MATAYO 22

Masadukayo womuuza Yesu mbuli ya kuzilibuka

23 Mdizua ijo, Masadukayo wamwenga waja hawatogola kuzilibuka kwa wafile wamuinza Yesu. 24 Ivo, wamlongela, "Mfundaji, Musa kalonga munhu yasolile mwehe yahafa bila kuleka wana, kolondeka magati yamhazi mwehe iyo mgane, ili yamlelele wana mkulu wake. 25 Ivo, hano hamwetu hakala na ndugu saba waleligwe na tata imwe. Yalongole kasola amala kadanganika bila kulela wana, mdodowake kamhazi iyo mgane. 26 Mbuli iyo imlawila iyo ndugu wa kaidi na wakadatu mbaka wose saba. 27 Viwamalile ndugu wose kudanganika, na mgane ija kadanganika ivija. 28 Ivo, mdizua dakuzilibuka wafile mgane iyo kokua mwehe wa yelihi mwa waja ndugu saba? Manake wose saba wakala wamsola." 29 Yesu kewedika waja Masadukayo, "Mweye mokwaga kwavija hammanyile Mayandiko ga Mulungu hebu udaho wa Mulungu." 30 Manake wafile wahazilibuka habule kusola hebu kusoligwa, wokua kama watumigwa wa kuulanga kwa Mulungu. 31 Mbali kwa mbuli ya kuzilibuka kwa wafile, ivo hamsomile gaja gayawalongele Mulungu? Kawalonge, 32 ‘Nie Mulungu wa Ibulahimu na Mulungu wa Isaka na Mulungu wa Yakobo.’ Ivo, Mulungu sio Mulungu wa wanhu wafile mbali ni Mulungu wa wanhu wagima." 33 Bumbila da wanhu viwahulike ivo, wakanganya kwa vija viyofunda.