18 ତିଆଡିଡ୍ ଅଡ଼୍କୋ ମନ୍ରାନ୍ ମେଗନ୍ ଆସନଡ୍ଡା ଡ ତାବ୍ରେଡନ୍ ଡ ପନେଡନ୍ ଆସନଡ୍ଡା ଡ ଓମୋଡନ୍ ଆବରିୟ୍ ବରୁନ୍ ଗିଜେଞ୍ଜି; ଆରି ଆନିଞ୍ଜି ତିଆତେ ଗିୟ୍ଲେ ବତଙ୍ଡାଲେ ସଙାୟ୍ ତନଙେଞ୍ଜି । 19 ଆରି ଆନିଞ୍ଜି ମସାନ୍ଆଡଙ୍ ବରେଞ୍ଜି, ଆମନ୍ ଇନ୍ଲେନ୍ ସରିନ୍ କଡାଡ଼ିନା, ଇନ୍ଲେଞ୍ଜି ଏଅମ୍ଡଙ୍ତାୟ୍, ବନ୍ଡ ଇସ୍ୱରନ୍ ଇନ୍ଲେନ୍ ସରିନ୍ କଡାଡ଼ିଡଙ୍ନେତଡ୍, ଇଜ୍ଜାଡେନ୍ ଇନ୍ଲେଞ୍ଜି ରବୁତଲେନ୍ । 20 ସିଲତ୍ତେ ମସାନ୍ ମନ୍ରାଞ୍ଜିଆଡଙ୍ ବରେନ୍, ବତଙ୍ଡଙ୍ବେନ୍; ଇନିଆସନ୍ଗାମେଣ୍ଡେନ୍ ଇନ୍ଲେଞ୍ଜିଆଡଙ୍ ମନାଲନ୍ ଆସନ୍ ଡ ଆମ୍ୱେଞ୍ଜି ଏଙ୍ଗାଲେ ଇର୍ସେନ୍ ଏଲ୍ଲୁମେ, ତିଆସନ୍ ଆ ବରନ୍ତଙନ୍ ଆମ୍ୱେଞ୍ଜି ଆନବ୍ଗିୟ୍ ଆସନ୍ ଇସ୍ୱରନ୍ ଜିର୍ରାୟ୍ । 21 ତିଆସନ୍ ମନ୍ରାଞ୍ଜି ସଙାୟ୍ ତନଙ୍ଲେ ଡକୋଲଞ୍ଜି, ବନ୍ଡ ଅଙ୍ଗାଲୋଙ୍ ଇସ୍ୱରନ୍ ଡକୋଲନ୍, ଆଲୋଙଡ୍ରେଙନ୍ ମସାନ୍ ଜିରେନ୍ ।
ତନମ୍ପିଲନ୍ ଆନଗଡ୍
22 ସିଲତ୍ତେ ପ୍ରବୁନ୍ ମସାନ୍ଆଡଙ୍ ବରେନ୍, ଆମନ୍ ଇସ୍ରାଏଲନ୍ ଆଅଞ୍ଜିଆଡଙ୍ କେନ୍ ଆବର୍ନେ ବରା, ରୁଆଙ୍ଲୋଙନ୍ ଡକୋଲନ୍ ଆମ୍ୱେଞ୍ଜି ସରିନ୍ କଡାଡ଼ିଲନାୟ୍, ତିଆତେ ଆମ୍ୱେଞ୍ଜି ଏଗିଜେନ୍ । 23 ତିଆସନ୍ ଆମ୍ୱେଞ୍ଜି ସୁନ୍ନାନ୍ ଡ ରୁପାନ୍ ବାତ୍ତେ ଅନ୍ନିଙ୍ ଆସନୁମ୍ ଆକୋଣ୍ତାୟ୍ ବାଡଲେନ୍ ଆସନ୍ ସନୁମଞ୍ଜି ଏତୁବ୍ଡଙ୍ । 24 ଆମ୍ୱେନ୍ ଞେନ୍ ଆସନ୍ ଅବୟ୍ ଲବନ୍ ବାତ୍ତେ ତନମ୍ପିଲନ୍ ତୁବ୍ବା, ଆରି ତି ଆତୋଣ୍ଡୋ ଜନ୍ତୁଜି ସନୟ୍ ଅନମଙନ୍ ଡ ସୁକ୍କାଡକୋନେନ୍ ଆନମଙ୍ ସୋରୋପ୍ପାୟ୍ବା; ଞେନ୍ ଅଙ୍ଗା ଆଡ୍ରକୋନେଲୋଙ୍ ଅଞୁମ୍ଞେନ୍ ଅଃମାନ୍ନେତବେନ୍, ତି ଅଡ଼୍କୋନ୍ ଆଡ୍ରକୋନେଲୋଙ୍ ଅମଙ୍ବାବେନ୍ ଜିର୍ରେ ଞେନ୍ ଆମ୍ୱେଞ୍ଜିଆଡଙ୍ ଆସିର୍ବାଦତବେନ୍ । 25 ଆଙ୍ଗା ଞେନ୍ ଆସନ୍ ଅରେଙ୍ ତନମ୍ପିଲନ୍ ଏତୁବ୍ତେ, ତିଡେନ୍ ଆସେୟ୍ସେୟ୍ ଜରନ୍ ବାତ୍ତେ ଏତୁବ୍ଡଙ୍; ଇନିଆସନ୍ଗାମେଣ୍ତେନ୍ ସରଜରନ୍ ବାତ୍ତେ ଅରେଙନ୍ ଆତୋଣ୍ଡୋ ଏଆଙ୍ତାରେଣ୍ଡେନ୍, ତିଆତେ ଏର୍ମଡ଼ିର୍ ଏଅବ୍ମେତେ । 26 ଆମ୍ବେନ୍ ଆଉର୍ଡିୟ୍ ଗାମ୍ଲେ ଏଙ୍ଗାଲେ ତନମ୍ପିଲ୍ଲୋଙ୍ଞେନ୍ ଅଃରାଙ୍ଡାଏ, ତିଆସନ୍ ଆମ୍ୱେନ୍ ପାଆସଗଡ୍ ଡାୟ୍ଲେ ତନମ୍ପିଲନ୍ ଆତୋଣ୍ତୁ ଏଜିର୍ଡଙ୍ ।