ଆଟ ପନବ୍ରଡ୍ ପପ୍ପରନ୍
1 ସିଲତ୍ତେ ପ୍ରବୁନ୍ ମସାନ୍ଆଡଙ୍ ବରେନ୍, "ଆମ୍ୱେନ୍ ପାରୋନ୍ ଆମଙ୍ ଇୟ୍ବା; ଇନିଆସନ୍ଗାମେଣ୍ଡେନ୍ ଞେନ୍ ଏଙ୍ଗାଲେ ମନ୍ରାଞ୍ଜି ଆମଙ୍ଲୋଙ୍ କେନ୍ ଅଡ଼୍କୋନ୍ ଆରମ୍ମଡ୍ ଅବ୍ତୁୟ୍ତାୟ୍, 2 ଆରି, ଞେନ୍ ମିସରିୟଞ୍ଜି ଆଡଅଙ୍ ଇନି ଇନିଜି ଏଲୁମ୍ଲାୟ୍ ଆରି ଆମଙଞ୍ଜି ଅରମ୍ମଡ୍ଞେନ୍ ଅନ୍ତମ୍ ଅଙ୍ଗା ଅଙ୍ଗା ଆକାବ୍ବାଡ଼ା ଏଲୁମ୍ଲାୟ୍, ତି ଅଡ଼୍କୋନ୍ ଆବର୍ନେ; ଆମ୍ୱେନ୍ ଏଙ୍ଗାଲେ ଡାଙ୍ଗଡ଼ାଅନନ୍ ଡ ଉଲ୍ଲେଙ୍ଅନ୍ବେଞ୍ଜି ଅବ୍ଗନ୍ଲୁଡ୍ଲେ ବର୍ନାବା, ଆରି ଞେନ୍ ସଦାପ୍ରବୁ କେନ୍ଆତେ ଜନାତବେନ୍ ।" 3 ତିଆଡିଡ୍ ମୋସାନ୍ ଡ ଆରୋଣନ୍ ପାରୋନ୍ଆଡଙ୍ ଇୟ୍ଲେ ବରେଜି, "ଏବ୍ରିଅଞ୍ଜି ଆ ସଦାପ୍ରବୁ ଇସ୍ୱରନ୍ ବର୍ତନେ, ତେମଡ୍ଲୋଙ୍ଲେନ୍ ଆମ୍ୱେଞ୍ଜି ଲବ୍ଗଡ୍ନେନ୍ ଆସନ୍ ଡିଅଙ୍ଡିନ୍ନା ଅଃନଡ଼େଏ ? ସନେବାଞେନ୍ ଆସନ୍ ମନ୍ରାଲେଞ୍ଜିଆଡଙ୍ ଅମ୍ରେଙାଜି । 4 ବନ୍ଡ ଅନୁମ୍ରେଙନ୍ ଆସନ୍ ଆଙ୍ଗା ଅଃନଡ଼େଏ, ତିଡେନ୍ ଗିଜା, ଇନ୍ଲେନ୍ ବିଅଡ଼େଡ୍ ଡେସାବେନ୍ ପପ୍ପରନ୍ ପାଙ୍ତାୟ୍ । 5 ଆନିଞ୍ଜି ଲବନ୍ ଏନେଲେ ୟୁମ୍ତଜି ଡ, ତିଆତେ ଆନ୍ନିଙ୍ ଗିୟ୍ଲେ ଅଃରପ୍ତିଏଜି; ଆରି ଆଡ଼େର୍ ତିରନ୍ ସିଲଡ୍ ଆ ରଏନ୍ ଡ ଆମ୍ୱେଞ୍ଜିଆତେ ଲାଙ୍ଲେଡ୍ ଇନିଜି ଡକୋ, ତିଆତେ ଆନିଞ୍ଜି ଜୋମ୍ତଜି, ଆରି ବସେଙ୍ଲୋଙ୍ବେନ୍ ଅଡ଼୍କୋନ୍ ଆ ପଡାବ୍ନୁବ୍ ଜୋମ୍ତଜି । 6 ଆରି ଆନିଞ୍ଜି ବାତ୍ତେ ଅସିଙ୍ବେନ୍ ଡ କମ୍ୱାରିମର୍ବେନ୍ ଆସିଙ୍ ଡ ସମ୍ପରା ମିସର୍ମରଞ୍ଜି ଆସିଙ୍ ବରିୟ୍ତେ, କେନ୍ ଆଡେସାଲୋଙ୍ ପୁର୍ବା ଜୋଜୋବେଞ୍ଜି ଡ ଆ ପୁର୍ବା ଜୋଜୋଞ୍ଜି ଆ କନୋଡ୍କୋଡ୍ ନମିଆନ୍ତାନ୍ ଆଙ୍ଗିୟ୍ ଏନ୍ନେଲେ ଅଃରାଙ୍ଡାଲୋ ।" ତିଆସନ୍ ପାରୋନ୍ ଆମଙ୍ବା ସିଲଡ୍ ମସାନ୍ ୟର୍ରନ୍ ଡୁଙ୍ଲନ୍ ଜିରେନ୍ । 7 ସିଲତ୍ତେ ପାରୋନ୍ଆଡଙ୍ ଆ କମ୍ୱାରିଞ୍ଜି ବରେଞ୍ଜି, "କେନ୍ ଆମନ୍ରା ଡିଅଙ୍ଡିନ୍ନା ଞେନ୍ ଆସନ୍ ଡନଙ୍ଡଙନ୍ ଅନ୍ତମ୍ ଡେଏ ?" କେନ୍ ଆମନ୍ରାଜି ଆ ସଦାପ୍ରବୁ ଇସ୍ୱରନ୍ ଆ ସନେବା ଆସନ୍ କେନ୍ ଆନିଞ୍ଜିଆଡଙ୍ ଅମ୍ରେଙାଜି; ମିସର୍ ଡେସାନ୍ ଗୁରୁଡ୍ଡେଏନ୍ନି, କେନ୍ଆତେପଙ୍ ଆମନ୍ ନମିଆନ୍ତାନ୍ ଅଃଜନାଅମ୍ ? 8 ସିଲତ୍ତେ ମସାନ୍ ଡ ଆରୋଣନ୍ ଅନବ୍ବାଗୁତର ପାରୋନ୍ ଆମଙ୍ ଓରୋଙ୍ଲାଜି, ଆନିନ୍ ଆନିଞ୍ଜିଆଡଙ୍ ବରେନ୍, "ଜିର୍ବା, ସଦାପ୍ରବୁ ଇସ୍ୱରବେନ୍ ଇୟ୍ସେବାବା; ବନ୍ଡ ଆନା ଆନା ଏଜିର୍ତେ ?" 9 ସିଲତ୍ତେ ମସାନ୍ ବର୍ନେ, "ଇନ୍ଲେଞ୍ଜି ରମ୍ମଙ୍ ରମ୍ମଙ୍ ଆ ପସିୟ୍ ଡ ଅଡ଼୍କୋ ବୁଡାକୋଜଞ୍ଜି ସରିନ୍ ଏଜିର୍ତେ ଆରି ରମ୍ମଙ୍ ରମ୍ମଙ୍ ଡାଙ୍ଗାଡ଼ାଅନ୍ ଡ ଡାଙ୍ଗଡ଼ିଅନଞ୍ଜିଆଡଙ୍, ଆରି ଅଡ଼୍କୋନ୍ ଆ ଜନ୍ତୁମଣ୍ତା ଜାୟ୍ ସରିନ୍ ପାଙ୍ଲେ ଏଜିର୍ତେ, ଇନିଆସନ୍ଗାମେଣ୍ତେନ୍ ଇନ୍ଲେଞ୍ଜି ପ୍ରବୁନ୍ ଆସନ୍ ପୁର୍ପୁରନ୍ ଲନୁମନ୍ ଡେତେ ।" 10 ସିଲତ୍ତେ ପାରୋନ୍ ଆନିଞ୍ଜିଆଡଙ୍ ବରେନ୍, "ପ୍ରବୁନ୍ ଆମ୍ୱେନ୍ ସରିନ୍ ଡକୋନେତୋ, ଇନ୍ଲେନ୍ ତ ଆମ୍ୱେଞ୍ଜିଆଡଙ୍ ଡ ପସିୟ୍ବେଞ୍ଜିଆଡଙ୍ ଏଅମ୍ରେଙ୍ତବେନ୍; ଜାଗର୍ତ, ଏର୍ସୁକ୍କାନ୍ ମ୍ମୁକାବାବେନ୍ ଡକୋ । 11 ଏନେଲେ ଅଡ଼େ, ଆମ୍ୱେଞ୍ଜି ଓବ୍ବାମରନ୍ ଡିଅଙ୍ଗା ଡକୋ, ଜିର୍ବା, ପ୍ରବୁନ୍ ଇୟ୍ସେବାବା; ଇନିଆସନ୍ଗାମେଣ୍ଡେନ୍ କେନ୍ ଆତେ ଆମ୍ୱେନ୍ ଏସାୟ୍ତେ ।" ସିଲତ୍ତେ ଆନିଞ୍ଜି ପାରୋନ୍ ଆତେମଡ୍ ସିଲଡ୍ ଗନଙ୍ତିଡନ୍ ଡେଏଞ୍ଜି । 12 ତିସିଲଡ୍ ପ୍ରବୁନ୍ ମସାନ୍ଆଡଙ୍ ବରେନ୍, "ଆମ୍ୱେନ୍ ପପ୍ପରନ୍ ଆସନ୍ ମିସର୍ଡେସାନ୍ ଆଉପ୍ରେଙ୍ ତେକେସିନା, ସିଲତ୍ତେ ଆନିଞ୍ଜି ମିସର୍ ଡେସାଲୋଙ୍ ଆଡ଼େର୍ତିରନ୍ ବାତ୍ତେ ଆ ରଏନ୍ ଅଡ଼୍କୋ ବସେଙନ୍ ଆନୁବ୍ଜି ଜୋମ୍ତଜି ।" 13 ସିଲତ୍ତେ ମସାନ୍ ମିସର୍ ଡେସାନ୍ ଆଉପ୍ରେଙ୍ ଆ ଡାଙ୍ଗୋନ୍ ଆତ୍ରେକେଏନ୍, ପ୍ରବୁନ୍ ତମ୍ବା ତଗଲନ୍ ତି ଆଡେସାଲୋଙ୍ ଡରୁଙ୍ୟୋଙ୍ଗଡ୍ ଆରିଙ୍ଙ୍ଗେ ଅବ୍ବୁଡିଡେନ୍; ଆ ତରଗାଡେନ୍, ଡରୁଙ୍ୟୋଙ୍ଗଡ୍ ଆରିଙ୍ଗେ ବାତ୍ତେ ପପ୍ପରଞ୍ଜି ଜିର୍ରାଜି । 14 ସିଲତ୍ତେ ସମ୍ପରା ମିସର୍ ଡେସାଲୋଙ୍ ପପ୍ପରନ୍ ଲାର୍ରଞ୍ଜି, ସମ୍ପରା ମିସର୍ ଡେସାନ୍ ପପ୍ପରନ୍ ଅସେଡେଞ୍ଜି; ଆନିଞ୍ଜି ବବରନ୍ତଙନ୍ ଡକୋଏଞ୍ଜି; ତି ଆ ପପ୍ପରନ୍ ଅନ୍ତମ୍ ପୁର୍ବାନ୍ ଆଙ୍ଗିୟ୍ ଅଡ୍ଡକୋଲୋ, ଅଡ଼େ ଆରି ଆଙ୍ଗିୟ୍ ଏତ୍ତେଲେ ଅଃଡ୍ଡେଏ । 15 ଆନିଞ୍ଜି ଅଡ଼୍କୋନ୍ ଆ ଲବ ୟୁମେଞ୍ଜି ଆରି ଆନିଞ୍ଜି ବାତ୍ତେ ଡେସାନ୍ ଲୋଙଡେନ୍, ଲବନ୍ ଆଜିଙ୍ ଡ ଅରାନୁବନ୍ ଆଡ଼େର୍ତିରନ୍ ବାତ୍ତେ ଆ ରଏନ୍ ଆ ଜଅ ଆନିଞ୍ଜି ଜୋମେଞ୍ଜି; ସିଲତ୍ତେ ସମ୍ପରା ମିସର୍ ଡେସାନ୍ ଅନ୍ନିଙ୍ ଆରାନୁବ୍ ଅଡ଼େ ବସେଙନ୍ ଆଲେଡେଙ୍ଜିଙ୍ ଇନ୍ନିଙ୍ ଅଃର୍ରଏଲୋ । 16 ସିଲତ୍ତେ ପାରୋନ୍ ମସାନ୍ ଡ ଆରୋଣନ୍ଆଡଙ୍ ଲଜିର୍ ଓଡ୍ଡେଲେ ବରେନ୍, "ଞେନ୍ ସଦାପ୍ରବୁ ଇସ୍ୱରବେନ୍ ଡ ବିରୁଦଲୋଙ୍ବେନ୍ ଇର୍ସେନ୍ ଲୁମ୍ଲାୟ୍ । 17 ଞେନ୍ କାକୁର୍ତିତନାୟ୍, ଆବତରନ୍ କେନ୍ ଇର୍ସେଞେନ୍ କେମାଲେ ବରନ୍ତଙ୍ଡାନ୍ ଆ ପନବ୍ରଡ୍ ଅମଙ୍ଞେନ୍ ସିଲଡ୍ ଆ ସନମ୍ଙ୍ଗାୟ୍ ଆସନ୍ ସଦାପ୍ରବୁ ଇସ୍ୱରବେନ୍ ଆମଙ୍ବା ପାର୍ତନାନ୍ନା ।" 18 ସିଲତ୍ତେ ଆନିନ୍ ପାରୋନ୍ ଆମଙ୍ ସିଲଡ୍ ଜିର୍ରେ ପ୍ରବୁନ୍ ଆମଙ୍ବା ଆ ପାର୍ତନାଲନ୍, 19 ପ୍ରବୁନ୍ ଆକ୍ରାନ୍ ବରୁବ୍ୟୋଙ୍ ଆରିଙ୍ଗେ ଆବ୍ୟର୍ରେ ଡେସାନ୍ ସିଲଡ୍ ପପ୍ପରଞ୍ଜିଆଡଙ୍ ସୁପ୍ ସମେଁୟ୍ଣ୍ତ୍ରାଲୋଙନ୍ ସେଡେନ୍; ତିସିଲଡ୍ ମିସର୍ ଡେସାନ୍ ଅନ୍ନିଙ୍ ଆ ଏରିଆରେଙ୍ ଅବୟ୍ଜା ପପ୍ପରନ୍ ଅଃଡକୋଲନ୍ । 20 ବନ୍ଡ ପ୍ରବୁନ୍ ପାରୋନ୍ ଆଉଗ୍ଗର୍ ରବ୍ଡୋଏନ୍, ଆରି ଆନିନ୍ ଇସ୍ରାଏଲନ୍ ଆଅଞ୍ଜିଆଡଙ୍ ଅଃନୁମ୍ରେଙ୍ଲୋ ।
ନଅ ଲୋଙଡ୍ ପନବ୍ରଡ୍
21 ଆରି ପ୍ରବୁନ୍ ମୋସାନ୍ଆଡଙ୍ ବରେନ୍, "ଆମନ୍ ରୁଆଙ୍ବାନ୍ ଅସିନମ୍ ରସିଆ, ସିଲତ୍ତେ ମିସର୍ ଡେସାନ୍ ଲୋଙଡ୍ତେ ଆରି ଲୋଙଡନ୍ ଆସନ୍ ମନ୍ରାଞ୍ଜି ଆସାୟ୍ଲେ ଡେତଜି ।" 22 ସିଲତ୍ତେ ମୋସାନ୍ ରୁଆଙ୍ବାନ୍ ଆର୍ରସିଏନ୍, ସମ୍ପରା ମିସର୍ ଡେସାନ୍ ୟାଗି ଡିନ୍ନା ଜାୟ୍ ମସିଗୋ ଆଲୋଙଡ୍ ଲୋଙଡେନ୍ ଡ, ଆନ୍ନିଙ୍ ଆଡଅଙ୍ ରପ୍ତି ଅଃନଲ୍ଗିୟ୍ଲଜି । 23 ଆରି ୟାଗି ଡିନ୍ନା ଜାୟ୍ ଆ ଡ୍ରକୋନେଲୋଙଞ୍ଜି ସିଲଡ୍ ଆନ୍ନିଙ୍ ଡୋଲନ୍ ଅରପ୍ତିଲଜି; ବନ୍ଡ ଇସ୍ରାଏଲନ୍ ଆଅନ୍ଞ୍ଜି ଅଡ଼୍କୋନ୍ ଆଡ୍ରକୋନେଲୋଙ୍ ସାଆର୍ ଡକୋଏନ୍ । 24 ସିଲତ୍ତେ ପାରୋନ୍ ମୋସାନ୍ଆଡଙ୍ ଓଡ୍ଡେଲେ ବରେନ୍, "ଆମ୍ବେଞ୍ଜି ପ୍ରବୁନ୍ ଆସନେବା ଆସନ୍ ଜିର୍ବା; ତାଙ୍ଲେୟନ୍ ଡ ଗୋସ୍ସାମେନ୍ବେନ୍ ତୁମ୍ ଡକୋନେତୋଜି; ବନ୍ଡ ଡକ୍ରିବେନ୍ ଡ ପସିୟ୍ବେଞ୍ଜି ନିୟ୍ ଆମ୍ୱେନ୍ ସରିନ୍ ଜିରେତଜି ।" 25 ସିଲତ୍ତେ ମସାନ୍ ବର୍ନେ, "ଇନ୍ଲେଞ୍ଜି ସଦାପ୍ରବୁ ଇସ୍ୱରଲେନ୍ ଆସନ୍ ଅଙ୍ଗା ଆନମଙ୍ ଡ ତନୁମୋଡ୍ ଜନବନ୍ ଏସୋରୋପ୍ପାୟ୍ତାୟ୍, ଅସିଲୋଙ୍ଲେନ୍ ତି ନିୟ୍ ଆତେ ଆମନ୍ ତିୟ୍ତଲେନ୍ । 26 ଜନ୍ତୁଲେଞ୍ଜି ଇନ୍ଲେଞ୍ଜି ସରିନ୍ ଜିର୍ତଜି, ବଗୋଡାଜା ଅଃର୍ରଏଏ; ଇନିଆସନ୍ଗାମେଣ୍ଡେନ୍ ସଦାପ୍ରବୁ ଇସ୍ୱରଲେନ୍ ଆ ସନେବା ଆସନ୍ ଅନମଙନ୍ ଆନିଞ୍ଜିଲୋଙ୍ ସିଲଡ୍ ପନାଙନ୍ ଡେତେ; ଆରି ଇନି ତିୟ୍ଲେ ପ୍ରବୁନ୍ଆଡଙ୍ ସନେବାନ୍ ଡେତେ, ତିଆତେ ତେତ୍ତେ ଅଃନଡ଼ୋଲୋଡେନ୍, ଇନ୍ଲେଞ୍ଜି ଜନାଲେ ଏରପ୍ତିଆୟ୍ ।" 27 ବନ୍ଡ ପ୍ରବୁନ୍ ପାରୋନ୍ ଆଉଗ୍ଗର୍ ରବ୍ଡୋଏନ୍, ଆରି ଆନିନ୍ ଆନିଞ୍ଜିଆଡଙ୍ ଅନୁମ୍ରେଙନ୍ ଆସନ୍ ଅଃନଡ଼େଲୋ । 28 ତିଆସନ୍ ପାରୋନ୍ ଆନିନ୍ଆଡଙ୍ ବରେନ୍, "ଆମଙ୍ଞେନ୍ ସିଲଡ୍ ସବ୍ଙାୟ୍ନା, ଆମନ୍ଡମନ୍ ଆସନ୍ ଇୟମା, ମୁକ୍କାଞେନ୍ ଆଙ୍ଗିୟ୍ ଏଗିୟ୍ଡଙ୍; ଆଙ୍ଗା ଆଡିଡ୍ ମୁକ୍କାଞେନ୍ ଏଗିୟ୍ତେ, ତି ଆଡିଡ୍ ରବୁତମ୍ ।" 29 ସିଲତ୍ତେ ମସାନ୍ ବର୍ନେ, "ଆମନ୍ ମନଙ୍ ବର୍ରନ୍, ଞେନ୍ ଆଙ୍ଗିୟ୍ ମୁକ୍କାନମ୍ ଅଃଗିଜାୟ୍ ।"
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)