Mateus 26

Chigwena cha kumkoma Yesu

1 Yesu viyakomeleze kulonga gago gose, kawalongela waluko wake, 2 "Mvimanya kua mazua maidi hamwande hokua na lusona lwa Pasaka, na Mwana Munhu kolavingwa ili yawambingwe mumsalaba."

3 Chipindi icho wakulu wa walava nhambiko na vilongozi wa Wayahudi waiting’hanila hamwe haluhelengo lwa Kayafa, mkulu wa walava nhambiko, 4 wamwikila chigwena cha kumwamha Yesu kwa ubala ili wamkome. 5 Mbali walamula mbuli iyo seke itendeke mchipindi cha lusona lwa Pasaka, "Seke ilawilile ndwagi mwa wanhu."

Yesu kogidiligwa mavuta uko Betania

6 Yesu viyakalile Betania, muing’anda ya Simoni, yeli na dikulu, 7 mwanachike imwe yakalile na nhyupa ilumbigwe kwa dibwe da bei ng’hulu da alabasta ili na vinhung’ila va bei ng’hulu, kamuwinza Yesu haja hayakalile yoja ndia, kamgidila kinhung’ila icho mditwi. 8 Waluko wake viwaonile gago wagevuzika, walonga,"Ubananzi uno wachoni? 9 "Mavuta gano gaguligwe kwa bei ng’hulu na sente izo waheng’higwe vikumbi muyega."

10 Yesu kawamanya viwotonga kawalongela, "Habali momgaza mwanachike ino? Ino kanisang’hanila mbuli inogile. 11 Vikumbi myega mnao mazua gose, mbali nie sikala na mweye mazua gose. 12 Mwanachike ino kanigidila kinung’ila chino kwakunitanda kwambuli ya kuwandigwa kwangu. 13 Nowalongela kweli, hanu hohose mziisi haja Usenga wangu uhaliguligwa, mbuli zino ziyatendile mwanachike ino zolongigwa kwa ng’humbukizi yake."

Yuda kotogola kumhinduka Yesu

14 Amala Yuda isikaliyote, imwe mwawaja waluko kumi nawaidi, kaita kwa wakulu wa walava nhambiko, 15 kawalongela, "Moning’ha choni nihamgala Yesu kumwenu?" Wampetela vihande salasini va madini ya feza, 16 kulawila baho Yuda kakala yolonda nzila vija vonda yamgale Yesu kumwao.

Yesu koja ndia ya Pasaka na waluko wake

17 Mdizua da mosi ya lusona wa migate haigeligwe mela, waluko wake wamuwinza Yesu wamuuza, "Kolonda chikutandile halihi ndia ya lusona lwa Pasaka? 18 Yesu kawedikila, "Gendeni muikae kwa mulume imwe, mkamlongele, ‘Mfundaji kolonga, saa yangu ivika, kumwako noja ndia ya Pasaka hamwe na waluko wangu.’" 19 Waluko wasang’hana kama Yesu viyawalagize waitanda ndia ya lusona lwa Pasaka. 20 Viivikile chigulogulo, Yesu kakala hamwe na waja waluko wake kumi na waidi wakala ili waje ndia. 21 Na viwakalile woja Yesu kalonga, "Kweli nowalongela, mienu imwe konihinduka." 22 Waluko wake wapata usungu mmoyo, waiuza wenyego kwa wenyego, "Mndewa! Ivo, iyo nie?" 23 Yesu kawedika, "Yozang’ika gate hamwe nanie mdibakuli iyo yonda yanihinduke. 24 Enaa, Mwana Munhu kokwiza kudanganika kama Mayandiko ga Mulungu vigalonga, mbali koluona munhu ija yonda yamuhinduke Mwana Munhu! Ihawile goya ng’hani munhu iyo maza sekeyaleligwe." 25 Yuda, ija yamhinduke Yesu kamuuza, "Mfundaji! Ivo, iyo nie?" Yesu kamwidika, "Kulonga gweye."

Ndia ya Mndewa

26 Viwakalile woja, Yesu kalava mgate, kamwing’ha hewela Mulungu, kaubanzula kaweng’ha waluko wake yolonga, "Soleni mje uno uo lukuli lwangu."

27 Amala kasola chikombe cha divai, kamwing’ha hewela Mulungu, kaweng’ha yolonga, "Soleni mose mng’we divai ino, 28 manake ino iyo damu yangu ilagusa lagano dino da kweli, damu itike kwa mbuli ya wanhu wengi ili kuwalekesela malozo.