João 9

Yesu komuhonya munhu yaleligwe chipofu

1 Zua dimwe Yesu viyakalile kobita kamona munhu imwe yakalile chipofu kulawa viyaleligwe.

2 Waluko wake wamuuza, "Mfundaji, yelihi yeli na malozo, munhu ino hebu Tati na mami yake mbaka yaleligwe chipofu?"

3 Yesu kedika, mbuli ino hailawile kwa malozo gake ino hebu malozo ga tata na mami yake, mbali kaleligwa chipofu ili udaho wa Mulungu uwoneke muugima wake. 4 Cholondeka kusang’hana sang’hano za ija yachitumile ing’hali imisi, kwa vija chilo yokwiza habule munhu yoyose yoodaha kusang’hana sang’hano.

5 Nihawa muuisi ino niye iyo bung’hulo da isi."

6 Viyakomeleze kugalonga gago, katema mate gake hasi, kasang’hana nhope kwa gaja mate gake, amala kasola nhope kamhaka mzing’hope za ija munhu chipofu,

7 amala Yesu kamlongela munhu ija, "Genda kasunhe chihanga chako mdilamba da Siloamu." Zina Siloamu manake yatumigwe. Na ija munhu chipofu, kaita kusunha chihanga chake amala kabwela yolola.

8 Baho wanhu waja wokala behi na ukae yake na wanhu wamwenga wamwonile umwaka yopula, wasonga kuiuza wenyego, ivo, ino sio ija chikumbi muyega yakalile kopula wanhu mnzila? 9 Wamwenga walonga, "Iyo yeye." Wamwenga walonga, "Bule sio ino! mbali waigala." Nayo ija yaakalile chipofu kalonga, "Iyo niye!"

10 Baho wamuuza, "Ilawilaze mbaka sambi kolola?"

11 Nayo kedika, "Munhu imwe yokemigwa Yesu kavunyanga nhope, kanibaka mchihanga amala kanongela, ‘Genda Siloamu kasunhe chihanga chako.’ Baho, niye niita nisunha chihanga na vino sambi nolola."

12 Wamuuza, "Kakulihi munhu iyo?" Munhu ija kalonga, "Mmane!"