1 ପ୍ରବୁନ୍ ମସାନ୍ଆଡଙ୍ ବରେନ୍, "ଗିୟ୍ବା, ଞେନ୍ ଆମନ୍ଆଡଙ୍ ପାରୋନ୍ ଆମଙ୍ ଇସ୍ୱରନ୍ ଅନ୍ତମ୍ ଅମ୍ମେଲେ ତବ୍ନଙ୍ଲମ୍, ଆରି ଆରୋଣନ୍ ପୁର୍ବାଃତେ ବର୍ନେମର୍ ଡେତେ । 2 ଞେନ୍ ଆମ୍ବେଞ୍ଜିଆଡଙ୍ ଇନିଜି ଆବନାଁୟ୍ ବାଁୟ୍ତବେନ୍, ତିଆତେ ଆମ୍ବେନ୍ ଅଡ଼୍କୋନ୍ ବର୍ନାବା ଆରି ପାରୋନ୍ ଇସ୍ରାଏଲ ମରଞ୍ଜିଆଡଙ୍ ଆଡେସାନ୍ ସିଲଡ୍ ଅମ୍ରେଙାଜି ଗାମ୍ଲେ ବୋଞାଙ୍ବେନ୍ ଆରୋଣନ୍ ଆନିନ୍ଆଡଙ୍ ବର୍ତେ । 3 ବନ୍ଡ ଞେନ୍ ପାରୋନ୍ ଆଉଗ୍ଗର୍ ରଡୋ ଏମ୍ମେତାୟ୍, ଆରି ମିସର୍ ଡେସାଲୋଙନ୍ ଅରମ୍ମଡ୍ଞେନ୍ ଡ ସାନ୍ନିକାବ୍ବାଡ଼ାନ୍ ଅବ୍ଗୋଗୋୟ୍ତାୟ୍ । 4 ବନ୍ଡ ପାରୋନ୍ ବର୍ନେବେନ୍ ଅଃନମ୍ଡଙେ, ତାସନ୍ ଞେନ୍ ମିସର୍ ଡେସାନ୍ ଆମନ୍ରାଜିଆଡଙ୍ ବରନ୍ତଙନ୍ ଆଡଣ୍ଡ ଆପ୍ପାୟ୍ତାୟ୍ ଆରି ମିସରନ୍ ସିଲଡ୍ ସିପ୍ପାୟ୍ମରଞ୍ଜି ଡ ମନ୍ରାଞେଞ୍ଜିଆଡଙ୍ ଅମ୍ଡୁଙ୍ଲେ ଓରୋଙ୍ତାୟ୍ । 5 ଆରି ଞେନ୍ ବୋର୍ସାଞେନ୍ ମିସର୍ ଡେସାଲୋଙନ୍ ଅବ୍ତୁୟ୍ଲାୟ୍ଡେନ୍ ଇସ୍ରାଏଲ ମରଞ୍ଜିଆଡଙ୍ ଅମ୍ଡୁଙ୍ଲେ ଓରୋଙ୍ଲାଜି ଆଡିଡ୍ ଞେନ୍ ପ୍ରବୁନ୍ ଗାମ୍ଲେ ଆନିଞ୍ଜି ଜନାତଜି ।" 6 ପ୍ରବୁନ୍ ମସାନ୍ ଡ ଆରୋଣନ୍ଆଡଙ୍ ଏଙ୍ଗାଲେ ବାୟେଁଞ୍ଜି ଆନିଞ୍ଜି ଏତ୍ତେଲେମା ଲୁମେଞ୍ଜି । 7 ଆନିଞ୍ଜି ପାରୋନ୍ ସରିନ୍ ଆକ୍ରଡାଡ଼ିଲଞ୍ଜି ଆଡିଡ୍ ମସାନ୍ ଉଞ୍ଜିକୁଡ଼ି ଡ ଆରୋଣନ୍ ଉଞ୍ଜିକୁଡ଼ି ୟାଗି ବର୍ସେଙ୍ ଡେଏଞ୍ଜି ।
ଆରୋଣନ୍ ଆ ତନୁଡ଼େଡାଙ୍
8 ଆରି ପ୍ରବୁନ୍ ମସାନ୍ ଡ ଆରୋଣନ୍ଆଡଙ୍ ବରେଞ୍ଜି, 9 "ରାଜାନ୍ ସରାନ୍ନିଆନ୍ ଆକାବ୍ବାଡ଼ା ଅନବ୍ତୁଜନ୍ ଆସନ୍ ଆମ୍ବେଞ୍ଜିଆଡଙ୍ ବର୍ରବେଣ୍ଡେନ୍, ଆମନ୍ ଆରୋଣନ୍ଆଡଙ୍ ବରା ତନୁଡ଼େ ଡାଙ୍ନମ୍ ପାଙ୍ଲେ ପାରୋନ୍ ଆମୁକାବା ସେଡା, ତନୁଡ଼େ ଡାଙ୍ନମ୍ ଜାଆଡନ୍ ଗଡେଲ୍ତେ ।" 10 ମସାନ୍ ଡ ଆରୋଣନ୍ ପାରୋନ୍ ଆମଙ୍ ଇୟ୍ଲେ ପ୍ରବୁନ୍ ଆବ୍ରାଞେଞ୍ଜି ଅନ୍ତମ୍ ଲୁମେଞ୍ଜି । ଆରୋଣନ୍ ପାରୋନ୍ ଡ ଆ ସୋଡ଼ାମରଞ୍ଜି ଆମୁକାବା ତନୁଡ଼େ ଡାଙନ୍ ସେଡେନ୍, ଆରି ତନୁଡ଼େ ଡାଙନ୍ ଜାଆଡନ୍ ଗଡେଲେନ୍ । 11 ପାରୋନ୍ ପଣ୍ଡିତଞ୍ଜି ଡ ତନେୟ୍ ମରଞ୍ଜିଆଡଙ୍ ଓଡ୍ଡେଏଞ୍ଜି, ବନ୍ଡ ଆନିଞ୍ଜି ଆର୍ଲୁମେଞ୍ଜି ଅନ୍ତମ୍ ଲୁମେଞ୍ଜି । 12 ଆନିଞ୍ଜି ରମ୍ମଙ୍ ଆ ତନୁଡ଼େଡାଙଞ୍ଜି ଆସ୍ରେଡେଞ୍ଜି, ତନୁଡ଼େଡାଙନ୍ ଜାଆଡନ୍ ଗଡେଲେନ୍ । ବନ୍ଡ ଆରୋଣନ୍ ଆ ତନୁଡ଼େଡାଙନ୍ ଆ ତନୁଡ଼େଡାଙଞ୍ଜି ଅଡ଼୍କୋନ୍ ମଆଜେନ୍ । 13 ସଦାପ୍ରବୁନ୍ ଆବର୍ରନ୍ ଅନ୍ତମ୍ ପାରୋନ୍ ଆଉଗ୍ଗର୍ ରଡୋ ଡେଏନ୍ ଆରି ଆରୋଣନ୍ ଡ ମସାନ୍ ଆବର୍ନେ ରାଜାନ୍ ଅଃନମ୍ଡଙ୍ଲୋ ।
ଆପର୍ତମ୍ମୁ ଆ ପନବ୍ରଡ୍-ମିଞାମ୍
14 ପ୍ରବୁନ୍ ମସାନ୍ଆଡଙ୍ ବରେନ୍, "ପାରୋନ୍ ଆଉଗ୍ଗର୍ ରଡ଼ୋଏନ୍ ଆରି ଆନିନ୍ ମନ୍ରାଞ୍ଜିଆଡଙ୍ ଅଃନମ୍ରେଙେ ଆସନ୍ ଅଃନଡ଼େଏ । 15 ତିଆସନ୍ ଆମ୍ବେନ୍ ଡୋତାନ୍ ପାରୋନ୍ ଆମଙ୍ବା ଇୟ୍ବା । ଗିୟ୍ବା ଆନିନ୍ ଅଲରେଙନ୍ ଇୟେଣ୍ଡେନ୍ ଆମ୍ବେନ୍ ଆନିନ୍ ସରିନ୍ ଅନଲ୍ରବାଙନ୍ ଆସନ୍ ନିଡ଼ ଅନେଙ୍ ଅଲବାନ୍ ଇୟ୍ତନଙ୍ବା । ଅଙ୍ଗା ଆ ତନୁଡ଼େଡାଙ୍ ଜାଆଡନ୍ ଗଡେଲେନ୍ ତିଆତେ ନିୟ୍ ଞମ୍ଲେ ପାଙ୍ବା । 16 ପାରୋନ୍ଆଡଙ୍ ବରା, ଏବ୍ରିଅମରଞ୍ଜି ଆ ପ୍ରବୁନ୍, ଇସ୍ୱରନ୍ ଞେନ୍ଆଡଙ୍ ବର୍ରେ ଅମଙ୍ବାନମ୍ ଆପ୍ପାୟ୍ଲିଁୟ୍, ଆମନ୍ ମନ୍ରାଲେଞ୍ଜିଆଡଙ୍ ଆରିଙ୍ରିଙ୍ ପଡ଼ିଆବାନ୍ ଇସ୍ୱରନ୍ ଆଗନଙ୍କିନ୍ ଆସନ୍ ଅମ୍ରେଙାଜି । ବନ୍ଡ ଆମନ୍ ନମିଅନ୍ତାନ୍ କେନ୍ ଆବର୍ନେ ଅଃନମ୍ଡଙେ । 17 ନମି, ପ୍ରବୁନ୍ ଗାମ୍ତେ, ଞେନ୍ ପ୍ରବୁନ୍, ଆମନ୍ ଏତର ଜନାତମ୍ । ଗିଜା, ଞେନ୍ ଆସିଲୋଙନ୍ ଆ ତନୁଡ଼େଡାଙ୍ ବାତ୍ତେ ନିଡ଼ ଅଲନ୍ ଆ ଡାଆ ତ୍ତିତାୟ୍, ଆରି ଅଲନ୍ ଆ ଡାଆ ମିଞାମନ୍ ଗଡେଲ୍ତେ । 18 ଅଲଲୋଙନ୍ ଡକୋନ୍ ଆୟଜି ଅଡ଼୍କୋନ୍ ରବୁତଜି, ଆରି ମିସରନ୍ ଆମନ୍ରାଜି ଅଲନ୍ ଆ ଡାଆ ଗାଗାନ୍ ଆସନ୍ ଅଃଲଡଜେଜି ।"
19 ପ୍ରବୁନ୍ ମସାନ୍ଆଡଙ୍ ବରେନ୍, "ଆରୋଣନ୍ଆଡଙ୍ ବରା ଆମନ୍ ତନୁଡ଼େଡାଙ୍ନମ୍ ପାଙ୍ଲେ ମିସର୍ ଡେସାନ୍ ଆ ଡାଆଲୋଙ୍ ଆଗରାମ୍ଗାମନ୍ ଅଲନ୍, ଅନାନ୍, ବଣ୍ଡାନ୍, ଡ ଡୁଙ୍ଡମ୍ନେ ଡାଆରେଙନ୍ ଅଡ଼୍କୋନ୍ ଅସିନମ୍ ତ୍ତେକେଆ । ଆରି ଅଡ଼୍କୋନ୍ ଆ ଡାଆ ମିଞାମନ୍ ଗଡେଲ୍ତେ ମିସର୍ ଡେସାନ୍ ଅଡ଼୍କୋନ୍ ଆରା ଆ ଅଲା ଡ ଅରେଙ୍ ସିମ୍ଲୋଙନ୍ ମିଞାମାୟ୍ ଡେତେ ।"
20 ମସାନ୍ ଡ ଆରୋଣନ୍ ସଦାପ୍ରବୁନ୍ ଆବନାଁୟ୍ ଅନ୍ତମ୍ ଲୁମେଞ୍ଜି । ଆନିନ୍ ତନୁଡ଼େ ଡାଙନ୍ ପାଙ୍ଲେ ପାରୋନ୍ ଡ ଆ ସୋଡ଼ା ମରଞ୍ଜି ଆତେମଡ୍ ଅଲନ୍ ଆ ଆଡା ତିଡେନ୍, ଆରି ଅଡ଼୍କୋନ୍ ଆଲଡା ମିଞାମନ୍ ଗଡେଲେନ୍ । 21 ଅଲନ୍ ଆୟ୍ ଅଡ଼୍କୋନ୍ ରବୁଏଞ୍ଜି, ଆରି ଅଲନ୍ ଆ ଡାଆ ସମ୍ପରାନ୍ ମିଞାମନ୍ତୁମ୍ ଡେଆଜେନ୍ ଆରି ସଅଏନ୍ ତାସନ୍ ମିସରନ୍ ଆ ମନ୍ରାଜି ଅଲନ୍ ଆ ଡାଆ ଗାଲେ ଅଃରପ୍ତିଲଜି । 22 ମିସର୍ ଡେସାଲୋଙନ୍ ମନ୍ତ୍ରନ୍ ଜନାନ୍ ଆମନ୍ରାଜି ଆମନ୍ତ୍ର ବାତ୍ତେ ଲୁମେଞ୍ଜି, ବନ୍ଡ ଇସ୍ୱରନ୍ ଆବର୍ନେ ଅନ୍ତମ୍ ପାରୋନ୍ ଆଉଗ୍ଗର୍ ରଡୋଏନ୍ ଆରି ଆନିନ୍ ମସାନ୍ ଡ ଆରୋଣନ୍ ଆବର୍ନେ ଅଃନମ୍ଡଙ୍ଲୋ । 23 ବନ୍ଡ ପାରୋନ୍ ଇନ୍ନିଙ୍ ଏର୍ଗନାମ୍ ମଡ଼େଙ୍ଲନ୍ ଆରି ଆଡ୍ରକୋନେସିଙନ୍ ୟର୍ରନେ । 24 ମିସରନ୍ ଅଡ଼୍କୋନ୍ ଆ ମନ୍ରାଜି ଅଲନ୍ ଆ ଡାଆ ଗାଲେଅଃରପ୍ତିଲଞ୍ଜି ଡାଆନ୍ ଆସନ୍ ଅଲରେଙ୍ ଗାଗାଡାନ୍ ଆସନ୍ ଗାୟେଞ୍ଜି ।
25 ପ୍ରବୁନ୍ ଅଲ ଡାନ୍ ଆତରିଡେନ୍ ସିଲଡ୍ ସାତ ଡିନ୍ନା ଡେଏନ୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)