>>

47 Tabɔkɔ oko ele a ma tee o dawuma-a, akwɛyi a wɔ kwudu laa ipwulama e ke kpombaa mu idu iyi Ɔzhizɔsi. Mu eyi iyi enzu mbamba lɛɛbi, e so kiya ingyi ki shi bɔkɔ uwu a pwu wu afyi mbala ewo iyi bɔkɔ ofya wu u bomo mu kwotota. 48 Akwɛyi Ɔzhizɔsi a za wu tee, <<Umɛ mi, ikwu idu lu fulo ŋɔ i bo ŋɔ ofya ma-a. Somo moloto.>>

49 Ɔzhizɔsi a rala opwu uwu iso mbala oko awu bɛnɛ, akwɛyi ɔlɔgbulɔ a wɔ mu kwogba ungwu Ozhariyusu akwɛyi a za laa Ozhariyusu tee, <<Umɛ ŋɔ e kpomoo; ki loo Omale inyashi shaa mo.>> 50 Tabɔkɔ Ɔzhizɔsi a pwa ɛlɛ a za laa Ozhariyusu tee, ki riyi mo uŋɔ kwu idu fulo bi akwɛyi a gba lakwunyɔ. 51 Kwuye ungwu bɔkɔ e bo mu kwogba ungwu Ozhariyusu e shi uwewe tee le fyemo mbala wu mo, Opita mbala Ɔzhɔnu mbala Ozhemisi mbala ada uwu umɛ mbala ɛnɛ uwu umɛ kɛɛkyi gba a nya mba ma tee lo fyemo le. 52 Enzu umba o yi mɔmɔ lɛɛbi o le mu oga ilomo mbala obobyi iwomo kwuwongu umɛ awu. Akwɛyi Ɔzhizɔsi a za mba tee, <<La lu lafya la oga ilomo; umɛ ele e kpomo mo-ondo gba e yi mu ikpolomo le!>>

53 Enzu mbamba lɛɛbi ba ɔ nyɔngɔ wu ma, moo o yitu tee umɛ awu e kpomoo. 54 Ɔzhizɔsi ba e yi wu mu kwuwo akwɛyi a ya wu ma mu opwu uwɔkwuu tee, <<Umɛ mi, yimo!>> 55 Ɛndu wu igbama akwɛyi e yimo kɛlɛlɛ. Akwɛyi Ɔzhizɔsi a za mba tee lo shiwu kiya ingyirimo kaa le ri. 56 Izele i yi anyi wu mbala ete wu mo, Ɔzhizɔsi ba a za mba tee lo so onzu ɛnyɛnyi kiya ingyi bɔkɔ ki wo le mo.