João 13

Yesu kowasunha Waluko wake magulu

1 Baho viivikile behi na lusona lwa Pasaka. Yesu kakala yomanya chipindi chake chivika wa kusegela muiisi ino na kuita kwa Tati yake. Nayo kakala na wende mazua gose na wanhu wake weli muiisi, enaa kaweng’ha wende mazua gose mbaka kulava ugima ugima wake. 2 Baho Yesu na waluko wake viwakalile woja ndiya ya chigulogulo, nayo chinyamkela kakala kakomeleza kumgela Yuda Isikaliote mwanage Simoni moyo wihile, ili yadahe kumhinduka Yesu. 3 Kuno Yesu kovimanya kua Tati yake kamwing’ha vose mmakono gage, na ivija kakala yalawile kwa Mulungu na kobwela kwa Mulungu. 4 Baho kasegela kulawa muindia, kavula chivalo chake cha kunze, kasola chivalo chimwenga kaizinga mchigudi. 5 Amala kagida mazi mdibakuli, kasonga kuwasunha migulu Waluko wake na kuihangusa ija migulu kwa chija chitambala chiyavalile. 6 Viyamvikile kwa Simoni Petulo, nayo Petulo kalonga, "Mndewa, ivo! gweye konisunha niye migulu?" 7 Yesu kamwidika, "Gweye huchimanya sambi chinisang’hana, mbali kokimanya hamwande." 8 Petulo kamlongela, "Gweye hunisunha niye magulu mbe!" Yesu kamwidika, "Kama sikusunhile hudaha kuilumba na niye kaidi."

9 Simoni Petulo kalonga, "Mndewa nisunhe, sio magulu tu, mbali na makono na ditwi jangu ivija!"

10 Yesu kamlongela, "Munhu yamalile koga, halondeka kaidi mbali kuisunha magulu iiyeka, manake kamala kunang’hana lukuli lose. Mweye mnang’hana, mbali siwose."

11 Yesu kakala kammanya munhu ija yonda yamuhinduke, iyo mana kalonga, "Mweye mnang’hana mbali siwose."

12 Yesu viyakomeleze kuwasunha magulu na kuvala kaidi valo jake, kabwela haja hayakalile muindiya kawalongela, "Ivo, mgamanya ganiwasang’hanile? 13 Mweye monikema niye Mfundaji na Mndewa, molonga goya kwa vija niye iyo. 14 Ihawa niye iyo Mfundaji na Mndewa wenu niwasunha magulu, na mweye wenyego kwa mwenyego molondeka kuisunha magulu. 15 Kwa vija niye niweng’heni mfano uno, na mweye ivija muisang’hanile kama viniwasang’hanile. 16 Nowalongela, mtumigwa si mkulu kubita Mkulu wake, hebu mtumigwa si mkulu kubita ija yamtumile. 17 Basi yahawa mogamanya gago, mmweda mhagasang’hanila.