10 ଆନିଞ୍ଜି ଡନେଙ୍ଗାନ୍‌ ବାଗ୍‌ସନ୍ତି ବସାଙ୍କଡ଼େ ଆରି ଲନାଆଙନ୍ ବସନ୍ତି ବସାଙ୍କଡ଼େ ଡ ତୋଣ୍ଡୋନ୍ ଆଡନେଙ୍ଗା ବସନ୍ତି ବସାଙ୍କଡ଼େ ସିଟିମ୍‌ ଅରାନ୍‌ ବାତ୍ତେ ଅବୟ୍‌ ପେଲାନ୍‌ ତୁବେତଜି । 11 ଆମନ୍‌ ସତ୍ତର୍‌ ସୁନ୍ନାନ୍‌ ବାତ୍ତେ ଅମ୍ମଗଡ୍ ବାରେଗଡ୍ ବାର୍ମିଡ଼ିୟ୍‌ତାଲନ୍ ବଲା ଆରି ଉଞ୍ଜିକୁନେନ୍ ଆଡାରାନ୍ ତୁବ୍‌ବା । 12 ପେଲାନ୍ ବୋୟ୍‌ଲେ ଆପନାଙ୍‌ ଆସନ୍‌ ସୁନ୍ନାନ୍‌ ବାତ୍ତେ ଉଞ୍ଜି କାଡ୍ଡୁନ୍‌ ତୁବ୍‌ଲେ ଉଞ୍ଜିନ୍ ଆକୁନେଗଡ୍ ଜୁଡ଼େବା, ବପାକିଗଡ୍ ବାଗୁ ଆରି ବପାକିଗଡ୍ ବାଗୁ କାଡ୍ଡୁନ୍ ଡକୋତନ୍ । 13 ପେଲାନ୍ ଆବନୋୟ୍ ଆସନ୍‌ ସିଟିମ୍ ଅରାନ୍‌ ବାତ୍ତେ ବରୋୟ୍‌ଡାଙନ୍ ତୁବ୍‌ବା ଆରି ବରୋୟ୍‌ଡାଙ୍‌ଲୋଙନ୍ ସୁନ୍ନାନ୍ ବାତ୍ତେ ବଲ୍‌ବା 14 ଆରି ବରୋୟ୍‌ଡାଙଞ୍ଜି ପେଲାନ୍ ଆ ବର୍ମଡ଼ିୟ୍‌ତାନ୍ ଆ କାଡ୍ଡୁଲୋଙ୍ ପସେର୍‌ବା । 15 ବରୋୟ୍‌ଡାଙଞ୍ଜି ପେଲାନ୍‌ ଆ କାଡ୍ଡୁଲୋଙନ୍ ସିଲଡ୍‌ ଏତବ୍‌ଡଙ୍ । 16 ଞେନ୍ ଆମନ୍‌ଆଡଙ୍ ଅଙ୍ଗା ବନାଁୟ୍‌ବର୍‌ ସାକି ଅଲାନ୍ ତିୟ୍‌ଲମ୍, ତିଆତେ ଅମ୍ମ ପେଲାନ୍ ଡକ୍କୋବା ।

17 ଆମନ୍‌ ସତ୍ତର୍ ସୁନ୍ନାନ୍ ବାତ୍ତେ ଡନେଙ୍ଗାନ୍ ବାଗୁ ସନ୍ତି ବସାଙ୍କଡ଼େ, ଲନାଙନ୍‌ ବସନ୍ତି ବସାଙ୍କଡ଼େ ଅବୟ୍ ଇର୍ସେ ରନୁବନ୍ ତୁବ୍‌ବା । 18 ପମ୍‌ପମ୍‌ସିଲେ ଆମନ୍‌ ସୁନ୍ନାନ୍ ବାତ୍ତେ ବାଗୁ କିରୁବଞ୍ଜି ତୁବା, ତି ଆ ଇର୍ସେ ରନୁବ୍‌ ଆତୋଣ୍ତୋ ବାତବାନେନ୍‌ ଡକୋବା । 19 ଅବୟ୍‌ ଆ କିରୁବ ବଅନେଗଡ୍‌ ଆରି ଅବୟ୍‌ ଆକିରୁବ ବଅନେଙ୍ଗଡ୍‌ ତମ୍ମିୟ୍‌ବା । ବାଗୁ ଆକିରୁବ ରନୁବନ୍ ମାୟ୍‌ଲନ୍ ଡକୋତନ୍ । 20 କିରୁବଞ୍ଜି ଅଲ୍‌ମୁକାଲେ ଆଡେନ୍ନାଞ୍ଜି ଉର୍ରାଡ୍‌ଲେ ରନୁବନ୍ ଡଙ୍‌ତଜି । ରନୁବ୍‌ଗଡ୍ କିରୁବଞ୍ଜି ଆମୁକାନ୍‌ ଡକୋତନ୍‌ । 21 ଆମନ୍‌ ରନୁବନ୍ ଆ ପେଲାଲୋଙନ୍ ଡକ୍କୋଆ ଆରି ଞେନ୍ ଅଙ୍ଗା ସାକିପେଲାନ୍ ଆମନ୍‌ଆଡଙ୍ ଏତିୟ୍‌ଲମ୍ ତିଆତେ ଅମ୍ମପେଲାନ୍ ଡକ୍କୋଆ ।