1 यहोवा को यो वचन मरा पास आयो: 2 हे इन्सान का बच्चा, इस्राएल का चरानवालाहोन का विअरुध्द भविष्यवाणी करीखे वे चरानवाला से बोल, परमेश्वर यहोवा यो बोलस हइ: जो चरवाह खुद को एट भरस हइ ओके धिक्कार हइ! का चरवाह के अपना भेड-बकरीहोन के चरानो नी चाये? 3 तुम दुनीया चर्बी खास हइ, उनका कपडा पेनस हइ अरु मोटा मोटा जनवरहोन खे काटस हइ; पर भेड-बकरिहोन खे नी चरास हइ. 4 तुमने कमजोर खे बलवान नी कर्यो, बिमार आलाहोन खे अच्छा नी कर्या या घायल खे मलम पट्टी नी करी. तुम भटक्या हुया खे सही रास्ता पर नी लाया या गम्या हुया खे ढुढी खे नी लाया. तुमने उनका पर कठोर अरु जबरदस्ती से उनका पर अधिकार चलायो हइ. 5 क्युकी वे ठाट्यो नी का कारन तितर-बितर हुइ गा, अरु सब जगली जनवरहोन को खानो हुइ गयो. 6 मरी भेड-बकरी सब पहाडहोन अरु उच्ची उच्ची टेकडी पर वे भटकती थी; मेरी भेड-बकरी पुरी धरती पर तितर-बितर हुइ गइ; अरु नी कोइ उनखे याद करता अरु नी कोइ उनखे ढुडता. 7 यो कारण, हे चरानआलो, यहोवा को वचन सुन: 8 परमेश्वर यहोवा कि या वाणी हइ, मी अपना जिवन की कसम खइ खे बोलु हइ, क्योकि मरी भेड-बकरीहोन का लिये कोइ चरानआलो नी हइ ओका लिये उनखे जगली जनवरहोन ने खइ ली हइ. अरु क्योकि मरा चरानआला ने उनखे नी ढुडी हइ अरु मरी भेड-बकरीहोन पर ध्यान देनु छोडी खे खुद पर ध्यान दियो हइ. 9 यो कारण चरानवाला यहोवा को वचन सुन, 10 परमेश्वर यहोवा यो बोलस हइ: देख, मी चरानवालाहोन का विरुध्द हइ; अरु मी उनका से अपनी भेड-बकरीहोन को हिसाब माग्यु, अरु उनखे फिर चरान नी देनको; वे फिर अपनो अपनो पेट नी भरी पानका. मी अपनी भेड-बकरीहोन खे उनका मुडा से छुडायु कि आगे से वे उनको खानो नी हुये.

11 क्योकि परमेश्वर यहोवा यो बोलस हइ: देख, मी खुद ही अपनी बकरीहोन खे ढुड्यु अरु उनकी देखभाल कर्यु. 12 जसो चरानआलो अपना भेड-बकरीहोन मे से भटकी हुइ खे फिर से अपना खाडु मे ढुडी खे लास हइ, वसो ही मी भी अपना भेड-बकरीहोन खे ढुडी खे लायु; मी उनखे वे सब जगहहोन से निकाली खे लायु, जहा वे बद्दल अरु अंधारा से घेर्या हुया दिन मे तितर-बितर हुइ गइ थी. 13 मी उनखे देश देश का दुनीयाहोन खे निकाल्यु, अरु देश-देश से जमा कर्यु, अरु उनकी ही जमीन मे ली आयु; अरु इस्राएल का पहाडहोन पर अरु नालाहोन मे अरु उ देश का सब बस्या जगलहोन मे मी चरायु. 14 मी उनखे अच्छी घास वाली जगहहोन पर चरायु, अरु इस्राएल का उच्चा उच्चा पहाडहोन पर जाये. वहा वे अच्छी हरीयाली मे घास खाये, अरु इस्राएल का पहाड अच्छी घास आली जगह पर चर्ये. 15 मी खुद ही अपनी भेड-बकरीहोन खे चरायु अरु उनखे अराम करायु, प्रभु यहोवा की या वाणी हइ. 16 मी गमी हुइ खे ढुड्यु, अरु गमी हुइ खे वापस ली आयु, अरु घायल हुये उनकी मलम पट्टी कर्यु, अरु कमजोर हइ, उनखे बलवान बनायु, पर मी वे मोटा अरु शक्तिशाली चरानवाला होन खे खतम करी दियु. मी उनखे उ दण्ड दियु जेका वे हकदार हइ. 17 "प्रभु यहोवा यो बोलस हइ, हे चरानवाला देख, मी भेड-बकरी का बिच अरु मेडा अरु बकराहोन का बीच न्याय करुस हइ." 18 का तुम्हारा लिये अच्छो नी हइ कि तुम अच्छा से चरीले अरु बच्या हुयो चारा खे अपना पायहोन से रौदी दे; अरु का तुमखे या छोटी बात लगस हइ कि तुम अच्छो पाणी पीले अरु बच्यो हुयो पाणी अपना पाय से गंधो करी देनु? 19 मरी भेड-बकरीहोन खे तुम्हारा पायहोन से रौद्यो हुया खे चरानु, अरु तुम्हारा पायहोन से गंधो कर्यो हुयो पाणी पिस हइ. 20 यो कारण परमेश्वर यहोवा उनका से यो बोलस हइ: देख, मी खुद मोटी अरु दुबली भेड-बकरीहोन का बिच न्याय कर्यु. 21 क्योकि तुम सब कमजोर भेड-बकरीहोन खे अपना बाजु अरु अपना कंधाहोन से तब तक ढकलता अरु उनखे सींग से यहा तक मारस हइ जब तक कि दुर नी चली जाये. 22 यो कारण मी अपना भेड-बकरीहोन खे छुडायु, अरु वे फिर दुसरा को खानो नी बने. मी एक भेड अरु दुसरी भेड का बिच न्याय कर्यु. 23 मी उनका पर असो एक चरानआलो ठहरायु जो उनखे चरायु, उ म्हरो दास दाउद हुये, उही उनखे चराये, अरु उही उनको चरानआलो हुये. 24 मी, यहोवा उनको परमेश्वर ठहअरु, अरु म्हरो दास दाउद ओका बिच प्रधान हुयो; मेखे यहोवा ही ने यो बोल्यो हइ. 25 "मी उनका साथ शान्ति कि एक वचन बाध्यु, अरु दुष्ट जन्तुहोन खे देश मे नी रेन देनको अत: वे जंगल मे बिना डरी के ऱ्हिये, अरु जंगल मे सोये. 26 मी उन्हखे अपना पहाडहोन का आस पास की जगलहोन खे आशीष देयु; अरु मी टेम पर बारीश भेज्यु; वा आशीष की बारीश करायु. 27 मैदान का झाड फल्ये अरु जमिन अपनी पैदावार बडाये, अरु वे अपना देश मे बिना डरे ऱ्हिये; जब मी उनका गुलामी के तोडी खे वे दुनीयाहोन का हाथ से छुडायु,जो उनका से सेवा करवास हइ, तब वे जानी लिये कि मी यहोवा आय. 28 वे राष्ट्र से लुटी नी जानका, अरु नी जगली जनवर उनखे फाडी खाये; वे बिना डरे ऱ्हिये, अरु उनखे कोइ नी डरानका. 29 मी उनका लिये पिक पैदा बाडी बनायु, अरु वे देश मे फिर भुखा नी मर्ये, अरु न राष्ट्र-राष्ट्र का दुनीया फिर उनकी निन्दा कर्ये. 30 वे जन्ये कि मी परमेश्वर यहोवा, ओका संग हइ, अरु वे जो इस्राएल को कुल हइ, वे मरी प्रजा हइ, मी यहोवा की या वाणी हइ. 31 तुम तो मरी भेड-बकरीहोन, म्हरो चरानआला कि भेड, तुम तो इन्सान हइ, अरु मी तुम्हारो परमेश्वर आय, प्रभु यहोवा की या वाणी हइ."