1 यहोवा की शक्ति मरा पर हुइ, अरु उ मरा मे अपनी आत्मा खे समइखे बाहेर ली गयो अरु मेखे खइ का बीच मे खडो करी दियो; वा खइ हड्डाहोन से भरी थी. 2 तब ओने मेखे उनका चारी तरफ घुमायो, अरु खइ का नीच्चे बहोत हड्डाहोन था; अरु वे बहोत सुखी गइ थी. 3 तब ओने मेखे पुछ्यो, हे इन्सान का बच्चा, का ये हड्डाहोन जिन्दा हुइ सकस हइ का? मेने बोल्यो, हे परमेश्वर यहोवा, तू ही जानस हइ. 4 तब ओने मरा से बोल्यो, ये हड्डाहोन से भविष्यवाणी करी खे बोल, हे सुखा हड्डाहोन, यहोवा को वचन सुनो. 5 परमेश्वर यहोवा तुम हड्डाहोन से यो बोलस हइ: देखो, मी अब तुम्हारा मे साँस डाल्यु, अरु तुम जिन्दा हुइ जाये. 6 मी तुम्हारी नसहोन खे उपजइखे मास चडायु, अरु तुमखे चमडा से झाक्यु; अरु तुम्हारा मे साँस डाल्यु, अरु तुम जिन्दा हुइ जाये; अरु तुम जानी लिये की मी यहोवा आय. 7 या आज्ञा का अनुसार मी भविष्यवाणी करन लग्यो; अरु मी भविष्यवाणी कर ही रो थो, कि मेने एक बडो आवाज सुन्यो, अरु हड्डाहोन खडखडान लगी, अरु हड्डाहोन एक जगा जमा हुइ गइ अरु हड्डा से हड्डा जुडी गया. 8 मी देखतो रियो, कि उन मे नसहोन पैदा हुइ अरु गोस चढी गयो, अरु वे उपर चमडा से झकी गइ; पर उनमे साँस नी थी. 9 तब ओने मरा से बोल्यो, "हे इन्सान का बच्चा, साँस से भविष्यवाणी करी खे बोल, हे साँस परमेश्वर यहोवा यो बोलस हइ: चारी दिशाहोन से अइखे ये मार्या हुया मे समइ जा कि ये जिन्दा हुइ जाये." 10 ओकी या आज्ञा का अनुसार मेने भविष्यवाणी करी, तब साँस उनमे अइ गइ, अरु वे जिन्दा हुइ खे अपना अपना पाय का बल से खडा हुइ गया; अरु एक बहोत बडी सेना हुइ गइ. 11 फिर ओने मरा से बोल्यो, "हे इन्सान का बच्चा, ये हड्डाहोन इस्राएल का सब कुल की उपमा हइ. वे बोलस हइ, हमारा हड्डाहोन सुकी गया हइ, अरु हमारी आशा जाती री; हम पुरा रीती से कटी गया हइ. 12 यो कारण भविष्यवाणी करी खे उनका से बोल, परमेश्वर यहोवा यो बोलस हइ: हे मरी प्रजा का दुनीयाहोन देखो, मी तुम्हारी कबर खोलीखे तुमखे निकाल्यु, अरु इस्राएल का देश मे पहुचइ दियु. 13 येकालिये जब मी तुम्हारी कबर खोल्यु, अरु तुमखे ओका से निकाल्यु, तब हे मरी प्रजा का दुनीयाहोन, तुम जानी लिये की मी यहोवा आय. 14 मी तुम्हारा मे अपनी आत्मा डाल्यु, अरु तुम जिये; अरु तुमखे तुम्हारा खुद का देश मे बसायु; तब तुम जानी लिये कि मी यहोवा ही ने यो बोल्यो, अरु कर्यो भी हइ, यहोवा की या वाणी हइ."

15 फिर यहोवा को यो वचन मरा पास आयो: 16 हे इन्सान का बच्चा, एक लकडी लीखे ओका पर लिख, यहुदा का अरु इस्राएल से संगी दुनीया ओका साथ जुडी गया हइ, तब दुसरी लकडी लीखे ओका पर लिख, यूसुफ एप्रैम अरु सब इस्राएल ओका साथ जुडी गया हइ. 17 फिर वे लकडीहोन खे एक दुसरा से जोडीखे एक ही करी ले कि वे तरा हाथ मे एक ही लकडी बनी जाये. 18 जब तरा दुनीयाहोन तरा से पुछ्ये, का तू हमखे नी बतानको कि इनका से तरो का मतलब हइ? 19 तब ओने बोल्यो, परमेश्वर यहोवा यो बोलस हइ: देखो, मी यूसुफ की लकडी खे तुकडो जो एप्रैम का हाथ मे हइ, अरु इस्राएल को जो राष्ट्र हइ उ ओका साथ जुड्यो हइ. उनखे लिखे यहुदा की लकडी से जोडीखे ओका साथ एक ही लकडी करी दियु; अरु दोइ मरा हाथ मे एक ही लकडी बन्ये. 20 जो लकडीहोन पटिहोन पर तु असो लिख्ये, वे उनका सामने तरा हाथ मे रीये. 21 तब तु वे दुनीयाहोन से बोल, परमेश्वर यहोवा यो बोलस हइ: देख, मी इस्राएलीहोन खे वे राष्ट्रहोन मे से लिखे जेमे वे चली गया हइ, चारी तरफ से जमा कर्यु; अरु उनका खुद का देश मे पहुचायु. 22 मी उनखे उ देश मे इस्राएल का पहाडहोन पर एक ही राष्ट्र करी दियु; अरु वे सभ को एक ही राजो हुये; अरु वे फिर दो नी रेनका अरु नी दो राज्यहोन मे बट्ये. 23 वे फिर अपनी मुर्तिहोन, अरु गंदा कामहोन या अपनो कोइ प्रकार को पाप का द्वारा खुद खे शुध्द नी करना; पर मी उनखे उनका पहले का पापमय कामहोन से बचायु, अरु वे मरी प्रजा हुये, अरु मी उनको परमेश्वर हुयु. 24 "म्हरो दास दाऊद उनको राजो हुये; अरु उन सभ को एक ही चरानआलो हुये. वे मरा नियमहोन पर चल्ये अरु मरी विधिहोन खे मानीखे उनका अनुसार चल्ये.✝ 25 वे उ देश मे ऱ्हिये जेखे मेने अपना दास याकुब खे दियो थो; अरु जेमे तुम्हारा बापदादाहोन ऱ्हेता था, ओमे ही वे अरु उनका बेटा-नाती हमेशा बस्या ऱ्हिये; अरु म्हरो दास दाऊद सदा उनको प्रधान ऱ्हिये. 26 मेने उनका साथ शान्ति को वचन बाध्यो हइ; उ हमेशा को वचन ठहर्ये; अरु मी उनखे जगा दि खे गिनती मे बडायु, अरु उनका बिच अपनो पवित्र जगा सदा बनायो रख्यु. 27 म्हरो ऱ्हेन को तम्बू उनका साथ हमेशा ऱ्हिये अरु मी उनको परमेश्वर ठहर्यु , अरु वे मरी प्रजा हुये. 28 जब म्हरो पवित्र जगह उनका बिच सदा का लिये ऱ्हिये, तब सब राष्ट्रहोन जानी लिये कि मी यहोवा इस्राएल खे पवित्र करनवालो आय."