Mateus 14

Yesu koweng’ha ndia wanhu wobita elufu tano

13 Yesu viyapatia mbuli iyo, kasegela hanhu haja kwa ngalawa, kaita hanhu halibule wahu ili yawe yaiyeka. Mbali wanhu viwapatile kuimanya mbuli iyo, wamuwinza kwa magulu kulawa mzikae. 14 Yesu viyatelemke kulawa muingalawa na kuona bumbila kulu da wanhu, moyo wake uwaonela bazi, na kawahonya watamu wao. 15 Viiviklie chigulogulo, waluko wake wamuwinza wamlongela, "Hanhu hano hamchiwala na zua diswa. Baho walage wanhu waite mvijiji waigulile ndia." 16 Yesu kawalongela, "Sio mbaka waite, weng’heni mweye ndia." 17 Mbali waluko wake wamlongela, "China migate mitano tu na somba waidi." 18 Yesu kawalongela, "Ngalileni hano." 19 Kawalagiza wanhu wakale hasi mmayani. Amala Yesu kaisola ijaa migate mitano na waja somba waidi, kalola uchanha kuulanga, kavipulila ganogile ga Mulungu. Amala kamega ija migate, kaweng’ha waluko wake, nao waweng’ha wanhu. 20 Wanhu wose waja weguta. Amala waluko wakunzanya visigale na wamemenza vigelo kumi na vidi. 21 Waja wadile walume wovikila elufu tano bila kupeta wanachike na wana wadodo.