1 ଲପେକନ୍‌ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ମୁନେତ୍‌ଲେକେ ରେଣ୍ଡେ କାଲ୍‌ଦେ ବାଲା ଡ଼େକାଟ୍‌। ମିଡ଼୍‌ ବେନ୍‌ କାଲ୍‌ଦେ ବାଲେ ଉଃସ୍‌ମିନ୍ଧେଡ଼୍‌, ଆଦିନ୍‌ ପର ବାତେ ବାତେ ଲେକା ମାତ୍‌ତେ, ଆ ସାରେ ଗଟି ମାମ୍‌ ଇ ରେଣ୍ଡେ କାଲ୍‌ଦାଗ୍‌ ଲେକିତମ୍‌। 2 ମେଣ୍ଡେ ମିଡ଼୍‌ ନାର୍‌କୁକ୍‌ ତିଆର୍‌ ଆୟିମୁଟ୍‌ ନୁ ନାର୍‌କୁକ୍‌ତେ ସମୟତେ ସିନୟ ମେଟେତାଗ୍‌ ତାରି ଆଗେ ମେଟେତେ ନେତିନାଗ୍‌ ମା ଗାରେ ୱାସ୍‌ ନିଲ୍‌ମୁଟ୍‌। 3 ମାତର୍‌ ମିତଡ଼୍‌ ମେଣ୍ଡେ ବେନ୍‌ ପର ୱାଡ଼୍‌ମାକିଣ୍ଡ୍‌, ମେଣ୍ଡେ ଇ ସାରେ ମେଟେତାଗ୍‌ ବେନ ତଃନ୍ଦଣ୍ଡ୍‌ ନୁ ଗଡ୍‌ମେକା ମାନ୍ଦେକନ୍‌ ଇ ମେଟେତ୍‌ ମୁନେ ମେୟିମାକି। 4 ଆସୁଙ୍କ୍‌ ମୋଶାଲ୍‌ ପ୍ରତମ୍‌ କାଲ୍‌ ଇନା ରେଣ୍ଡେ ନେଟାନ୍‌ ବାଲା ଟେଣ୍ଡିତଣ୍ଡ୍‌; ମେଣ୍ଡେ ଅଣ୍ଡ୍‌ ସଦାପ୍ରବୁନ୍‌ ଆଜ୍ଞାନୁସାର୍‌ତେ ନାର୍‌କୁକ୍‌ ତେଦି ସିନୟ୍‌ ମେଟେତ୍‌ ପର ଆତ୍‌ତଣ୍ଡ୍‌ ନୁ ଆ ରେଣ୍ଡେ କାଲ୍‌ବାଲା କାଇଦାଗ୍‌ ଅତ୍‌ତଣ୍ଡ୍‌।

5 ଆସୁଙ୍କ୍‌ ସଦାପ୍ରବୁ ମୟଲ୍‌କନ୍‌ ଡ଼ିଗି ଆ ପଡ଼ିୟ୍‌ ଅନ୍‌ତଡ଼୍‌ ନିସ୍‌ ସଦାପ୍ରବୁନ୍‌ ପେଦେର୍‌ କେତ୍‌ତଣ୍ଡ୍‌। 6 ମେଣ୍ଡେ ସଦାପ୍ରବୁ ଅନ୍‌ ମୁନେ ଇସ୍‌ ଆଞ୍ଜ୍‌ ଇଦି କେତ୍‌ତଣ୍ଡ୍‌, ସଦାପ୍ରବୁ, ସଦାପ୍ରବୁ ପରମେଶ୍ୱର୍‌ ଏମେର୍‌ତେ ନୁ କୃପାମୟ, କପାତେ ଜେୟି, ଦୟା ନୁ ନିଜାମ୍‌ତେ ମାନ୍ଦାନଣ୍ଡ୍‌; 7 "ହଜାର୍‌ ହଜାର୍‌ ମାନେୟ୍‌କନ୍‌ ଦୟା ରକ୍ଷାମାଡ଼ାନଣ୍ଡ୍‌, ଦୋଷି ମାଡ଼ାନଡ଼୍‌ ନୁ ପାପ୍‌ କ୍ଷମାକାରି, ଆଗେକ୍‌ବା ନିତାଲ୍‌ତେ ଆସୁଙ୍କ୍‌ତେ ଦଣ୍ଡଦାତାଲ୍, ତୃତିୟ ନୁ ଚତୁର୍ଥ ମାନେୟ୍‌ ଆଇନା ନାତିଡ଼୍‌ ପର ଆନିଦାଦିଡ଼୍‌ ଅପରାଦ୍‌ ପାକେତ୍‌ ଦାତାଲ୍‌।"

8 ଆସୁଙ୍କ୍‌ ମୋଶାଲ୍‌ ଜାପେ ବୁମ୍‌ଦାଗ୍‌ ମକମ୍‌ ମଦଲ୍‌ ପ୍ରଣାମ୍‌ ମାଡ଼ି କେତ୍‌ତଣ୍ଡ୍‌, 9 ଅଣ୍ଡ କେତ୍‌ତଣ୍ଡ ହୋ ପ୍ରବୁ ନାନ୍‌ ମିଇ କଣ୍ଡେତେ ଅନୁଗ୍ରହ ପାୟେମ୍‌ ଆସମିନ୍ଦେନ୍‌, ଆଦିଙ୍କ୍‌ ବିନୟ୍‌ ମାଡ଼ୁତାନ୍‌, ପ୍ରବୁ ମା ଗାରେ ଇସ୍‌ଆନ୍‌; ବାତେଙ୍କ୍ଇତ୍କେ ଇଡ଼୍‌ ଉର୍‌ଗାଡ଼୍‌ ନାରୁଡ଼୍‌, ମେଣ୍ଡେ ମା ଅପରାଦ୍‌ ନୁ ପାପ୍‌ ନର୍‌ସି ନିଜର ଅଦିକାର୍‌ତେ ମାକିଙ୍କ୍‌ ନେଃମୁଟ୍‌।

10 ଆସୁଙ୍କ୍‌ ଅଣ୍ଡ୍‌ କେତ୍‌ତଣ୍ଡ୍‌, ଉଡ଼୍‌ ମାମ୍‌ ଅଣ୍ଡୟ୍‌ ନିୟମ୍‌ ମାଡ଼ିତମ୍‌; ସାରେତଡ଼୍‌ ପୃତିବିତେ ବା ବେନ୍‌ ଗଷ୍ଟିକନ୍‌ କି ଆଦ୍‌ବେସୁଙ୍କ୍‌ ମାଡ଼ାଙ୍କ୍‌ ଆୟ୍‌,ଇସତ୍‌ ବୟଙ୍କର୍‌ ପାଡ଼ିୟ୍‌ ମାମ୍‌ ମିଇ ସାରେ ନାରୁଡ଼୍‌ କାୟିଲ୍‌ତାଗ ମାଡ଼୍‌ତାନ୍‌; ଆଗେତ୍‌ ବେନ୍‌ ସାରେ ନାରୁଡ଼୍‌କନ୍‌ ମିଇ ମିନ୍ଦେନି, ଅଡ଼୍‌ ସଦାପ୍ରବୁନ୍‌ ଆ ପାଡ଼ିୟ୍‌ ଉଡ଼୍‌ତଡ଼୍‌, ବାତେଙ୍କ୍‌ଇତ୍କେ ମିଡ଼୍‌ ବାତେ ମାଡ଼୍‌ନାଦ୍‌, ଆଦ୍‌ ବୟଙ୍କର୍‌ ଆଦ୍‌ତେ। 11 ନେଣ୍ଡ୍‌ ମାମ୍‌ ମିକିଙ୍କ୍ ବେନ୍‌ ଆଦେଶ୍‌ ମାଡ଼ିତମ୍‌, ଆଗେ ମାନ୍‌ଇମୁଟ୍‌; ଉଡ଼୍‌, ମା ଇମୋରିୟ, କିଣାନୀୟ, ହିତ୍ତୀୟ, ପରିଷୀୟ, ହିବ୍ଦୀୟ ନୁ ଯିବୂଷୀୟ ନାରୁଡ଼୍‌କିଙ୍କ୍‌ ମିଇ ମୁନେ ତଲିଦ୍‌ତମ୍‌। 12 ମିଡ଼୍‌ ନିଜର ବିଷୟତେ ସାବଦାନ୍‌ ଆୟ୍‌ମୁଟ୍‌, ବେନ୍‌ ଦେଶ୍‌ତାଗ୍‌ ଆଦ୍‌ଦୁତିଡ଼୍‌, ଆ ଦେଶତେ ନିବାସିଡ଼୍‌ ତଡ଼୍‌ ନିୟମ୍‌ ମାଡ଼୍‌ ମାଡ଼୍‌ମାଟ୍‌; ମାଡ଼୍‌କେ ଆଦ୍‌ ମିଇ ମାଇଦିଙ୍କ୍‌ ଅଣ୍ଡୟ୍‌ ଉଡ଼ିୟି ଲେକାମ୍‌ ଆଦ୍‌ତେ। 13 ମାତର୍‌ ମିଡ଼୍‌ ଅଡ଼୍‌ ବେଦି ସାରେ ଉଃତିତିଡ଼୍‌ ନୁ ଅଡ଼୍ ଗୁଞ୍ଜେ ସାରେ ଉଃତିଡ଼୍‌ ନୁ ଆଶେରାତେ ମୁର୍ତ୍ତି ନାଡ଼୍‌କିତିଡ଼୍‌।

14 ବେଲା କି ମିଡ଼୍‌ ୱେର୍‌ ଦେୟାକିଙ୍କ୍‌ ମଡ଼୍‌କ୍‌ମାଟ୍‌, ବାତେଙ୍କ୍‌ଇତ୍କେ ସଦାପ୍ରବୁନ୍‌ ପେଦେର୍‌ ନାର୍ଗେ ଗୌରବ୍‌ତେ ରକ୍ଷାମାଡ଼ାନଣ୍ଡ୍‌, ଅଣ୍ଡ୍‌ ନିଜର ରକ୍ଷାମାଡ଼ାନ୍‌ ଉଦ୍‌ଯୋଗି ପରମେଶ୍ୱର୍‌ । 15 ଉମ୍ୱକି ବେଲାକି ମିଡ଼୍‌ ଆ ଦେଶତାଗ୍‌ ମାନ୍ଦାନ୍‌ ନାରୁଡ଼୍‌ତଡ଼୍‌ ନିୟମ୍‌ ମାଡ଼୍‌ତିଡ଼୍‌; ମାଡ଼୍‌କେ ବେନ୍‌ ସମୟତେ ଅଡ଼୍‌ ନିଜର ଦେୟାତେ ପାକେ ଆସ୍‌ ବ୍ୟବିଚାର୍‌ ମାଡ଼ିତଡ଼୍‌ ନୁ ନିଜର ଦେୟାତ୍‌ଗାରେ ପୁଜେ ମାଡ଼୍‌ତଡ଼୍‌, ଆ ସମୟ୍‌ତେ ବେନ୍‌ ମିକିଙ୍କ୍ କାର୍‌ଙ୍ଗ୍‌କେ, ମିଡ଼୍‌ ତାନ୍‌ ବଲିଦାନ୍‌ ସାମାନ୍‌ ତିନ୍‌ତିଡ଼୍‌; 16 କି ମିଡ଼୍‌ ନିଜର ମାର୍କିଡ଼୍‌ ମାଇଦିଙ୍କ୍‌ ଅଡ଼୍‌ମାୟାସ୍କିଙ୍କ୍‌ ତାଡ଼୍‌ମାଟ୍‌, ଅଡ଼୍‌ମାୟାସ୍କ୍‌ ନିଜର ଦେୟାକିନ୍‌ ପୂଜା ମାଡ଼ାନାୱୁ ଆସ୍‌ ମିଇ ମାର୍କିଡ଼୍‌କ୍‌ ନିଜର ଦେୟାକିନ୍‌ ଅନୁଗାମି ମାଡ଼ି ବ୍ୟବିଚାର୍‌ ମାଡ଼୍‌ନା ମାଡ଼ିତଡ଼୍‌।

17 ମିଡ଼୍‌ ନିଜର ମାଇଦିଙ୍କ୍‌ ନିଜର୍‌ ମକମ୍‌ତେ ବେନ୍‌ ଦେୟାମ୍‌ ମାଡ଼୍‌ମାଟ୍‌। 18 ମିଡ଼୍ ତାଡ଼ି କାଇଲ୍‌ତେ ରୋଟି ପାଣ୍ଡୁମ୍‌ ମାଡ଼୍‌ତିଡ଼୍‌, ମେଣ୍ଡେ ଅଡ଼୍‌ ପ୍ରତମ୍‌ ନେଲ୍‌ଞ୍ଜ୍‌ ବେନ୍‌ ସମୟତେ ବେଲାନେ ମାଡ଼୍‌ନଙ୍କ୍‌ ମିକିଙ୍କ୍‌ ଆଦେଶ୍‌ ଇସ୍‌ମିନ୍ଦେମ୍‌, ଆଲେନେ ମିଡ଼୍‌ ସାତ୍‌ ଦିନ୍‌ ତାଡ଼ି କାଇଲ୍‌ତେ ରୋଟି ତିନ୍‌ତିଡ଼୍‌; ବାତେଙ୍କ୍‌ଇତ୍କେ ଆ ଆବିବ୍‌ ନେଲ୍‌ଞ୍ଜ୍‌ତେ ମିଡ଼୍‌ ମିସର୍ ଦେଶକନ୍‌ ପେୟିସ୍‌ୱାସ୍‌ ମାତ୍‌ତିଡ଼୍‌।

19 ମେଣ୍ଡେ ସାରେ ପ୍ରତମ୍‌ ଜାତ୍‌ ଆସ୍‌ତେ କାୟେ ନୁ ଗଡ୍‍ପିଲେତ୍‌ ମାନ୍ଦେତାଗାଙ୍କ୍‌ ପ୍ରତମ୍‌ ଜାତ୍‌ ମାନେୟ୍‌ ସାରେ ମାୟାୱୁ। 20 ମାତର୍‌ ପ୍ରତମ୍‌ ଜନ୍ମ ଗଦ ବାଦୁଲ୍‌ତେ ମିଡ଼୍‌ ମେଣ୍ଢା ପିଲାଇସ୍‌ ଆଦିଙ୍କ୍‌ ମୁକ୍ତି ମାଡ଼୍‌ତିଡ଼୍‌; ବେସୁଙ୍କ୍‌ ମୁକ୍ତ ମାଡ଼୍‌ୱିଡ଼୍‌, ଆସୁଙ୍କ୍‌ ଆଦିନ୍‌ ଗୁଡ଼୍‌ଙ୍ଗ୍‌ ଉତ୍‌ତିଡ଼୍‌ ମିୟାଦ୍‌ ପ୍ରତମ୍‌ ଜନ୍ମ ମାର୍‌କ୍‌ ସାରେତଡ଼୍‌ ମିଡ଼୍‌ ମୁକ୍ତ ମାଡ଼ିତିଡ଼୍‌। ମେଣ୍ଡେ ବେନ୍‌ ଆସାମ୍‌ କାଇଦେ ମାଆ ମୁନେ ନିତ୍‌ପାର୍‌ୱଣ୍ଡ୍‌।

21 ମିଡ଼୍‌ ଆରୁଦିନା ପାଡ଼୍‌ୟି ମାଡ଼୍‌ତିଡ଼୍‌, ମାତ୍ର ସାତ୍‌ ଦିନ୍‌ତେ ରମିତିଡ଼୍‌; କୃଷି ନୁ ଶସ୍ୟକୟଦାନ୍‌ ସମୟତେ ବା ରମିତିଡ଼୍‌। 22 ମିଡ଼୍‌ ଆଟିନ୍‌ ପାଣ୍ଡୁମ୍‌,ଇତ୍କେ, କୟ୍‌ତେ ଗହମ୍‌ତେ ପ୍ରତମ୍‌ କାୟେତ୍‌ତେ ପାଣ୍ଡୁମ୍‌ ନୁ ଏଣ୍ଡ୍‌ ତେର୍‌ତେ ବାଗ୍‌ କାୟା ଗୁଡ଼୍‌ପି ପାଣ୍ଡୁମ୍‌ ମାଡ଼ିତିଡ଼୍‌।

23 ମିୟାଗାଙ୍କ୍ ସାରେ ମାନେୟ୍‌ ଏଣ୍ଡେତେ ମୁଣ୍ଡୁଦାମ୍‌ ଇସ୍ରାଏଲତେ ସଦାପ୍ରବୁ ପରମେଶ୍ୱରଦେ ମୁନେ ନିତ୍‌ତିତଡ଼୍‌। 24 ବାତେଙ୍କ୍‌ଇତ୍କେ ମାମ୍‌ ମିଇ ମୁନେ ୱେର୍‌ ଦେଶତେ ନାରୁଡ଼୍‌କିଙ୍କ୍‌ ଜେକେ ମାଡ଼୍‌ତମ୍‌ ନୁ ମିଇ ସିମା ଜାର୍‌ପ୍‌ତମ୍‌, ମେଣ୍ଡେ ମିଡ଼୍‌ ଏଣ୍ଡେକ୍‌ତେ ମୁଣ୍ଡୁଦାମ୍‌ ସଦାପ୍ରବୁ ପରମେଶ୍ୱରଦେ ମୁନେ ନିତ୍‌ତାନ୍‌ ମାଇଦିଙ୍କ୍‌ ଆତ୍କେ, ମିଇ ବୁମ୍‌ଦେ ପର ବେନ୍‌ ଆଶେ ମାଡ଼ଣ୍ଡ୍‌। 25 ମିଡ଼୍‌ ମା ପୁଜ୍‌ତେ ନେତୁରୁ ସାମାନ୍‌ ତଡ଼୍‌ ବଲିଦାନ୍‌ ମାଡ଼୍‌ମାଟ୍‌ ନୁ ନିସ୍ତାର୍‌ ପାଣ୍ଡୁମ୍‌ତେ ପାଣ୍ଡୁମ୍‌ ବଲିସାମାନ୍‌ ନାର୍କୁକ୍‌ଆୟିନା ନେମାଟ୍‌ ।

26 ମିଡ଼୍‌ ନିଜର ବୁମ୍‌ଦେ ପ୍ରତମ୍‌ କାୟାତେ ନିଜର ସଦାପ୍ରବୁ ପରମେଶ୍ୱରଦେ ଲତ୍‌ତାଗ ତାତିତିଡ଼୍‌। ମେଣ୍ଡେ ମିଡ଼୍‌ ମେଣ୍ଢ୍‌ପିଲାନ୍‌ ବାରଟାନ୍‌ ୟାୟନ୍‌ ପାଲ୍‌ଦେ ଉସ୍‌ପ୍‌ମାଟ୍‌। 27 ମେଣ୍ଡେ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ, ମିଡ଼୍‌ ଇସାରେ ବାକ୍ୟ ଲେକାଟ୍‌, ବାତେଙ୍କଇତ୍କେ ମାମ୍‌ ଇ ବାକ୍ୟ ଲେକାମ୍‌ ମି ତଡ଼୍‌ ନୁ ଇସ୍ରାଏଲ୍‌ ତଡ଼୍‌ ନିୟମ୍‌ ମାଡ଼୍‌ତମ୍‌। 28 ଆ ସମୟତେ ମୋଶାଲ୍‌ ସଦାପ୍ରବୁନ୍‌ ତଡ଼୍‌ ଆ ପଡ଼୍‌ୟିତାଗ୍‌ ଚାଲିଶ୍‌ଦିନ୍‌ ନାର୍କାପାୟାଲ୍‌ ମାତ୍‌ତେନଣ୍ଡ୍‌ ଅଣ୍ଡ୍‌ ଦଡ଼୍‌ ତିନଣ୍ଡ୍‌ କି ଏର୍‌ ଉନ୍‌ନଣ୍ଡ୍‌। ଅଣ୍ଡ୍‌ ଆ ରେଣ୍ଡ୍‌ କାଲ୍‌କିନାଗ୍‌ ନିୟମ୍‌ ବାକ୍ୟ, ଇତ୍କେ, ଦଶ ଆଦେଶ୍‌ ଲେକ୍‌ତଣ୍ଡ୍‌।

29 ଲପେକନ୍‌ ମୋଶାଲ୍‌ ସିନୟ ମେଟେ କନ୍‌ ଡ଼ିଗାନ୍‌ ସମୟତେ ସାକ୍ଷ୍ୟ ଇନା ରେଣ୍ଡେ ଦୁଡ଼୍‌ କାଲ୍‌କ୍‌ କାଇଦେ ପହିସ୍‌ ମେଟେକନ୍‌ ଡ଼ିଗିତଣ୍ଡ୍‌, ମାତର୍‌ ସଦାପ୍ରବୁନ୍‌ ତଡ଼୍‌ ତିର୍ୟାନ୍‌ ମାଡ଼୍‌ତେ ମାଇଦିଙ୍କ୍‌ ନିଜର ମକମ୍‌ ୱେସ୍‌ ଆସ୍‌ମାତ୍‌ତେ, ଆଦ୍‌ ମୋଶାଲ୍‌ ପୁନୱେ ମାତ୍‌ତଣ୍ଡ୍‌। 30 ମେଣ୍ଡେ ବେସୱେଲେ ହାରୋଣ ନୁ ଇସ୍ରାଏଲତେ ମାର୍କିଡ଼୍‌କିଙ୍କ୍‌ ମୋଶାଙ୍କ୍‌ ଉଡ଼୍‌ତଡ଼୍‌, ଆସୱେଲେ ଅନ୍‌ ମକମ୍‌ତେ ତଲ୍‌କେ ୱେସ୍‌ ମାତ୍‌ତେ; ଆଦିଙ୍କ୍‌ ଅଡ଼୍‌ ଅନ୍‌ ଗାରେ ଆଦାନ୍‌ ମାଇଦିଙ୍କ୍‌ ୱେର୍‌ତଡ଼୍‌। 31 ମାତର୍‌ ମୋଶାଲ୍‌ ଅଡ଼୍‌କିଙ୍କ୍‌ କାର୍‌ଙ୍ଗୱାନାକେ, ହାରୋଣ ନୁ ମଣ୍ଡଲିତେ ବାଡ଼ିୟଡ଼୍‌ ଅନ୍‌ ଗାରେକନ୍‌ ମାଲ୍‌ ଆତ୍‌ତଡ଼୍‌; ଆସୁଟ୍‌ ମୋଶାଲ୍‌ ଅଡ଼୍‌ତଡ଼୍‌ ତିର୍‌ତଣ୍ଡ୍‌। 32 ଆଗାକନ୍‌ ଇସ୍ରାଏଲତେ ମାର୍କିଡ଼୍‌ ଅନ୍‌ ଗାରେ ଆତ୍‌ତଣ୍ଡ୍‌; ଆସୁଟ୍‌ ସଦାପ୍ରବୁ ସିନୟ ମେଟେକନ୍‌ ଅଡ଼୍‌କ ବେନ ବେନ୍‌ ଗଟି କେସ୍‌ମାତ୍‌ତଣ୍ଡ୍‌, ଆୱୁସାରେ ଅଣ୍ଡ୍‌ ଆଦେଶ୍‌ ଇନା ଅଡ଼କ୍‌ ପୁଞ୍ଜ୍‌ପିମାତ୍‌ତଣ୍ଡ୍‌। 33 ମେଣ୍ଡେ, ମୋଶାଲ୍‌ ଅଡ଼୍‌ତଡ଼୍‌ କେତାକେତି ମାଡ଼୍‌ତେ ପେର୍‌କେ ନିଜର ମକମ୍‌ତିଙ୍କ୍‌ କକାଡ଼୍‌ ମୁସ୍‍ତଣ୍ଡ୍‌। 34 ମାତର୍‌ ମୋଶାଲ୍‌ ସଦାପ୍ରବୁନ୍‌ ତଡ଼୍‌ ଗଟି ତିରିଆୟାନ୍‌ ମାଇଦିଙ୍କ୍‌ ଲପେ ଅନ୍‌ ମୁନେ ଆଞ୍ଜ୍‌ ବାୟିଦେ ୱାଡ଼୍‌ୱେ ଜାକ ଆ କକାଡ଼୍‌ ଟେଣ୍ଡି ନେଃତ୍‌ତଡ଼୍‌; ମେଣ୍ଡେ ବେନ୍‌ ଆଦେଶ୍‌ ଦର୍‌କ୍‌ତେ, ବାଇଦେୱାସ୍‌ ଇସ୍ରାଏଲତେ ମାର୍କିଡ଼୍‌କିଙ୍କ୍‌ ଆଦ୍‌କେତ୍‌ତଡ଼୍‌। 35 ଆସୁଟ୍‌ ମୋଶାନ୍‌ ମକମ୍‌ ୱେସ୍‌, ଇଦି ଇସ୍ରାଏଲତେ ମାର୍କ ଅନ୍‌ ପର ମାଡ଼୍‌କି ଉଡ଼୍‌ତଡ଼୍‌; ମୋଶାଲ୍‌ ସଦାପ୍ରବୁନ୍‌ ତଡ଼୍‌ ଗଟି କେତାନଙ୍କ୍‌ ବେସୁଙ୍କ୍‌ଆଇନା ଲପେଆନଣ୍ଡ୍‌; ଆସୁଟ୍‌ଆଇନା ନିଜର ମକମ୍‌ତାଗ୍‌ କକାଡ଼୍‌ ମୁସ୍‌ତଣ୍ଡ୍‌।