1 Apolo naɨʉkolɨ kʉ Kolinto, Paʉlo wɨkalongola mʉmahɨɨ nakoli mʉmalʉgʉlʉ, wɨkapika kʉ Epeso. Kʉng’wanso wɨkaahanga amanyisigwa kɨtʉnga, 2 wɨkaakolya, "Itɨɨ, aɨmʉmʉsɨngɨɨyene ʉ Ng’wahʉ Ng’welʉ apo naɨmʉmʉhʉɨɨe ʉ Yesʉ?" Nɨenso ɨkamʉsʉkɨɨlya,

"Shanga aɨkigulye kɨna ʉkolɨ Ng’wahʉ Ng’welʉ."

3 Papo Paʉlo wɨkaakolya, "Itɨɨ, aɨmʉbadisigwe ʉbadiso kɨɨ?" Ɨkamʉsʉkɨɨlya,

"Naɨʉmanyisilye ʉ Yohana."

4 Paʉlo wɨkalʉnga, "Yohana aɨʉmʉmanyisilye kila itʉnʉ, Yohana aɨʉatambʉie ɨantʉ amʉhʉɨɨle ʉyo nʉpembilye anga wahega nʉanso, ingɨ ʉ Yesʉ."

5 Antʉ naɨija aya, ɨkabadisigwa kʉ lina lang’wa Yesʉ. 6 Paʉlo wɨkaalompeela nʉkʉaɨkɨɨlya mɨkano, ɨkalija ngulu niya Ng’wahʉ Ng’welʉ, nawo ɨkandya kʉtambʉla kʉntambʉ ngɨɨza nʉkʉtanantya Nkani Nza. 7 Antʉ awa aɨanga itʉnja ikʉmi na abɨɨlɨ.

8 Matungo a myeli ɨtaatʉ Paʉlo aɨʉkendingɨla mʉnyʉmba akʉtankanɨla Ayahudi mʉng’wanso wɨkatambʉla kʉ ʉkamatɨku, wazitambʉlya nʉkʉpepeelya antʉ ahʉɨɨle makani a Ʉtemi wang’wi Itunda. 9 Ingɨ ang’wɨao aɨalʉgoha ɨkahita kʉhʉɨɨla, ɨkatula lʉkunka lʉkani lang’wi Isekʉlʉ Yesʉ ntongeela amɨlʉmdo nʉwa antʉ. Papo ʉ Paʉlo wɨkatemanʉka nɨenso, wɨkaahola kɨmpelo ɨamanyisigwa akwe, wɨkitambʉlya nawo mahikʉ ɨhi mʉ kɨanda ka mʉntʉ ʉng’wɨ witangwa Tilano. 10 Wɨkalongoleka kʉtendaʉʉ kʉ myaka ɨbɨɨlɨ, Ayahudi nɨ antʉ nɨshanga Ayahudi ɨhi nɨishiɨ kihɨɨ a Asia ɨkatula ija ʉlʉkani lag’wi Isekʉlʉ Yesʉ.

11 Itunda wɨkituma mɨʉkʉɨlwa ɨdʉ kʉkɨɨla Paʉlo. 12 Antʉ aɨakendahola itambala ang’wɨ ngʉo ga natugawe nʉ Paʉlo, alwae anga ikʉye mʉmɨɨlɨao, aɨakenda komya malwaeao nawa nɨ ahɨng’wɨ aɨakenda puma. 13 Ayahudi ang’wɨ nawo naɨɨhamambya azepumya ahɨng’wɨ ɨkagema kʉtʉmɨla lina lang’wi Isekʉlʉ Yesʉ kʉ antʉ nɨakete ahɨng’wɨ azelʉnga, "Kʉʉlagɨɨlya ʉmʉpume kʉ lina lang’wi Isekʉlʉ Yesʉ, ʉyo nʉkʉtanantigwa nʉ Paʉlo." 14 Aɨakolɨ ahʉmba mʉpungatɨ a mʉtongeeli nʉwa apolyi nʉwa Ayahudi lina lakwe Sikewa, aɨagemile kʉheja hɨng’wɨ. 15 Ingɨ ʉ hɨng’wɨ wɨkaasʉkɨɨlya, "Yesʉ nʉmʉmanyile nʉ Paʉlo nʉmʉmanyile, ʉnyenye mɨanyenyu?"

16 Sʉnga mʉntʉ ʉyʉ naɨʉkete ʉhɨng’wɨ wɨkaaputɨla wɨkaakʉa nʉ kʉalemya ɨhi. Ɨkapuma mʉnyʉmba nanso ikamanka aze ɨkɨpwɨ hangɨ akete ngʉma. 17 Ikani ɨlɨ lɨkakumʉka kʉ Ayahudi ɨhi nɨ antʉ nɨshanga Ayahudi naɨishiɨ kʉ Epeso, ɨhi ɨkaambwa woa, nawo ɨkalɨkʉlya ɨ lina lang’wi Isekʉlʉ Yesʉ. 18 Antʉ nɨamʉhʉɨɨe ʉ Yesʉ ɨdʉ ɨkapumɨla kɨhenga ɨkila itʉnʉ kʉ ntendo yao nimbɨ. 19 Antʉ ang’wɨ naɨitʉmile makani aʉlogi ɨkaleta mbugulu nɨɨlogela pantongeela a antʉ nʉkʉisonsa moto. Ɨkaaɨɨlya nsaɨlo niyambugulu naɨasonsilwe moto aɨmagwe amadini apeza elupu hamʉsini. 20 Itɨ ʉʉgwa lʉkani lang’wi Isekʉlʉ Yesʉ lɨkalongoleka kenela nʉkʉtula ningulu.

21 Naɨakɨla makani aya, Paʉlo wɨkolomeela walongole kʉ Yelusalemu kʉkɨɨla kihɨɨ a kʉ Makedonia nɨ Akaya. Wɨkalʉnga, "Anga mpike kʉng’wanso, nɨitiga kʉhɨɨgwa nongole nʉ kʉ Lumi." 22 Itɨgwa wɨkaalagɨɨlya ahemba akwe abɨɨlɨ a Timoteo nʉ Elasito, amʉtongeele kʉ Makedonia, nʉanso wɨkasaga iniino kʉ Asia.

23 Itungo lɨlo lɨɨlo wikigela minyomo ʉkʉlʉ kʉ Epeso kʉnsoko a lʉkani lang’wi Isekʉlʉ. 24 Mʉntʉ ʉng’wɨ mʉtyana peza lina lakwe Demetilio aiwipityana pidʉdʉ nɨpimpyani nɨ mʉnyʉmba ang’wi Itundaao nʉwa kɨsʉngʉ nʉitangwa Alitemi, mʉlɨmo nʉwanso aɨwɨagolɨpya atyani. 25 Dematilio wɨkailingɨɨla antyanɨ aʉya naɨɨtyana anga ng’wenso, wɨkaaɨla, "Ʉnyenye antʉ, mʉlɨngile kɨna ʉgolɨ witʉ wɨpumɨɨla mʉʉsʉlʉja wʉwʉ. 26 Nʉnyenye mijaa nʉkʉona makani ʉ Paʉlo nʉkʉtenda, shanga kʉnʉ kʉ Epeso du ingɨ pakupɨ Asia ɨhi ile itʉnʉ. Waapema nʉkʉapɨʉla antʉ ɨdʉ kʉnsoko ʉkʉlʉnga kɨna alʉngʉ nɨatyanilwe nɨ antʉ shanga alʉngʉ atai. 27 Nɨitiga nɨkɨbɨ shanga mʉlɨmo witʉ ʉdu ʉkʉdalahwa, ingɨ nɨ nyʉmba nag’wi mʉlʉngʉ nʉwa kɨsʉngʉ ʉ Alitemi ɨkʉdalahwa. Nɨtunda nʉmʉkʉlʉ nʉɨkʉligwa kʉ Asia ɨhi nʉ ʉnkumbigʉlʉ wɨhi antʉ akʉpela kʉmʉkʉligwa."

28 Naɨija inkani izi, ɨkahung’wa ikuo ɨkatula kitʉnta azelʉnga, "Alitemi mʉlʉngʉ nʉwa Aepeso ingɨ Mʉkʉlʉ." 29 Papo minyomo wɨkigela mʉantʉ kɨsalɨ kɨhi. Ɨkaamba a Gayo nʉ Alisitaliko, antʉ abɨɨlɨ nɨa kʉ Makedonia naɨɨgendania nʉ Paʉlo, antʉ ɨkamankɨɨla pa ɨtankanɨla kʉdʉa. 30 Paʉlo wɨkahiya kingɨla mʉmilʉmdo nʉwa antʉ, ingɨ ahemba ɨkamʉgilya. 31 Atongeeli ang’wɨ nɨa kɨsalɨ ka Asia, naɨahʉmbaʉya ang’wa Paʉlo, ɨkalagɨɨlya antʉ azemʉɨla ʉ Paʉlo waleke kiaja kingɨla pang’wanso. 32 Pang’wanso shanga aɨakitengeelya antʉ ang’wɨ aɨakitʉnta itɨ nɨ aʉya aɨakitʉnta itɨ. Antʉ ɨdʉ shanga aɨalɨngile nɨkɨ aɨilundile kʉng’wanso. 33 Ayahudi ɨkamʉtala ʉ Alekisanda pantongeelao, antʉ aʉya mʉmilʉmdo nʉanso ɨkitʉnta azemʉlɨngasa nɨkakʉtambʉla. Alekisanda wɨkanyansʉɨla mʉkono akilaje wahume kilongola ntongeela a antʉ. 34 Ingɨ naɨalɨnga kɨna ʉ Alekisanda ingɨ Mʉyahudi, ɨhi palʉng’wɨ ɨkazogolya kitungo nɨla masaa abɨɨlɨ, azelʉnga, "Alitemi nʉwa Aepeso ingɨ Mʉkʉlʉ."

35 Itungo iniino mʉtongeeli nʉwa kɨsalɨ wɨkaakilaja ɨantʉ nʉ kʉlʉnga, "Ʉnyenye anya kʉ Epeso, itɨɨ, mʉlɨngɨlene kɨna antʉ a kɨsalɨ ka Epeso wawo asʉnji a nyʉmba ang’wa Alitemi nɨɨza mʉkʉlʉ hangɨ ɨɨza asʉnji a dʉdʉ nʉigwe naɨtʉngʉkile kʉpuma kigʉlʉ. 36 Kʉtɨlɨ anga mʉntʉ nʉhumile kʉhita ɨmakani aya. Kʉlʉlo mʉtakɨwe mʉkilaje hangɨ mʉleke kipatɨɨlya kʉtenda kɨhi. 37 Maaleta antʉ awa apaitɨ, nɨitɨ ga shanga amɨsensile ɨ nyʉmba ang’wa Alitemi ang’wɨ kʉmʉtʉkɨla itunda witʉ nʉwa kɨsʉngʉ. 38 Itɨ gwa, anga ɨze ʉ Demetilio nɨatyani aʉya akete ikani ilito kʉ mʉntʉ wɨhi, maanza nɨalamʉli akolɨ, ahumile kʉsema kʉko. 39 Ingɨ anga ɨze lɨkolɨ ikani lɨhi, mʉtakɨwe mʉtale mʉ milʉmdo nʉʉgombekile. 40 Anga itungo ɨlɨ nɨ yɨlɨ, kʉkolɨ mʉʉsemelwa kɨna kʉletile minyomo kʉnsoko ikani nɨla lelo. Shanga kʉhumile kilongola kʉnsoko minyomo shanga ʉkʉaɨɨlya." 41 Naɨwakondya kʉtambʉla itɨ wɨkaaɨla antʉ naɨakolɨ pianza nɨlanso abalansane.