1 ତାନ୍‌ପେର୍‌କେ ମୋଶାଲ୍‌ ନୁ ଇସ୍ରାଏଲତେ ନାରୁଡ଼୍‌କିଙ୍କ୍‌ ସଦାପ୍ରବୁନ୍‌ ମାଇଦିଙ୍କ୍‌ ଇ ପାଟା ପାର୍‍ତଣ୍ଡ୍‌, ମାନାଡ଼୍‌ ସଦାପ୍ରବୁନ୍‌ ମାଇଦିଙ୍କ୍‌ ପାରିକାଡ଼୍‌, ବାତେଙ୍କ୍‌ଇତ୍କେ ଅଣ୍ଡ୍‌ ଅଦିକ୍‌ ସାୟେ ଆସମିନ୍ଦେଣ୍ଡ୍‌; ଅଣ୍ଡ୍‌ ଗୁରାକ୍‌ ନୁ ଗୁରାକ୍‌ ଚାଲାମାଡ଼ାନଡ଼୍‌କିଙ୍କ୍‌ ସମୁଦ୍ର ଲପେ ହେସି ମିନ୍ଦେଡ଼୍‌। 2 ସଦାପ୍ରବୁ ମା ବପୁ ନୁ ପାଟା, ମେଣ୍ଡେ ଅଣ୍ଡ୍‌ ମା ପରିତ୍ରାଣ ଆସମିନ୍ଦେଣ୍ଡ୍‌; ଅଣ୍ଡ୍‌ ମା ପରମେଶ୍ୱର, ମାମ୍‌ ଅଙ୍କ୍‌ ପ୍ରଶଂସା ମାଡ଼ିତମ୍‌; ଅଣ୍ଡ୍‌ ମା ଆନିଦାଡ଼ିଡ଼୍‌ ପରମେଶ୍ୱର୍‌, ମାମ୍‌ ଅନ୍‌ ମାଇଦିଙ୍କ୍‌ ପାଟେପାରିତମ୍‌। 3 ସଦାପ୍ରବୁ ଯୁଦ୍ଦବିର୍‌ ସଦାପ୍ରବୁ ଅନ୍‌ ପେଦେର୍‌ ସଦାପ୍ରବୁ। 4 ଅଣ୍ଡ୍‌ ଫାରୋନ୍‌ ରତ୍‌ ନୁ ସୈନ୍ୟନଡ଼୍‌କ୍‌ ସମୁଦ୍ର ହେସିମିନ୍ଦେଡ଼୍‌, ମେଣ୍ଡେ, ଅନ୍‌ ହେଞ୍ଚିମାନ୍ଦାନ୍‌ ବିରଡ଼୍‌ ସୂଫ ସାଗର୍‌ତାଗ୍‌ ମୁଡ଼ୁନ୍ଦି ମିନ୍ଦେଡ଼୍‌। 5 ନାର୍ଗେ ଏର୍‌ ଅଡ଼୍‌କିଙ୍କ୍‌ ମିସି ମିନ୍ଦେ, ଅଡ଼୍‌ ନେଟେ ଲେକାମ୍‌ କୁଇଙ୍କ୍‌ ଏର୍‌ଦାଗ ମୁଡ଼୍‌ନ୍ଦତଡ଼୍‌। 6 ହୋ ସଦାପ୍ରବୁ, ନି ତିନ୍ଦେକାଇ ବପୁତେ ଗୌରବ୍‌ ମିନ୍ଦେ; ହୋ ସଦାପ୍ରବୁ, ନିୟାଦ୍‌ ତିନ୍ଦେକାଇ ଶତ୍ରୁଡ଼୍‌କ୍‌ ଚୁନାମ୍‌ ମାଡ଼ିତ୍‌, 7 ନିମେ ନିଜର ଅଦିକ୍‌ ମହିମାତେ ନି ବିରୁଦ୍ଦ୍‌ ତିଡ଼୍‌ପାକା ମାନ୍ଦାନଡ଼୍‌କିଙ୍କ୍‌ ଆରା ମାଡ଼ିମାନୁଟ୍‌; ନିମେ ନିୟାଦ୍‌ କପାମ୍‌ ରଃମ୍‌, ଆଦ୍‌ ଅଡ଼୍‌କିଙ୍କ୍‌ ଟଣ୍ଡେ ଲେକାମ୍‌ ୱେସିତ୍‌। 8 ନି ମସର୍‌ତେ ନେସ୍‌କାନାଦିନ୍‌ ଏର୍‌ ଇଡ଼ିପାମ୍‌ ଆତ୍‌ତେ; ପେୟିତାନାଦ୍‌ ସାରେ ନେଟେ ଲେକାମ୍‌ ନିସ୍‌ ମାତ୍‌ତେ; ସମୁଦ୍ର ନାଡ଼୍‌ମେ ନାର୍ଗେ ଏର୍‌ ଗୁଡ଼ିଆତ୍‌ତେ। 9 ଶତ୍ରୁ କେତ୍‌ତଣ୍ଡ୍‌; ମାନାଡ଼୍‌ ପେର୍କେ ପେର୍କେ ତଲିକାଡ଼୍‌, ମାନାଡ଼୍‌ ଅଡ଼୍‌କିଙ୍କ୍‌ ପଇଦିକାଡ଼୍‌, ମାନାଡ଼୍‌ ଡଙ୍ଗିମାନ୍ଦାନ୍‌ ଜିନିଷ୍‌ ତୁସି ଅଦିକାଡ଼୍‌, ଅଡ଼୍‌ ପର ମାନାଦ୍‌ ଅବିଲାଷ୍‌ ନାର୍ଗେ ଆଦ୍‌ତେ; ମାନାଡ଼୍‌ ନିଜେତ୍‌ କଡ଼୍‌ଗ ପେସ୍ପିକାଡ଼୍‌, ମାନାଦ୍‌ କାଇଦେ ଅଡ଼୍‌କିଙ୍କ୍‌ ଆୱୁକିକାଡ଼୍‌। 10 ମାତର୍‌ ମିଡ଼୍‌ ନିଜର ନେସ୍କାନାଦ୍‌ ଉଦିତିଡ଼୍‌, ସମୁଦ୍ର ଅଡ଼୍‌କିଙ୍କ୍‌ ମୁଃଉତେ, ଅଡ଼୍‌ ସୀସା ଲେକାମ୍‌ ନାର୍ଗେ ଏର୍‌ଦାଗ୍‌ ମୁଡ଼ୁନ୍ଦି ଆତ୍‌ତଡ଼୍‌। 11 ହୋ ସଦାପ୍ରବୁ ପରମେଶ୍ୱର୍‌, ଦେୟାକ୍‌ କିନାଗାଙ୍କ୍‌ ନି ଲେକାମ୍‌ ବେନ୍‌ ମିନ୍ଦେଣ୍ଡ୍‌ ? ନି ସାମାନ୍‌ ପବିତ୍ରତାତେ ଆଦରଣୀତେ, ପ୍ରଶଂସାତେ ୱେର୍‌ଦାନ୍‌ଲେକେ ନୁ ବାଡ଼୍‌ୟେ କାମ୍‌ ମାଡ଼୍‌ନଣ୍ଡ୍‌ ବେନ୍‌ ? 12 ମିଡ଼୍‌ ନିଜର ତିନ୍‌ କାଇ ଆତ୍‌ତିନ୍‌, ପୃଥିବି ଅଡ଼୍‌କିଙ୍କ୍‌ ଗ୍ରସ ମାଡ଼୍‌ତେ। 13 ମିଡ଼୍‌ ନିଜର ଦୟାତେ ନିଜର ମୁକ୍ତ ନାରୁଡ଼୍‌କିଙ୍କ୍‌ ରସମିନ୍ଦେନି, ନିମେ ନିଜର ପରାକ୍ରମ ଅଡ଼୍‌କିଙ୍କ୍‌ ଆର୍ ତସ ନି ପବିତ୍ର ଲତ୍‌ତେ ପଡ଼ିୟେତାଗ୍‌ ଅଦୁତିନ୍‌। 14 ନାରୁଡ଼୍ ଇଦି କେଞ୍ଜିମିନ୍ଦେଡ଼୍, ଅଡ଼୍‌ ୱାଡ଼୍‌କୁତଡ଼୍‌; ପଲେଷ୍ଟିୟଡ଼୍‌ ନାରୁଡ଼୍‌କିଙ୍କ୍‌ ୱେର୍‌ସମାତ୍‌ତଡ଼୍‌। 15 ଆସୁଟ୍‌ ଇଦୋମ୍‍ତେ ରାଜାନଡ଼୍‌ ୱେର୍‌ସ୍‌ ଆତ୍‌ତଡ଼୍‌; ୱାଡ଼୍‌କୁତଡ଼୍‌ ମୋୟାବର୍ ବପୁ ମାନ୍ଦାନ୍‌ ନାରୁଡ଼୍‌କିଙ୍କ୍‌ ଆକ୍ରମନ୍‌ ମାଡ଼ମିନ୍ଦେଣ୍ଡ୍‌; କିଣାନ୍‌ତେ ନାରୁଡ଼୍‌ ସାରେ କାଡ଼୍‌ଙ୍ଗି ଆସମିନ୍ଦେଡ଼୍‌। 16 ୱେର୍‌ ନୁ ଚିନ୍ତେ ଅଡ଼୍‌ପର୍‌ ରାୟୁତେ; ହୋ ସଦାପ୍ରବୁ, ବେସୁଙ୍କ୍‌ ଆଇନା ମିଇ ନାରୁଡ଼୍‌ ଆନ୍‌ନଡ଼୍‌, ଆସୁଙ୍କ୍‌ ଆଇନା ମିଇ କ୍ରିତ ନାରୁଡ଼୍‌ ଆନଡ଼୍‌, ଆସୁଙ୍କ୍‌ ଆଇନା ମି ବପୁତଡ଼୍‌ ଅଡ଼୍‌ ନେଟେ ନିୟମ୍‌ ବନ୍ଦ୍‌ଆସ୍‌ ମିନ୍ଦେଡ୍‌। 17 ହୋ ସଦାପ୍ରବୁ, ନିମେ ନିଜର ମାନ୍ଦାନ୍‌ ମାଇଦିଙ୍କ୍‌ ବେନ୍‌ ପଡ଼ିୟେ ତିଆର ମାଡ଼ିମିନ୍ଦେନି, ପ୍ରବୁ ନି କାଇ ବେନ୍‌ ଦର୍ମମାମ୍‌ ମାଡ଼ିମିନ୍ଦେନି, ନିମେ ଅଡ଼କିଙ୍କ୍‌ ତାସ ନିଜର ପଡ଼୍‌ୟେତାଗ୍‌ ଅଦିକାର୍‌ତେ ମେଟେତାଗ୍‌ ନେଃମ୍‌। 18 ସଦାପ୍ରବୁ ଯୁଗ୍‌ଯୁଗ୍‌ ସାରେ କାଲାମ୍‌ ରାଜତ୍ୱ ମାଡ଼ିତଣ୍ଡ୍‌।

19 ବାତେଙ୍କ୍‌ଇତ୍କେ ଫାରୋନ୍‌ ଗୁରାକ୍‌, ରତ ନୁ ଗୁରାକ୍‌ଚାଲା ମାଡ଼ାନଡ଼୍‌ ସମୁଦ୍ରତାଗ୍‌ ନେଙ୍ଗୱାନାକେ, ସଦାପ୍ରବୁ ଅଡ଼୍‌ ପର ମେଣ୍ଡନ୍‌ଦାମ୍‌ ସମୁଦ୍ର ଏର୍‌ ତାତ୍‌ତଣ୍ଡ୍‌, ମାତର୍‌ ଇସ୍ରାଏଲତେ ନାରୁଡ଼୍‌ ୱାସ୍ତେ ଆର୍‍ଇସ୍‌ ସମୁଦ୍ର ନାଡ଼୍‌ମେଙ୍କ୍‌ ଆତ୍‌ତଡ଼୍‌।

20 ତାନ୍‌ପେର୍‌କେ ହାରୋଣତେ ଏଲାଡ଼୍‌ ବବିଷ୍ୟଦ୍‌ବକ୍ତାଲଡ଼୍‌ ମରିୟମ୍‌ କାଇଦାଗ୍‌ ପୟିସ୍‌ ଆତ୍‌ତେ ନୁ ତାନ୍‌ ପେର୍କେ ପେର୍କେ ବାଗାତ୍‌ ନାଟାସାରେ ଦାରା ଅସ୍‌ ଏନ୍ଦଡ଼୍‌ ଏନ୍ଦଡ଼୍‌ ପେୟିତା। 21 ତାନ୍‌ପେର୍କେ ମରିୟମ୍‌ ନାରୁଡ଼୍‌କିଙ୍କ୍‌ ଉତ୍ତର ମାଡ଼୍‌ତେ, "ମିଡ଼୍‌ ସଦାପ୍ରବୁନ୍‌ ମାଇଦିଙ୍କ୍‌ ପାଟେ ପାରାଟ୍‌; ବାତେଙ୍କ୍‌ଇତ୍କେ ଅଣ୍ଡ୍‌ ଅଦିକ୍ ସାୟେ ଆସ୍‌ମିନ୍ଦେଣ୍ଡ୍‌, ଅଣ୍ଡ୍‌ ଗୁରାକ୍‌କିଙ୍କ୍‌ ନୁ ଗୁରାକ୍‌ ଚାଲାମାଡ଼ାନଡ଼୍‌ ସମୁଦ୍ରତାଗ୍‌ ହେସିସ୍‌ ମିନ୍ଦେଡ଼୍‌।"

22 ତାନ୍‌ପେର୍କେ ମୋଶାଲ୍‌ ଇସ୍ରାଏଲତେ ସୂଫ ସାଗର୍‌ତାଗାଙ୍କ୍‌ ତାକ୍‌ତଣ୍ଡ୍‌, ମେଣ୍ଡେ ଅଡ଼୍‌ ଶୂର ଉସ୍କବୁମ୍‌ଦେ ପାକେ ତାକ୍‌ତଡ଼୍‌ତ, ଅଡ଼୍‌ ଆଞ୍ଚିନା ମୁଣ୍ଡ୍‌ ଦିନା ତାକି ଏର୍‌ ଦର୍‌କେ ପାର୍‌ୱଡ଼୍‌। 23 ଆସୁଟ୍‌ ଅଡ଼୍‌ ମାରାଟାତାଗ୍‌ ହେଉସ୍‌ ୱାନାକେ; କାୟିତ୍‌ ଏର୍‌ ମାଇଦିଙ୍କ୍ ମରାର ଏର୍‌ ଉନ୍ଦାନଙ୍କ୍‌ ପାର୍‌ୱଡ଼୍‌ ଆତ୍‌ତଡ଼୍‌; ଆଦିଙ୍କ୍‌ ଆଦିନ୍‌ ପେଦେର୍‌ ମାରା ଆତ୍‌ତେ। 24 ଆସୁଙ୍କ୍‌ ନାରୁଡ଼୍‌ ମୋଶାଙ୍କ୍‌ ବିରୁଦ୍ଧତେ ପାସ୍କ୍‌କି କେତ୍‌ତଡ଼୍, "ମାନାଡ଼୍‌ ବାତେ ଉନ୍‌ତାଡ଼୍‌ ?" 25 ଆସୁଟ୍‌ ଅଣ୍ଡ୍‌ ସଦାପ୍ରବୁନ୍‌ ଗାରେ ପ୍ରାର୍ତନା ମାଡ଼ୱାନାକେ, ସଦାପ୍ରବୁ ଅକିଙ୍କ୍‌ ଅଣ୍ଡୟ୍‌ ଲେକାମ୍‌ ୱେର୍‌କ୍‌ ତଃତ୍‌ତଣ୍ଡ୍‌, ଅଣ୍ଡ୍ ଆଦ୍‌ ଅସ୍‌ ଏର୍‌ଦାଗ୍‌ ୱାଟୱାନାକେ, ଏର୍‌ ମିଙ୍ଗିତେ। ଆ ପଡ଼ିୟେତାଗ୍‌ ସଦାପ୍ରବୁ ଅଡ଼୍‌ମାଇଦିଙ୍କ୍‌ ନିୟମ ନୁ ଆଦେଶ୍‌ ତିଆର୍‌ ମାଡ଼୍‌ତଣ୍ଡ୍‌, ମେଣ୍ଡେ, ଅଡ଼କିଙ୍କ୍‌ ପରିକ୍ଷା ଅସ୍‌ ମାଡ଼ି କେତ୍‌ତଣ୍ଡ। 26 ମିଡ଼୍‌ ଯଦି ବେସୁଙ୍କ୍‌ ନିଜର ସଦାପ୍ରବୁ ପରମେଶ୍ୱରଦେ ବାକ୍ୟତାଗ୍‌ ମନ୍‌ ଇଦ୍‌ତିଡ଼୍‌, ଅନ୍‌ କଣ୍ଡେତେ ବାତେ ସାୟେ ଆଦ୍‌ ମାଡ଼ାଟ୍‌, ଅନ୍‌ ଆଦେଶ୍‌ତିଙ୍କ୍‌ କେୱୁଇମୁଟ୍‌ ନୁ ଅନ୍‌ ନିୟମ ସାରେ ପାଲନ ମାଡ଼ାଟ୍‌, ଆସୁଟ୍‌ ମାମ୍‌ ମିସ୍ରିୟ ନାରୁଡ଼୍‌କିଙ୍କ୍‌ ବେନ୍‌ସାରେ ରୋଗ୍ ତିପାଲ୍‌ ମାଡ଼୍‌ତମ୍‌, ଆୱୁସାରେ ମିକିଙ୍କ୍ ତିପାଲ୍‌ ଆଦାଙ୍କ୍‌ ଇୱମ୍‌, ବାତେଙ୍କ୍‌ଇତ୍କେ ମାମ୍‌ ସଦାପ୍ରବୁନ୍‌ ମିଇ ଆରୋଗ୍ୟନଡ଼୍। 27 ତାନ୍‌ପେର୍କେ ଅଡ଼୍‌ ଏଲିମ୍‌ତାଗ୍‌ ଆଞ୍ଜ୍‌ ହେୱୁତଡ଼୍‌; ଆଗେ ଏର୍‌ଦେ ବାରଟାନ୍‌ ଇଲ୍‌କେ ଇଡ଼୍‌ପାମ୍‌ ନୁ ସତୁରି ଇନ୍ତେ ମାଡ଼ାକ୍‌ ମାତ୍‌ତା; ଆସୁଙ୍କ୍‌ ଅଡ଼୍‌ ଆଦ୍‌ ଏର୍‌ଦେ ଗାରେ ଗୁଡ଼ୁସେ ତିଆର୍‌ ମାଡ଼୍‌ତଡ଼୍‌।