1 Ghamalango gha ukwingilila Yeriko tsaghahindighwa ghendo, ili Waisiraeli waleke ukwingila. Haduhu munu yadahile kwingila mghati wala kulawa kunze. 2 Kuya IMNDEWA kamlongela Yoshua, "Ulole nikwing’a ghumji ghwa Yeriko mmoko mwako, hamwe na imfalume wake na iwaasikali wake iwana libapfu lya ukwitowa. 3 Mwemwe na iwanu wose wa ing’ondo mghutsunguluke ghumji aghuno mala lumwe chila tsuwa, na mtende apfino kwa matsuwa sita. 4 Na watambika saba chila yumwe yakinde malati ya membe ya ng’olo mmale, walilongolele lisanduku lya lilaghano. Mna litsuwa lya saba mghutsunguluke ghumji aghwo ghwa Yeriko mala saba, aku iwatambika wotowa tsimalati tsawo. 5 Hawotsotowa tsimalati tsawo kwa litsi likulu, na iwanu wose hawotsohulika wakemelele, kuya imibanda ya ghumji itsakughwa. Aho iwanu watsoghughendela ghumji aghwo, chila munu kulawa hanu hake hayemile."

6 Apfo Yoshua mwana wa Nuni kawakema iwatambika kawalongela, "Liduteni lisanduku lya lilaghano lya IMNDEWA Imulungu, na watambika saba walilongolele aku wakinda malati saba tsa membe tsa ng’olo wamale." 7 Na kawalaghitsa iwanu apfino, "Lelo mghende, mghutsunguluke ghumji, na iwanu wana tsisilaha walilongolele lisanduku lya IMNDEWA."