1 ତିସିଲଡ୍‍ ଇସ୍ୱରନ୍‌ ମସାନ୍‍ ଆସନ୍‌ ଡ ଆମନ୍‌ରାଞ୍ଜି ଆସନ୍‌ ଅଙ୍ଗା ଆଲନୁମ୍‌ ଲୁମେଞ୍ଜି, ପ୍ରବୁନ୍‌ ଇସ୍ରାଏଲଞ୍ଜି ମିସରନ୍‍ ସିଲଡ୍‌ ଏଙ୍ଗାଲେ ଅମ୍‍ଡୁଙ୍‌ଲେ ଓରୋଙ୍‍ଲାୟ୍‍, କେନ୍‍ ଅଡ଼୍‌କୋନ୍‌ ଆବର୍ନେ ମସାନ୍‍ ଆକୁଞାର୍‌ ମିଦିୟନିୟ୍‍ ଆରାଓଡ଼ା ଜିତ୍ରୋନ୍‌ ଅନମ୍‌ଡଙନ୍‌ ଞାଙେନ୍‌ । 2 ମସାନ୍ ଆକୁଞାର୍‍ ଜିତ୍ରୋନ୍‌ ଆସିଙ୍‌ଡମନ୍‍ ଆନାପ୍ପାୟ୍‌ ମସାନ୍‍ ଆଡୁକ୍ରି ସିପୋରାନ୍‍ଆଡଙ୍‌ ଡ ବାଗୁ ଡାଙ୍ଗାଡ଼ାଅନନ୍‌ଆଡଙ୍‌ ଓରୋଙେନ୍‌ । 3 ତି ବାଗୁ ଆଡାଙ୍ଗାଡ଼ାଅନ୍‍ ଅବୟ୍‌ନେ ଆଞୁମ୍‌ ଗେର୍ସୋମ୍‌ କେନ୍‌ ଆଡ୍ରକୋନେ ବଡେସାବାୟ୍‌ ଇନିଆସନ୍‌ଗାମେଣ୍ଡେନ୍‌ ଆନିନ୍‌ ବରେନ୍‍, "ଞେନ୍‌ ବଡେସାମର୍‌ ତେନେ ଡେଲିଁୟ୍ ।" 4 ଆରି,ଆନ୍ନାମର୍ର ଆଞୁମ୍‌ ଇଲିୟେଜର୍‌,ଇନିଆସନ୍‌ ଗାମେଣ୍ତେନ୍‍ ଆନିନ୍‌ ବର୍ରନ୍‌, "ଆପେୟ୍‌ ଞେନ୍‌ ଇସ୍ୱରନ୍‌ ସାଜେଞ୍ଜି ପାରୋନ୍‍ ଆକଡ଼ିବ୍‌ଲୋଙ୍‌ ସିଲଡ୍‌ ଞେନ୍‌ ଅମେଙ୍‍ଲିୟ୍‍ ।" 5 ତିସିଲଡ୍‌ ମସାନ୍‍ ଆକୁଞାର୍‍ ଜିତ୍ରୋନ୍‌, ବାଗୁନ୍‌ ମସାନ୍‍ ଆ ଡାଙ୍ଗାଡ଼ାନ୍‌ ଡ ଆଡୁକରିଞ୍ଜିଆଡଙ୍‌ ସରିନ୍‌ ଆରିଙ୍‌ରିଙ୍‌ ଡରକୋନେ ମସାନ୍‌ ଆମଙ୍‌ବା, ଆଗରାମ୍‌ଗାମ୍‌ ଇସ୍ୱରନ୍‌ ଆବରୁ ଅଙ୍ଗା ଡରକୋନେଲୋଙ୍‌ ଆନିନ୍‌ ତମ୍ୱୁସିଙନ୍‌ ତୁବେନ୍‍ ତି ଆ ଡରକୋନେଲୋଙ୍‌ ଜିର୍ରାଜି । 6 ଆରି ଆନିନ୍‌ ମସାନ୍‍ଆଡଙ୍‌ ଅବ୍‍ଜନାଏନ୍‍, "କୁଞାର୍‍ନମ୍‍ ଜିତ୍ରୋ, ଞେନ୍‌ ଡ ଡୁକ୍ରିନମ୍‍ ଆନିନ୍‌ ବୟନ୍‍ ବାଗୁଅନମ୍‍ ଇନ୍‌ଲେନ୍‌ ଅଡ଼୍‌କୋନ୍‌ଲେନ୍‌ ଅମଙ୍‌ନମ୍‌ ଏଜିର୍ରାୟ୍‌ ।" 7 ତିଆଡିଡ୍‌ ମସାନ୍‍ ଆକୁଞାରନ୍‌ ବୟନ୍‍ ଆର୍ରବାଙ୍‌ ଆସନ୍‌ ଡାଣ୍ତନ୍‍ଡୁଙ୍‌ଲନ୍‍ ଆନିନ୍‌ଆଡଙ୍‌ ଲୁମେନ୍‍ ଆରି ଜୁର୍ଜୋରେନ୍‍; ଆରି ରମଙ୍‍ ରମଙ୍‍ ମନଙ୍‍ବର୍ରନ୍‍ କଡାଡ଼ିଲଞ୍ଜି କି ଆନିଞ୍ଜି ତମ୍ୱୁଲୋଙନ୍ ଗନେଞ୍ଜି । 8 ତି ସିଲଡ୍‌ ପ୍ରବୁନ୍‌ ଇସ୍ରାଏଲ ଆସନ୍‌ ପାରୋନ୍‍ ଆଡଅଙ୍‍ ଡ ମିସ୍ରିୟ୍‍ମରଞ୍ଜି ଆଡଅଙ୍‍ ଇନି ଇନି ଏଙ୍ଗାଏଞ୍ଜି,ତଙିୟ୍‍ନେଲୋଙ୍‍ ଆନିଞ୍ଜି ଆଡଅଙ୍‍ ଅଡ଼୍‌କୋନ୍‌ ଆଡଣ୍ଡ ଡେନ୍‌ ଡ ପ୍ରବୁନ୍‌ ଏଙ୍ଗାଲେ ଆନିଞ୍ଜି ଅନୁରନ୍‌ ତିୟେଞ୍ଜି, କେନ୍‍ ଅଡ଼୍‌କୋନ୍‌ ମସାନ୍‍ ଆକୁଞାରନ୍‌ ଅବ୍‍ଜନାଏନ୍‍ । 9 ତି ଆସନ୍‌ ପ୍ରବୁନ୍‌ ମିସ୍ରିୟମରଞ୍ଜି ଆସିଂଲୋଙ୍‌ ଇସ୍ରାଏଲଞ୍ଜି ଅନୁରନ୍‌ ତିୟେଞ୍ଜି ତି ଅଡ଼୍‌କୋନ୍‌ ମନଙ୍‌ ତିୟ୍‍ଏଞ୍ଜି, ତିଆସନ୍‍ ଜିତ୍ରୋନ୍‌ ଅଗୋୟ୍‌ ସର୍ଡାଏନ୍‍ । 10 ଆରି,ଜିତ୍ରୋ ବର୍ରନ୍‌, "ଅଙ୍ଗା ପ୍ରବୁନ୍‌ ମିସରିଅଞ୍ଜି ଡ ପାରୋନ୍‍ ଆସିଂଲୋଙ୍‌ ଅମେଙ୍‍ଲବେନ୍, ଆରି ମିସ୍ରିୟ୍‍ମରଞ୍ଜି ଆସିଂଲୋଙ୍‌ ସିଲଡ୍‌ ଅଃମେଙ୍‌ ଲବେନ୍‌, ଆନିନ୍‌ ସନେନ୍‌ସେନ୍‌ । 11 ପ୍ରବୁନ୍‌ କେନ୍‌ ଅଡ଼୍‌କୋନ୍‌ ଆ ସନୁମ୍‍ଞ୍ଜି ଗୋଗୋୟ୍‌ ସୋଡ଼ା, କେନ୍‍ ଆତେ ଞେନ୍‌ ନମିଞେନ୍‍ ଜନାଲିଁୟ୍‌ । ଓଓ ଆନିଞ୍ଜି ଅଙ୍ଗା ଆବିସୟଜି ଆନିଞ୍ଜି ସଙ୍ଗତାଲେ ଗର୍ବଲଞ୍ଜି, ତି ଆବର୍ନେ ଆନିନ୍‌ ସୋଡ଼ା ।" 12 ତିସିଲଡ୍ ମସାନ୍‍ ଆକୁଞାର୍‍ ଜିତ୍ରୋ ଇସ୍ୱରନ୍‌ ଆସନ୍‌ ତନୋମ୍ମୋଡନ୍‌ ଡ ଅନମଙନ୍‌ ତନୋମ୍ମୋଡନ୍‌ ତିଏଞ୍ଜି; ଇସ୍ରାଏଲନ୍‌ ଡ ଆରୋଣନ୍‌ ଅଡ଼୍‌କୋନ୍‌ ଆମ୍ମୁଙ୍‌ ଜୋଜୋଞ୍ଜି ଜିର୍ରେ ଇସ୍ୱରନ୍‌ ଆମୁକ୍କାବାନ୍‌ ମସାନ୍‍ ଆକୁଞାର୍‍ ବୟନ୍ ଗାଗାଲଞ୍ଜି ।

13 ଆବାର୍ତାନ୍‌ ମସାନ୍‍ ମନ୍‌ରାଞ୍ଜି ପଞ୍ଚୁଆତିନ୍ ଆସନ୍‌ ତୁତୁମେଞ୍ଜି, ମନ୍‍ଡ୍ରାଞ୍ଜି ଡୋତାନ୍‍ ସିଲଡ୍‌ ସାଲୁମନ୍‍ ଜାୟ୍‌ ଆମୁକ୍କାବାନ୍‌ ତନଙ୍‌ଲେ ଡକୋଲଞ୍ଜି । 14 ତିଆଡିଡ୍‌ ମସାନ୍‍ ମନ୍‌ରାଞ୍ଜି ଆସନ୍‌ ଇନିଜି ଲୁମେନ୍‌, ତିଆତେ ଆକୁଞାରନ୍‌ ଗିୟ୍‌ଲେ ବର୍ରନ୍‌, "ମନ୍‌ରାଞ୍ଜିଆଡଙ୍‌ ଆମନ୍‌ ଇନିବା ଏନ୍ନେଲେ ଞର୍ରମ୍‌ତନ୍‌ ? ଆମନ୍‌ ଇନିଆସନ୍‌ ଇନ୍‌ସୟ୍‌ନମ୍‌ ତଙ୍କୁମ୍‌ତେ ଆରି ଅଡ଼୍‌କୋ ମନ୍‌ରାନ୍‌ ଡୋତାନ୍‌ ସିଲଡ୍‌ ସାଲ୍ଲୁମ୍‌ ବେଡ଼ାନ୍‌ ଜାୟ୍‌ ଅମଙ୍‌ବାନ୍‌ ଅବ୍‌ୟର୍‌ୟର୍‌ ଇନିବା ତନଙ୍‌ଲେ ଡକୋତଞ୍ଜି ?" 15 ସିଲତ୍ତେ ମସାନ୍‍ ଆକୁଞାର୍‌ ବରେନ୍‌, "ମନ୍‌ରାଞ୍ଜି ଇସ୍ୱରନ୍‌ ପନ୍‌ସୁଆତି ଜନନାନ୍‍ ଆସନ୍‌ ଅମଙ୍‍ଞେନ୍‍ ଜିର୍ତାଜି 16 ଆନିଞ୍ଜି ଇନ୍ନିଙ୍‌ ଗୁଡ଼େଲଞ୍ଜିଡେନ୍‌, ଅମଙ୍‌ଞେନ୍ ପନ୍‌ସୁଆତିବାନ୍‌ ଇୟ୍‌ତାଜି, ଆରି, ଇସ୍ୱରନ୍‌ ଆନସୟ୍ ଡ ବନାୟ୍‌ବରନ୍ ଆନିଞ୍ଜି ଜନାତଜି ।" 17 ତିଲୋଙ୍‌ ମସାନ୍‍ ଆକୁଞାର୍‍ ବର୍ରନ୍‌, "କେନ୍‌ ଆ କାବ୍ବାଡ଼ା ମନଙ୍‍ତଡ୍‍ । 18 ଆମନ୍‌ ଡ ଗଡ଼ିନମ୍‌ଜି କେନ୍‌ ବାଗୁ ମନ୍‌ରାନ୍‌ ଆଜାଡ଼ିନ୍‌ ବାମ୍ବାତଜି; ଇନିଆସନ୍‌ଗାମେଣ୍ଡେନ୍‌ କେନ୍‍ ଆକାବ୍ବାଡ଼ା ଆସନ୍‌ ଗୋଗୋୟ୍‌ ଲଗିନ୍‍, ଆମନ୍‌ କେନ୍‌ଆତେ ଇନ୍‌ସୟ୍‌ନମ୍‌ ଲୁମ୍‌ଲେ ଅଃରପ୍ତିଏ । 19 କେନ୍‍ ଆତେ ଗାମେନ୍‌ ଞେନ୍‌ ଅମ୍‍ଡଙା, ଞେନ୍‌ ଆମନ୍‌ଆଡଙ୍‌ ଞଙ୍‍ଞଙ୍‍ତମ୍‍, ଆରି ଇସ୍ୱରନ୍‌ ବୟନ୍‍ ଡକୋନେତୁ; ଇସ୍ୱରନ୍‌ ଆତେମଡ୍‌ଲୋଙ୍‍ ଆମ୍ୱେନ୍‌ ମନ୍‌ରାଞ୍ଜି ଡେନ୍ନେଲେ ଆବର୍ନେଞ୍ଜି ଇସ୍ୱରନ୍‌ ଆମଙ୍‍ ଅବ୍‍ଜନାବା । 20 ଆରି ଆମ୍ୱେନ୍‌ ଆନିଞ୍ଜିଆଡଙ୍‌ ଅନଗଡନ୍‌ ଡ ବନାଁୟ୍‌ବର୍‌ ଞନଙନ୍‍ ତିୟ୍‌ବାଜି ଆରି ଆତଙିୟ୍‌ନେଞ୍ଜି ଆକାଡ଼ାଞ୍ଜି ଅବ୍‌ତୁୟ୍‌ବା । 21 ଆରି, ଆମନ୍‌ କେନ୍‍ ଆମନ୍‌ରାଜି ଆମଙ୍‌ଲୋଙ୍‌ସିଲଡ୍‌ କାବ୍ବାଡ଼ାମରଞ୍ଜି, ଆଗରାମ୍‌ଗାମ୍‌ ଇସ୍ୱରନ୍‌ଆଡଙ୍‌ ଆବରତଙ୍‌ତେନ୍‌ ଆମନ୍‌ରାଜି, ଆଜାଡ଼ିନ୍‌ ଆବରର୍ତନ୍‌ ଆମନ୍‌ରାଜି ଆରି ଲାନ୍‌ସନ୍‌ ଆଞନାଙ୍‌ ଆସନ୍‌ ଏଡ଼ୁର୍‌ମଡ୍‌ତଜି, କେନ୍‌ ଅନ୍ତମ୍‌ ଆମନ୍‌ରାଜି ସେଡାଲେ ତବ୍‌ନଙା; ଆରି ଆନିଞ୍ଜିଆଡଙ୍‌ ମନ୍‌ରାଞ୍ଜି ଆଉପରେଙ୍‌ ସୋଡ଼ାଗଡ୍‌ମର୍‌ ବସଅ ଆମନ୍‌ରାଜି ଆସୋଡ଼ା, 22 ଆନିଞ୍ଜି ଡିତାନ୍‌ ମନ୍‌ରାନ୍‌ ପସୁଆତିତଜି, ଆରି ଇନ୍ନିଙ୍‍ ସୋଡ଼ା ବିର୍ରନେ ଡେନ୍‍ ଓରୋଙ୍‍ତାଜି, ବନ୍‌ଡ ଅସୋୟ୍‌ ଆବର୍ନେ ଡେନ୍‌ ଆନିଞ୍ଜି ପନ୍‌ସୁଆତିତଜି, ଏତେଲ୍‌ଡେନ୍‌ କାବ୍ବାଡ଼ାନମ୍‌ ଲିଆର୍‌ତେ । 23 ଆମନ୍‌ ଏନ୍ନେଲେ ଲୁମା, ଆରି ଇସ୍ୱରନ୍‌ ଏନ୍ନେଲେ ଲନୁମନ୍‌ ଆସନ୍‌ ବନାଞନ୍‌ ତିୟ୍‌ତମ୍‌, ଏତ୍ତେଲ୍‌ଡେନ୍‌ ଆମନ୍‌ ସଏଲେ ରପ୍ତିତେ, ଆରି କେନ୍‍ ଅଡ଼୍‌କୋନ୍‌ ଆମନ୍‌ରାଞ୍ଜି ଆସୁକାନ୍‌ ରମ୍ମଙ୍‌ ଡରକୋଲୋଙନ୍‌ ଜିର୍ତଜି ।" 24 ତିସିଲଡ୍‍ ମସାନ୍‍ ଆକୁଞାର୍‍ ଆବର୍ନେ ଅମ୍‍ଡଙ୍‌ଡାଲେ ଆବର୍ନେ ଅନ୍ତମ୍‌ ଅଡ଼୍‌କୋନ୍‌ ଆଲନୁମ୍‌ ଲୁମେନ୍‍ । 25 ଆରି, ମସାନ୍‍ ଅଡ଼୍‌କୋନ୍‌ ଇସ୍ରାଏଲଲୋଙ୍‍ କାବ୍ବାଡ଼ାନ୍‌ ଆସୋଡ଼ା,ସହସ୍ରପତି, ଶତପତି, ପଚାଶତ୍‍ପତି ଓ ଦଶପତି ଅନ୍ତମ୍‌ ତବ୍‌ନଙେନ୍‌ । 26 ତି ଲୋଙ୍‍ ଆନିଞ୍ଜି ଅଡ଼୍‌କୋନ୍‌ ମନ୍‌ରାନ୍‌ ରୟଙନ୍‌ ତିୟ୍‌ଲେ ପନ୍‌ସୁଆତିଏଞ୍ଜି; ଜଡ଼ଙ୍‌ ପନ୍‌ସୁଆତିନ୍‌ ମସାନ୍‍ ଆମଙ୍‍ ପାଙ୍‌ଲାଜି; ବନ୍‌ଡ ସନ୍ନାରାନ୍‌ ଆବିସୟଜି ଆନିଞ୍ଜିମା ଅଡ଼୍‌କୋନ୍‌ ପନ୍‌ସୁଆତିଏଞ୍ଜି । 27 ତିସିଲଡ୍‍ ମସାନ୍‍ ଆକୁଞାର୍‍ ଆଜିର୍ରେନ୍‌, ଆଡେସାମ୍ମା ଆନିନ୍ ୟର୍ରନେ ।