Êxodo 7

1 ताहां यहोवा प्रभु मोशेहे कोयो, "उनाआ, आंय ताहूं फारोअ काजे प्रभुउ होस ठरवोहो; आन ताआ पाही आरोन ताआ भविश्यवक्ता ठरे. 2 जो जो आदेश आंय ताहूं आपिहीं तोज तू कोजी, आन आरोन तिया फारोहो कोये, ताहां तो इस्राएलोहो तियाआ देसोम रोत निहींत जाअहूं देय. 3 पोन आंय फारोअ मोनोहो कठीण कोइ देहीं, आन माआ वारुज समत्कार मिसर देसोमेहें देखाड़ीहीं.✝7:3 प्रेशित 7:36 4 तेबी फारो तुमाआ ने उनाये; आन आंय मिसर देसो पोअ मिसरोहो आंय वोडु डोंड आपित कोइत माआ सेना मोन्ज्ये माआ इस्राएलोअ माअहुंहूं मिसर देसोम रोत काडीत लेहीं, 5 आन जेहेलाम आंय मिसरोपोअ आथ टाकीत इस्राएलोहो तियांआं विसमेहें रोत काडीत लेहीं, ताहां मिसरवाले जाईंत लेय, के आंय यहोवा होय." 6 ताहां मोशे आन आरोन यहोवाआ आदेशोअ नुसार कोअयो. 7 जेहेलाम ते फारोअरी गोठी कोआ वोल्या, ताहां मोशे हांयशी वोरहोअ, आन आरोन त्र्यांयशी वोरहोअ ओतू.

आरोनोअ डेंगार

8 ताहां यहोवा देवे मोशे आन आरोनोहो कोयो, 9 "जाहां फारो तुमुहूं कोये, ‘तुमाआ सेक्ती वाअहीं एखु समत्कार देखाड़ा,’ ताहां तू आरोनोहो कोजी, ‘ताआ डेंगार लेत कोइत फारोअ आगाड़ी टाकी दे के तो हाप बोणीत जाय.’" 10 ताहां मोशे आन आरोन फारोअ जागे जात कोइत देवोअ आदेशोअ परमाणे कोअयो; आन जेहेलाम आरोन तियाआ डेंगार फारो आन तियाआ आधिकारीइ आगाड़ी टाकी देदी, ताहां ते हाप बोणित गोयी. 11 ताहां फारो राजे माहाराजोहों आन बोड़वाहा हादाड़्या; आन मिसरोअ जादुगारोहों आवीत कोइत तियां तियांआं तंतर-मंतर कोअयो.✝7:11 2 तिम 3:8 12 तियें बी तियां तियांआं डेंगार टाकी देदी, आन ते बी हाप बोणीत गोयी; पोन आरोनोअ डेंगार तियांआं डेंगारीही गिंइत लेदो. 13 पोन फारोअ मोन फाशोअ कोठीण ओत गोयो, मोशेहे आन आरोनोहो गोठीही ने मान्यू. जेहेलोहो यहोवा देवे कोयोतो.

पेहली पिड़ा: रक्त

14 ताहां यहोवा प्रभु मोशेहे कोयो, "फारोअ मोन वातड़ो ओत गोयोहो आन तो तियां माअहोंहों जाअहूं नाहां देतु. 15 जेहेलाम फारो वेगीइ वेले, नोयीइहें आवे ताहां तु तियाआ जागे जाजी, तु नील नोयीइ मेरे तियाआ वाट जोवजी, जे डेंगार हाप बोणीत गोयीते, तियीही ताआ आथोम लेत लेजी. 16 आन तु तियाहा कोजी, ‘इब्री माअहोंअ देव यहोवा ताहूं एहें कोय तेहें मोकल्युहू के, तू माआं माअहोंहों रानोमेहें माआं भक्ती कोए तेहें जाअहूं दे. पोन ओमे जाआं तू नाहांजी उनाअयू. 17 यहोवा ओं कोहे, तियापोअ रोत तु जाईंत लेही के आंयज यहोवा होय; पाल, आंय माआ आथोमेऱ्यीइ डेंगारीही नील नोयीइ पाअयोंपोअ लागावीहीं, आन नोयीइ पाईं रगत बोणीत जाय,✝7:17 प्रेशित 16:4 18 आन जे मासे नील नोयीमेहें होय तें मोइत जाय, ताहरीइ खाड गुंदाइ वोले, आन खाडीइ पाईं मिसरवालाआं काजे पिअहूं जोगोहो ने रोय.’"

19 तिहीं रोत यहोवा देवे मोशेहे कोयो, "आरोनोहो को के, ताआ डेंगार लेत कोइत मिसर देसोअ आखी खाडीपोअ, खोबरीपोअ आन धरणोपोअ ताआ आथ तोइत उबू रो, ताहां तो आखो पाईं रगत बोणित जाय, आन आखा मिसर देसोअ पाईं पोइलोअ बासने मोन्ज्ये लाकड़ुउ कोड्बे आन डोणोअ देगे नेहें रक्ताल्लाज ओत जाय."

20 ताहां मोशे आन आरोने यहोवा देवे जेहें कोयो, तेहेंज कोइत कोअयो, मोन्ज्ये तियाआ डेंगार उसी कोइत फारो आन तियाआ सिपायड़ाआ देखताइज नील खाडीइ पाअयोंपोअ लागावयो, ताहां खाडीइ आखो पाईं रक्त बोणीत गोयो.✝7:20 भजन 78:44; 105:29 21 आन खाडीइ आखे मासे मोइत गोये; आन खाड सिसड़ाअलिही गुंदाइ वोल्यी, ताहां मिसरवाले माअहें खाडीइ पाईं पीत ने सेके; आन आखा मिसर देसोम रक्त ओत गोयो. 22 ताहां मिसरोअ जादूगारहों बी तियांआं जादू-मोंतरो वाअहीं तेहेलोज कोअयो; तेबी फारोअ मोन वातड़ो ओत गोयो, आन यहोवा देवोअ कोल्यी गोठी तो मोशेए ना आरोनोअ ने मान्यू. 23 फारो यापोअ बी दिहान ने देदो, आन मुउड़ात तियाआ कोअ जातू रोयू. 24 आन आखे मिसरवाले माअहें पीइलाअ पाअयोंअ काजे नील खाडीइ मेरे कुवा खुएं वोल्ये, काहाके तें खाडीइ पाईं ने पीत सेकतेते.

25 जेहेलाम यहोवा देवे नील नोयीही लागावयो तेदिहीं रोत हांत दिही ओत गोयाते.