Matej 22

O Isus vakerela bašo uštibe taro mule

23 Ko adava dive nesave sadukeja so vakerena sine deka nane uštibe taro mule ale ko Isus hem pučle le: 24 "Učitele, o Mojsej phengja: ‘Ako nesavo ženimo manuš mulo, a na mukhla čhave pala peste, leskoro phral trebela te lel leskere romna te šaj oj te bijanel čhave so ka ovel nasledniko e muleskoro.’

25 Agjar sine efta phrajla maškar amende. O prvo lela romni hem mulo, ama adaleske so na mukhla čhave pala peste, pe romna mukhla la pe dujtone phraleske. 26 Agjar mulo o dujto hem o trito phral, hem agjar sa dži ko eftato phral. 27 Ki krajka muli hem i romni. 28 Togaš kaskiri romni ka ovel oj, koga ka uštel pe taro mule, a sa o phrajla ikerge la?"

29 O Isus odgovoringja lenge: "Hovavge tumen, soske na džanena o Sveto Lil hem i sila e Devleskiri. 30 Koga ka ušten taro mule, o manuša nane te len pe, nego ka oven sar angejla ko nebo. 31 Ama bašo uštiba taro mule, na čitingjen li ko Sveto Lil so o Devel phengja tumenge: 32 ‘Me sijum o Devel e Avraameskoro, e Isakoskoro hem e Jakoveskoro’ so mule angleder? Adaleske ov nane Devel e mulengoro, nego e dživdengoro."

33 Koga o manuša šunge adava, but čudisalile taro leskoro učibe.