Matthew 4

Jisu de kedeikecu

1 Pecai Jisu de herakesiabe de peu kedei kerane Kemci Rabe ne hetaideu gage ngngwa gaidi. 2 Pa tingba zie riakdai nah tingmuizie riakdai mmwang kelucai, pa mzeudi.✝4:2 Tet. 34:28 3 Ge kedei kecube gwang eh pe dage rangdi, "Magade Nang Tinggwang Na liecai, tangtsu aidungde de tangku mmi lulo beulo." 4 Dede Jisu pecu keligai eh rangdi, "Kesanglaisiu ga ainzwa rauteula, ‘Mina tangku rünne tyei eh lungh gailak, dede Tinggwang mui gade kepet sam leune gade zie.’"✝4:4 Hez. 8:3 5 Pecai herakesiabe pecu kemci namdi ga ngngwa gwanglu delwe pecu peu kerecaki hutube ga bamlu,✝4:5 Luk. 4:9 6 nah pe dage rangdi, "Magade nang Tinggwang Na liecai, nkatei ncu kelien gailo, kedanemene ainzwa raupwala,

‘Pa n ma pielu kerane pe gwame de aja kai beuzie,’✝4:6 Lei. 91:11-12

nah, ‘Penui penui ba gage ncu teucuh luzie,

ciu eh nang n pi tangtsu ge reu gage de rejam melu kerane.’"✝4:6 Lei. 91:11,12

7 Jisu pe dage rangdi, "Iciu de ainzwa rau pwala, ‘Nang Rampaube n Tinggwang de kedei so.’"✝4:7 Hez. 6:16 8 Pecaide, herakesiabe pecu kideutu husüt kecu ga ngngwa nghang nah pecu kideube hegwangram leune, penui kendu leune de si eh keulia. 9 Herakesiabe Jisu dage rangdi, "Ma aidung leune Ih ncu pwa peuzie, nang keumie eh acu recalu cai." 10 Ge Jisu pe dage rangdi, "Aika de tet dilu, Satan! Kedanemene ainzwa rau pwala,

‘Nang Rampaube n Tinggwang de reca zie, nah nang pe gwa rünne teizie.’"✝4:10 Hez. 6:13

11 Ge herakesiabe pecu pütdi, nah ainie, tinggimgwamedung gwang eh pe gwatei di.